မင်းအောင်လှိုင်က သူဦးဆောင်သော အစိုးရမှာ ပြည်သူက ရွေးချယ်ထားသော်လည်း နိုင်ငံတကာက စီးပွားရေးပိတ်ဆို့မှု၊ ကန့် သတ်မှုနှင့် ဖိအားပေးမှုများ လုပ်ဆောင်နေကြဆဲဟု အပြစ်တင်

ရန်ကုန်၊ မေ ၇

အကြမ်းဖက်စစ်ခေါင်းဆောင် မင်းအောင်လှိုင်က သူဦးဆောင်သော အစိုးရမှာ ပြည်သူက ရွေးချယ်ထားသော အစိုးရဖြစ်သော် လည်း နိုင်ငံတကာက စီးပွားရေးပိတ်ဆို့မှု၊ ကန့်သတ်မှုနှင့် ဖိအားပေးမှုများ လုပ်ဆောင်နေကြကြောင်း အပြစ်တင်ပြောဆိုသည်။

ယမန်နေ့ နေပြည်တော်တွင် ပြုလုပ်သော အစည်းအဝေးတွင် အကြမ်းဖက် စစ်ခေါင်းဆောင် မင်းအောင်လှိုင်က ထိုသို့ ပြောဆိုလာခြင်းဖြစ်သည်။

မင်းအောင်လှိုင်က ၎င်းတို့ အစိုးရသည် ပြည်သူက ရွေးချယ်ထားသော အစိုးရဖြစ်ကြောင်း ၊ သို့ရာတွင် အချို့သောနိုင်ငံများက ပြည်သူများကရွေးချယ်ထားသည့် ဒီမိုကရေစီနည်းလမ်းနှင့်အညီ တာဝန်ထမ်းဆောင်နေသည့်မိမိတို့အစိုးရအပေါ်၌ ကန့်သတ်မှုများ၊ စီးပွားရေး ပိတ်ဆို့မှုများကို ဖိအားပေး လုပ်ဆောင်နေကြဆဲဖြစ်ကြောင်း၊ ဒီမိုကရေစီနည်းလမ်းတကျ မိမိဆန္ဒဖြင့် လာရောက်မဲပေးကြသူများကို ဒီမိုကရေစီနိုင်ငံများမှ တန်ဖိုးထားရန်လိုကြောင်း အပြစ်တင် ပြောဆိုသည်။

မင်းအောင်လှိုင် သူ့အစိုးရမှာ လွတ်လပ်၍တရားမျှတသည့် ပါတီစုံဒီမိုကရေစီအထွေထွေရွေးကောက်ပွဲတွင် ပြည်သူလူထုမှ ၎င်းတို့၏စိတ်သဘောဆန္ဒများအလျောက် ဆန္ဒမဲပေးရွေးချယ်ပြီး ထွက်ပေါ်လာခဲ့သည့် ပြည်သူ့ကိုယ်စားလှယ်များမှ ရွေးကောက်တင်မြှောက်ထားသည့် ရွေးကောက်ခံအစိုးရအဖွဲ့ဖြစ်ကြောင်း ပြောဆိုသည်။

မင်းအောင်လှိုင်က ထိုသို့ ပြောဆိုချိန်မှာ အာဆီယံက စစ်ခေါင်းဆောင် မင်းအောင်လှိုင်နှင့်ဝန်ကြီးများကို ၄၈ ကြိမ်မြောက် အာဆီယံ ထိပ်သီးအစည်းအဝေးကို တက်ခွင့်မပေးဘဲ ပိတ်ပင်ထားချိန်လည်းဖြစ်သည်။

မေလ ၇ ရက်နေ့မှ မေလ ၉ ရက်နေ့ အထိ ကျင်းပပြုလုပ်သည့် အာဆီယံထိပ်သီးအစည်းအဝေးသို့ မင်းအောင် လှိုင်နှင့် ဝန်ကြီးများကို အာဆီယံဥက္ကဋ္ဌ ဖိလစ်ပိုင်နိုင်ငံက တက်ခွင့်မပေးဘဲ နိုင်ငံရေးကိုယ်စားမပြုသူကိုသာ ကိုယ်စားလှယ်အဖြစ် စေလွှတ်ခွင့်ပေးသည်။

အခြားတစ်ဖက်တွင်လည်း ၂၀၂၁ ခုနှစ်မှစတင်၍ စစ်အာဏာသိမ်းခဲ့သော အကြမ်းဖက် မင်းအောင်လှိုင်နှင့်အဖွဲ့ကို အစိုးရအဖြစ် အသိအမှတ်မပြုဘဲ နိုင်ငံ့အကြီးအကဲ နေရာတွင် သမ္မတ ဦးဝင်းမြင့်နှင့် နိုင်ငံခြားရေးဝန်ကြီးနေရာတွင် ဒေါ်အောင်ဆန်းစုကြည်ကို ဆက်လက် အသိအမှတ်ပြုထားသည်။

ကုလသမဂ္ဂ၊ အမေရိကန်၊ ဥရောပသမဂ္ဂ အပါအဝင် နိုင်ငံတကာက မင်းအောင်လှိုင်နှင့် စစ်တပ်ကို စစ်အာဏာသိမ်းခဲ့ခြင်း၊ ငြိမ်းချမ်းစွာ ဆန္ဒပြသော ပြည်သူများကို ပစ်ခတ်သတ်ဖြတ်ခြင်း၊ ပြည်သူလူထုအပေါ် လေ ကြောင်းတိုက် ခိုက် ဗုံးကျဲသတ်ဖြတ်နေခြင်းတို့ကြောင့် စီးပွားရေးပိတ်ဆို့မှု၊ သံတမန်ရေး အဆင့်နှိမ့်ချမှု၊ ကန့်သတ်မှု နှင့်ဖိအားပေးမှုများ ဆက်တိုက်လုပ်ဆောင်လျက်ရှိသည်။