ညောင်လေးပင်ခရိုင်တွင် စစ်တပ်နှင့် KNLA တပ်ဖွဲ့များ တိုက်ပွဲဖြစ်ပွားပြီး စစ်တပ်က ကျေးရွာများကို လက်နက်ကြီးဖြင့် ပစ်ခတ်မှုကြောင့် ထောင်နှင့်ချီသော ပြည်သူများ ထွက်ပြေး တိမ်းရှောင်နေရ

ရန်ကုန်၊ အောက်တိုဘာ ၃၀

ပဲခူးတိုင်း၊ ညောင်လေးပင်ခရိုင်တွင် စစ်တပ်နှင့် KNLA တပ်ဖွဲ့များ တိုက်ပွဲဖြစ်ပွားပြီး စစ်တပ်က ကျေးရွာများကို လက်နက်ကြီးဖြင့် ပစ်ခတ်မှုကြောင့် ထောင်နှင့်ချီသော ပြည်သူများ ထွက်ပြေး တိမ်းရှောင်နေရကြောင်း ကေအဲန်ယူ-ဗဟို က ထုတ်ပြန်ထားသည်။

အောက်တိုဘာလ ၂၈ ရက်နေ့ မွန်းလွဲ ၁၂ နာရီ ၃၀ မိနစ်တွင် အကြမ်ဖက် စစ်တပ်၏ ဒုံစရစ်တပ် ခမရ-၅၈၉၊ စကခ-၂၁ ဗန်းမော် လက်အောက်ခံ ရွှေက္ကူတပ် ခမရ−၆၀၂ တို့မှ စစ်သားများက ကေအဲန်ယူ−မူးမြို့နယ်အတွင်းရှိ သပြေညွှန့်စခန်း၊ မိုးပျံစခန်း တို့ကို လာရောက် ပူးပေါင်းခဲ့ကြောင်း သိရသည်။

ယင်းနေ့ ည ၈ နာရီကျော်ခန့်တွင် သပြေညွှန့်စခန်းနှင့် ရဲစခန်း တို့ရှိ အကြမ်းဖက် စစ်သားများက လက်နက်ကြီး ၂ လုံးဖြင့် ပြည်သူများ နေထိုင်ရာ ကျေးရွာများကို ပစ်ခတ်ခဲ့ပြီး ကျောက်ကြီးပေါက် ကျေးရွာဘေးတွင် ကျရောက် ပေါက်ကွဲခဲ့ကြောင်း သိရသည်။

အကြမ်းဖက် စစ်တပ်က ပစ်ခတ်သော လက်နက်ကြီး ပေါက်ကွဲပြီးနောက် ကရင်အမျိုးသား လွတ်မြောက်ရေးတပ်မတော် (K.N.L.A) တပ်မဟာ ၃ လက်အောက်ရှိ တပ်ရင်း တပ်ဖွဲ့များ၊ ပူးပေါင်းတပ်ဖွဲ့များနှင့် အကြမ်းဖက် စစ်ကောင်စီတပ်များ အကြား တိုက်ပွဲ ၄ ကြိမ် ဖြစ်ပွားခဲ့ကြောင်း သိရှိရသည်။

ယင်းသို့ လက်နက်ကြီး ပစ်ခတ်မှုနှင့် တိုက်ပွဲများဖြစ်ပွားခဲ့သောကြောင့် ကျောက်ကြီးပေါက်ကျေးရွာ၊ ဆမ်မန်းပေါက်ကျေးရွာ၊ သပြေညွန့်ကျေးရွာ၊ ရွှေပြည်သာကျေးရွာ၊ လေလံကုန်းကျေးရွာတို့မှ ပြည်သူ ၂၀၅၂ ဦးသည် ဘေးလွတ်ရာကို ထွက်ပြေး တိမ်းရှောင်နေရပြီး အစားအစာနှင့် ဆေးဝါးများ အရေးပေါ် လိုအပ်လျက်ရှိကြောင်း သိရသည်။

ထို့ပြင် အောက်တိုဘာ ၂၀ ရက်နေ့တွင် အကြမ်းဖက် စစ်တပ်၏ ခမရ-၃၅၁ က နိုတောတာ (မရမ်းစိန်လေး) ကျေးရွာကို လက်နက်ကြီး ၅ လုံးဖြင့် ပစ်ခတ်ခဲ့သည့်အချိန်မှစ၍ ကျေးရွာနေ ပြည်သူ ၄၀၄ ဦးသည် ထွက်ပြေးတိမ်းရှောင်နေရပြီး လက်ရှိချိန်ထိ နေရပ် မပြန်နိုင်သေးသောကြောင့် နေရာထိုင်ခင်း၊ အစားအစာနှင့် ကျန်းမာရေးအတွက် ဆေးဝါးများ အစရှိသည့် အရေးပေါ်အကူအညီများ လိုအပ်လျက်ရှိသည်ဟု မူးမြို့နယ်အရေးပေါ် ကူညီ ကယ်ဆယ်ရေး ကော်မတီက ထုတ်ပြန်ထားသည်။

ညောင်လေးပင်ခရိုင် (ခလယ်လွီထူ) အတွင်း နေထိုင်သည့် ပြည်သူလူထုများသည် အကြမ်းဖက် စစ်ကောင်စီ၏ အုပ်ချုပ်မှုကို လက်မခံသည့်အတွက် မြို့နယ်အဆင့်နှင့် ကျေးရွာအဆင့် တို့တွင် အင်းအိုင်ကော်မတီ၊ ကူးတို့ကော်မတီ၊ ကူးသန်းရောင်းဝယ်ရေးကော်မတီ၊ ပညာရေးကော်မတီ၊ ကျန်းမာရေးကော်မတီ၊ အရေးပေါ် ကူညီကယ်ဆယ်ရေးကော်မတီ၊ မြေယာကော်မတီ၊ သဘာဝပတ်ဝန်းကျင်ထိန်းသိမ်းရေးကော်မတီ အစရှိသည်ဖြင့် ကော်မတီ ၈ ခုကို ဖွဲ့စည်းခဲ့ကြောင်း သိရသည်။

ထိုသို့ ဖွဲ့စည်းပြီးသည့်နောက် ကေအဲန်ယူ-ညောင်လေးပင် ခရိုင်မှ ၎င်းကော်မတီများကို ဦးဆောင်ပြီး လက်တွဲလုပ်ဆောင်လျက်ရှိသောကြောင့် ခလယ်လွီထူခရိုင်တွင် အရေးပေါ်အကူအညီများ လိုအပ်လျက်ရှိသော ပြည်သူလူထုများကို အကူအညီများပေးရေးလုပ်ငန်းများလုပ်ဆောင်လိုလျှင် ကေအဲန်ယူ-ဗဟိုထံမှ ခွင့်ပြု ချက် ရယူပြီးမှသာလျှင် တရားဝင်လုပ်ဆောင်နိုင်မည်ဖြစ်ကြောင်း ကေအဲန်ယူ-ဗဟို က ထုတ်ပြန်ထားသည်။