ပဲခူးရိုးမတွင် တိုက်ပွဲဖြစ်ပွားနေ၍ ရိုးမလမ်းပိုင်းကို ပြည်သူများ အသုံးမပြုရန် နှင့် မိုင်းခွဲတိုက်ခိုက်မှုများရှိမည်ဟု သတိပေးချက်ထုတ်ပြန်

ရန်ကုန်၊ မတ် ၇

ပဲခူးတိုင်း တောင်ငူခရိုင် ပဲခူးရိုးမ ရကိုင်းချောင်းရိုး တလျောက် စစ်ကြောင်းထိုးလာသည့် အကြမ်းဖက် စစ်ကောင်စီ တပ်ဖွဲ့များနှင့် တောင်ငူ PDF တပ်ဖွဲ့တို့ မတ်လ ၄ရက်နေ့မှစတင်၍ တိုက်ပွဲဖြစ်ပွားခဲ့ပြီး ပဲခူးရိုးမ လမ်းပိုင်းကို ပြည်သူများ အသုံးမပြုရန် တောင်ငူ PDF တပ်ဖွဲ့က ထုတ်ပြန်ချက် တစ်စောင် ထုတ်ပြန်ထားသည်။

မတ်လ ၄ရက်နေ့တွင် ဖြစ်ပွားခဲ့သော တိုက်ပွဲတွင် အကြမ်းဖက် စစ်ကောင်စီ စစ်ကြောင်းကို တောင်ငူ PDF တပ်ရင်းမှ လက်ဦးမှုရယူ တိုက်ခိုက်ခဲ့ခြင်းကြောင်း စစ်တပ်က သေဆုံးထိခိုက်မှု များပြားခဲ့ခြင်းဖြစ်ကာ ထိခိုက်သေဆုံးမှု အရေအတွက်ကို အတည်မပြုနိုင်သေးကြောင်း တောင်ငူ PDF တပ်ဖွဲ့က ထုတ်ပြန်ထားသည်။

ထို အကြမ်းဖက် စစ်ကောင်စီ တပ်ဖွဲ့များသည် အင်းအား အလုံးအရင်းဖြင့် တောင်ခြေရွာများတွင် တပ်စွဲကာ ရိုးမပေါ်သို့ အရပ်ဝတ်များ၊ ဆိုင်ကယ်များ၊ ဖောကားများ အသုံးပြုပြီး PDF တပ်ဖွဲ့ဝင်များ၏ သတင်းများကို လိုက်လံစုံစမ်းနေခြင်းကြောင့် ရိုးမပေါ် ပြည်သူများအနေဖြင့် ဖြတ်သန်းသွားလာခြင်း မပြုလုပ်ရန် တောင်ငူ PDF တပ်ဖွဲ့က ထုတ်ပြန်ထားသည်။

ယင်း ရိုးမပေါ်သို့ လှုပ်ရှားသွားလာနေသည့် ဖောကား/ဆိုင်ကယ်များ အားလုံးကို တောင်ငူ PDF အနေဖြင့် အကြမ်းဖက် စစ်ကောင်စီ တပ်ဖွဲ့ဝင်များဟု မှတ် ယူကာ တောင်ငူ PDF ဘုရင့်နောင်တပ်ရင်းက မိုင်းဆွဲ၊ ပစ်ခတ်တိုက်ခိုက်ခြင်းများ စတင်ပြုလုပ်မည်ဖြစ်ကြောင်း သတိပေးချက်ထုတ်ပြန်ထားသည်။