ရန်ကုန်၊ ဇွန် ၁၂
၂၀၂၆ ခုနှစ် ကမ္ဘာ့ဖလားဘောလုံးပြိုင်ပွဲအတွက် မြန်မာနိုင်ငံတွင်း မီဒီယာထုတ်လွှင့်ခွင့်မူပိုင်ခွင့်ကို စစ်တပ်ပိုင် ဆက်သွယ်ရေးအော်ပရေတာဖြစ်သော Mytel ကုမ္ပဏီထံသို့ ပေးအပ်လိုက်ခြင်းအတွက် နိုင်ငံတကာဘောလုံးအဖွဲ့ချုပ် ဖီဖာ (FIFA) ၏ ဆုံးဖြတ်ချက်အပေါ် Justice For Myanmar (JFM) အဖွဲ့က ပြင်းထန်စွာ ရှုတ်ချလိုက်သည်။
JFM ၏ ထုတ်ပြန်ချက်အရ ဖီဖာသည် လူ့အခွင့်အရေးဆိုင်ရာ တင်ကြိုစိစစ်မှုများ ပြုလုပ်ရန် ပျက် ကွက်ခဲ့ပြီး လူ့အခွင့်အရေးကို လုံးဝလျစ်လျူရှုကာ အကျင့်ပျက်ခြစားမှုများနှင့် သွေးစွန်းနေသော မြန်မာစစ်အုပ်စုအား ပုံရိပ်ကောင်းရအောင် ဖြူစင်သယောင် ဖန်တီးပေးလိုက်ခြင်းဖြစ်ကြောင်း ပြစ်တင်ဝေဖန်ထားသည်။
မြန်မာပြည်တွင်း ဆက်သွယ်ရေး အော်ပရေတာဖြစ်သော Mytel သည် ရက်စက်ကြမ်းကြုတ်သည့် တရားမဝင် စစ်အုပ်စုအတွက် အကျိုးအမြတ်များစွာ ရရှိစေသော ဝင်ငွေရင်းမြစ်တစ်ခုဖြစ်ပြီး၊ ယခုအခါ နိုင်ငံတကာက ဒဏ်ခတ်ပိတ်ဆို့မှုများ ချမှတ်ထားသည့် စစ်တပ်စီးပွားရေးလုပ်ငန်းစုကြီးဖြစ်သော မြန်မာ့စီးပွားရေးကော်ပိုရေးရှင်း (MEC) က ပူးတွဲပိုင်ဆိုင်ကာ လွှမ်းမိုးချုပ်ကိုင်ထားသည့် လုပ်ငန်းတစ်ခု ဖြစ်သည်။
Justice For Myanmar ၏ လေ့လာဆန်းစစ်ချက်များအရ မြန်မာစစ်တပ်၏ ရှယ်ယာပိုင်ဆိုင်မှုများကြောင့် Mytel လုပ်ငန်းစတင်လည်ပတ်သည့် ပဉ္စမနှစ်မှ နဝမနှစ်ကာလအတွင်း အမေရိကန်ဒေါ်လာ သန်း ၂၇၀ ထိ ရရှိနိုင်ပြီး၊ ယင်းနောက်ပိုင်း ၅ နှစ်အတွင်းတွင် နောက်ထပ် အမေရိကန်ဒေါ်လာ သန်း ၄၅၀ အထိ ထပ်မံရရှိနိုင်ကြောင်း တွေ့ရှိရသဖြင့် ယင်းသည် စစ်တပ်နှင့် ထိပ်တန်းစစ်ဗိုလ်ချုပ်ကြီးများအတွက် အလွန်ကြီးမားသည့် ငွေကြေးအကျိုးအမြတ်တစ်ရပ် ဖြစ်နေသည်။
Mytel သည် စစ်တပ်ကို ငွေကြေးထောက်ပံ့ပေးခြင်းနှင့် စစ်ကောင်စီ၏ ဒစ်ဂျစ်တယ်စောင့်ကြည့်ထောက်လှမ်းရေးလုပ်ငန်းများကို ကူညီဆောင်ရွက်ပေးနေခြင်းကြောင့် မြန်မာစစ်တပ်က ပြည်သူများအပေါ် ဆက်လက်ကျူးလွန်လျက်ရှိသည့် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို တိုက်ရိုက်ကူညီအားပေးရာ ရောက်နေသည်ဟု Justice for Myanmar က ထောက်ပြ ပြောဆိုသည်။
ယခုကဲ့သို့ စစ်အုပ်စုအတွက် စောင့်ကြည့်ထောက်လှမ်းရေးဆိုင်ရာ နည်းပညာနှင့် ငွေကြေးပံ့ပိုးမှုများ ပြုလုပ်နေခြင်းကြောင့် Mytel အား အမေရိကန် ကုန်သွယ်ရေးဝန်ကြီးဌာနက ပိတ်ဆို့အရေး ယူမှုများ ချမှတ်ထားသည်။
ထို့အပြင် Mytel မိခင်ကုမ္ပဏီဖြစ်သော စစ်တပ်ပိုင် မြန်မာ့စီးပွားရေးကော်ပိုရေးရှင်း-MEC ကိုလည်း အမေရိကန်၊ ယူကေ၊ အီးယူ၊ ကနေဒါနှင့် သြစတြေးလျနိုင်ငံတို့က တိုက်ရိုက် ဒဏ်ခတ်ပိတ်ဆို့မှုများ ချမှတ်ထားပြီး ဖြစ်သည်။
ဖီဖာသည် ယခင်ကလည်း စစ်တပ်ခရိုနီဖြစ်သူ Max Myanmar ကုမ္ပဏီပိုင်ရှင် ဦးဇော်ဇော်အား ဖီဖာ၏ လူမှုအကျိုးပြုလုပ်ငန်းကော်မတီ ဥက္ကဌအဖြစ် ခန့်အပ်ခဲ့သည့် ဆုံးဖြတ်ချက်မျိုး ချမှတ်ခဲ့ဖူးပြီး၊ ယခုတစ်ကြိမ်တွင် Mytel နှင့် စီးပွားရေးပူးပေါင်းမှု ထပ်မံပေါ်ထွက်လာခြင်း ဖြစ်သည်။
ရိုဟင်ဂျာလူမျိုးများအပေါ် လူမျိုးတုံးသတ်ဖြတ်မှု ဖြစ်ပွားစဉ်က စစ်တပ်အား ငွေကြေးထောက်ပံ့မှုများ ပြုလုပ်ခဲ့ခြင်းကြောင့် ကုလသမဂ္ဂ မြန်မာနိုင်ငံဆိုင်ရာ အချက်အလက်ရှာဖွေရေးမစ်ရှင်က ၂၀၁၉ ခုနှစ်တွင် Max Myanmar မှ တာဝန်ရှိသူများကို လူသားမျိုးနွယ်အပေါ် ကျူးလွန်သည့် ရာဇဝတ်မှုများတွင် ပါဝင်ပတ်သက်မှု ရှိမရှိ ရာဇဝတ်မှုဆိုင်ရာ စုံစမ်းစစ်ဆေးမှုများ ပြုလုပ်ပြီး တရားစွဲဆိုမှုများ ပြုလုပ်သင့်ကြောင်း သုံးသပ်ခဲ့ဖူးသည်။
ထို့ကြောင့် ဖီဖာအနေဖြင့် မြန်မာစစ်အုပ်စု၊ ၎င်းတို့၏ ခရိုနီများနှင့် ပူးပေါင်းဆောင်ရွက်နေမှုများကို ချက်ချင်းရပ်တန့်ရမည်ဖြစ်ပြီး၊ ၎င်းတို့ကိုယ်တိုင် ထုတ်ပြန်ကြေညာထားသည့် လူ့အခွင့်အရေးဆိုင်ရာ ကတိကဝတ်များနှင့် နိုင်ငံတကာတာဝန်ဝတ္တရားများကို လက်တွေ့ကျကျ လိုက်နာဆောင်ရွက်ရန် Justice For Myanmar က တောင်းဆိုထားသည်။
