အာဆီယံက စစ်ကောင်စီကို အကြမ်းဖက်စစ်အုပ်စုအဖြစ် သတ်မှတ်ရန် မြန်မာလူငယ်များက အာဆီယံ အထူးသံတမန် ရုံး သံအမတ်ကြီးနှင့်တွေ့ဆုံ တင်ပြ

အာဆီယံက စစ်ကောင်စီကို အကြမ်းဖက်စစ်အုပ်စုအဖြစ် သတ်မှတ်ရန် မြန်မာလူငယ်များက အာဆီယံ အထူးသံတမန် ရုံး သံအမတ်ကြီးနှင့်တွေ့ဆုံ တင်ပြ

■ လမ်းပြမြေပုံ ၅ ချက်နှင့် အကြံပြုချက် ၁၀ ချက်ကိုလည်း တင်ပြ

ရန်ကုန်၊ ဇူလိုင် ၁၀

အာဆီယံက စစ်ကောင်စီကို အကြမ်းဖက် စစ်အုပ်စုအဖြစ် သတ်မှတ်ပြီး တရား မဝင် အဖွဲ့အစည်းအဖြစ် သတ်မှတ်၍ အာဆီယံအစည်းအဝေးများအားလုံးမှ ဖယ်ရှားရန် မြန်မာလူငယ် အင်အားစုများက မြန်မာနိုင်ငံဆိုင်ရာ အာဆီယံ အထူးသံတမန်ရုံး သံအမတ်ကြီးနှင့်တွေ့ဆုံ တင်ပြတောင်းဆိုလိုက်ကြသည်။

ဇူလိုင်လ ၃ ရက်နေ့တွင် စစ်အာဏာရှင် ဆန့်ကျင်ရေးနှင့် တက်ကြွလှုပ်ရှားသော တော်လှန်ရေးအဖွဲ့ ၂၃ ခုမှ မြန်မာ့နွေဦး၏ လူငယ် ၂၆ ဦးက မြန်မာနိုင်ငံဆိုင်ရာ အထူးသံတမန်ရုံး အကြီးအကဲဖြစ်သူ သံအမတ်ကြီး Mr. Ngurah Swajaya နှင့် တွေ့ဆုံခဲ့စဉ် ထိုသို့ တင်ပြ တောင်းဆိုခဲ့ကြခြင်းဖြစ်သည်။

အာဆီယံအထူးသံတမန်ရုံးအကြီးအကဲနှင့်တွေ့ဆုံသည့် လူငယ်များသည် တိုင်းရင်းသားလူငယ်အဖွဲ့အစည်းများ၊ သမဂ္ဂများနှင့် ကွန်ရက်များ၊ နှင့် အရပ်ဘက်လူထုအဖွဲ့အစည်းများမှ လူငယ်ကိုယ်စားလှယ် ၂၆ ဦး ပါဝင်တက်ရောက်ခဲ့ကြကြောင်း သိရှိရသည်။

မြန်မာ့နွေဦး လူငယ်ကိုယ်စားလှယ်များက ၂၀၂၁ ခုနှစ် ဧပြီလ ၂၄ ရက်နေ့တွင် အာဆီယံဘုံသဘောတူညီချက်ငါးရပ် (Five Point Consensus – 5PC) ကို ချမှတ်ခဲ့ပြီးနောက် နှစ်နှစ်ကျော်ကာလအတွင်း မြန်မာပြည်သူများအပေါ် ကျူးလွန်နေသည့် အကြမ်းဖက်စစ်အုပ်စု၏ အကြမ်းဖက်မှုများနှင့် ရက်စက်ကြမ်းကြုတ်မှုများကို အာဆီယံမှ ထိရောက်စွာ တားဆီးနိုင်မှု မရှိခြင်းနှင့် ကျရှုံးနေမှုတို့အပေါ် ၎င်းတို့၏ စိုးရိမ်ပူပန်မှုနှင့် စိတ်ပျက်မှုများကို ထုတ်ဖော်ပြောကြားခဲ့ကြသည်။

စစ်ကောင်စီအပေါ် ထိရောက်မှုမရှိသည့် ထို ဘုံသဘောတူညီချက်ငါးရပ်ကို ဆက်လက်ထားရှိနေခြင်းက အကြမ်းဖက်စစ်အုပ်စုကို နောက်ထပ်ရာဇဝတ်မှုများ ဆက်လက်ကျူးလွန်စေရန် အတင့်ရဲစေမည်ဖြစ်ပြီး မြန်မာပြည်သူများ ခံစားနေရသော အတိဒုက္ခကို ပိုမိုဆိုးရွားစေမည်ဖြစ်ကြောင်း၊ အကြမ်းဖက်စစ်အုပ်စုမှ မြန်မာနိုင်ငံတစ်ဝှမ်းရှိ ပြည်သူများအပေါ် ဆက်လက်ကျူးလွန်နေသော လူ့အခွင့်အရေးချိုးဖောက်မှုများ၊ ရက်စက်ကြမ်းကြုတ်သောရာဇဝတ်မှုများနှင့် စပ်လျဥ်းသည့် မြေပြင်တွင် ဖြစ်ပွားနေသော လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်မှု၊ ရွာများကို မီးရှို့မှု၊ တရားလက်လွတ်သတ်ဖြတ်မှုများ ဆက်လက်ကျူးလွန်နေကြောင်း၊ တရားမဝင်စစ်အုပ်စု၏ ကျရှုံးနေသော အာဏာသိမ်းရေးကြိုးပမ်းမှု ၂၉ လတာ ကာလအတွင်း ၎င်းတို့ ကျူးလွန်သောရာဇဝတ်မှုများသည် နိုင်ငံတကာ လူ့အခွင့်အရေးဥပဒေနှင့် ဂျီနီဗာသဘောတူစာချုပ်များအရ စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သောရာဇဝတ်မှု မြောက်ကြောင်း ပြောဆိုကြသည်။

စစ်တပ်က ကျူးလွန်သော စစ်ရာဇဝတ်မှုများ၏ ဆိုးရွားပြင်းထန်မှုနှင့် အရှိန်မြင့်တက်လာနေမှုတို့သည် မြန်မာစစ်အုပ်စုက ဘုံ သဘောတူညီချက်ငါးရပ်နှင့် အာဆီယံ၏ ဂုဏ်သိက္ခာ ပျက်ပြားအောင်လျစ်လျူရှုခြင်း၏ ထင်ရှားသော အထောက်အထားများ ဖြစ်ကြောင်း၊ ပိုမိုပြင်းထန်လာနေသော မြန်မာနိုင်ငံ၏ အကျပ်အတည်းကို ဖြေရှင်းရာတွင် အထူးသံတမန်၏ အခန်းကဏ္ဍမှာ လက်တွေ့တွင်အလုပ်မဖြစ်သကဲ့သို့ ထိရောက်မှုမရှိကြောင်း၊ အလှည့်ကျတာဝန်ယူရသည့် အာဆီယံဥက္ကဌရာထူးနှင့်အတူ အထူးသံတမန်၏ လုပ်ပိုင်ခွင့်သက်တမ်း တစ်နှစ်မှာ မြန်မာနိုင်ငံ၏ အကျပ်အတည်းကို ဖြေရှင်းရေးအတွက် လုပ်ငန်းအစီအစဥ် ရေးဆွဲရန်နှင့် အကောင်အထည်ဖော်ဆောင်ရန် အလွန်တိုတောင်းလှသောကြောင့် ထိရောက်မှုရှိပြီး ဗျူဟာကျသော ပုံစံတစ်ရပ်ဖြစ်မနေကြောင်း၊ အထူးသံတမန်မှ တရားမဝင်စစ်အုပ်စုနှင့် တရားဝင် ထိတွေ့ဆက်ဆံ နေခြင်းသည် စစ်အုပ်စုကို အဆင့်မြင့် အာဆီယံအစည်းအဝေးများမှ ချန်လှပ်၊ ပိတ်ပင်ထားမည်ဆိုသည့် အာဆီယံ၏ ဆုံးဖြတ်ချက်၊ ရပ်တည်ချက်တို့နှင့် ရှေ့နောက်မညီညွတ် ဖြစ်နေသည်ကိုလည်း ထောက်ပြခဲ့သည်။

တစ်ဖက်တွင်လည်း အထူးသံတမန်အနေဖြင့် အမျိုးသားညီညွတ်ရေး အစိုးရ (National Unity Government – NUG)၊ အမျိုးသားညီညွတ်ရေး အတိုင်ပင်ခံကောင်စီ (National Unity Consultative Council – NUCC)၊ တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ (Ethnic Revolutionary Organizations – EROs)၊ ပြည်ထောင်စုလွှတ်တော် ကိုယ်စားပြုကော်မတီ (Committee Representing Pyidaungsu Hluttaw – CRPH)၊ မြန်မာ့နွေဦး တော်လှန်ရေး၏ အခြားသောအင်အားစုများနှင့် အရပ်ဘက်လူထုအဖွဲ့အစည်းများ (Civil Society Organizations – CSOs) တို့နှင့် တရားဝင်ဆက်သွယ်ရေးနှင့် ထိတွေ့ဆက်ဆံရေး လမ်းကြောင်းများ တည်ဆောက်ထားခြင်း မရှိသေးမှုအပေါ် အလေး ပြောဆိုကြသည်။

လူသားချင်းစာနာထောက်ထားမှုအကူအညီများ ပေးပို့ရေးနှင့်စပ်လျဥ်း၍ အကူအညီများကို အလိုအပ်ဆုံးဖြစ်နေသည့် ပြည်သူများထံ မရောက်ရှိစေရန် မြန်မာစစ်အုပ်စုက လက်နက်သဖွယ် အမြဲတစေအသုံးချပြီး တားဆီးပိတ်ဆို့နေသောကြောင့် အာဆီယံအနေဖြင့် အကူအညီများပေးပို့ရာတွင် မြန်မာစစ်အုပ်စုနှင့် လက်တွဲဆောင်ရွက်ခြင်း သို့မဟုတ် မြန်မာစစ်အုပ်စုမှတစ်ဆင့် ပေးပို့ခြင်းတို့ မလုပ်ဆောင်ရန် ကိုယ်စားလှယ်များက တိုက်တွန်းတောင်းဆိုခဲ့သည်။

အာဆီယံအနေဖြင့် NUG၊ NUCC၊ ERO များနှင့် လက်တွဲလုပ်ဆောင်ရန်နှင့် အမှန်တကယ် အကူအညီလိုအပ်နေသော လူထုအသိုင်းအဝိုင်းများထံ၊ နယ်စပ်ဖြတ်ကျော်လမ်းကြောင်းများအပါအဝင် အကူအညီများကို ထိရောက်စွာ ပေးပို့နေသည့် ဒေသခံအရပ်ဘက်လူထုအဖွဲ့အစည်းများကို တိုက်ရိုက်ကူညီပံ့ပိုးပေးရန် အရေးတကြီး လိုအပ်နေကြောင်း ပြောဆိုကြသည်။

မြန်မာ့နွေဦးလူငယ်တော်လှန်ရေးသမားများက ဖက်ဒရယ်ဒီမိုကရေစီ မြန်မာ နိုင်ငံသစ်အတွက် အောက်ပါ နိုင်ငံရေးလမ်းပြ မြေပုံငါးရပ်ကို တင်ပြခဲ့ကြပြီး အဆိုပါ လမ်းပြမြေပုံတွင်-

၁။ စစ်အာဏာရှင်စနစ် အပါအဝင် အာဏာရှင်စနစ်အားလုံးကို အပြီးတိုင်ဖျက်သိမ်းရန်နှင့်တရားမျှတမှုနှင့် တာဝန်ယူမှု တာဝန်ခံမှုရှိသော ဖက်ဒရယ်ဒီမိုကရေစီသို့ အသွင်ကူးပြောင်းရန်၊

၂။ နိုင်ငံရေးအကျဥ်းသားအားလုံးကို လွှတ်ပေးရန်နှင့် အာဏာဖီဆန်ရေးလူထုလှုပ်ရှားမှု (CiviDisobedience Movement – CDM) ကို ပံ့ပိုးကူညီရန်၊

၃။ ၂၀၀၈ ဖွဲ့စည်းပုံအခြေခံဥပဒေကို အပြီးတိုင် ဖျက်သိမ်းရန်၊

၄။ ဖက်ဒရယ်ဒီမိုကရက်စီ ပြည်ထောင်စုမြန်မာနိုင်ငံ တည်ဆောက်ရန်

(၁) ဖက်ဒရယ်ဖွဲ့စည်းပုံအခြေခံဥပဒေ မူကြမ်းတစ်ရပ်ရေးဆွဲရန်နှင့် အတည်ပြုပြဌာန်းရန်၊

(၂) သက်ဆိုင်ရာပြည်နယ်များအတွင်းရှိ ကိစ္စရပ်များကို စီမံကွပ်ကဲနိုင်ရန်အတွက် ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဌာန်းခွင့်အပြည့်အဝရှိသော ပြည်နယ်ဖွဲ့စည်းပုံ အခြေခံဥပဒေများနှင့် ပြည်နယ်အစိုးရများကို ဖွဲ့စည်းရန်၊

(၃) ရိုဟင်ဂျာကဲ့သို့သော လူနည်းစုများကို နိုင်ငံသားဖြစ်ခွင့် မရရှိရန် ကန့်သတ်ထားသည့် ၁၉၈၂ ခုနှစ် မြန်မာနိုင်ငံသားဥပဒေကို ဖျက်သိမ်းရန်၊

(၄) အနာဂတ်နိုင်ငံရေးတွင် စစ်တပ်၏ပါဝင်မှု မရှိစေရေး ကန့်သတ်မှုကို သေချာစွာ လုပ်ဆောင်ရန်၊ နှင့်

၅။ လူမျိုးကြီးဝါဒကို ဆန့်ကျင်ရန်

(၁) ယဥ်ကျေးမှု၊ ယုံကြည်မှုနှင့် လိင်စိတ်ခံယူမှုများအပေါ် အခြေခံသည့် ဖိနှိပ်မှုများအပါအဝင် ဖိနှိပ်မှု ပုံစံအားလုံးကို တိုက်ဖျက်ဖယ်ရှားရန်၊

(၂) စုံလင်ကွဲပြားမှုကို တန်ဖိုးထားရန်နှင့် လေးစားလိုက်နာရန်၊

(၃) ခေါင်းဆောင်မှုအခန်းကဏ္ဍ နေရာများတွင် လူငယ်မျိုးဆက်များ ရောက်ရှိလာစေရေးကို ထောက်ခံအားပေးရန်၊ နှင့်

(၄) အမျိုးသမီးများအား စွမ်းရည်မြှင့်တင်ပေးရန်နှင့် အားလုံးကြားတွင် တန်း တူညီမျှမှု ကောင်းမွန်တိုးတက်လာစေရေး လုပ်ဆောင်ရန် အာဆီယံ ထံသို့ တင်ပြခဲ့ကြသည်။

ထို့ပြင် အာဆီယံအနေဖြင့်-

၁။ နွေဦးတော်လှန်ရေးတွင် အဓိကကျသော ပါဝင်ပတ်သက်သူများနှင့် တိုက်ရိုက်ထိတွေ့ ဆက်ဆံမှု၊ ဆွေးနွေးမှု၊ တွေ့ဆုံမေးမြန်းမှုနှင့် ဆန်းစစ်သုံးသပ်မှုများ ပြုလုပ်ခြင်းမှတစ်ဆင့် မြန်မာနိုင်ငံ၏ အကျပ်အတည်းကို တိကျသေချာစွာ ကိုင်တွယ်ဖြေရှင်းနိုင်ရန်အတွက် အာဆီယံ အတွင်းမှ အားအင်စိုက်ထုတ်ပြီး လုပ်ကိုင်ဆောင်ရွက်ပေးမည့် အစုအဖွဲ့တစ်ခု တည်ဆောက်ရန်၊ (အဆိုပါ အစုအဖွဲ့၏ သက်တမ်းကို အလှည့်ကျအာဆီယံဥက္ကဌတာဝန်နှင့်အတူ ကန့်သတ် မထားသင့်ပေ။)

၂။ မြန်မာနိုင်ငံရှိ အကျပ်အတည်းကို ကိုင်တွယ်ဖြေရှင်းရာတွင် ထိရောက်မှုရှိပြီး ခိုင်မာအားကောင်းသော ဖြေရှင်းမှုများအတွက် ကုလသမဂ္ဂနှင့် နီးနီးကပ်ကပ်း ညှိနှိုင်းစေ့စပ်၊ ပူးတွဲလုပ်ဆောင်ရန်၊

၃။ စစ်အုပ်စုကို အကြမ်းဖက်အဖွဲ့အစည်းတစ်ခုအဖြစ် သတ်မှတ်ပြီး အာဆီယံ အစည်းအဝေးနှင့် ယန္တရားများ အားလုံးမှ ဖယ်ရှားရေးကို သေချာစွာ လုပ်ဆောင်ရန်နှင့် ၎င်းတို့ကို တရားမဝင် အစုအဖွဲ့တစ်ခုအဖြစ် သတ်မှတ်ဆက်ဆံရန်၊

၄။ အာဆီယံအဖွဲ့ဝင်နိုင်ငံအားလုံးအနေဖြင် အကြမ်းဖက်စစ်တပ်နှင့် ပူးပေါင်းဆောင်ရွက်မှုများ အားလုံးကို ရပ်တန့်ရေး ပြင်းထန်စွာတိုက်တွန်းရန်၊

၅။ NUCC၊ မြန်မာနိုင်ငံ၏ တရားဝင်အစိုးရ NUG၊ ERO များ၊ နွေဦးတော်လှန်ရေး အင်အားစုများနှင့် တရားဝင် အစည်းအဝေးနှင့် ထိတွေ့ဆက်ဆံမှုများ စီစဥ်ဆောင်ရွက်ရန်နှင့် တရားဝင်မှုရှိပြီး အပြုသဘောဆောင်သော ပတ်သက်ဆက်ဆံမှုများကို ဖော်ဆောင်ရန်၊

၆။ အာဆီယံ၏ ဘုံသဘောတူညီချက်ငါးရပ်ကို ကျော်လွန်လုပ်ဆောင်ရန်နှင့် ၂၀၂၃ ခုနှစ် မေလတွင် အာဆီယံထံသို့ အရပ်ဘက်လူထုအဖွဲ့အစည်းများ အဆိုပြုပေးပို့ခဲ့သည့် တန်ပြန်မူငါးရပ်ကို ချမှတ်ကျင့်သုံးရန်၊

၇။ ထိခိုက်နစ်နာမှုရှိသော ပြည်သူများ၊ အထူးသဖြင့် ပြည်တွင်းနေရပ်စွန့်ခွာ ထွက်ပြေးတိမ်းရှောင်ရ သူများ (internally displaced persons – IDPs) နှင့် လူ့ အခွင့်အရေးချိုးဖောက်မှု များတွင် ထိခိုက်နစ်နာသူများနှင့် အသက်ရှင်ကျန်ရစ်သူများအပေါ် နယ်စပ်ဖြတ်ကျော်လမ်းကြောင်းများ အပါအဝင် လူသားချင်းစာနာ ထောက်ထားမှုအကူအညီများကို တိုက်ရိုက်ပေးပို့နိုင်ရန်အတွက် နွေဦးတော်လှန်ရေးအင်အားစုများနှင့် ပူးတွဲလုပ်ဆောင်ရန်၊

၈။ စစ်အုပ်စု၏ “ပုံမှန်အခြေအနေ” သို့ ရောက်ရှိရေး ကြိုးပမ်းရာတွင် အပေါ်ယံနိုင်ငံရေးလုပ်ကွက်အဖြစ် အသုံးချရန် လုပ်ဆောင်နေသော တရားမဝင်အထွေထွေရွေးကောက်ပွဲကို လုပ်ဆောင်၍မရစေရေး တားဆီးပိတ်ပင်ရန်၊ တရားမဝင် ရွေးကောက်ပွဲမှတစ်ဆင့် တရားဝင်မှုရရှိရန် ကြိုးပမ်းမည့် စစ်အုပ်စု၏ မည်သည့်လုပ်ရပ်ကိုမဆို ငြင်းပယ်ရန်နှင့် ဒီမိုကရေစီ နည်းကျ လုပ်ဆောင်သော နိုင်ငံရေးဖြစ်စဥ်များသာ ပေါ်ပေါက်စေပြီး ယင်းဖြစ်စဥ်များကိုသာလျှင် ဒေသတွင်းနှင့် နိုင်ငံတကာမှ အသိအမှတ်ပြုစေရေး သေချာစွာ လုပ်ဆောင်ရန်၊

၉။ အရေးယူပိတ်ဆို့မှုများချမှတ်ခြင်း အပါအဝင် လိုအပ်သည့် နိုင်ငံတကာနှင့် ပြည်တွင်းကြိုးပမ်း အားထုတ်မှုများအားလုံးနှင့် အတူတကွပူးပေါင်းဆောင်ရွက်ရန်နှင့် စစ်အုပ်စုထံသို့ လက်နက်၊ ခဲယမ်းနှင့် လေယာဥ်ဆီများ တင်ပို့ရောင်းချမှုကွင်းဆက်အားလုံးကို ပိတ်ပင်တားဆီးရန်၊

၁၀။ မြန်မာနိုင်ငံ၏ အကျပ်အတည်းကို ကိုင်တွယ်ဖြေရှင်းရာတွင် အာဆီယံ၏ အာဏာကို အမှီအခိုကင်းပြီး လွတ်လပ်သော ဒေသတွင်းအဖွဲ့အစည်းတစ်ရပ်အဖြစ် အခိုင်အမာထုတ်ဖော်ရန်နှင့် မည်သည့် ပြည်တွင်း၊ ပြည်ပ၏ လွှမ်းမိုးမှု သို့မဟုတ် အမြတ်ထုတ်မှုကိုမဆို တန်ပြန်ဆန့်ကျင်ရန်နှင့် ဖိအားများကို အလျှော့မပေးဘဲ ဘက်မလိုက်မှုနှင့် လွတ်လပ်အမှီအခိုကင်းမှုတို့ဖြင့် ဆောင်ရွက်ရန်တို့ကိုလည်း တောင်းဆိုကြသည်။

မြန်မာနိုင်ငံဆိုင်ရာ အာဆီယံ အထူးသံတမန်းရုံးအကြီးအကဲကို သွားရောက်တွေ့ဆုံရာတွင် ပါဝင်သည့် ကိုယ်စားလှယ်များ၏ အဖွဲ့အစည်းများ၊ ကွန်ရက်များနှင့် မဟာမိတ်အဖွဲ့အစည်းများမှာ

၁။ ဗမာပြည်သူ့လွတ်မြောက်ရေးတပ်တော် (BPLA)

၂။ မြန်မာနိုင်ငံလုံးဆိုင်ရာ ချင်းကျောင်းသားများသမဂ္ဂ (CSUM)

၃။ အထွေထွေသပိတ်ပူးပေါင်းဆောင်ရွက်ရေးကော်မတီ (GSCC)

၄။ အထွေထွေသပိတ်ကော်မတီ (GSC)

၅။ လူမျိုးပေါင်းစုံအထွေထွေသပိတ်ကော်မတီ (GSCN)

၆။ အထွေထွေသပိတ်ညှိနှိုင်းရေးအင်အားစု (GSCB)

၇။ မွန်ပြည်သူ့အခွင့်အရေးဖောင်ဒေးရှင်း (HURFOM)

၈။ ကချင်ပြည်နယ်လူထုသပိတ်ကော်မတီ (KSCM)

၉။ ကရင်ကျောင်းသားကွန်ရက်အဖွဲ့ (KSNG)

၁၀။ ကရင်လူငယ်အစည်းအရုံး (KYO)

၁၁။ ကရင်နီအမျိုးသားများ ကာကွယ်ရေးတပ် (KNDF)

၁၂။ အမျိုးသမီးစစ်သည်တော်တပ်ရင်း (မြောင်)

၁၃။ ပအိုဝ်းလူငယ်အစည်းအရုံး (PYO)

၁၄။ စစ်ကိုင်းဖိုရမ်

၁၅။ ကရင်နီလူငယ်အစည်းအရုံး (UKSY) တို့ဖြစ်ကြောင်း သိရှိရသည်။

သွားရောက်တွေ့ဆုံကြသူများတွင်

၁။ ဒီမိုကရေစီဖွံ့ဖြိုးတိုးတက်ရေးလှုပ်ရှားဆောင်ရွက်မှုကော်မတီ (ACDD)

၂။ အသံ – လွတ်လပ်စွာထုတ်ဖော်ပြောဆိုခွင့်လှုပ်ရှားမှုအဖွဲ့ (Athan)

၃။ ညီမျှခြင်းမြန်မာ (EQMM)

၄။ မျိုးဆက်လှိုင်း (GW)

၅။ ကရင်လူ့အခွင့်အရေးအဖွဲ့ (KHRG)

၆။ ကယန်းအမျိုးသမီးအစည်းအရုံး (KyWO)

၇။ ရှေ့ပြေးအသံအဖွဲ့ (PV) တို့မှ လူငယ်များလည်း ပါဝင်ကြကြောင်း သိရှိရသည်။

ဓာတ်ပုံ- မြန်မာနိုင်ငံဆိုင်ရာ အာဆီယံရုံး အကြီးအကဲ သံအမတ်ကြီး Ngurah Swajaya။