အခေါက်ရွှေတစ်ကျပ်သား ငွေကျပ် ၄၁ သိန်းကျော်အထိ စံချိန်တင်ထိုးတက်

အခေါက်ရွှေတစ်ကျပ်သား ငွေကျပ် ၄၁ သိန်းကျော်အထိ စံချိန်တင်ထိုးတက်

ရန်ကုန်၊ မတ် ၁၂

ပြည်တွင်းစီးပွားရေးစျေးကွက်တွင် ၁၆ ပဲရည် အခေါက်ရွှေတစ်ကျပ်သားလျှင် ငွေကျပ် ၄၁ သိန်းကျော်သို့ စံချိန်တင် စျေးထိုးတက်သွားကြောင်း ရန်ကုန်တိုင်းရွှေလုပ်ငန်းရှင်တစ်ဦးက ပြောဆိုသည်။

“ဒီနေ့ စျေးပိတ်တာ မီးလင်းရွှေ (အခေါက်ရွှေ) တစ်ကျပ်သားကို ၄,၁၀၅,၀၀၀ ( ၄၁ သိန်း ၅ ထောင်ကျပ်) နဲ့ စျေးပိတ်ပါတယ်။ မနက် စျေးဖွင့်တုန်းက ရွှေစျေးက သိန်း ၄၀ နဲ့ ၈ သောင်းက နေ စျေးဖွင့်တာ။ စျေးပိတ်ချိန်မှာ ထိုးတက်သွားတာ။ ဒေါ်လာစျေးတက်လာတာရယ်ကြောင့် ။ အခု ဒေါ်လာက တစ်ဒေါ်လာကို ၃၆၆၀ ကျပ်ကျော်လာတယ်။ ကမ္ဘာ့ရွှေစျေးကလည်း အမြင့်ပိုင်းမှာပဲရှိတယ်။ ရွှေတစ်အောင်စကို အမေရိကန်ဒေါ်လာ ၂၁၈၀ ပတ်ချာလည်မှာ ရှိနေတယ်” ဟု ရန်ကုန်တိုင်း ရွှေကုန်သည်က ရှင်းပြသည်။

ရွှေစျေးကွက်တွင် စံချိန်တင်စျေးများထိုးတက်နေသော်လည်း ရွှေအဝယ်များ များပြားကြောင်း၊ ရွှေရောင်းသူထက် ဝယ်သူများပြားနေခြင်းကလည်း စျေးကွက်သဘောတရားအရ စျေးအမြင့်ပိုင်းသို့ ဦးတည်စေလိမ့်မည်ဟု ရန်ကုန်တိုင်းရွှေကုန်သည်က သုံးသပ်ပြောဆိုသည်။