ရန်ကုန်၊ ဇွန် ၁၆
မကွေးတိုင်း၊ မြိုင်မြို့နယ်၊ ဇီးတောရွာရှိ စစ်ဘေးရှောင် ပြည်သူများ နေထိုင်သော ဘုန်းကြီးကျောင်းကို အကြမ်း ဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ရာ ပြည်သူ ၁ ဦး သေဆုံးခဲ့ကြောင်း ဒေသ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဇွန်လ ၁၆ ရက်နေ့ မွန်းလွဲ ၁ နာရီ ၂၁ မိနစ်ခန့်အချိန် မြိုင်မြို့နယ်၊ ဇီးတောရွာရှိ စစ်ဘေးရှောင် ပြည်သူများ နေထိုင်သော ဘုန်းကြီးကျောင်းကို အကြမ်းဖက် စစ်တပ်က ဂျက်ဖိုက်တာဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
ယင်း တိုက်ခိုက်မှုအတွင်း စစ်ဘေးရှောင် အမျိုးသမီး ၁ ဦး သေဆုံးပြီး ပြည်သူ ၇ ဦး ထိခိုက်ဒဏ်ရာရရှိကာ ၂ ဦးမှာ ဒဏ်ရာအခြေအနေ စိုးရိမ်ရကြောင်း၊ စေတီပုထိုးများနှင့် ဘုန်းကြီးကျောင်းလည်း ထိခိုက်ပျက်စီးခဲ့ကြောင်း သိရှိရသည်။
“စစ်ရှောင်တွေနေတဲ့ ဘုန်းကြီးကျောင်းကို ကျဲသွားတာ အမျိုးသမီး ၁ ဦး သေဆုံးတယ်။ ထိခိုက်ဒဏ်ရာ ရရှိသူများတယ်။ ၇ ဦးလောက်ရှိတယ်။ ဒဏ်ရာရရှိသူ ၂ ဦးက စိုးရိမ်ရတယ်။ ကလေးငယ်တွေလည်း သတိလစ်တာတွေရှိတယ်။ ကမ္မ အပါဝင် ပေါက်လမ်းအနီးတဝိုက်က ရွာတွေက ပြည်သူတွေက ဘုန်းကြီးကျောင်းမှာ စစ်ရှောင်နေတာ ဘုရားရှိခိုးတဲ့နေရာကို ကျသွားတာ အသက်အရွယ်ကတော့ မသိရဘူး” ဟု ဒေသပြည်သူတစ်ဦးက ပြောဆိုသည်။
အကြမ်းဖက် စစ်တပ်က မြိုင်မြို့နယ်တောင်ပိုင်း ဇီးတောကျေးရွာကို တိုက်ပွဲဖြစ်ပွားခြင်းမရှိဘဲ လေကြောင်းဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
ဓာတ်ပုံ – အညာမြေမြိုင်မြို့နယ်နှင့် ပေးပို့။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
