ရန်ကုန်၊ ဧပြီ ၃
အကြမ်းဖက်စစ်ကောင်စီ၏ အပစ်အခတ်ရပ်စဲရေးမှာ စည်းမရှိ၊ ကမ်းမရှိဖြစ်နေပြီး တိုက်ချင်ရာတိုက်နေကာ ကိုယ့်ကြေညာချက်ကိုယ် ပြန်လည်ချိုးဖောက်နေဟု KIO ပြောခွင့်ရပုဂ္ဂိုလ် ဗိုလ်မှူးကြီးနော်ဘူက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ညပိုင်း စစ်ကောင်စီက ဧပြီလ ၂ ရက်နေ့မှ ဧပြီလ ၂၂ ရက်နေ့အထိ ရက်ပေါင်း ၂၀ အကြာ အပစ်အခတ်ရပ်စဲသည်ဟု ကြေညာခဲ့သော်လည်း ယနေ့ နံနက်ပိုင်းတွင် ၀ိုင်းမော်သို့ စစ်ကြောင်းထိုးလာသဖြင့် တိုက်ပွဲဖြစ်ပွားနေကြောင်း၊ ဗန်းမော်တွင်လည်း နေ့ရော ညပါ လေယာဉ်ဖြင့် ဗုံးကျဲနေပြီး အင်းတော်တွင်လည်း စစ်တပ်က လေယာဉ်ဖြင့် ဗုံးကျဲနေကြောင်း ဗိုလ်မှူးကြီး နော်ဘူက ရှင်းပြသည်။
“တိုက်ပွဲက ၃ နေရာမှာဖြစ်နေတယ်။ ၀ိုင်းမော်မှာဖြစ်တယ်။ အောက်အင်းတော်မှာဖြစ်တယ်။ ဗန်းမော်မှာလည်း လေကြောင်းတိုက်ခိုက်မှုတွေ လုပ်နေတယ်” ဟု ဗိုလ်မှူးကြီး နော်ဘူက ဆိုသည်။
စစ်ကောင်စီ၏ အပစ်အခတ်ရပ်စဲရေးသည် မည်သည့်အဖွဲ့နှင့်မျှ သဘောတူညီချက်မယူဘဲ တစ်ဖက်သတ်ကြေညာပြီး ယင်းကြေညာချက်ကိုပင် စစ်တပ်က ပြန်လည် ချိုးဖောက်နေကြောင်း ၎င်းက ဆိုသည်။
“ဘယ်တော့မှလည်း ကတိမတည်ဘူး။ အပစ်အခတ်ရပ်စဲရေးကို ဘယ်အဖွဲ့နဲ့မှ သဘောတူညီချက် မယူဘဲ တစ်ဖက်သတ်ကြေညာပြီး စည်းမရှိ၊ ကမ်းမရှိ တိုက်ချင်ရာ တိုက်နေတာ။ သူတို့ရဲ့ သဘောတူညီချက်ကို သူတို့ဟာသူတို့ ပြန်ပြီး ချိုးဖောက်နေတယ်” ဟု ဗိုလ်မှူးကြီး နော်ဘူကရှင်းပြသည်။
လက်ရှိ မင်းအောင်လှိုင်က အပစ်အခတ်ရပ်စဲရေး ကြေညာမှုသည် ဘန်ကောက်မြို့တွင် ပြုလုပ်မည့် BIMSTEC အစည်းအဝေးတွင် တက်ရောက်ရာတွင် အပြကောင်းစေရန် နှင့်နိုင်ငံတကာ ဖိအားပေးမှု မရှိစေရန် လုပ်ဆောင်သည့် ကြေညာမှုဟုလည်း ဆိုနိုင်ကြောင်း ဗိုလ်မှူးကြီးနော်ဘူက သုံးသပ်ပြောဆိုခဲ့သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
