ရန်ကုန်၊ ဧပြီ ၁
ပဲခူးတိုင်း သနပ္ပင်မြို့နယ် အောင်ချမ်းသာရွာရှိ အကြမ်းဖက်စစ်တပ်ခန့် အုပ်ချုပ်ရေးမှူး မြနိုင်က ပြည်သူများကို စစ်မှုထမ်း လစဉ်ကြေးအတင်းအဓမ္မကောက်ခံနေပြီး ငွေမပေးနိုင်သည့် လူငယ်များကို အတင်းအဓမ္မ စစ်မှုထမ်းတပ်သားများအဖြစ် ဖမ်းဆီးခေါ်ဆောင်နေကြောင်း ဒေသပြည်သူများက ရန်ကုန်ခေတ်သစ်သတင်းဌာနသို့ ပြောကြားသည်။
အုပ်ချုပ်ရေးမှူး မြနိုင်က လူစားထိုးလိုသူများထံမှ လူစားထိုးခ တစ်ဦးလျှင် ငွေကျပ် သိန်း ၁၀၀ ရယူပြီး အောင်ချမ်းသာကျေးရွာမှ လူငယ်များကို ဖမ်းဆီးကာ လူစားထိုး စစ်မှုထမ်း တပ်သားများအဖြစ် ပို့ဆောင်လျက်ရှိကြောင်း၊ စုစုပေါင်း အောင်ချမ်းသာကျေးရွာမှ လူငယ် ၄ ဦးကို စစ်မှုထမ်း အစားထိုး တပ်သားအဖြစ် ဖမ်းဆီး စစ်ထဲသို့ ပို့ဆောင်ခဲ့ကြောင်း သိရှိရသည်။
“တခြားရွာတွေက ပိုက်ဆံရှိတဲ့သူတွေက အုပ်ကြီး မြနိုင်ကို လူစားထိုးဖို့ ရှာခိုင်းတယ်။ သူက လူစားထိုး စစ်သား တစ်ဦးကို သိန်း ၁၀၀ နဲ့ ရှာပေးတယ်။ သူက အဲဒီလူတွေကို ပြန်ရောင်းတဲ့ သဘော။ တစ်ခါတလေ အရမ်းဒုက္ခ ရောက်တဲ့ အိမ်ထောင်စုဝင်တွေက ငွေကြေး မပေးနိုင်ရင် ဖမ်းပြီး စစ်ထဲထည့်တာပဲ။ ရွာမှာလည်း ရဲနဲ့ပေါင်းပြီး လောင်းစကားဝိုင်းတွေ မပြတ်ထောင်ပါတယ်” ဟု ဒေသပြည်သူတစ်ဦးက ပြောပြသည်။
အောင်ချမ်းသာကျေးရွာအတွင်းတွင် စစ်မှုထမ်းကြေးဆိုကာ လစဉ်လတိုင်း ကောက်ခံနေကြောင်း၊ ထို့ပြင် သမ ချေးငွေဟုဆိုကာ အိမ်ထောင်စုတိုင်း ကျပ် ၄ သိန်းမှ ၅ သိန်း အထိ ပေးနေရကြောင်း၊ အချို့ ရွာသားများသည် သမချေးငွေတောင် မသိရှိရဘဲ တစ်ရွာလုံး၏ နာမည်များ ထည့်ကာ အကုန်ဆပ်ခိုင်းနေခြင်းဖြစ်ကြောင်း ဒေသပြည်သူများထံမှ သိရှိရသည်။
“စစ်မှုထမ်းကြေးက လွန်ခဲ့တဲ့ ၃ လလောက်က ၂ သောင်းကောက်ပါတယ်။ ၃ သောင်းကောက်တာက ၃ လရှိပါပြီ။ လတိုင်းပေးရပါတယ်။ ရက်ကျော်သွားရင် မိုက်နဲ့ နာမည်တွေ တပ်ပြီး စစ်မှုထမ်းလိုက်ရမယ်ကြေညာတော့ ကြောက်ပြီး အကုန်ထည့်ရတာပါ” ဟု ဒေသပြည်သူတစ်ဦးက ပြောဆိုသည်။
ဓာတ်ပုံ – ရန်ကုန်တွင် စစ်တပ်နှင့်ရဲက လူငယ်များကို ဖမ်းဆီးစစ်ဆေးနေစဉ်။ (ပုံအဟောင်းဖြစ်ပါသည်။)
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
