30 C
Yangon

စစ်အာဏာသိမ်းမှု ဆန့်ကျင်သော ငလျင်ဒဏ်သင့် ပြည်သူများထံသို့ အကူအညီများ မရောက်စေရန် စစ်ကောင်စီက မဟာဗျူဟာဖြင့် ပိတ်ပင်နေပြီး စစ်ရေးအရ တိုက်ခိုက်နေဟု ကုလသမဂ္ဂက အသိပေးကြေညာ ​

Must read

စစ်အာဏာသိမ်းမှု ဆန့်ကျင်သော ငလျင်ဒဏ်သင့် ပြည်သူများထံသို့ အကူအညီများ မရောက်စေရန် စစ်ကောင်စီက မဟာဗျူဟာဖြင့် ပိတ်ပင်နေပြီး စစ်ရေးအရ တိုက်ခိုက်နေဟု ကုလသမဂ္ဂက အသိပေးကြေညာ

ရန်ကုန်၊ ဧပြီ ၄

အကြမ်းဖက် စစ်ကောင်စီက ငလျင်ဒဏ်သင့်ဒေသများမှ ပြည်သူများထံသို့ လူသားချင်းစာနာထောက်ထားမှုအကူအညီများကို ပိတ်ပင်ကန့်သတ်နေပြီး အထူးသဖြင့် စစ်အာဏာသိမ်းမှု ဆန့်ကျင်သော ပြည်သူများထံသို့ အကူအညီများ မရောက်ရှိစေရန် တားဆီးခြင်း၊ တိုက်ခိုက်မှုများ လုပ်ခြင်းများ ဆောင်ရွက်နေကြောင်း ကုလသမဂ္ဂလူ့အခွင့်အရေးဆိုင်ရာရုံးက သတင်းထုတ်ပြန် ကြေညာသည်။

အကြမ်းဖက်စစ်တပ်က တော်လှန်ရေးတပ်ဖွဲ့များ စိုးမိုးနေသည့် ငလျင်ဒဏ်သင့်ဒေသမှ ပြည်သူများထံသို့ လူသားချင်းစာနာထောက်ထားမှု အကူအညီများ မရောက်ရှိစေရန် ကန့်သတ်ပိတ်ပင်နေကြောင်း၊ ထို့ပြင် မတ်လ ၂၈ ရက်နေ့ ငလျင်လှုပ်ခတ်ပြီးနောက် စစ်တပ်က လေကြောင်းတိုက်ခိုက်မှု အပါအဝင် တိုက်ခိုက်မှုပေါင်း ၅၃ ခုကို လုပ် ဆောင်ခဲ့ကြောင်း၊ ယင်းတို့အနက်မှ စစ်တပ်၏ တိုက်ခိုက်မှုပေါင်း ၁၆ ခုမှာ ဧပြီလ ၂ ရက်နေ့ စစ်ကောင်စီက အပစ်အခတ်ရပ်စဲသည်ဟု ကြေညာပြီးနောက် လုပ်ဆောင်ခဲ့ခြင်းဖြစ်ကြောင်း သိရှိရသည်။

ယနေ့ ဧပြီလ ၄ ရက်နေ့တွင်လည်း စစ်တပ်က ထပ်မံ၍ တိုက်ခိုက်မှုပေါင်း ၈ ခုကို ဆောင်ရွက်ခဲ့ကြောင်း ၊ စစ်တပ် ထိန်းချုပ်ထားခြင်းမရှိသော နေရာများတွင် လူသားချင်းစာနာထောက်ထားမှု အကူအညီများ မရရှိသဖြင့် ကပ်ဆိုးကြီးဖြစ်နေကြောင်း ကုလသမဂ္ဂလူ့အခွင့်အရေးရုံးမှ ပြောရေးဆိုခွင့်ရှိသူ Ravina Shamdasani က ဂျီနီဗာတွင် သတင်းထောက်များအား ပြောကြားသည်။

မတ်လ ၂၈ ရက်နေ့ လှုပ်ခတ်ခဲ့သော ပြင်းအား ၇ ဒသမ ၇ အဆင့်ရှိ ငလျင်ကြီးမှာ မြန်မာပြည်သူ ၂၈ သန်းနေထိုင်ရာဒေသများသို့ လှုပ်ခတ်ခဲ့ပြီး အဆောက်အအုံများပြိုလဲခြင်း၊ လူမှုအသိုင်းအဝိုင်းကို ပြိုကွဲပျက်စီးစေခြင်း၊ အများစုသော ပြည်သူများ အစား အစာ၊ ရေနှင့် ခိုလှုံရာ ကင်းမဲ့ နေကြောင်း၊ ငလျင်ကြောင့် သေဆုံးသူ ၃၁၀၀ ကျော်ရှိလာကြောင်း သိရှိရသည်။

“အကူအညီကန့်သတ်ချက်များသည် ၂၀၂၁ ခုနှစ် စစ်အာဏာသိမ်းမှုကို မထောက်ခံသော ပြည်သူများထံသို့ မရောက်ရှိစေရန် စစ်တပ်က မဟာဗျူဟာအစိတ်အပိုင်းတစ်ခုအဖြစ် တားဆီးထားကြောင်း” ကုလသမဂ္ဂ OHCHR ၏မြန်မာနိုင်ငံအကြီးအကဲ James Rodehaver က ပြောဆိုသည်။

ငလျင်ဘေးဒဏ်သင့် စစ်ကိုင်းတိုင်းတွင် အကူအညီများ အထူးလိုအပ်နေပြီး လိုအပ်နေသူများကို ကူညီရန် အချိန်နည်းပါးလာနေကြောင်း ကုလသမဂ္ဂလူ့အခွင့်အရေးရုံးမှ ပြောရေးဆိုခွင့်ရှိသူ Ravina Shamdasani ကဆိုသည်။

“လေကြောင်းတိုက်ခိုက်မှုတွေဟာ ထိတ်လန့်တုန်လှုပ်စရာကောင်းပြီး ချက်ချင်းရပ်တန့်ဖို့ လိုအပ်ပါတယ်။ လူ သား ချင်းစာနာထောက်ထားမှုဆိုင်ရာအကူအညီနဲ့ ပြန်လည်ထူထောင်ရေးအပေါ် အာရုံစိုက်ဖို့လိုပါတယ်” ဟု Shamdasani က ပြောကြားသည်။

- Advertisement -spot_img

More articles

LEAVE A REPLY

Please enter your comment!
Please enter your name here

- Advertisement -spot_imgspot_imgspot_imgspot_img

Latest article