ရန်ကုန်၊ မေ ၆
အာဆီယံအလှည့်ကျဥက္ကဋ္ဌ တာဝန်ယူထားသည့် ဖိလစ်ပိုင်နိုင်ငံက အကြမ်းဖက်စစ်တပ်က ဖမ်းဆီးထိန်းသိမ်းထားသော ဒေါ်အောင်ဆန်းစုကြည်ကို အာဆီယံအထူးသံတမန်နှင့် တွေ့ဆုံခွင့်ပေးရန် ယနေ့ မေလ ၆ ရက်နေ့တွင် ဖိလစ်ပိုင်နိုင်ငံခြားရေးဝန် ကြီးဌာနက တရားဝင်ကြေညာချက် ထုတ်ပြန် တောင်းဆိုလိုက်သည်။
ဖိလစ်ပိုင်နိုင်ငံခြားရေးဝန်ကြီးဌာနက ဧပြီလ ၃၀ ရက်နေ့ ဒေါ်အောင်ဆန်းစုကြည်ကို အကျဉ်း ထောင်မှ နေအိမ်အချုပ်သို့ စစ်တပ်က ပြောင်းရွှေ့လိုက်ခြင်းနှင့် အကျဉ်းသားများကို စစ်တပ်က လွတ်ငြိမ်းချမ်းသာခွင့်ပေးလိုက်ခြင်းတို့ကို ကြိုဆိုကြောင်း ပြောဆိုသည်။
သို့သော်လည်း ယင်းလုပ်ဆောင်ချက်များသည် စစ်မှန်သော အမျိုးသားပြန်လည်သင့်မြတ်ရေးသို့ ရှေးရှုရန်အတွက် ပွင့်လင်းမြင်သာမှုရှိရန် လိုအပ်ကြောင်း ထောက်ပြထားသည်။
“အာဆီယံအလှည့်ကျဥက္ကဋ္ဌ၏ မြန်မာနိုင်ငံဆိုင်ရာ အထူးသံတမန်အနေဖြင့် ဒေါ်အောင်ဆန်းစုကြည်နှင့် ခေတ္တတွေ့ဆုံခွင့်ရရှိရန် တောင်းဆိုချက်ကို မြန်မာနိုင်ငံဘက်က ခွင့်ပြုပေးလိမ့်မည်ဟု ဖိလစ်ပိုင်နိုင်ငံက မျှော်လင့်ပါသည်။ ထိုသို့ ခွင့်ပြုပေးခြင်းသည် အားလုံးပါဝင်နိုင်သည့် အမျိုးသားအဆင့် ဆွေးနွေးပွဲများ ဖြစ်ပေါ်လာစေရန်အတွက် အစုအဖွဲ့အားလုံးနှင့် ထိတွေ့ဆက်ဆံရမည့် အထူးသံတမန်၏ အခန်းကဏ္ဍနှင့် ကိုက်ညီမှုရှိမည် ဖြစ်ပါသည်။”ဟု ဖိလစ်ပိုင်နိုင်ငံခြားရေးဝန်ကြီးဌာနက ယနေ့ ကြေညာသည်။
ဖိလစ်ပိုင်နိုင်ငံအနေဖြင့် မြန်မာနိုင်ငံ၏ ရေရှည်တည်ငြိမ်မှုအတွက် ယုံကြည်မှုတည်ဆောက်ရန်မှာ ဒေါ်အောင်ဆန်းစုကြည်ကို သူမ၏ မိသားစုနှင့် လွတ်လပ်စွာ ဆက်သွယ်ခွင့်ပေးရန်လည်း တိုက်တွန်းထားသည်။ ထိုသို့ လုပ်ဆောင်ခြင်းဖြင့် မြန်မာနိုင်ငံအနေဖြင့် အမျိုးသားပြန်လည်သင့်မြတ်ရေးအတွက် စစ်မှန်သော ကတိကဝတ်ရှိမရှိကို ပြသရာရောက်မည်ဟု ဆိုသည်။
ယခုနောက်ဆုံး ဖြစ်ပေါ်တိုးတက်မှုများမှာ အာဆီယံ၏ ဘုံသဘောတူညီချက် ၅ ချက် (Five-Point Consensus) ကို ထိရောက်စွာ အကောင်အထည်ဖော်ရန်အတွက် အရှိန်အဟုန်ကောင်းတစ်ခု ဖြစ်လာနိုင်ကြောင်း၊ မြန်မာ နိုင်ငံကိုယ်တိုင် ဦးဆောင်သည့် ငြိမ်းချမ်းရေးလုပ်ငန်းစဉ်များတွင် အားလုံးပါဝင်နိုင်စေရန် ဖိလစ်ပိုင်နိုင်ငံက တိုက်တွန်းထားသည်။
မြန်မာနိုင်ငံဆိုင်ရာ အာဆီယံအထူးသံတမန်အဖြစ် လက်ရှိ အာဆီယံဥက္ကဋ္ဌ ဖိလစ်ပိုင်နိုင်ငံခြားရေးဝန်ကြီး Theresa Lazaro က တာဝန်ထမ်းဆောင်လျက်ရှိသည်။
ဓာတ်ပုံ- ဒေါ်အောင်ဆန်းစုကြည်နှင့် ဖိလစ်ပိုင်နိုင်ငံခြားရေးဝန်ကြီး Theresa Lazaro ။
