ရန်ကုန်၊ ဩဂုတ် ၉
အကြမ်းဖက်မင်းအောင်လှိုင်နှင့် တရုတ်အထူးကိုယ်စားလှယ် နေပြည်တော်တွင် တွေ့ဆုံအပြီး မူဆယ်တွင် မြောက်ပိုင်းမဟာမိတ်တပ်နှင့် စစ်ကောင်စီတပ်များ တိုက်ပွဲဖြစ်ပွားကြောင်း မူဆယ်ဒေသ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဩဂုတ်လ ၈ ရက်နေ့ နေပြည်တော်တွင် တရုတ်နိုင်ငံ၏ အာရှရေးရာအထူးကိုယ်စားလှယ် Mr. Deng Xijun နှင့် အကြမ်းဖက်မင်းအောင် လှိုင်တို့ တွေ့ဆုံခဲ့ကြကြောင်း၊ နှစ်နိုင်ငံ နယ်စပ်ရေးရာကိစ္စများ၊နယ်စပ်တည်ငြိမ်အေးချမ်းရေး ၊ အွန်လိုင်းလောင်းကစားမှုများ၊ အွန်လိုင်းလိမ်လည်မှုများ၊ အခြားငွေကြေးလိမ်လည်မှုနှင့် တရားမဝင်လုပ်ငန်းများ ပပျောက်စေရေး ၊ မြန်မာနိုင်ငံတွင် ရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိမှု အခြေအနေများကို ထည့်သွင်းဆွေးနွေးကြောင်း စစ်ကောင်စီက သတင်းထုတ်ပြန်ခဲ့သည်။
ယင်းနောက် ယမန်နေ့ည ၈ နာရီ ၃၀ မိနစ်ဝန်းကျင်အချိန် မူဆယ်မြို့နယ်၊ နမ့်ခွန်ကျေးရွာတွင် မြောက်ပိုင်းမဟာမိတ်တပ်များနှင့် စစ်ကောင်စီတပ်များအကြား တိုက်ပွဲဖြစ်ပွားခဲ့ကြောင်း၊ လက်နက်ကြီးပစ်ခတ်သံများနှင့်လက်နက်ငယ်ပစ်ခတ်သံများ နာရီဝက်နီးပါး ကြာမြင့်ခဲ့ကြောင်း သိရှိရသည်။
“မနေ့ညပိုင်း မူဆယ် ၁၀၅ မိုင်ဘက်နဲ့ နမ့်ခွမ်ရွာဘက်မှာ လက်နက်ကြီးပစ်ခတ်သံတွေကြားရတယ်။ မနေ့ည တိတိကျကျဆိုရရင်တော့ ည ၈ နာရီ ၃၇ မိနစ်မှာ စကြားရတာ။ လက်နက်သံတွေလည်းကြားရတယ်။ နာရီဝက်လောက်တော့ကြာမယ်။ ပြီးတော့ ပြန်ငြိမ်သွားတယ်။ ပစ်ခတ်မှုဖြစ်တုန်းက လက်နက်ကြီးပစ်သံတွေက ၁၀ မိနစ်တစ်ကြိမ် ထွက်ပေါ်တာ။ မူဆယ်မှာ ပြည်သူတွေကတော့ အထုပ်ပြင်ထားကြပြီ။ ဖြစ်လာရင်လည်း တရုတ်ဘက်ပြေးရုံအပြင် ပြေးစရာလည်းမရှိဘူး” ဟု မူဆယ်မြို့မှ ပြည်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
လတ်တလော မူဆယ်မြို့တွင် မြောက်ပိုင်းမဟာမိတ်တပ်ဖွဲ့က အရှေ့မြောက်တိုင်းစစ်ဌာနချုပ် တိုင်းမှူး ဗိုလ်မှူးချုပ်စိုးလှိုင်ကို လက်နက်ချရန် ကမ်းလှမ်းထားသည်ဆိုသော သတင်းများလည်း ပြည်သူများအကြား ကျယ်ကျယ်ပြန့်ပြန့်ထွက်ပေါ်နေပြီး မူဆယ်ဒေသပြည်သူများမှာ တရုတ်ပြည်ဘက်သို့ နည်းလမ်းမျိုးစုံဖြင့် ကူးဖြတ်စစ်ရှောင်နိုင်ရေး ကြိုးပမ်းမှုများရှိနေကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
