နွားထိုးကြီးတွင် စစ်တပ် စစ်ကြောင်း မိုင်းနင်းမိပြီး စစ်ကောင်စီ တပ်သား ၃ ဦးသေဆုံး
ရန်ကုန်၊ နိုဝင်ဘာ ၅
မန္တလေးတိုင်း၊ နွားထိုးကြီးမြို့နယ်တွင် အကြမ်းဖက် စစ်တပ် စစ်ကြောင်းမှ စစ်ကောင်စီ တပ်သားများ မိုင်းနင်းမိပြီး ၃ ဦးသေဆုံးခဲ့ကြောင်း မြင်းခြံခရိုင်အမှတ် ၄ တပ်ရင်း နွားထိုးကြီး PDF တပ်ဖွဲ့က ပြောဆိုသည်။
အောက်တိုဘာလ ၃၀ ရက်နေ့ နံနက်အစောပိုင်း ၂ နာရီခန့်တွင် နွားထိုးကြီးမြို့နယ်၊ ပြင်စည်ကျေးရွာမှ ထွက်လာသော အင်အား ၆၀ ခန့်ပါ စစ်တပ် စစ်ကြောင်းသည် နွားထိုးကြီးမြို့အတွင်းကို ဝင်ရောက်ရန် ကြိုးစားစဉ် ခက်လန်းရွာ အနီးအရောက်၌ ပြည်သူ့ကာကွယ်ရေးတပ်ဖွဲ့ဝင်များ ထောင်ထားသည့် မိုင်းများ နင်းမိပြီး ၃ ဦး သေဆုံးခဲ့ကြောင်း သိရသည်။
မိုင်းပေါက်ကွဲမှု ဖြစ်ပွားပြီးနောက် အကြမ်းဖက် စစ်ကောင်စီ တပ်သားများသည် အနီးပတ်ဝန်းကျင်ရှိ ကျေးရွာများကို လက်နက်ကြီး၊ လက်နက်ငယ်များဖြင့် ရမ်းသမ်း ပစ်ခတ်ခဲ့ပြီး ပြင်စည်ကျေးရွာဘက်ကို ပြန်လည် ဆုတ်ခွာသွားကြောင်း သိရှိရသည်။
