ရွှေကူမြို့နယ်တွင် တိုက်ပွဲ ၃ ကြိမ် ဖြစ်ပွားပြီး စစ်သား ၉ ဦးသေဆုံး
ရန်ကုန်၊ စက်တင်ဘာ ၂၇
ကချင်ပြည်နယ်၊ ရွှေကူမြို့နယ်တွင် အကြမ်းဖက် စစ်တပ်နှင့် မြို့လှ PDF တို့ တိုက်ပွဲ ၃ ကြိမ် ဖြစ်ပွားပြီး စစ်သား ၉ ဦးသေဆုံးခဲ့ကြောင်း မြို့လှ PDF မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
စက်တင်ဘာလ ၂၀ ရက်နေ့တွင် ရွှေကူမြို့ ဆိပ်ကမ်းမှ အကြမ်းဖက် စစ်ကောင်စီ၏ ရိက္ခာတင်သင်္ဘော ၆ စီး ဗန်မော်ကို ဆန်တက်စဥ် လုံခြုံရေးယူရန် သင်္ဘောအင်းကျေးရွာကို အကြမ်းဖက် စစ်တပ်၏ တပ်မ ၈၈ လက်အောက်ခံ ခလရ ၁၂၁ တပ်ရင်းနှင့် ခလရ ၁၀ ၊ ခလရ ၇၇ တပ်ရင်းတို့ ဝင်ရောက် တပ်စွဲခဲ့ကြောင်းသိရသည်။
ယင်းနေ့ ညပိုင်းတွင် စစ်သင်္ဘောများ လုံခြုံရေးအတွက် တပ်စွဲထားသော အကြမ်းဖက် စစ်တပ်က ကျွန်းတော်ရွာဘက်မှ စက်လှေ ၂ စီးကို ချောဆွဲခဲ့ပြီး ခလရ ၁၀ နှင့် ၇၇ တပ်ရင်းမှ အင်အား ၄၆ ဦးပါသော စက်လှေ ၁ စီးသည် ဆင်တပ်ကျေးရွာဘက်သို့ ဆင်းလာကြောင်း၊ ခလရ ၁၂၁ တပ်ရင်းမှ အင်အား ၆၇ ဦးပါ စက်လှေ ၁ စီးသည် သင်္ဘောအင်းရွာမှ နောင်မိုဘက်သို့ ဆန်တက်စဥ် မြို့လှ K-PDF အဖွဲ့မှ စောင့်ကြို တိုက်ခဲ့ပြီး တိုက်ပွဲ စတင် ဖြစ်ပွားခဲ့ကြောင်း သိရသည်။
တိုက်ပွဲအတွင်း အကြမ်းဖက် စစ်တပ်၏ စက်လှေကို ထိထိ ရောက်ရောက် ပစ်ခတ်နိုင်ခဲ့သည့်အတွက် စက်လှေသည် ကျောက်ကြိုးဘုရားအနီး ဧရာဝတီမြစ်တစ်ကမ်းကို မောင်းကပ်သွားရာ ကမ်းအရောက်တွင် စက်လှေ နစ်မြုပ်သွားကြောင်း၊ ထိခိုက် သေဆုံးသူများ၊ လက်နက်များနှင့် ဒဏ်ရာရသူများကို ဆွဲတင်နေကြသည်ကို တွေ့မြင်ခဲ့ရကြောင်း သိရသည်။
စက်တင်ဘာလ ၂၁ ရက်နေ့ နံနက် ၇ နာရီ ၂၀ မိနစ်တွင် ဧရာဝတီမြစ်ကမ်း၌ ရောက်ရှိနေသော အကြမ်းဖက် စစ်တပ်၏ ခလရ ၁၂၁ တပ်ရင်းနှင့် မြို့လှ PDF တို့ တိုက်ပွဲထပ်မံ ဖြစ်ပွားပြီး စစ်သား ၉ ဦးသေဆုံးကာ စစ်ကြောင်းမှူး အပါအဝင် စစ်သား ၁၁ ဦး ထိခိုက် ဒဏ်ရာရခဲ့ကြောင်း သိရသည်။
ယင်းနေ့ နံနက် ၈ နာရီ ၄၀ မိနစ်တွင် ခလရ ၁၂၁ တပ်ရင်းနှင့် မြို့လှ PDF တို့ တတိယအကြိမ် ထပ်မံတိုက်ပွဲဖြစ်ပွားခဲ့ပြီး အကြမ်းဖက် စစ်တပ်မှ ကျောက်ကြိုးဘုန်းကြီးကျောင်းဘက်ကို တက်ပြေးသွားကြောင်း၊ တိုက်ပွဲအတွင်း ဒဏ်ရာရသူများကို ကျောက်ကြိုးဘုန်းကြီးကျောင်းကို သယ်ယူသွားပြီး ကုသမှုများ ပြုလုပ်နေကြောင်း သိရသည်။
” ထိတွေ့ တိုက်ပွဲမှာ စစ်ခွေး ၉ ကောင်သေတယ်။ စစ်ခွေး စစ်ကြောင်းကို Drone အဖွဲ့တွေကတော့ မကြာခဏ ဆော်နေတုန်းပဲ မြေပြင်တိုက်ပွဲတော့ စစ်ခွေးတွေက ပုန်းနေကြတော့ ထပ်မဖြစ်သေးဘူး” ဟု မြို့လှ PDF မှ တာဝန်ရှိသူ တစ်ဦး ကပြောဆိုသည်။
