ရန်ကုန်၊ ဇန်နဝါရီ ၂၄
ပဲခူးတိုင်း၊ ပေါက်ခေါင်းမြို့နယ်တွင် PDF တပ်ဖွဲ့ဝင်များကို သတ်ဖြတ်မည်ဟု ကြွေးကြော်ထားသည့် ပျူစောထီး ဝင်းကျော် ကို ပစ်ခတ်တိုက်ခိုက်ရာ သေဆုံးခဲ့ကြောင်း ၃၆၀၁ PPDF တပ်ရင်း စစ်ထောက်လှမ်းရေးနှင့် သတင်းပြန်ကြားတာဝန်ခံက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၂၃ ရက်နေ့ ညနေ ၄ နာရီခန့်တွင် ပေါက်ခေါင်းမြို့နယ်၊ ကျွဲဘောင်ဘင်အုပ်စု၊ ကျွဲဘောင်ဘင်ရွာတွင် နေထိုင်သော တော်လှန်ရေး တပ်ဖွဲ့ဝင်များ၏ သတင်းအချက်လက်များကို လိုက်လံ စုံစမ်းနေသော ပေါက်ခေါင်းမြို့နယ် ခလရ ၅၃ တပ်ရင်း သတင်းပေးလည်းဖြစ်၊ ပျူစောထီး အပတ်စဉ် ၁ သင်တန်းဆင်းလည်းဖြစ်သူ ဝင်းကျော် ကိုပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း သိရသည်။
သေဆုံးသွားသော ပျူစောထီးဝင်းကျော်သည် PDF တပ်ဖွဲ့ဝင်များကို အရှင်ဖမ်းမိပါက ငါးခူးကို ဓါးဖြင့် မွန်းသလိုမွန်းပြီးမှ သတ်မည်ဟု ကြွေးကြော် ခြိမ်းခြောက်ထားသူ ဖြစ်ပြီး ပျူစောထီးအပတ်စဉ် ၁ သင်တန်းကို ပေါက်ခေါင်းမြို့နယ် အုပ်ပုံရွာ ခလရ ၅၃ တပ်ရင်းထဲတွင် ၃ လ တက်ရောက်ထားသူဖြစ်ပြီး ပေါက်ခေါင်းမြို့နယ် ထွေ/အုပ်မှ ၁ လလျှင် ငွေကျပ် ၂၀၀၀၀၀ ထောက်ပံ့ လစာပေးထားသူလည်း ဖြစ်ကြောင်း သိရှိရသည်။
“ပျူစောထီးဝင်းကျော်က PDF ရဲဘော်တွေကို အရှင်ဖမ်းဆီးမိရင် ငါးခူကို ဓါးနဲ့ မွှန်းသလို မွှန်းပြီးမှ သတ်မယ်လို့ ကြွေးကြော် ခြိမ်းခြောက်ထားသူပါ။ ပျူစောထီး အပတ်စဉ် ၁ သင်တန်းကိုလည်း ပေါက်ခေါင်းမြို့နယ် အုပ်ပုံရွာ ခလရ ၅၃ တပ်ရင်းထဲမှာ ၃ လ တက်ရောက်ထားသူပါ။ သူ့ကို ပေါက်ခေါင်းမြို့နယ် ထွေ/အုပ်ကလည်း ၁ လကို ငွေကျပ် ၂၀၀၀၀၀ ထောက်ပံ့ လစာ ပေးထားတာပါ။ သူက ပြည်သူ့ကာကွယ်ရေးတပ်ဖွဲ့ဝင်တွေရဲ့ သတင်းအချက်လက်တွေကို လိုက်လံ စုံစမ်းပြီး ပေါက်ခေါင်းမြို့နယ် ခလရ ၅၃ တပ်ရင်းကို သတင်းပေးနေတဲ့ အတွက် ပစ်ခတ်ရှင်းလင်းခဲ့တာပါ” ဟု ၃၆၀၁ PPDF တပ်ရင်း စစ်ထောက်လှမ်းရေးနှင့် သတင်းပြန်ကြားတာဝန်ခံက ပြောဆိုသည်။
ပြည်သူ့ကာကွယ်ရေးတပ်ဖွဲ့ဝင်များအနေဖြင့် ရပ်/ကျေး အုပ်ချုပ်ရေးမှူးများ၊ ပျူစောထီး၊ သတင်းပေးလမ်းပြဒလန်များကို စစ်ရေးပစ်မှတ်များအဖြစ် ဆက်လက် အပြစ်ပေးအရေးယူ ဆောင်ရွက်သွားမည်ဖြစ်ကြောင်း ၃၆၀၁ PPDF တပ်ရင်း စစ်ထောက်လှမ်းရေးနှင့် သတင်းပြန်ကြားတာဝန်ခံက ဆက်လက်ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
