မြိုင်မြို့ပေါ်ရှိ မီးသတ်ရုံးအနီး တပ်စွဲထားသော စစ်တပ်ဂိတ်ကို ဝင်ရောက် တိုက်ခိုက်
ရန်ကုန်၊ မေ ၁၈
မကွေးတိုင်း၊ မြိုင်မြို့ပေါ်ရှိ မီးသတ်ရုံးနီး တပ်စွဲထားသော အကြမ်းဖက် စစ်တပ်ဂိတ်ကို ဝင်ရောက် တိုက်ခိုက်ခဲ့ကြောင်း ကျားသစ်နက်တပ်မတော်မှ တာဝန်ရှိ သူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ မေလ ၁၇ ရက် ညနေ ၅ နာရီ အချိန်ခန့်တွင် မြိုင်မြို့ပေါ်ရှိ မီးသတ်ရုံး အနီး တပ်စွဲထားသော အကြမ်းဖက် စစ်တပ်ဂိတ်ကို ကျားသစ်နက်တပ်မတော် – Black Leopard Army မြိုင်တပ်ခွဲမှ ဦးဆောင်ပြီး အင်အား ၅၀ ဖြင့် အဖွဲ့ ၃ ဖွဲ့ခွဲ၍ လက်နက်ငယ်များဖြင့် ဝင်ရောက် ပစ်ခတ်တိုက်ခိုက်ခဲ့ ရာ အပြန်အလှန် ပစ်ခတ်တိုက်ပွဲ ၁ နာရီခန့်ကြာမြင့်ခဲ့ကြောင်း သိရသည်။
“အဓိကတော့ မြိုင်မြို့ မီးသတ်ရုံးနားက ခွေးဂိတ်ကို ဝင်ပစ်တာပါ။ ကျန်တဲ့ နှစ်ဖွဲ့က စစ်ကူလမ်း ကြောင်းဖြတ်တောက်တာဝန်ယူတယ်။ အပြန်အလှန် ပစ်ခတ်တိုက်ခိုက်မှု ၁ နာရီလောက်ကြာခဲ့ တယ်။ ထိခိုက်သေဆုံးမှုရှိနိုင်ပေမယ့် မသိရသေးပါဘူး” ဟု ကျားသစ်နက်တပ်မတော်မှ တာဝန်ရှိ သူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယင်းတိုက်ခိုက်မှုအတွင်း အကြမ်းဖက်စစ်သား ထိခိုက်သေဆုံးမှုရှိနိုင်သော်လည်း အတိအကျ သိရှိနိုင်ရန် စုံစမ်းနေဆဲဖြစ်ပြီး ပြည်သူ့ကာကွယ်ရေးတပ်ဖွဲ့ဝင် ၁ ဦး မစိုးရိမ်ရ ဒဏ်ရာရရှိခဲ့ကြောင်း သိရသည်။
အဆိုပါ တိုက်ခိုက်မှုကို ယင်းမာပင်ခရိုင်အမှတ် ၁၁ တပ်ရင်း ၊ တပ်ခွဲ-၄ လရောင်ပြည်သူ့ ကာကွယ် ရေးအဖွဲ့၊ ဗိုလ်စတီးအဖွဲ့ ၊ ကိုမိုက်ခဲအဖွဲ့၊ ကျားပေါက်အဖွဲ့ နှင့် မိုင်းတစ်ထောင်ဗိုလ်ပြောင်အဖွဲ့ တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
