ရန်ကုန်၊ မေ ၁၉
ထိုင်းနိုင်ငံ၊ ချွန်ပူရီခရိုင်၊ ပတ္တရားမြို့ လမ်းမပေါ်တွင် အသက် ၁၆ နှစ်အရွယ် ထိုင်းလူငယ်တစ်ဦးကို ဝိုင်းဝန်းတိုက်ခိုက်ခဲ့သည်ဟု စွပ်စွဲခံထားရသည့် မြန်မာလူငယ်တစ်ခုကို ထိုင်းရဲတပ်ဖွဲ့က ယမန်နေ့ညပိုင်း ဖမ်းဆီးထိန်းသိမ်းလိုက်သည်။
သို့သော်လည်း ဖမ်းဆီးခံရသည့် မြန်မာလူငယ်က ၎င်းတို့ကို ထိုင်းလူငယ်အဖွဲ့၏ သေနတ်ဖြင့် ချိန်ရွယ်ခဲ့ပြီး ကွန်ဗာ့စ် (Converse) ဖိနပ်တစ်စုံကို လုယက်ခြင်း ခံခဲ့ရသည်ဟု ပြန်လည်ထွက်ဆိုထားသဖြင့် ထိုင်း ရဲတပ်ဖွဲ့အနေဖြင့် အခင်းဖြစ်ပွားရာနေရာမှ CCTV မှတ်တမ်းများကို ပြန်လည်စစ်ဆေးပေးရန် လုပ်ဆောင်လျက်ရှိကြောင်း သိရှိရသည်။
ယင်းဖြစ်စဉ်မှာ မေလ ၁၆ ရက်နေ့ ညပိုင်းဖြစ်ပွားခဲ့ခြင်းဖြစ်ပြီး ဘန်လမွန် (Bang Lamung) ခရိုင်၊ နာကလူးဝါး (Na Kluea) ရပ်ကွက်ရှိ ဝပ်ချောင်လွန် (Wat Chong Lom) ဘုန်းကြီးကျောင်းရှေ့ စုခုမ်ဗစ် (Sukhumvit) လမ်းမပေါ်တွင် ထိုင်းနိုင်ငံသားလူငယ်ကို မြန်မာနိုင်ငံသားဟု ယူဆရသည့် လူငယ် ၁၀ ဦးခန့်က ဝိုင်းဝန်းရိုက်နှက်ကာ၊ ဖိနပ်ကိုလုယူ၊ မော်တော်ဆိုင်ကယ်ကို ဖျက်ဆီးပြီး တံတွေးနှင့် ထွေးသွားခဲ့ကြောင်း သိရှိရသည်။
ယနေ့ မေ ၁၉ ရက်နေ့ ဘန်လမွန်ရဲစခန်းမှ တာဝန်ရှိသူက မြန်မာလူငယ်အုပ်စုကို မေလ ၁၈ ရက်နေ့ ညနေပိုင်းတွင် ဖမ်းဆီးထိန်း သိမ်းနိုင်ခဲ့ကြောင်း ပြောကြားသည်။
ရဲတပ်ဖွဲ့၏ စစ်ဆေးမေးမြန်းမှုအတွင်း ဖမ်းဆီးခံရသည့် မြန်မာလူငယ်များက ထိုင်းလူငယ်ကို တိုက်ခိုက်ခဲ့ကြောင်း ဝန်ခံခဲ့ကြသော်လည်း ယင်း တိုက်ခိုက်မှုမဖြစ်ပွားမီ အဆိုပါ ထိုင်းလူငယ်က ၎င်းတို့ကို သေနတ်ဟု ယူဆရသည့် လက်နက်တစ်ခုဖြင့် ချိန်ရွယ်ခြိမ်းခြောက်ကာ ဝတ်ဆင်ထားသည့် ကွန်ဗာ့စ် (Converse) ဖိနပ်ကို အဓမ္မချွတ်ယူသွားခဲ့ကြောင်း ထွက်ဆိုခဲ့သည်။
မြန်မာလူငယ်အုပ်စုက ၎င်းတို့သည်လည်း အုပ်စုဖွဲ့ လုယက်ခြင်းခံရသည့် သားကောင်များဖြစ်ကြောင်း သက် သေပြနိုင်ရန်အတွက် အခင်းမဖြစ်ပွားမီ နာရီပိုင်းက ရိုက်ကူးထားသည့် CCTV မှတ်တမ်းများကို သေချာစွာ စစ်ဆေးပေးရန် ရဲတပ်ဖွဲ့ကို တောင်းဆိုထားသည်။
အမှုစစ်ဆေးနေသည့် ရဲအရာရှိများကမူ နှစ်ဖက်စလုံးကို အသေးစိတ် ဆက်လက်စစ်ဆေးသွားမည်ဖြစ်ပြီး၊ ရရှိနိုင်မည့် သက်သေအထောက်အထားအားလုံးကို ပြန်လည်သုံးသပ်ပြီးမှသာ မည်သူ့ကို အမှုဖွင့်တရားစွဲဆိုမည်ကို ဆုံးဖြတ်ချက်ချသွားမည်ဖြစ် ကြောင်း ပြောကြားသည်။
ယခုအမှုတွင် အရွယ်မရောက်သေးသူ ကလေးသူငယ်များ ပါဝင်ပတ်သက်နေသောကြောင့် သက်ဆိုင်ရာ ကလေးသူငယ်ကာကွယ် ရေးအဖွဲ့အစည်းများ၊ ဘာသာရပ်စုံကျွမ်းကျင်သူများအဖွဲ့နှင့် ပူးပေါင်းကာ စနစ်တကျ စစ်ဆေးသွားမည် ဖြစ်ကြောင်း၊ အာဏာပိုင်များက နှစ်ဦးနှစ်ဖက်စလုံးအတွက် တရားမျှတမှုရှိစေရန် ဥပဒေအတိုင်း အမှန်ကန်ဆုံး အရေးယူဆောင်ရွက်သွားမည်ဟု ကတိပြုထားသည်။
