ရန်ကုန်၊ ဩဂုတ် ၃၀
အကြမ်းဖက် စစ်ခေါင်းဆောင် မင်းအောင်လှိုင် ယနေ့ ပဲခူးမြို့သို့ ရောက်ရှိနေပြီး ဘုရားဖူး၊ ယတြာချေ၊ တပ်စစ်ဆေးမှုများ လုပ်ဆောင်ကာ လုံခြုံရေးအလွန်တင်းကျပ်ပြီး မြို့တွင်းနှင့်မြို့ပြင် ယာဉ်အသွားအလာများ ပိတ်ဆို့ထားကြောင်း မြို့ခံများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့မှစတင်ပြီး ပဲခူးမြို့တစ်ခုလုံးတွင် လုံခြုံရေး တင်းတင်းကျပ်ကျပ် လုပ်ဆောင်ထားပြီး ယနေ့ နံနက်ပိုင်းတွင် လုံခြုံရေး အထူထပ်ဆုံး ချထားကြောင်း၊ မြို့တွင်းမြို့ပြင် လမ်းများကို ပိတ်ဆို့ထားခြင်း၊ ကျိုက်ပညာယျသမိုင်းဝင်စေတီ သွားလမ်းများကို ပိတ်ဆို့ထားခြင်းများ လုပ်ဆောင်ကြောင်း၊ အကြမ်းဖက် မင်းအောင်လှိုင် လာရောက်ခြင်းဖြစ်ပြီး သမိုင်းဝင် ကျိုက်ပညာယျစေတီသို့ သွားရောက် ဖူးမြော်ခြင်း၊ ယတြာချေခြင်းများ လုပ်ဆောင်ခဲ့ကာ တပ်စစ်ဆေးခြင်းများကိုလည်း လုပ်ဆောင်နေကြောင်း သိရှိရသည်။
ယခုနှစ် မတ်လ ၁၇ ရက်နေ့တွင် ပဲခူးမြို့ သမိုင်းဝင် ကျိုက်ပညာယျစေတီကို မင်းအောင်လှိုင်နှင့် သားအောင်ပြည့်စုံက ထီးတော်တင်ခဲ့ပြီးနောက် ယခုတစ်ဖန် ဒုတိယအကြိမ်လာရောက် ဘုရားဖူးခြင်း၊ ယတြာချေခြင်းများကို လုပ် ဆောင်ခြင်းဖြစ်ကြောင်း သိရှိရသည်။
“မနက်ပိုင်းမှာ မအလ ရောက်လာတယ်။ ဘုရားသုံးဆူဘက်မှာရှိတဲ့ ကျိုက်ပညာယျ သမိုင်းဝင်စေတီကိုသွားတယ်။ ပြီးတော့ ပဲခူးတပ်တွေနဲ့ ပဲခူးအစိုးရရုံး၊ နန်းတော်ဟောင်းနေရာလည်းသွားတယ်လို့တော့ သိရတယ်။ ခရီးစဉ်ကတော့ ဘုရားဖူး ၊ ယတြာချေ ၊ တပ်တွေ လျှောက်သွားတဲ့ ခရီးစဉ်တဲ့” ဟု ပဲခူးမြို့မှ ဒေသသတင်းရင်းမြစ်က ပြောဆိုသည်။
အကြမ်းဖက် စစ်ခေါင်းဆောင်မင်းအောင်လှိုင်သည် ယခုလအတွင်း မန္တလေး၊ တောင်ငူ၊ ပဲခူးတို့သို့ သွားရောက်၍ ဘုရားဖူးခြင်း၊ ယတြာချေခြင်းနှင့် တပ်စစ် ဆေးခြင်းများကို ခပ်စိတ်စိတ်ပြုလုပ်လာကြောင်း သိရှိရသည်။
ဓာတ်ပုံ – ယနေ့ နံနက်ပိုင်း အကြမ်းဖက် မင်းအောင်လှိုင် ရောက်ရှိစဉ် ပဲခူးမြို့ကို ပိတ်ဆို့ထားသည့် မြင်ကွင်း။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
