ရန်ကုန်၊ မတ် ၁၄
ကုလသမဂ္ဂစားနပ်ရိက္ခာအစီအစဉ် WFP က ရန်ပုံငွေ မလုံလောက်တော့သဖြင့် မြန်မာနိုင်ငံမှ လူဦးရေ ၁ သန်းအတွက် စားနပ်ရိက္ခာအထောက်အပံ့များကို ရပ်ဆိုင်းတော့မည်ဖြစ်ကြောင်း ယနေ့ တရားဝင် သတင်းထုတ်ပြန် ကြေညာသည်။
မြန်မာနိုင်ငံအတွင်း ပဋိပက္ခများ၊ နေရပ်စွန့်ခွာ ရွှေ့ပြောင်းမှုများနှင့် သွားရောက်ကူညီခွင့် ကန့်သတ်ချက်များ တိုးမြင့်လာခြင်းတို့ကြောင့် စားနပ်ရိက္ခာအကူအညီလိုအပ်ချက်များ ပိုမိုများပြားလာနေသည့်အချိန်တွင် ယခုကဲ့သို့ အထောက်အပံ့များ ရပ်ဆိုင်းရန်ဖြစ်လာရခြင်းဖြစ်ကြောင်း သိရှိရသည်။
လက်ရှိတွင် ရန်ပုံငွေ အသစ်မရရှိပါက WFP က အသက် ၅ နှစ်အောက် ကလေးများ၊ ကိုယ်ဝန်ဆောင်များ၊ နို့တိုက် မိခင်များနှင့် မသန်စွမ်းသူများ ပါဝင်သော လူဦးရေ ၃၅၀၀၀ ခန့်ကိုသာ အကူအညီများ ပေးနိုင်တော့မည်ဖြစ်ကြောင်း၊ အထောက်အပံ့များ ရပ်ဆိုင်းမှုသည် ရိုဟင်ဂျာများ အပါအဝင် ရခိုင်ပြည်အလယ်ပိုင်းရှိ နေရပ်စွန့်ခွာသူ ၁ သိန်းကိုပါ ထိခိုက်မည်ဖြစ်ကြောင်း သိရှိရသည်။
“အခုဖြစ်လာမယ့် အကူအညီရပ်ဆိုင်းမှုတွေက အသက်ရှင်သန်ရေးအတွက် WFP အကူအညီ တစ်ခုတည်းကိုသာ အားထားနေကြရတဲ့ နိုင်ငံတစ်ဝန်းက ထိခိုက်လွယ် ရပ်ရွာလူထုတွေအတွက် ပြင်းပြင်းထန်ထန်ဆိုးရွားစွာ ရိုက်ခတ်နိုင်ပါတယ်။ ကျနော်တို့ WFP အနေနဲ့ကတော့ မြန်မာပြည်သူတွေကို ထောက်ပံကူညီသွားမယ်ဆိုတဲ့ ကတိကဝတ်အတိုင်း ဆက်လက်ကြိုးစား လုပ်ဆောင်နေမှာ ဆိုပေမယ့်လည်း အကူအညီ တကယ်လိုအပ်နေတဲ့ သူတွေဆီ အကူအညီတွေ ဆက်လက် ပေးပို့နိုင်ဖို့ရာ ရန်ပုံငွေတွေ ချက်ချင်းလက်ငင်းရရှိဖို့ အရေးကြီးပါတယ်” ဟု WFP ၏ မြန်မာနိုင်ငံဆိုင်ရာ ဌာနေကိုယ်စားလှယ် Michael Dunford က ပြောဆိုသည်။
ယခုနှစ်တွင် မြန်မာပြည်သူပြည်သူများအတွက် အသက်ကယ်ဆယ်ရေး ရိက္ခာအထောက်အပံ့များ ဆက်လက်ပေးအပ်နိုင်ရန် WFP က အမေရိကန်ဒေါ်လာ သန်း ၆၀ အရေးတကြီး လိုအပ်နေကြောင်း သိရှိရသည်။
မြန်မာနိုင်ငံတွင် လူဦးရေ ၁၅ ဒသမ ၂ သန်းခန့်သည် တစ်နေ့တာ စားနပ်ရိက္ခာလိုအပ်ချက်ကို မပြည့်နိုင်သည့် အရေး ကြုံတွေ့နေရပြီး ယခင်နှစ်တွင် ရှိခဲ့သည့် လူဦးရေ ၁၃ ဒသမ ၃ သန်းမှ တိုးမြှင့်လာခြင်းဖြစ်ကြောင်း၊ လူဦးရေ ၂ ဒသမ ၃ သန်းသည် ဆာလောင်မွတ်သိပ်မှုဒဏ်ကို အရေးပေါ် အခြေအနေအထိ ရင်ဆိုင်နေရကြောင်း WFP က ထုတ်ပြန်ကြေညာသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
