ရန်ကုန်၊ ဧပြီ ၂
မန္တလေးမြို့ပေါ်တွင် ပြည်သူများ ညအချိန် လမ်းမများ၌ ဖြစ်သလို အိပ်စက်နေရပြီး စစ်ကောင်စီ၏ ထောက်ပံ့မှုများ လုံးဝ မရရှိသေးကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၈ ရက်နေ့တွင် လှုပ်ခတ်ခဲ့သော အင်အားပြင်း မြေငလျင်၏ နောက်ဆက်တွဲအဖြစ် မန္တလေးမြို့ပေါ်တွင် နေ့စဉ် ငလျင်များ ဆက်တိုက် လှုပ်ခတ်နေခြင်းကြောင့် ပြည်သူများသည် ညအချိန်တွင် နေအိမ်များ၌ အိပ်စက်ရဲခြင်းမရှိတော့ဘဲ လမ်းမတွင်သာ ဖြစ်သလို အိပ်စက်နေရခြင်းဖြစ်ကြောင်း သိရသည်။
ထိုသို့ လမ်းမများပေါ်တွင် ဖြစ်သလို အိပ်စက်နေရခြင်းကြောင့် ခြင်ပေါများပြီး ခြင်ထောင်များ အရေးပေါ်လိုအပ်နေကာ သက်ကြီးရွယ်အိုများနှင့် ကလေးငယ်များ ခြင် ကြောင့်ဖြစ်ပွားနိုင်သည့် နောက်ဆက်တွဲ ရောဂါများ ဖြစ်ပွားလာမည်ကို စိုးရိမ်နေကြကြောင်း သိရှိရသည်။
ထို့ပြင် အကြမ်းဖက် စစ်ကောင်စီ၏ ကူညီ ထောက်ပံ့မှုများသည်လည်း လက်ရှိချိန်ထိ ရောက်ရှိလာခြင်းမရှိသေးဘဲ ပြည်သူများ၏ ကိုယ်ထူကိုယ်ထ လှူဒါန်းမှုများသာ ရှိကြောင်း သိရသည်။
“မန္တလေးမှာ ငလျင်က ခဏခဏ လှုပ်နေလို့ ရပ်ကွက်တွေထဲက ပြည်သူတွေ လမ်းမတွေမှာ ဖြစ်လို အိပ်နေကြရတာ ကလေးငယ်လေးတွေ သက်ကြီးရွယ်အိုတွေရော ခြင်တွေက အရမ်းပေါတယ်။ ခြင်ထောင်တွေလှူမဲ့ အလှူရှင်တွေကို မျှော်လင့်နေကြပါတယ်။ ဒီနေ့အထိ စစ်ကောင်စီ ထံက ဘာအကူအညီ ဘာအထောက်အပံ့မှ မရသေးပါဘူး” ဟု ဒေသပြည်သူ တစ်ဦးက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
