တော်လှန်ရေးအင်အားစုများကို ကူညီရေးနှင့် မြန်မာစစ်တပ်၏ ဟန်ပြ ရွေးကောက်ပွဲအပေါ် တုံ့ ပြန် ရေးဆိုင်ရာ အမေရိကန် ကွန်ဂရက်လွှတ်တော် ရှင်းလင်းပွဲ ကျင်းပ

NUG ၊ KNU အပါအဝင် တိုင်းရင်းသားများနှင့် တော် လှန်ရေးအင်အားစုများ တက်ရောက်

ရန်ကုန်၊ ဧပြီ ၁၆

မြန်မာ့အရေး ၇ ကြိမ်မြောက် အမေရိကန်ကွန်ဂရက်လွှတ်တော်ဆိုင်ရာ ရှင်းလင်းတင်ပြပွဲကို အမေရိကန်ပြည်ထောင်စု၊ ဝါရှင်တန်ဒီစီတွင် ယနေ့ ကျင်းပပြီး NUG ၊ KNU အပါ အဝင် တိုင်းရင်းသားများနှင့်တော်လှန်ရေးအင်အားစုများ တက်ရောက်ကြကြောင်း အဆိုပါပွဲကို စီစဉ်သော်မြန်မာနိုင်ငံသုတေသနအဖွဲ့ (Burma Research Institute – BRI) က သတင်း ထုတ်ပြန်သည်။

အမေရိကန်စံတော်ချိန် ဧပြီလ ၁၅ ရက်နေ့ (မြန်မာစံတော်ချိန် ယနေ့ ဧပြီလ ၁၆ ရက်နေ့) အဆိုပါ ရှင်းလင်းတင်ပြပွဲကို “ဟန်ပြရွေးကောက်ပွဲများအလွန် အမေရိကန်၏ အခွင့် အလမ်းနှင့် စိန်ခေါ်မှုများ” ခေါင်းစဉ်ဖြင့် ဝါရှင်တန်ဒီစီရှိ Dirksen Senate Office Building ၌ ကျင်းပခြင်းဖြစ်သည်။

အဆိုပါ ဆွေးနွေးပွဲကို အမေရိကန်ပြည်ထောင်စု၊ မေရီလန်းပြည်နယ် အထက်လွှတ်တော်အမတ် Chris Van Hollen ၏ ပံ့ပိုးမှုဖြင့် ကျင်းပခြင်းဖြစ်ပြီး လူကိုယ်တိုင်ရော အွန်လိုင်းမှပါ တက်ရောက်နိုင်သည့် စနစ်ဖြင့် ပြုလုပ်ခဲ့ခြင်း ဖြစ်သည်။

မြန်မာ့အရေးဆွေးနွေးပွဲတွင် အမေရိကန် လွှတ်တော်အမတ်များနှင့် မြန်မာ့ဒီမိုကရေစီအရေး ဦးဆောင်နေသူများက အသီးသီး အမှာစကား ပြောကြားခဲ့ကြပြီး အထက် လွှတ် တော်အမတ် Chris Van Hollen: မြန်မာ့အရေးတွင် အမေရိကန်၏ အခန်းကဏ္ဍနှင့် ပတ် သက်၍ ဗီဒီယိုမှတစ်ဆင့် မိန့်ခွန်းပြောကြားသည်။

ယင်းဆွေးပွဲတွင် အမျိုးသားညီညွတ်ရေးအစိုးရ-NUG ကိုယ်စား လက်ရှိမြန်မာ့အခြေ အနေနှင့် ရှေ့လုပ်ငန်းစဉ်များကို ဝန်ကြီးချုပ် မန်းဝင်းခိုင်သန်းက ရှင်းလင်းပြောဆိုခဲ့ပြီး

ကရင်နီပြည်ကြားဖြတ်အုပ်ချုပ်ရေးကောင်စီ ဥက္ကဋ္ဌ ခူဦးရယ်ကလည်း ကရင်နီပြည်နယ်၏ အခြေအနေနှင့် တော်လှန်ရေးအင်အားစုများ၏ အခန်းကဏ္ဍကို တင်ပြခဲ့သည်။

ပြည်ထောင်စုလွှတ်တော်ကိုယ်စားပြုကော်မတီ-CRPH ကိုယ်စား အဖွဲ့ဝင် ဒေါ်ဖြူဖြူသင်းကလည်း ဗီဒီယိုမှတစ်ဆင့် မိန့်ခွန်းပြောဆိုခဲ့ပြီး BRI ၏ အမှုဆောင်အရာရှိချုပ်ဖြစ်သူ Zo Tum Hmung က အစီအစဉ်တင်ဆက်သူအဖြစ် ဆောင်ရွက်ခဲ့သည်။

အဆိုပါ ဆွေးနွေးပွဲသို့ မြန်မာ့အရေး ကျွမ်းကျင်သူများနှင့် တိုင်းရင်းသားခေါင်းဆောင်များလည်းဖြစ်တက်ရောက်ခဲ့ကြပြီး ဦးကျော်ဇော် (NUG သမ္မတ၏ အကြံပေး)၊ပဒိုစောတောနီး (KNU ပြောရေးဆိုခွင့်ရှိသူ)၊ဦးမိုးဇော်ဦး (NUG နိုင်ငံခြားရေးဝန်ကြီးဌာန အကြံပေး)၊

မေစံပယ်ဖြူ (အမျိုးသမီးအရေးလှုပ်ရှားသူ)၊ ဦးထွန်းခင် (BROUK ဥက္ကဋ္ဌ)တို့ကလည်း တက်ရောက်​ ဆွေးနွေးခဲ့ကြသည်။

အဆိုပါ ရှင်းလင်းပွဲတွင် မြန်မာစစ်တပ်၏ “ဟန်ပြရွေးကောက်ပွဲများ” အပေါ် အမေရိကန်အစိုးရက မည်သို့တုံ့ပြန်သင့်သည်နှင့် တော်လှန်ရေးအင်အားစုများကို မည်သို့ထိရောက်စွာ ကူညီပေးနိုင်မည်နည်းဆိုသည့်အချက်များကို အဓိကထား ဆွေးနွေးခဲ့ကြခြင်း ဖြစ်ကြောင်း သိရှိရသည်။