စစ်တပ်က အာဏာသိမ်းအပြီး ၃ နှစ်ကျော်အကြာ မြန်မာနိုင်ငံမှ ပြည်သူ ၁၈ ဒသမ ၆ သန်း အရေးပေါ်အကူအညီလိုအပ်နေပြီး အကူအညီလိုအပ်သူ ၆ သန်းမှာ ကလေးငယ်များဖြစ်

ရန်ကုန်| ဩဂုတ် ၂၁

မြန်မာနိုင်ငံမှာ စစ်ရှောင်များအပါအဝင် အရပ်သားပြည်သူ လူ ၁၉ သန်းနီးပါး (၁၈ ဒသမ ၆ သန်း) လူသားချင်းစာနာထောက်ထားမှုဆိုင်ရာ အကူအညီများ အရေးပေါ်လိုအပ်နေကြောင်း ကုလသမဂ္ဂက ဩဂုတ် ၁၉ ရက်နေ့တွင် ထုတ်ပြန်ထားသည်။

အကူအညီလိုအပ်နေသော လူ ၁၉ သန်းနီးပါးထဲမှ ၆ သန်းမှာ ကလေးငယ်များဖြစ်ပြီး ကျယ်ပြန့်သော ပဋိပက္ခများနှင့် ဆိုးရွားသော သဘာဝဘေးအန္တရာယ်များ၏ နာကျင်စေသည့် အကျိုးဆက်များကို ရင်ဆိုင်နေရသည်ဟု ကုလအဖွဲ့ UNOCHA မြန်မာက ဆိုသည်။

ဆိုးရွားသော အကျပ်အတည်းမှုများကြောင့် လူများစွာ အသက်ရှင်သန်ရေး အလွန်ခက်ခဲနေကြပြီး စားနပ်ရိက္ခာ၊ အမိုးအကာနှင့် အသက်ကယ်ဆယ်ရေး အကူအညီများ လိုအပ်နေကြောင်းနှင့် ၂၀၂၄ ခုနှစ် ပထမ နှစ်ဝက်အတွင်း UNOCHA က လူ ၂.၁ သန်းကို အကူအညီပေးခဲ့ကြောင်း ထုတ်ပြန်သည်။

“မြန်မာနိုင်ငံအတွင်း လူသားချင်းစာနာမှုဆိုင်ရာ အခြေအနေဟာ အလွန်အမင်း စိုးရိမ်စရာဖြစ်နေပြီး နိုင်ငံအနှံ့အပြားမှာ ဖြစ်ပွားနေတဲ့ ပဋိပက္ခတွေကြားမှာ အရပ်သားတွေကတော့ ဆုံးရှုံးမှုအများဆုံးဖြစ်ပါတယ်။” ဟု ဆိုသည်။

၂၀၂၄ ခုနှစ် လူသားချင်းစာနာထောက်ထားမှုဆိုင်ရာလိုအပ်ချက်များနှင့် တုံ့ပြန်ရေးစီမံချက်မှာ ၂၁ ရာခိုင်နှုန်းသာ ရန်ပုံငွေထောက်ပံ့ထားပြီး သိသိသာသာ ရန်ပုံငွေစိန်ခေါ်မှုများ ရှိနေသော်လည်း အကူအညီကို ပေးအပ်ခဲ့ကြောင်း သိရသည်။

မြန်မာနိုင်ငံတွင် ပဋိပက္ခများ ပြင်းထန်လာသည်နှင့်အမျှ အရပ်သားများနှင့် အကူအညီပေးရေး ဝန်ထမ်းများသည် နေ့စဉ်နှင့်အမျှ အန္တရာယ်များနှင့် ရင်ဆိုင်နေရကြောင်းလည်း UNOCHA က ပြောသည်။

ပဋိပက္ခတွင် ပါဝင်သူအားလုံးသည် အရပ်သားများနှင့် အကူအညီပေးလုပ်ကိုင်သူများကို အကာအကွယ်ပေးရန် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေ၏ တာဝန်ဝတ္တရားများကို လိုက်နာရန် အရေးကြီးသည်ဟု UN က တိုက်တွန်းထားသည်။

ဓာတ်ပုံ – စစ်ကိုင်းတိုင်းမှ စစ်ဘေးရှောင် ပြည်သူများ။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar