ရန်ကုန်၊ ကြည့်မြင်တိုင်မြို့နယ် ပန်းပင်နီလမ်းတွင် လူထုသပိတ်ကို ကားဖြင့် တိုက်၍ ပစ်ခတ်ဖြိုခွင်းမှုတွင် အဓိက ပါဝင်သူ စစ်တပ် ထောက်တိုင် မောင်ဦး ပစ်ခတ်ခံရပြီး သေဆုံး
ရန်ကုန်၊ ဧပြီ ၂၇
ရန်ကုန်မြို့၊ ကြည့်မြင်တိုင်မြို့နယ် ပန်းပင်နီလမ်းတွင် လူထုသပိတ်ကို ကားဖြင့် တိုက်၍ ပစ်ခတ်ဖြိုခွင်းမှုတွင် အဓိက ပါဝင်သူ အကြမ်းဖက် စစ်တပ် ထောက်တိုင် မောင်ဦးကို ပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း Operation Flame (OF) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ယနေ့ ဧပြီလ ၂၇ ရက်နေ့ မွန်းလွဲ ၂ နာရီခန့်တွင် ကြည့်မြင်တိုင်မြို့နယ် သရက်တော ၅ လမ်းတွင် အကြမ်းဖက် စစ်တပ် ထောက်တိုက် မောင်ဦးကို Operation Flame (OF) အဖွဲ့က ပစ်ခတ် တိုက်ခိုက်ရာ ပွဲချင်းပြီးသေဆုံးခဲ့ကြောင်းသိရသည်။
သေဆုံးသွားသော မောင်ဦးသည် ၂၀၂၁ ခုနှစ် ဒီဇင်ဘာလ ၅ရက်နေ့တွင် ပန်းပင်နီလမ်း၌ ပြုလုပ်သည့် လူထုသပိတ်ကို ကားဖြင့်တိုက်၍ ပစ်ခတ်ဖြိုခွင်းမှုတွင် အဓိက ပါဝင်ခဲ့သော အကြမ်းဖက် စစ်တပ် ထောက်တိုင် တစ်ဦး ဖြစ်ကြောင်း သိရှိရသည်။
လက်ရှိချိန်တွင် တော်လှန်ရေး ရဲဘော်များ ဘေးကင်း လွတ်မြောက်ရာ နေရာကို ရောက်ရှိနေပြီဖြစ်ကြောင်း၊ ဆက်လက်၍ ရန်ကုန်မြို့နှင့် ကြည့်မြင်တိုင်မြို့နယ်အတွင်း အများ ပြည်သူကို အတင်းအဓမ္မ စစ်ကျွန် ပြုနေသော အကြမ်းဖက်စစ်တပ်နှင့် အားပေးအား မြှောက်ဝိုင်းဝန်းလုပ်ဆောင်နေသော အုပ်ချုပ်ရေးမှုးများ၊ နောက်လိုက်များ အားလုံးကို စစ်ရေးပစ်မှတ်များအဖြစ် သတ်မှတ်ပြီး တိုက်ခိုက် သွားမည်ဖြစ်ကြောင်း Operation Flame (OF) အဖွဲ့မှ တာဝန်ရှိသူ တစ်ဦးက ပြောဆိုသည်။
