ရန်ကုန်၊ ဩဂုတ် ၂၀
မြန်မာနိုင်ငံတွင် Online Live Sale နှင့် Facebook အခြေခံသော စီးပွားရေးလုပ်ငန်းများအတွက် VPN Service Provider များ ထူထောင်ခွင့်ပေးရန် စစ်ကောင်စီထံတင်ပြထားကြောင်း ကုန်သည်နှင့်စက်မှု အသင်းချုပ် UMFCCIမှအလုပ်အမှုဆောင် စီးပွားရေးသမားတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
စစ်ကောင်စီက ဆိုက်ဘာလုံခြုံရေးဥပဒေကြမ်းကို ရေးဆွဲလျက်ရှိပြီး ယင်းဥပဒေတွင် Facebook လူမှုကွန်ရက်များ အသုံးမပြုနိုင်ရန် စစ်တပ်က ပိတ်ပင်ထားမှုများကို VPN ဖြင့် ကျော်လွှား အသုံးပြုမှုများ ပိတ်ပင်ထားကြောင်း၊ ထို့ကြောင့် စီးပွားရေးလုပ်ငန်းများအတွက် လူမှုကွန်ရက် ဆက်လက်သုံးစွဲနိုင်ရန် တရားဝင် မှတ်ပုံတင်ထားသော VPN Service Provider များ ထူထောင်ခွင့်ပေးရန် UMFCCI က တောင်းဆိုထားပြီး ဆိုက်ဘာလုံခြုံရေးဥပဒေကြမ်းနှင့်ပတ်သက်၍ ပြင်ဆင်သင်သည့် အချက် ၃၀ ကို Review ပေးထားကြောင်း သိရှိရသည်။
အကယ်၍ UMFCCI ၏ တောင်းဆိုမှု အောင်မြင်ပါက ကိုယ်ပိုင် VPN များထူထောင်ပြီး စစ်ကောင်စီထံတွင် တရားဝင် မှတ်ပုံတင်ရမည်ဖြစ်ကြောင်း၊ ထို့ပြင် တရားဝင် မှတ်ပုံတင်ထားသော VPN များကိုလည်း ပြည်သူလူထုအတွင်း ရောင်းချခွင့်များလည်း ရရှိနိုင်မည်ဖြစ်ကြောင်း၊ Facebook လူမှုကွန်ရက်အပေါ် အခြေခံထားသည့် အွန်လိုင်းအရောင်းအဝယ် စီးပွားရေး လုပ်ငန်းများလည်း ဆက်လက် လည်ပတ်နိုင်မည်ဖြစ်ကြောင်း သိရှိရသည်။
ဓာတ်ပုံ – ပြည်တွင်းတွင် စစ်ကောင်စီက ပိတ်ပင်ထားသော Khit Thit Media ၏ လူမှုကွန်ရက် Facebook စာမျက်နှာ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
