မေလ ၃ ရက်၊ ၂၀၂၆ ခုနှစ်
ထိုင်း-မြန်မာနယ်စပ် မြန်မာနိုင်ငံဘက်အခြမ်းတွင် တိုက်ပွဲများ ပြင်းထန်လာသည်နှင့်အမျှ ပြီးခဲ့သည့် ဧပြီလမှစတင်၍ မြန်မာစစ်ကောင်စီတပ်ဖွဲ့ဝင် ၆၀ ကျော်ကို သုတ်သင်နိုင်ခဲ့ကြောင်း KNU က သတင်းထုတ်ပြန်သည်ဟု ထိုင်းအခြေစိုက် Khaosod သတင်းဌာနက သတင်းဖော်ပြသည်။
ကရင်အမျိုးသားအစည်းအရုံး (KNU) ၏ ထုတ်ပြန်ချက်အရ ဧပြီလအစောပိုင်းမှစ၍ တိုက်ပွဲများအတွင်း စစ်တပ်ဘက်မှ သေ ဆုံးသူ ၆၀ ဦးကျော်ရှိခဲ့ကြောင်း သိရသည်။
ပြီးခဲ့သည့် သီတင်းပတ်အတွင်း၌ပင် ထိုင်းနိုင်ငံ၊ မယ်ဟောင်ဆောင်ခရိုင်၊ မယ်စဲ့ရင်းမြို့နယ်နှင့် မျက်နှာချင်းဆိုင်ရှိ ကရင် ပြည် နယ်၊ ဖာပွန်မြို့နယ်အတွင်း တိုက်ပွဲများ ဖြစ်ပွားခဲ့ရာ စစ်ကောင်စီတပ်ဖွဲ့ဝင် ၂၆ ဦး သေဆုံးပြီး ၃၅ ဦး ဒဏ်ရာရရှိခဲ့ကာ အချို့ကိုလည်း ဖမ်းဆီးရမိခဲ့သည်ဟု KNU က ဆိုသည်။
ထို့အပြင် မတ်လ ၁၅ ရက်မှ ၂၂ ရက်အတွင်း စစ်ကောင်စီတပ်နှင့် KNLA တပ်မဟာ ၅ တို့အကြား တိုက်ပွဲပေါင်း ၉ ကြိမ် ဖြစ်ပွားခဲ့ကြောင်း ထုတ်ပြန်ချက်တွင် ဖော်ပြထားသည်။
မေလ ၃ ရက်နေ့ ညပိုင်းတွင် ထိုင်းနိုင်ငံဘက်ခြမ်းရှိ မယ်ဆမ်လပ်ကျေးရွာသားများမှာ နယ်စပ်တစ်လျှောက် ပေါက်ကွဲသံနှင့် သေနတ်သံများကို ကြားခဲ့ရသဖြင့် တိုက်ပွဲသစ်များ ဖြစ်ပွားနေကြောင်း အတည်ပြုနိုင်ခဲ့သည်။
အဆိုပါတိုက်ပွဲများသည် စစ်ကူအဖြစ် စေလွှတ်လိုက်သော စစ်ကောင်စီတပ်ဖွဲ့များကို KNLA က ဖြတ်တောက်တိုက်ခိုက်ရာမှ ဖြစ်ပွားခြင်းဖြစ်ကြောင်း သိရှိရသည်။
