ရန်ကုန်၊ ဧပြီ ၂
ချင်းပြည်နယ်၊ မင်းတပ်မြို့ပေါ်ကို အကြမ်းဖက် စစ်တပ်က ၂ ရက်ဆက်တိုက် လေယာဉ်ဖြင့် ပေါင် ၅၀၀ ဗုံးများ ဆက်တိုက် ကျဲချ တိုက်ခိုက်ခဲ့ကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့ ပြန်ကြားရေး တာဝန်ခံ ကိုယောမာန်က ရန်ကုန်ခေတ်သစ်မီဒီယာသို့ ပြောဆိုသည်။
ယနေ့ ဧပြီလ ၂ ရက်နေ့ မွန်းလွဲ ၁ နာရီ မိနစ် ၃၀ ခန့်နှင့် ဧပြီလ ၁ ရက်နေ့ ညပိုင်းတို့တွင် အကြမ်းဖက် စစ်တပ်က မင်းတပ်မြို့ပေါ်ကို လေယာဉ်ဖြင့် ပေါင် ၅၀၀ ဗုံးများ ဆက်တိုက် ကျဲချ တိုက်ခိုက်ခဲ့ခြင်းဖြစ်ကြောင်း သိရသည်။
မင်းတပ်မြို့သည် စစ်ကောင်စီ ကင်းစင်နယ်မြေဖြစ်ပြီး တိုက်ပွဲဖြစ်ပွားခြင်းလုံးဝ မရှိဘဲ လေကြောင်း တိုက်ခိုက်မှုများ ၂ ရက် ဆက်တိုက် လုပ်ဆောင်နေခြင်းဖြစ်ကြောင်း၊ စစ်ကောင်စီ၏ လေကြောင်း တိုက်ခိုက်မှု အတွင်း ပြည်သူများ ထိခိုက်မှုမရှိသော်လည်း နေအိမ်များ ပျက်စီးမှုရှိကြောင်း သိရှိရသည်။
“ဒီနေ့ နှစ်ကြိမ်ကျဲတယ်။ အဆောက်အဦတွေပဲ ထိပါတယ်။ ပြည်သူတွေ ထိခိုက်ဒဏ်ရာရတာတော့ မရှိပါဘူး။ မနေ့ကလည်း ၂ ကြိမ်ကျဲတယ်။ မနေ့က ညနေ ၆ နာရီခွဲ ၁ ကြိမ်နဲ့ ည ၁၀ နာရီခွဲ ၁ ကြိမ်ပေါ့။ ၁ ကြိမ်ကျဲရင်တော့ ဗုံး ၂ လုံးပေါ့။ ၂ လုံးတစ်ခါတည်း ကျဲချတာဆိုတော့ ဗုံး ၄ လုံးကျဲချတာပေါ့။ ဒီနေ့လည်း အဲလိုပဲ မွန်းလွဲ ၁ နာရီခွဲ လောက်မှာပဲ ၂ ကြိမ်လာကျဲသွားတယ်။ မိနစ်ပိုင်းပဲခြားတယ်။ ကျဲချတာ ဒီမှာတော့ တိုက်ပွဲတွေ ဖြစ်ပွားတာလည်းမရှိပါဘူး။ စစ်ကောင်စီတပ်သားတွေလည်း မရှိပါဘူး။ စစ်ကောင်စီ ကင်းစင်နယ်မြေပါ” ဟု မင်းတပ်မြို့နယ် ပြည်သူ့အုပ်ချုပ်ရေးအဖွဲ့ ပြန်ကြားရေး တာဝန်ခံ ကိုယောမာန်က ပြောဆိုသည်။
အလားတူ ယနေ့ မွန်းလွဲ ၂ နာရီ ၁၀ မိနစ်အချိန် မိတ္တီလာ ရှမ်းတဲလေဆိပ်မှ တက်လာသော တိုက်လေယာဉ် ၁ စီးက ချင်းပြည်နယ်၊ ကန်ပက်လက်မြို့ကို ဗုံးကျဲတိုက်ခိုက်ခဲ့ကြောင်း သိရှိရသည်။
ယနေ့ ဧပြီလ ၂ ရက်နေ့ မိတ္ထီလာလေတပ်မှ တိုက်လေယာဉ်များ အပါအဝင် စစ်ဘက်ဆိုင်ရာ လေယာဉ် ၁၀ စီး အတက်အဆင်းလုပ်ခဲ့ပြီး မကွေးလေတပ်မှလည်း တိုက်လေယာဉ်များ ဆက်တိုက် ပျံတက်နေကြောင်း လေတပ်ကင်းထောက်အဖွဲ့များက ရန်ကုန်ခေတ်သစ်သတင်းဌာနထံသို့ သတင်းပေးပို့သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
