ရန်ကုန်၊ ဇူလိုင် ၁၃
မကွေးတိုင်း၊ ပေါက်မြို့နယ်နှင့် မြိုင်မြို့နယ်အစပ်ရှိ ကျေးရွာများကို အကြမ်းဖက်စစ်တပ်က နေ့စဉ်ဆက်တိုက် လေကြောင်းမှ ဗုံးကျဲတိုက်ခိုက်နေပြီး ဇူလိုင်လ ၁၂ ရက်နေ့တွင်လည်း ဂျက်တိုက်လေယာဉ်နှင့် Mi-35 တိုက်ခိုက်ရေးရဟတ်ယာဉ်တို့ဖြင့် ၇ ကြိမ်တိုင်တိုင် ဗုံးကျဲတိုက်ခိုက်ခဲ့ကြောင်း အညာမြေ အရပ်ဘက်လူမှုအဖွဲ့အစည်း-မြိုင် အဖွဲ့မှ ဆရာထွေးက ရန်ကုန်ခေတ်သစ်သတင်းဌာနထံသို့ ပြောကြားသည်။
ဇူလိုင်လ ၁၂ ရက်နေ့ မွန်းလွဲ ၃ နာရီ ၃၀ မိနစ်ခန့်မှ ညနေ ၄ နာရီခန့်အထိ တံတားဦးလေတပ်မှ ပျံတက်လာသော ဂျက်တိုက်လေယာဉ် ၁ စီးနှင့် ညောင်ဦးလေဆိပ်မှ ပျံတက်လာသော Mi-35 တိုက်ခိုက်ရေးရဟတ်ယာဉ် ၁ စီးတို့က ပေါက်မြို့နယ်အရှေ့ပိုင်းရှိ ထောက်ရှာပင်ကျေးရွာ၊ မြိုင်မြို့နယ်အနောက်တောင်ပိုင်းရှိ ကန်နက်ကျေးရွာနှင့် ပေါက်-မြိုင်မြို့နယ်အစပ် ပုသိမ်-မုံရွာလမ်းအနီးတစ်ဝိုက်ရှိ နေရာများကို ၇ ကြိမ်တိုင်တိုင် လေကြောင်းမှ ဗုံးကျဲတိုက်ခိုက်ခဲ့ကြောင်း သိရသည်။
အဆိုပါ လေကြောင်းတိုက်ခိုက်မှုအတွင်း ပြည်သူများ သေဆုံးခြင်းနှင့် ထိခိုက်ဒဏ်ရာရရှိခြင်း မရှိကြောင်း ကနဦးသိရှိရသော်လည်း ကျေးရွာများအတွင်းရှိ နေအိမ်များ ထိခိုက်ပျက်စီးမှု ရှိနိုင်ကြောင်း သိရသည်။ သို့သော် ဒေသခံပြည်သူများမှာ စစ်ဘေးတိမ်းရှောင်နေကြရပြီး ကျေးရွာများအတွင်းသို့ ပြန်လည်ဝင်ရောက်ရန် မရဲသေးသဖြင့် ပျက်စီးဆုံးရှုံးမှု အခြေအနေအသေးစိတ်ကို အတည်ပြုနိုင်ခြင်း မရှိသေးကြောင်း ဆရာထွေးက ရှင်းပြသည်။
“ပြည်သူတွေ ထိခိုက်ဒဏ်ရာရတာမျိုး မကြားမိဘူး။ သေဆုံး၊ ထိခိုက်တာလည်း မကြားမိဘူး။ လေကြောင်းတိုက်ခိုက်မှုကတော့ ဟုတ်တယ်။ ဂျက်ဖိုက်တာနဲ့ ဗုံး ၃ လုံး ချသွားတယ်။ Mi-35 ကတော့ အကြာကြီး ပတ်ပစ်နေတာပါ။ နေအိမ်တွေ ပျက်စီးတာက ရှိနိုင်တယ်လို့ပဲ သုံးသပ်ရပါတယ်။ အဲဒီနားက ရွာတွေက လူတွေအကုန် စစ်ဘေးရှောင်နေကြပြီ။ လူတွေရှောင်နေတဲ့ ရွာတွေထဲကို ပစ်တာဆိုတော့ ဘယ်လောက်ပျက်စီးသွားလဲဆိုတဲ့ အတိုင်းအတာကို အသေးစိတ် မသိနိုင်သေးဘူး။ ရွာထဲကိုလည်း ပြန်မဝင်ရဲကြသေးဘူး။ ပေါက်မြို့နယ် ထောက်ရှာပင်ကျေးရွာနဲ့ မြိုင်မြို့နယ်တောင်ပိုင်း ကန်နက်ကျေးရွာတို့ ပတ်ဝန်းကျင်မှာတော့ လေကြောင်းတိုက်ခိုက်မှုကြောင့် နေအိမ်တွေ ပျက်စီးနိုင်တယ်” ဟု အညာမြေ အရပ်ဘက်လူမှုအဖွဲ့အစည်း-မြိုင် အဖွဲ့မှ ဆရာထွေးက ပြောဆိုသည်။
စစ်တပ်က ပေါက်နှင့် မြိုင်မြို့နယ်အစပ်ရှိ ကျေးရွာများကို ဇူလိုင်လ ၁၁ ရက်နေ့ကလည်း လေကြောင်းမှ ဆက်တိုက်ဗုံးကျဲတိုက်ခိုက်ခဲ့ပြီး ၂ ရက်ဆက်တိုက် လေကြောင်းတိုက်ခိုက်မှုများ ပြုလုပ်နေခြင်းဖြစ်ကြောင်း သိရသည်။
ဇူလိုင်လ ၁၁ ရက်နေ့တွင် ညောင်ဦးလေဆိပ်မှ ပျံတက်လာသော Mi-35 တိုက်ခိုက်ရေးရဟတ်ယာဉ် ၁ စီး၊ မကွေးလေတပ်မှ ဂျက်တိုက်လေယာဉ် ၂ စီးနှင့် တံတားဦးလေတပ်မှ ဂျက်တိုက်လေယာဉ် ၁ စီးတို့က ပေါက်မြို့နယ်နှင့် မြိုင်မြို့နယ်အစပ် ပုသိမ်-မုံရွာလမ်းအနီးတစ်ဝိုက်ရှိ နေရာများကို ၁၂ ကြိမ်တိုင်တိုင် ဗုံးကျဲတိုက်ခိုက်ခဲ့ကြောင်း သိရှိရသည်။
ယင်းတိုက်ခိုက်မှုအတွင်း မြိုင်မြို့နယ်တောင်ပိုင်း ကိုင်းတောကျေးရွာအနီးရှိ ကျေးရွာများမှ အသက် ၄၀ ဝန်းကျင်အရွယ် အမျိုးသား ၃ ဦး ရှပ်ထိဒဏ်ရာရရှိခဲ့ပြီး နေအိမ် ၂ လုံးမှာလည်း အမိုးလန်ပျက်စီးခဲ့ကြောင်း သိရသည်။
ပေါက်နှင့် မြိုင်မြို့နယ်အစပ်ရှိ ကျေးရွာများကို စစ်တပ်က လေကြောင်းတိုက်ခိုက်မှုများ နေ့စဉ်ဆက်တိုက် ပြုလုပ်နေသဖြင့် ဒေသခံပြည်သူအများအပြားမှာ နေရပ်စွန့်ခွာ စစ်ဘေးတိမ်းရှောင်နေရပြီး ကျေးရွာများအတွင်းရှိ နေအိမ်နှင့် ပစ္စည်းပျက်စီးဆုံးရှုံးမှု အခြေအနေများကိုပင် ပြန်လည်ဝင်ရောက် စစ်ဆေးနိုင်ခြင်းမရှိသေးကြောင်း ဒေသခံသတင်းရင်းမြစ်များထံမှ သိရှိရသည်။
ဓာတ်ပုံ- အကြမ်းဖက်စစ်တပ်က ၂၀၂၅ ခုနှစ်အတွင်း ဒီပဲယင်းမြို့နယ်သို့ လေကြောင်းဖြင့် ဗုံးကျဲတိုက်ခိုက်ခဲ့စဉ်။ (ပုံအဟောင်းကို အသုံးပြုထားပါသည်။)
