ဒီးမော့ဆိုတွင် စစ်တပ်က လက်နက်ကြီးများဖြင့် အကြောင်းမဲ့ ပစ်ခတ်သောကြောင့် နေအိမ်များ ထိမှန် ပျက်စီး
ရန်ကုန်၊ ဧပြီ ၂၁
ကယားပြည်နယ်၊ ဒီးမော့ဆိုမြို့နယ်အတွင်း အကြမ်းဖက် စစ်တပ်က လက်နက်ကြီးများဖြင့် အကြောင်းမဲ့ ပစ်ခတ်သောကြောင့် နေအိမ်များ ထိမှန် ပျက်စီးခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဧပြီလ ၂၀ ရက်နေ့ မွန်းလွဲ ၂ နာရီ ခန့်တွင် အကြမ်းဖက် စစ်တပ်က ဒီးမော့ဆို အနောက်ဘက်ခြမ်းရှိ ကျေးရွာများကို လက်နက်ကြီးများဖြင့် အကြောင်းမဲ့ ပစ်ခတ်ခဲ့သောကြောင့် ပြည်သူပိုင် နေအိမ်များနှင့် ကားများ ထိမှန်ပျက်စီးခဲ့ကြောင်း သိရသည်။
” ဒီးမော့ဆို အနောက်ဘက်ခြမ်းကို စစ်ခွေးတွေက ၂၀ ရက်နေ့ မွန်းလွဲ ၂ နာရီခန့်မှာ လက်နက်ကြီးတွေနဲ့ အကြောင်းမဲ့ ပစ်ခတ်လို့ ကျေးရွာ တစ်ရွာထဲကို လက်နက်ကြီး ၄ လုံးကျရောက် ပေါက်ကွဲပြီး လူနေအိမ်တွေနဲ့ အဆောက်အဦး တစ်ချို့ ထိခိုက်ပျက်စီးခဲ့တယ်။ အိမ်စီးကားတွေလည်း ထိခိုက်ပျက်စီးမှုရှိတယ်” ဟု ပြည်သူတစ်ဦးကပြောဆိုသည်။
