ရန်ကုန်| အောက်တိုဘာ ၁၀
ဘင်္ဂလားဒေ့ရှ်နိုင်ငံသား ၅ ဦးမှာ ငါးဖမ်းစက်လှေနှင့်အတူ အောက်တိုဘာလ ၇ ရက် နေ့လယ် ၁၂ နာရီအချိန် ရခိုင်ပိုင်နက်သို့ ဝင်ရောက်လာ၍ AA က ဖမ်းဆီးပြီး ပြန်လွှဲပြောင်းပေးခဲ့ကြောင်း The Daily Star က ဖော်ပြသည်။
ဘင်္ဂလားဒေ့ရှ်နယ်ခြားစောင့်တပ် ဒုဗိုလ်မှူးကြီး မော်ဟီးအူးဒိန်က “ကျွန်တော်တို့ တက္ကနာမြို့နယ် ဆားပြင်ကျေးရွာမှ တံငါသည်ငါးဦးပါ စက်လှေတစ်စီး ပုံမှန်ငါးဖမ်းနေတဲ့အချိန် စက်ချွတ်ယွင်းသွားတဲ့အတွက် မြန်မာ့ရေပိုင်နက်ထဲ ရောက်သွားတယ်ပေါ့နော် အဲမှာ Arakan Army တပ် ဖွဲ့ ဝင်တွေက ဖမ်းဆီးသွားကြောင်း မိသားစုတွေကတဆင့် သိရပါတယ်” ဟု ပြောသည်။
အဆိုပါ စက်လှေသမား ဘင်္ဂလားဒေ့ရှ်နိုင်ငံသား ၅ ဦး ပြန်လွတ်မြောက်နိုင်ရေး AA တာဝန်ရှိသူများဖြင့် ဆွေးနွေးညှိနှိုင်းပြီးနောက် အောက်တိုဘာလ ၈ ရက်နေ့တွင် ပြန်လည်ခေါ်နိုင်ယူခဲ့သည်ဟု ဘင်္ဂလားဒေ့ရှ်က ပြောဆိုထားသည်။
ဘူးသီးတောင်၊ မောင်တောဒေသတွင် စစ်ကောင်စီ (မြန်မာစစ်တပ်) ၏ နယ်ခြားစောင့်တပ် မရှိတော့သည့်အတွက် ဘင်္ဂလားဒေ့ရှ် နယ်ခြားစောင့်တပ်အနေဖြင့် မည်ကဲ့သို့ ဆက်သွယ်ပြီး စက်လှေသမားများကို ကယ်ထုတ်ခဲ့ရခြင်းဖြစ်ကြောင်း သိရှိရသည်။
ဒုဗိုလ်မှူးကြီး မော်ဟီးအူးဒိန်က “မြန်မာဘက်မှာ စကစ နယ်ခြားစောင့်တပ်ဖြစ်ဖြစ် Arakan Army (AA) ဖြစ်ဖြစ် ကျွန်တော်တို့ နိုင်ငံသားတွေအတွက် တရားမျှတမှု နိုင်ငံအကျိုးစီးပွားအတွက် ဘယ်အဖွဲ့အစည်းနဲ့မဆို ဆက်သွယ်မှာပဲ ဒါကျွန်တော်တို့ နယ်ခြားစောင့်တပ်ရဲ့ နိုင်ငံတော်က ပေးတဲ့တာဝန် ပါပဲ” ဟု ဆက်ပြောခဲ့သည်။
AA အကူအညီဖြင့် ပြန်လည်လွတ်မြောက်လာကြသည့် ဘင်္ဂလားဒေ့ရှ်နိုင်ငံသား ၅ ဦးကို မိသားစုဝင်များက နွေးထွေးစွာ ကြိုဆိုကြပြီး AA က မြန်မာစစ်တပ်ကဲ့သို့ မဟုတ်ကြောင်း လွတ်မြောက်လာသည့် ဘင်္ဂလားဒေ့ရှ်နိုင်ငံသားတစ်ဦး၏ ဖခင်က ထောက်ပြသည်။
ဖခင်ဖြစ်သူတစ်ဦးက “ကျွန်တော်တို့ နယ်စပ်မြို့သားတွေ ငါးဖမ်းပြီးရှာစားတာ နှစ်နိုင်ငံဆိုတော့ စက်ချွတ်ယွင်းတာတွေ အမြဲဖြစ်နေကျပါ။ ဒါပေမယ့် Arakan Army (AA) မရှိခင် ဒီမြန်မာ စစ် သားတွေ လက်ထက်က ဖမ်းသွားရင် ပြန်မလွတ်ဘူး။ သတင်းမရတော့ဘူး။ ဟိုအရင်က နေ့ချင်းပြန် ပတ်စ့်ပို့နဲ့ မောင်တောမြို့ကိုသွားပြီး ရှာကြပါတယ်။ ထောင်ချထားတယ်ဆိုတာပဲ သိရပါတယ်။ အခုလို မနေ့က ဖမ်း ဒီနေ့ လွတ်တာ ကျွန်တော့ တစ်သက် မျက်မြင်ပါပဲ” ဟု ဆိုသည်။
လူ့အခွင့်အရေးအဖွဲ့များ အပါအဝင် သတင်းထောက်များက AA ၏ လုပ်ရပ်အပေါ် လူသားဆန်မှုအဖြစ် ရှုမြင်ကြပြီး နယ်စပ်တွင် ဖြစ်နေကျ ပြဿနာများကို ပြေပြေလည်လည် ညှိနှိုင်းနိုင်ကြောင်း၊ နယ်စပ် နှစ်နိုင်ငံဆက်ဆံရေး ပိုမိုကောင်းမွန်လာရေး လမ်းစဖြစ်ကြောင်း ရှုမြင်ကြသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
