ရန်ကုန် ၊ ဧပြီ ၄
မန္တလေး၊ အိုးဘိုအကျဥ်းထောင်တွင် မတ်လ ၂၈ ရက်နေ့ လှုပ်ခတ်ခဲ့သော ငလျင်ဒဏ်ကြောင့် ပြင်းထန်စွာထိခိုက်ဒဏ်ရာရရှိထားသော အကျဉ်းသား၊ အကျဉ်းသူများကို စစ်ကောင်စီက ဆေးကုသခွင့် ကန့်သတ်နေကြောင်း မြန် မာ နိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM) မှ ဦးဆောင်ကော်မတီဝင် ကိုသိုက်ထွန်းက ရန်ကုန်ခေတ်သစ်သတင်းဌာနသို့ ပြောကြား သည်။
မတ်လ ၂၈ ရက်နေ့ လှုပ်ခတ်ခဲ့သည့် ငလျင်ကြောင့် အမျိုးသား ၁ ဦးနှင့် အမျိုးသမီး ၂ ဦး အပါအဝင် စုစု ပေါင်း ၄ ဦးသေဆုံးခဲ့ကြောင်း၊ ငလျင်ကြောင့် ပြင်းထန်သည့်ထိခိုက်ဒဏ်ရာကြောင့် စိုးရိမ်ရသူ ၉ ဦးရှိပြီး ဆေးရုံတက်ရန်လိုအပ်သူ ၄၀ ကျော်ရှိကြောင်း PPNM ထံမှ သိရှိရသည်။
“အကျဉ်ထောင်ထဲမှာ ဆရာဝန်အင်အားဟာ ၂ ဦးနဲ့ ၃ ဦးကြားမှာပဲ ပျမ်းမျှရှိတယ်။ ငလျင်လှုပ်လိုက်တဲ့အခါမှာ ထိခိုက်ဒဏ်ရာရတဲ့ အရေအတွက်ဟာ များပြီးတော့ နဂိုမူလဖျားနာရှိတဲ့အခါမှာတော့ တချို့ ဦးခေါင်း လက် ခြေ ထိခိုက်ဒဏ်ရာ ပြင်းပြင်းထန်ထန်ရတဲ့လူတွေက အရေးပေါ်ဆေးဝါးကုသဖို့ လိုအပ်တဲ့ အခြေအနေမျိုးတွေရှိတယ်။ ပြင်ပဆေးရုံတွေမှာ ကုသခွင့်ရဖို့ တင်ပြကြတဲ့အခါမှာလည်း ခွင့်ပြုချက်မရကြဘူး”ဟု ကိုသိုက်ထွန်းဦးက ပြောဆိုသည်။
ငလျင်ကြောင့် ထိခိုက်ဒဏ်ရာရရှိသူများမှာ အကျဉ်းထောင်တွင် ကုသရန်မလွယ်ကူ၍ ပြင်ပဆေးရုံသို့ ပို့ဆောင်ရန် လိုအပ်လျက်ရှိသော်လည်း ကုသခွင့်မရကြောင်း၊ ယနေ့အချိန်ထိ ဆေးဝါးကုသခွင့် ကန့်သတ်ခံထားရသူများစွာရှိကြောင်း၊ ထိခိုက်ဒဏ်ရာရရှိသူများမှာ မိသားစုဝင်များနှင့် ဆက်သွယ်တွေ့ဆုံခွင့်မရသည့် အခြေအနေများလည်း ရင်ဆိုင်ကြုံတွေ့နေရကြောင်း ၊လက်ရှိ အကျဉ်းထောင်တွင် ဆေးဝါးလိုအပ်ချက်များစွာရှိနေပြီး အရက်ပြန်၊ဂွမ်း၊အနာကျက်ဆေးရည်၊ပတ်တီး စသည့် ဆေးဝါးပစ္စည်းများလိုအပ်လျက်ရှိကြောင်း သိရှိရသည်။
မတ်လ ၂၈ ရက်နေ့တွင် လှုပ်ခတ်ခဲ့သည့် ငလျင်ကြောင့် အမျိုးသမီးအဆောင် ၁ နှင့် ၂ တို့တွင် ဆေးဝါးလိုအပ်ချက်များစွာရှိနေပြီး အရက်ပြန်၊ဂွမ်း၊အနာကျက်ဆေးရည်၊ပတ်တီး စသည့် ဆေးဝါးပစ္စည်းများလိုအပ်လျက်ရှိကြောင်း၊ အမျိုးသမီးဆေးရုံအဆောင်များပြိုကျပျက်ဆီးခြင်းနှင့်အတူ အမျိုးသားအဆောင်အလုပ်ရုံအပါအဝင် အဆောင်များနှင့် ကာရံထားသည့် အုတ်ရိုးများပြိုကျခဲ့ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM) က အသိပေးထုတ်ပြန်ထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
