ဘားအံတွင် စစ်တပ်က နာရေးအသင်းအဖွဲ့အဖြစ် အသွင်ယူ၍ စစ်ရေး လုပ်ဆောင်နေသောကြောင့် တော်လှန်ရေး တပ်ဖွဲ့များက စစ်ဆေးမှုများ ပြုလုပ်မည်
ရန်ကုန်၊ စက်တင်ဘာ ၂၈
ကရင်ပြည်နယ်၊ ဘားအံမြို့နယ်တွင် အကြမ်းဖက် စစ်တပ်က နာရေးအသင်းအဖွဲ့အဖြစ် အသွင်ယူ၍ စစ်ရေး လုပ်ဆောင်နေသောကြောင့် တော်လှန်ရေး တပ်ဖွဲ့များက စစ်ဆေးမှုများ ပြုလုပ်သွားမည်ဖြစ်ကြောင်း အမှတ် ၁ မိတ်ဖက် တော်လှန်ရေး တပ်ပေါင်းစု ထံမှ သိရသည်။
အမှတ် ၁ မိတ်ဖက် တော်လှန်ရေးတပ်ပေါင်းစုသည် KNU-သထုံခရိုင် တပ်မဟာ ၁ မိတ်ဖက်ရေးရာ ကြီးကြပ်ကွပ်ကဲမှု ကော်မတီ၏ စည်းရုံးဦးဆောင်မှုဖြင့် သထုံခရိုင်-ဘားအံမြို့နယ်၊ တပ်ရင်း ၁ နယ်မြေအတွင်း နယ်မြေစိုးမိုးရေးနှင့် လုံခြုံရေးကိစ္စရပ်များအား တာဝန်ယူဆောင်ရွက်လျက်ရှိကြောင်း၊ တပ်ပေါင်းစုတာဝန်ထမ်းဆောင်သည့် နယ်မြေအတွင်း အကြမ်းဖက် စစ်ကောင်စီ တပ်ဖွဲ့ဝင်များက နာရေးကူညီမှုအသင်းအဖွဲ့အသွင်ယူ၍ စစ်ဖက်ဆိုင်ရာကိစ္စရပ်များအား ဆောင်ရွက်လျက်ရှိကြောင်း သိရသည်။
ထို့ကြောင့် နာရေး အသင်းအဖွဲ့ ယာဥ်များ အနေဖြင့် မှားယွင်းမှုများ မဖြစ်ပေါ်စေရန်အတွက် နယ်မြေအတွင်းအကြောင်းမဲ့ သွားလာခြင်း လုံးဝ(လုံးဝ)မပြုလုပ်ရန် ၊ အရေးပေါ်ကိစ္စ ပေါ်ပေါက်ပါက နယ်မြေခံ အုပ်ချုပ်ရေး၊ လုံခြုံရေးတာဝန်ရှိသူများနှင့် ချိတ်ဆက်ခွင့်ပြုချက်ရယူပြီးမှသာ သွားလာရန် နှင့် လုံခြုံရေးအရ စစ်ဆေးမှုများကို ကြည်ဖြူစွာ ပူးပေါင်းဆောင်ရွက်ရန် အမှတ် ၁ မိတ်ဖက်တော်လှန်ရေးတပ်ပေါင်းစု ဘားအံမြို့နယ်၊ သထုံခရိုင် က ထုတ်ပြန်ထားသည်။
