စစ်ကောင်စီဝင် အောင်ကျော်မင်း၊ ပိုးရယ်အောင်သိန်း၊ ဒုဗိုလ်ချုပ်ကြီးကျော်စွာလင်း၊ ဝန်ကြီး မြင့်ကြိုင်၊ ပွင့်ဆန်းနှင့် သက်ခိုင်ဝင်းတို့ကို ဥရောပသမဂ္ဂက ပိတ်ဆို့ အရေးယူ
ရန်ကုန်၊ ဇူလိုင် ၂၁
မြန်မာနိုင်ငံတွင် အကြမ်းဖက်စစ်ကောင်စီက လူ့အခွင့်အရေးချိုးဖောက်မှုများ ဆက်လက် ကျူးလွန်နေသဖြင့် စစ်ကောင်စီ အဖွဲ့ဝင် ၂ ဦး၊ ဝန်ကြီး ၃ ဦးနှင့် ဒုဗိုလ်ချုပ်ကြီး ၁ ဦးကို ဒဏ်ခတ်ပိတ်ဆို့ အရေးယူလိုက်ကြောင်း ဥရောပသမဂ္ဂက ထုတ်ပြန်ကြေညာသည်။
စစ်ကောင်စီဝင်များဖြစ်ကြသည့် အောင်ကျော်မင်း၊ ပိုးရယ်အောင်သိန်းတို့ကိုလည်းကောင်း၊ ဝန်ကြီး ၃ ဦးဖြစ်သည့် လ၀က ဝန်ကြီး မြင့်ကြိုင်၊ အလုပ်သမားဝန်ကြီး ပွင့်ဆန်း၊ ကျန်းမာရေးဝန်ကြီး ပွင့်ဆန်း တို့ကို လည်းကောင်း၊ စစ်ထောက်ချုပ် ဒုဗိုလ်ချုပ်ကြီး ကျော်စွာလင်း စုစုပေါင်း ၆ ဦးတို့ကို ပိတ်ဆို့ အရေးယူလိုက်ကြောင်း၊ ထို့ပြင် အမှတ် ၂ သတ္တုတွင်းလုပ်ငန်းကိုလည်း စီးပွားရေးပိတ်ဆို့မှု စာရင်းတွင် ထည့်သွင်းလိုက်ကြောင်း သိရှိရသည်။
ဥရောပသမဂ္ဂက စစ်ကောင်စီဘက်မှ ၉၉ ဦးနှင့် လုပ်ငန်း ၁၉ ခုကို အရေးယူခဲ့ပြီးဖြစ်ကြောင်း ၊ စစ်လက်နက်ပစ္စည်း များ တင်ပို့ရောင်းချမှု၊ စစ်သင်တန်းနှင့် စစ်ဘက်ဆိုင်ရာ ပူးပေါင်းဆောင်ရွက်မှုများကိုလည်း ရပ်ဆိုင်းထားကြောင်း ဥရောပသမဂ္ဂ၏ ထုတ်ပြန်ချက်အရ သိရှိရသည်။
