ရန်ကုန်၊ ဩဂုတ် ၃၁
မန္တလေးတိုင်း၊ ပြင်ဦးလွင်မြို့နယ်နှင့် ရှမ်းပြည်နယ်၊ နောင်ချိုမြို့နယ်များတွင် အကြမ်းဖက်စစ်ကောင်စီတပ်များနှင့် မန္တလေး PDF ကြား ဩဂုတ်လ ၂၄ ရက်မှ ၃၀ ရက်နေ့အတွင်း တိုက်ပွဲ ၃ ကြိမ်ဖြစ်ပွားခဲ့ပြီး စစ်ကောင်စီဘက်မှ ၄၀ ကျော်သေဆုံးကာ အများအပြား ဒဏ်ရာရကြောင်း ပြည်သူ့ကာကွယ်ရေးတပ်မတော် (မန္တလေး) က သတင်းထုတ်ပြန်သည်။
ဩဂုတ်လ ၂၄ ရက်နေ့ နံနက် ၈ နာရီတွင် စစ်ကောင်စီ၏ တပ်မ ၁၀၁ လက်အောက်ခံ ခလရ ၂၅၃၊ စကခ ၁ လက်အောက်ခံ ခမရ ၅၀၂၊ ခမရ ၅၀၅ တပ်ရင်းတပ်ဖွဲ့များနှင့် မန္တလေး PDF ကြား အပြန်အလှန်တိုက်ပွဲဖြစ်ပွားပြီး အထိနာသော စစ်ကောင်စီတပ်ဘက်မှ တိုက်ခိုက်ရေးရဟတ်ယာဉ်များဖြင့် ပစ်ခတ်တိုက်ခိုက်ခဲ့ကြောင်း၊ အဆိုပါ တိုက်ပွဲတွင် စစ်ကောင်စီဘက်မှ ၂၀ ဦးဝန်းကျင်သေဆုံးပြီး အများအပြား ဒဏ်ရာရကြောင်း၊ PDF ၂ ဦး ဒဏ်ရာရကြောင်း သိရှိရသည်။
ဩဂုတ်လ ၂၉ ရက် ညနေ ၆ နာရီခန့်တွင် မန္တလေး PDF ထောင်ထားသော မိုင်းကွင်းထဲသို့ အကြမ်းဖက်စစ်တပ်၏ စစ်ကြောင်းတစ်ကြောင်း ဝင်ရောက်လာစဉ် ဖောက်ခွဲတိုက်ခိုက်ရာ စစ်သား ၁၉ ဦးထက်မနည်းသေဆုံးကာ အများအပြား ဒဏ်ရာရကြောင်း၊ ဩဂုတ်လ ၃၀ ရက် နံနက်တွင် စစ်ကောင်စီစစ်ကြောင်းကို ထပ်မံ မိုင်းခွဲရာ စစ်သား ၃ ဦးသေဆုံးကြောင်း မန္တလေး PDF က ထုတ်ပြန်သည်။
အဆိုပါ ဒေသတွင် စစ်ရေးတင်းမာလျှက်ရှိပြီး စစ်ကောင်စီတပ်ဖွဲ့ဝင်များအနေဖြင့် CDM ပြုလုပ်ကာ အလင်းဝင်လိုပါက မန္တလေး PDF ကနွေးထွေးစွာ ကြိုဆိုမည်ဖြစ်ကြောင်း ထုတ်ပြန်ထားသည်။
ဓါတ်ပုံ – မန္တလေး PDF များ (ပုံအဟောင်းဖြစ်ပါသည်)
