ကရင်နီပြည်အတွင်း အကြမ်းဖက်စစ်တပ်က လက်လွှတ်ထားရသော နယ်မြေများ ပြန်လည် သိမ်းပိုက်ရေး ထိုးစစ်ဆင်နွှဲစဉ် စစ်တပ်ဘက်မှ ဗိုလ်မှူး/ဗိုလ်ကြီး အောင်မင်းသူ သေဆုံးသွားကြောင်း သေဆုံးသူ၏ ဇနီးဖြစ်သူ၏ လူမှုကွန်ရက်တွင် ဖော်ပြချက်နှင့် မိတ်ဆွေဖြစ်သူတချို့၏ ပြောဆိုချက်အရ သိရှိရသည်။
အောက်တိုဘာလ ၁၄ ရက်နေ့ တိုက်ပွဲအတွင်း ဗိုလ်မှူး/ဗိုလ်ကြီး အောင်မင်းသူ သေဆုံးခဲ့ခြင်းဖြစ်ပြီး အလောင်းကိုမူ တပ်ရင်းတပ်ဖွဲ့ထံသို့ ပြန်လည် သယ်ယူနိုင်ခြင်းမရှိကြောင်း သိရှိရသည်။
“ကယားပြည်နယ်ဘက်မှာ ကျတာလို့ သိရတယ်။ သူက မြစ်ကြီးနားဇာတိပါ။ ဗိုလ်မှူးအပွင့်မတင်သေးဘူး။ ဒါပေမယ့် လစာတော့ စားနေပြီ” ဟု သေဆုံးသူ ဗိုလ်ကြီးအောင်မင်းသူ၏ အွန်လိုင်းမှ မိတ်ဆွေက ဆိုသည်။
သေဆုံးချိန်တွင် ဗိုလ်ကြီးအောင်မင်းသူထံတွင် မိန်းမဖြစ်သူ မေဖြူဖြူဇင်နှင့် သားသမီး ၂ ဦး ကျန်ရစ်ခဲ့ကြောင်း သိရှိရသည်။
