ရန်ကုန်၊ ဧပြီ ၃
မန္တလေးတိုင်း၊ ညောင်ဦးမြို့နယ်တွင် အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ ကျေးရွာများကို စစ် ကြောင်းထိုး ဝင်ရောက်ကာ စစ်ရှောင်တဲများကို မီးရှို့ဖျက်ဆီးနေကြောင်း People’s Democratic Army – PDA မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာန ထံသို့ ပြောဆိုသည်။
ယမန်နေ့ ဧပြီလ ၂ ရက်နေ့တွင် ညောင်ဦးမြို့နယ်၊ ကျောက်ပြင်ကန်ကျေးရွာကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ စစ်ကြောင်းထိုးဝင်ရောက် စီးနင်းခဲ့ကြောင်း ၊ ထို့သို့ ဝင်ရောက် စီးနင်းပြီးနောက် အကြမ်းဖက် စစ်ကောင်စီ တပ်သားများသည် ကျောက်ပြင်ကန်ရွာမှနေ၍ စစ်ဘေးရှောင် ပြည်သူများကို ၆၀ မမ လက်နက်ကြီးများ၊ လက်နက်ငယ်များဖြင့် ရမ်းသန်းပစ်ခတ်ကာ စစ်ဘေးရှောင်များနေထိုင်သော တောတဲများကိုလည်း မီးရှို့ ဖျက်ဆီးခဲ့ကြောင်း သိရှိရသည်။
“စစ်တပ် စစ်ကြောင်းက ဧပြီလ ၁ ရက်နေ့တည်းက ဇီးဇာမျှင်ရွာကို စရောက်တာ။ အဲဒီကနေပြီး စစ်ကြောင်း ၂ ကြောင်းခွဲပြီး ကျေးရွာတွေကို ဝင်ရောက် စီးနင်းနေတာပေါ့။ မနေ့က စစ်ကြောင်း တစ်ကြောင်းက ကျောက်ပြင်ကန်ရွာကိုရောက်တယ်။ နောက် စစ်ကြောင်း တစ်ခုက မြေသန့်တောင်ရွာရောက်နေတယ်” ဟု People’s Democratic Army – PDA မှ တာဝန်ရှိသူတစ်ဦးက ပြောဆိုသည်။
စစ်တပ်စစ်ကြောင်းက ကျောက်ပြင်ကန်ကျေးရွာကို ပထမအကြိမ် မီးရှို့ဖျက်ဆီးခဲ့ဖူးပြီး ကျေးရွာအတွင်းရှိ နေအိမ်၁၂ လုံး မီးရှို့ ဖျက်ဆီးခဲ့ကာ ငွေကျပ် သိန်း ၅၀၀၀ နီးပါး တန်ဖိုးရှိ ပြည်သူပိုင်ပစ္စည်းများကို ပျူစောထီးများနှင့် အကြမ်းဖက် စစ်သားများက ခိုးယူဖောက်ထွင်း သယ်ဆောင်သွားခဲ့ကြောင်း သိရှိရသည်။
ဓာတ်ပုံ – စစ်တပ်က ပြည်သူပိုင်ကျေးရွာများကို မီးရှို့ဖျက်ဆီးနေစဉ်။ (ပုံအဟောင်းဖြစ်ပါသည်။)
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
