မြန်မာနိုင်ငံသား ၂၇၈ ဦး စင်ကာပူနိုင်ငံသားအဖြစ် ပြောင်းလဲခံယူဟု စစ်ကောင် စီသံရုံး ကြေညာ၊ စစ်အာဏာသိမ်းပြီးနောက် စင်ကာပူရောက် ပညာ တတ် မြန်မာနိုင်ငံသားအများစု စင်ကာပူနိုင်ငံသားအဖြစ် ပြောင်းလျှောက်ထားမှု များပြား

ရန်ကုန်၊ ဖေဖော်ဝါရီ ၃

မြန်မာနိုင်ငံသား ၂၇၈ ဦးသည် မြန်မာနိုင်ငံသားအဖြစ်မှ စင်ကာပူနိုင်ငံသား အဖြစ် ပြောင်းလဲခံယူလိုက်ကြောင်း စင်ကာပူရှိ စစ်ကောင်စီသံရုံးက ယနေ့ ကြေညာသည်။

စင်ကာပူရှိ စစ်ကောင်စီသံရုံး၏ ကြေညာချက်တွင် မြန်မာနိုင်ငံသားအဖြစ်မှ စင်ကာပူနိုင်ငံသားအဖြစ်သို့ မိမိတို့၏ သဘော ဆန္ဒ အလျောက် ပြောင်းလဲခံယူခဲ့ပြီးသူများအနေဖြင့် ၂၀၂၄ ခုနှစ်၊ ဒီဇင်ဘာလအတွင်း မှတ်ပုံတင် နိုင်ငံသားစိစစ်ရေးကတ်ပြားမူရင်းများကို လာရောက်အပ်နှံခဲ့ကြကြောင်း၊ အဆိုပါပုဂ္ဂိုလ်များအနေဖြင့် သံရုံးထောက်ခံစာကို လာရောက်ယူနိုင်ပြီး နိုင်ငံကူးလက်မှတ်မူရင်းနှင့် Processing Letter မူရင်းတို့ကိုပါ တစ်ပါတည်း ပြန်လည် အပ်နှံရမည်ဖြစ်ကြောင်း ကြေညာထားသည်။

အဆိုပါ မြန်မာနိုင်ငံသား ၂၇၈ ဦးသည် စင်ကာပူနိုင်ငံသားအဖြစ် စစ်အာဏာသိမ်းပြီးနောက်ပိုင်းမှ ကူးပြောင်းသွားခြင်းဖြစ်ပြီး နိုင်ငံသားကူးပြောင်းသွားသူအများစုမှာ စင်ကာပူ PR အမြဲတမ်းနေထိုင်ခွင့်ရရှိထားသော ပညာတတ်လူတန်းစားအများစုဖြစ်ကြောင်း စင်ကာပူရောက် မြန်မာများက ပြောဆိုသည်။

“မြန်မာသံရုံးက ကြေညာတဲ့အထဲမှာ မိတ်ဆွေတွေရဲ့ နာမည်တွေလည်းတွေ့တယ်။ PR ရထားပြီး သတ်မှတ်သက်တမ်းရှိမှ စင်ကာပူနိုင်ငံသားလျှောက်ထားခွင့်ရှိတယ်။ စင်ကာပူမှာ PR ရထားတယ်ဆိုတာကလည်း ပညာတတ်အလွှာနဲ့ အခြေခိုင်မှ သူတို့ကလည်း PR ပေးတာ။ အခုပြောင်းသွားတဲ့သူတွေက အခုလတ်တလော ပြောင်းထားတာမျိုး မဟုတ်ဘူး။ အနည်းလေး ၈ လကနေ ၂ နှစ်လောက်ကြာတယ်။ ဒါက အာဏာသိမ်းပြီးမှ လျှောက်ကြတဲ့သူတွေများတယ်” ဟု စင်ကာပူရောက် မြန်မာတစ်ဦးက ပြောဆိုသည်။

ယခင်ကလည်း မြန်မာနိုင်ငံသားအဖြစ်မှ စင်ကာပူနိုင်ငံသားအဖြစ် ပြောင်းလဲလျှောက်ထားကြသူများရှိကြောင်း၊ သို့ရာတွင် ယခုကဲ့သို့ အရေအတွက်မများကြောင်း၊ ယခုအခါတွင်မူ စစ်အာဏာသိမ်းထားမှုကြောင့် စင်ကာပူနိုင်ငံ သားအဖြစ် ပြောင်းလဲ လျှောက်ထားသည့် မြန်မာအရေအတွက်များပြားလာကြောင်း၊ စင်ကာပူတွင် PR ရရှိထားသော မြန်မာများမှာ ပညာတတ်အလွှာ အများစုဖြစ်၍ စင်ကာပူနိုင်ငံသားအဖြစ် ပြောင်းလဲသွားသည့်အတွက် မြန်မာ နိုင်ငံအတွက် လူ့စွမ်းအားအရင်းအမြစ် ဆုံးရှုံးပြီး Brain Drain ဟုဆိုနိုင်ကြောင်း ၎င်းက ဆိုသည်။

“အရင်ကလဲ စင်ကာပူနိုင်ငံသား ပြောင်းကြပေမယ့် အခုလောက်တော့ မများဘူး။ အခုကတော့ ပိုများလာတာပေါ့။ စင်ကာပူမှာ PR နဲ့ နိုင်ငံသားဆိုတာက အခြေ မခိုင်သူကို မပေးဘူး။ စင်ကာပူက အများကြီးစိစစ်တယ်” ဟု စင်ကာပူရောက် မြန်မာက ဆက်လက်ရှင်းပြသည်။

စင်ကာပူသည် အာဆီယံအဖွဲ့ဝင်နိုင်ငံတစ်ခုဖြစ်ပြီး လူဦးရေ ၆ သန်းဝန်းကျင်ရှိကာ စီးပွားရေးအရ တိုင်းပြည် GDP အမေရိကန်ဒေါ်လာ ၄၆၇ ဘီလီယံရှိကာ အာဆီယံတွင် ထိပ်တန်းစီးပွားရေးအင်အားကြီးနိုင်ငံဖြစ်သည်။

ဓာတ်ပုံ – စစ်အာဏာသိမ်းပြီးနောက် ၂၀၀၈ အခြေခံဥပဒေဖြင့် သတ်မှတ်ထားသော နိုင်ငံအလံကို မီးရှို့ ဆန္ဒပြမှု တစ်ခု။ (ပုံအဟောင်းဖြစ်ပါသည်။)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar