ရန်ကုန်၊ နိုဝင်ဘာ ၂၀
လယ်ဒိုမြို့နယ်တွင် နိုဝင်ဘာလ ၁၆ ရက်နှင့် ၁၇ ရက်နှင့် ၁၉ ရက်နေ့တို့၌ အကြမ်းဖက် စစ်တပ်၏ ခလရ-၂၆၄ တပ်ရင်းက ၁၂၀ မမ လက်နက်ကြီးများဖြင့် ကျောင်းကုန်းကျေးရွာ၊ ခရုကုန်းရွာနှင့် နိုဂေါ်ကျေးရွာတို့ကို ပစ်ခတ်တိုက်ခိုက်ခဲ့ကြောင်း၊ ထို့ပြင် နတ်သံကွင်း၌ နေရာယူထားသော အကြမ်းဖက် စစ်ကောင်စီတပ်သားများက ၁၂၀ မမ လက်နက်ကြီးများဖြင့် ပဲသောင်ကျေးရွာနှင့် သောင်ပုကျေးရွာကို ပစ်ခတ် တိုက်ခိုက်ခဲ့ပြီး ဒရုန်းဖြင့် ဝါးပင်စုကျေးရွာ၊ ခြောက်တဲစုကျေးရွာ၊ အလယ်စုကျေးရွာနှင့် တောကြောင်ပေါက်ကျေးရွာတို့ကို ဗုံးကျဲ တိုက်ခိုက်ခဲ့ကြောင်း သိရသည်။
ယင်း တိုက်ခိုက်မှုအတွင်း အလယ်စုရွာမှ နေအိမ် ၁ လုံးနှင့် ကျေးရွာဆေးပေးခန်းတို့ ပျက်စီးခဲ့ပြီး တောကြောင်ပေါက်ကျေးရွာတွင် ကျောင်းတက်ချိန်၌ စာသင်ကျောင်းကို ဒရုန်းဖြင့် ဗုံးကျဲ တိုက်ခိုက်ခြင်းကြောင့် အသက် ၁၀ နှစ်အရွယ် နော်ရွှင်စင်ဦးနှင့် နော်သူမူးအင် တို့ ထိခိုက်ဒဏ်ရာရရှိခဲ့ပြီး မူကြိုကျောင်း ၁ လုံးနှင့် ခရစ်ယာန်ဘုရားကျောင်းတို့ ပျက်စီးခဲ့ကြောင်း သိရှိရသည်။
အလားတူ ကုန်းချောင်းဝမှ နေရာယူထားသော အကြမ်းဖက် စစ်ကောင်စီ တပ်သားများကလည်း နိုဝင်ဘာလ ၁၇ ရက်နေ့တွင် လက်နက်ကြီး ၁၂၀ မမ လက်နက်ကြီးဖြင့် ဝါးပင်စုကျေးရွာကို ပစ်ခတ် တိုက်ခိုက်ခဲ့ပြီး နေအိမ် ၁ လုံးပျက်စီးခဲ့ကြောင်းသိရသည်။
မူးမြို့နယ်တွင် နိုဝင်ဘာလ ၁၇ ရက်နေ့၌ အကြမ်းဖက် စစ်တပ်၏ ခမရ-၃၀၇ ရွှေဝါတပ်ရင်းက ဟောင်ဝစ်ဇာလက်နက်ကြီးဖြင့် ရွာကြီးအင်း ကျေးရွာကို ၆ လုံးပစ်ခတ်ခဲ့ကြောင်း၊ ယင်းပစ်ခတ်မှုအတွင်း ရွာကြီးအင်းကျေးရွာမှ ဦးပြူးကျော် အသက် ၅၅ နှစ်နှင့် ဦးဝဲကြည် အသက် ၇၅ နှစ်တို့ သေဆုံးခဲ့ပြီး ဦးစိုးကြည် အသက် ၅၀ နှစ်နှင့် ကိုခိုကြီး အသက် ၄၅ နှစ် တို့ ၂ ဦး ထိခိုက်ဒဏ်ရာရရှိခဲ့ကြောင်း သိရှိရသည်။
နိုဝင်ဘာလ ၁၈ ရက်နေ့တွင် ရင်းတိုက်ကုန်းကျေးရွာ၌ နေရာယူထားသော အကြမ်းဖက် စစ်ကောင်စီတပ်သားများသည် ရေလဲကျေးရွာကို လက်နက်ကြီး ၄ လုံး၊ နောင်ကုန်းကျေးရွာ လက်နက်ကြီး ၈ လုံး ပစ်ခတ်ခဲ့ကြောင်း၊ ယင်းနေ့တွင် နတ်သံကွင်းမှ နေရာယူထားသော အကြမ်းဖက် စစ်ကောင်စီတပ်သားများက ရွာကြီးအင်းကျေးရွာကို ၁၂၀ မမ လက်နက်ကြီး ၆ လုံးဖြင့် ပစ်ခတ် တိုက်ခိုက်ခဲ့ကြောင်း သိရသည်။
နိုဝင်ဘာလ ၁၉ ရက်နေ့ နံနက် ၅ နာရီခန့်မှ မွန်းလွဲ ၁ နာရီခွဲ အထိ ရင်းတိုက်ကုန်းကျေးရွာ၊ အုန်းပင်စုကျေးရွာ၊ နတ်သံကွင်းကျေးရွာ၊ နရွဲပင်ကျေးရွာတို့တွင် နေရာယူထားသော ခမရ-၃၀၇ တပ်ရင်းနှင့် ကျောက်ကြီးမြို့ရှိ ခမရ-၃၅၁ နှင့် ခလရ-၆၀ တပ်ရင်းတို့က နောင်ကုန်းကျေးရွာ၊ လေးပေါမူကျေးရွာ၊ တမာခေါကျေးရွာ၊ တောင်စုအရှေ့ကျေးရွာ၊ တောင်စုအနောက်အနောက်၊ မယမ်းစိန်လေး ကျေးရွာ၊ ရွာကြီးအင်းကျေးရွာ၊ ကျွန်းကုန်းကျေးရွာ၊ ငနွားဆိပ်ကျေးရွာ၊ အညာစုကျေးရွာ၊ ရေလဲကရင်ကျေးရွာ၊ ရေလဲဗမာကျေးရွာနှင့် ရန်မျိုးအောင်ကျေးရွာ တို့ကို လက်နက်ကြီး ၅၁ လုံးဖြင့် ပစ်ခတ် တိုက်ခိုက်ခဲ့ကြောင်း၊ ယင်းပစ်ခတ်မှုအတွင်း ရေလဲဗမာကျေးရွာမှ နေအိမ် ၂ လုံး ပျက်စီးခဲ့ကြောင်း သိရှိရသည်။
အကြမ်းဖက် စစ်တပ်က ကျေးရွာများ လက်နက်ကြီးများဖြင့် ပစ်ခတ်ပြီးနောက် နောင်ကုန်းကျေးရွာနှင့် ရွာကြီးအင်းကျေးရွာကို စစ်ကြောင်းထိုးဝင်ရောက်လာ၍ ကျေးရွာ ၁၀ ရွာကျော်မှ ပြည်သူ ၆၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေရပြီး စာနပ်ရိက္ခာနှင့် ကျန်းမာရေးစောင့်ရှောက်မှုများ လိုအပ်လျက်ရှိကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
