မြ၀တီမှ ထွက်ပြေးလာသော ကျားဖြန့် တရုတ်များနှင့် နိုင်ငံခြားသားများ ဘားအံ၊ ကျိုက်ထိုလမ်းကြောင်းမှတစ်ဆင့် ရန်ကုန်သို့ တက်၊ စစ်တပ်ကလည်း ဂိတ်များဖွင့် ငွေအတောင်းအရမ်းကြမ်းနေပြီး စစ်တပ်လက်အောက်ခံကရင်လက်နက်ကိုင်များက သယ်ယူပို့ဆောင်နေ

ရန်ကုန်၊ နိုဝင်ဘာလ ၂၇

ကရင်ပြည်နယ်၊ မြ၀တီမြို့နယ်အတွင်းမှ ထွက်ပြေးလာသော ကျားဖြန့် တရုတ်များနှင့် နိုင်ငံခြားသားများ ဘားအံ၊ ကျိုက်ထိုလမ်းကြောင်းမှတစ်ဆင့် ရန်ကုန်သို့ တက်ရန် ကြိုးစားနေကြောင်း ကရင်စစ်ရေးသတင်းရင်းမြစ်နှင့် ဒေသသတင်းရင်းမြစ်များက ရန်ကုန်ခေတ်သစ်သတင်းဌာနထံသို့ ပြောဆိုသည်။

ယခုရက်ပိုင်းအတွင်း မွန်ပြည်နယ်၊ ကျိုက်ထိုမြို့နယ်ရှိ “ရိုးရိုးလေး (၂)” ဟိုတယ် ၌ တရုတ်နိုင်ငံသား ကျားဖြန့်လုပ်ကိုင်သူ ၁၀၀ ကျော်ခန့် တည်းခိုခဲ့ပြီး အဆိုပါ တရုတ်နိုင်ငံသား အများစုမှာ အသက်ငယ်ရွယ်သူများဖြစ်ကြောင်း၊ ထူးခြားချက်မှာ မြန်မာနိုင်ငံသားစိစစ်ရေးကတ် ဖြစ်သော ရှမ်းပြည်နယ်မှတ်ပုံတင် ၁၃/… မှတ်ပုံတင်ကိုင်ဆောင်ထားသော တရုတ်တချို့လည်း ပါဝင်ကြောင်း၊ နိုင်ငံသား စိစစ်ရေးကတ် ကိုင်ဆောင်ထားသော်လည်းတရုတ်များမှာ မြန်မာစကားပင် မတတ်ကြောင်း၊ အဆိုပါ တရုတ်နိုင်ငံသားများကို မြဝတီမှ ဘားအံမြို့အထိ သယ်ယူရာတွင် စစ်တပ်နှင့်အဆင်ပြေသော လက်နက်ကိုင်များက လိုင်စင်မဲ့ ကားများ၊ တောတွင်းလမ်းများမှတစ်ဆင့် သယ်ဆေင်လာခဲ့ခြင်းဖြစ်ကြောင်း ၊ ထိုမှတစ်ဆင့် ကျိုက်ထိုမြို့သို့ ရောက်ရှိလာခြင်းဖြစ်ကြောင်း သိရှိရသည်။

“ဒီလိုမျိုး လူကုန်ကူးမှုနဲ့ဆက်စပ်တဲ့ ကျားဖြန့်ဆိုတာတွေ ပေါ်ပေါ်ထင်ထင်ကြီး သွားလာနေတာကို မြင်ရတော့ စိုးရိမ်စရာပဲ။ အထက်က တာဝန် ရှိသူတွေအနေနဲ့ သေချာစုံစမ်း အရေးယူသင့်ပါတယ်” ဟု ဒေသသတင်းရင်းမြစ်က ပြောဆိုသည်။

ကျားဖြန့်တရုတ်များမှာ ကျိုက်ထိုမြို့မှ ရန်ကုန်လေဆိပ်သို့ ဆက်လက်သွားရန် ကြိုးစားနေကြပြီး ယင်းကျားဖြန့်တရုတ်အဖွဲ့ကို သယ်ပေးနေသူများရှိကြောင်း၊ သယ်ယူသူများမှာ “ဆံရှည်” ခေါင်းဆောင်နှင့် “သူရ” ဆိုသူတို့က စီမံနေခြင်းဖြစ်ကြောင်း ၊ ပထမအသုတ်အဖြစ် ကျားဖြန့်တချို့ကို ရန်ကုန်သို့ ပို့ဆောင်ပြီးဖြစ်ကြောင်း၊ ယခု ကျိုက်ထိုမှ တရုတ်ကျားဖြန့်များကို ဒုတိယအသုတ်အဖြစ် ရန်ကုန်သို့ သယ်ယူရန် ပြင်ဆင်နေကြခြင်းဖြစ်ကြောင်း သိရှိရသည်။

ကျားဖြန့်တရုတ်များမှာ အသုတ်လိုက် ထွက်ခွာနေခြင်းဖြစ်ပြီး တစ်သုတ်လျှင် ကျပ် သိန်း ၁,၀၀၀ ကျော်မှ သိန်း ၁,၅၀၀ ခန့်အထိ ပေး၍ ရန်ကုန်သို့ ထွက်ခွာနေကြခြင်းဖြစ်ကြောင်း သိရှိရသည်။

မြတဝီမှ ဘားအံ၊ မော်လမြိုင်၊ မုဒုံ စသည့် ကျားဖြန့်များ ဖြတ်သန်းရာ လမ်းတစ်လျှောက်တွင်လည်း စစ်တပ်နှင့်ရဲများက ငွေညှစ်မှုများ အကြီးအကျယ်လုပ်ဆောင်နေပြီး ၂၆ မိုင်စစ်ဆေးရေးဂိတ်တွင် ခရီးသည်တင်ကားအသေးဆိုပါက လူ ၃ ယောက်ထက်ပိုလျှင် ကား ၁ စီး ၈ သောင်းကျပ် ပေးရကြောင်း၊ အလားတူ ၃ လမ်းဆုံဂိတ်ကို ဖြတ်သန်းပါကလည်း ကား ၁ စီးလျှင် ရဲကြေး ၃ ထောင် ကျပ်၊ ယဥ်ထိန်း ၃ထောင် ကျပ်၊ ယဥ်မှတ်ပုံတင်ဌာနက ၁ သောင်း ကျပ် ၊ စစ်သားဂိတ် ၂ ခုက တစ်ဂိတ်လျှင် ၁ သောင်းကျပ်၊ စရဖဂိတ်က ၁ သောင်းကျပ်၊ လဝကဂိတ်က ၅ ထောင်ကျပ် ၊ စသည်ဖြင့် ပေးချေရကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar