ရန်ကုန်၊ ဧပြီ ၂၉
ကရင်ပြည်နယ်၊ မြ၀တီမြို့တွင်းသို့ ခွင့်ပြုချက်မရှိဘဲ လက်နက်ကိုင် ဝင်ရောက်ပါက အရေးယူမည်ဟု စစ်တပ်က ပေါ်တင်အမိန့်ပေးလာသဖြင့် စစ်တပ်နှင့် မိတ်ဖက် ကရင်လက်နက်ကိုင်အဖွဲ့ တချို့အကြား ဆက်ဆံရေး မပြေလည်ဘဲ တင်းမာမှုများရှိနေကြောင်း ထိုင်း-မြန်မာနယ်စပ်မှ ကရင်စစ်ရေး သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၂၃ ရက်နေ့ မြ၀တီမြို့စောင့်တပ်ဖြစ်သော ခလရ ၂၇၅ တွင် စစ်တပ်က မိတ်ဖက်ဖြစ်နေသော ကရင်လက် နက်ကိုင်အဖွဲ့များဖြစ်သည့် KNA ၊ BGF ၊ DKBA ၊ KNU/KNLA PC အပါအဝင် ခေါ်ယူတွေ့ဆုံခဲ့ပြီး လိုက်နာရမည့် စည်းကမ်းချက် ၈ ချက်ကို ချမှတ်လာကြောင်း၊ ယင်းစည်းကမ်းများအနက်မှ မြ၀တီမြို့အတွင်းသို့ ခွင့်ပြု ချက်မရှိဘဲ လက်နက်ကိုင်ဝင်ရောက်မှုများကို အရေးယူမည်ဆိုသော အချက်မှာ ကရင်လက်နက်ကိုင်အဖွဲ့တချို့ မကျေလည်ကြကြောင်း သိရှိရသည်။
စစ်တပ်က ကရင်လက်နက်ကိုင်အဖွဲ့များကို တွေ့ဆုံ ညွှန်ကြားရာတွင် မြဝတီမြို့အတွင်း သွားလာရာတွင် လက်နက်ကိုင် တပ်ဖွဲ့ဝင်များ ယူနီဖောင်းများကို ဖားတစ်ပိုင်း ငါးတစ်ပိုင်း ဝတ်ဆင်ခြင်း မပြုရန်နှင့် သက်ဆိုင်ရာ လက်နက်ကိုင် အဖွဲ့အစည်းများ၏ စစ်စည်းကမ်းနှင့်အညီ သွားလာကြရန်၊ မြဝတီမြို့ပေါ် ရပ်ကွက်များအတွင်း နေထိုင်သည့် လက်နက်ကိုင် တပ်ဖွဲ့ဝင်များ မလိုအပ်ဘဲ လက်နက် ကိုင်ဆောင်ခြင်း မပြုရန်နှင့် လက်နက်များကို သက်ဆိုင်ရာ တပ်ရင်း/ဌာန (သို့မဟုတ်) စည်းကမ်းထိန်းသိမ်းရေးရုံးများတွင် အပ်နှံထားရန်၊ အမှတ် ၂ ချစ်ကြည် ရေးတံတား ပြန်ဖွင့်ချိန်တွင် တရားမဝင်ဂိတ်များအား ပြန်လည် ထိန်းချုပ်ပေးရန်၊ မြဝတီမြို့အတွင်း ခွင့်ပြုချက်မရှိဘဲ ကိုင်ဆောင်ထားသည့် လက်နက်များကို စစ်ဆေးတွေ့ရှိပါက တရားမဝင် လက်နက်ကိုင်ဆောင်မှုဖြင့် အမှုဖွင့် အရေးယူမည်ဖြစ်ကြောင်း စစ်တပ်က အမိန့်ပေး ညွှန်ကြားသည်။
ယင်းအပြင် ဌာနဆိုင်ရာများနှင့် လက်နက်ကိုင်အဖွဲ့အစည်းများ စုပေါင်းသန့်ရှင်းရေးပြုလုပ်သည့် နေ့များတွင် ပူးပေါင်းပါဝင်ဆောင်ရွက်ရာ၌ သက်ဆိုင်ရာ ယူနီဖောင်းများကို သန့်ရှင်းသပ်ရပ်စွာ ဝတ်ဆင်ကြရန် (လုံခြုံရေး တပ်ဖွဲ့ဝင်များမှ လွဲ၍ လက်နက် ကိုင်ဆောင်လာခြင်း မပြုရန်)၊ မြို့တွင်း စားသောက်ဆိုင်များ / KTV များတွင် ယူနီဖောင်း ဝတ်ဆင်ပြီး လက်နက်များ ကိုင်ဆောင်ကာ ဝင်ရောက်စားသောက်ခြင်း မပြုရန်၊ သက်ဆိုင်ရာ လက်နက်ကိုင်အဖွဲ့အစည်းများမှ ဖွင့်လှစ်ထားသည့် စားသောက်ဆိုင်များ / KTV များတွင် တပ်ဖွဲ့ဝင်များအား ယူနီဖောင်းဝတ်ဆင်ပြီး လက်နက်များကိုင်ဆောင်ကာ လုံခြုံရေးချထားခြင်း မပြုရန်၊မြို့ပေါ်တွင် ကားများ စည်းကမ်းမဲ့ တရကြမ်းမောင်းနှင်ခြင်းနှင့် လက်နက်များ ထောင်ပြီး ကိုင်ဆောင်သွားလာခြင်း မပြုရန် တို့ကိုလည်း စစ်တပ်က ညွှန်ကြားသည်။
စစ်တပ်၏ ညွှန်ကြားချက်အနေဖြင့် ရှေ့ဆက်သွားမည့် ငြိမ်းချမ်းရေး လမ်းစဉ်တွင် ဆူးငြောင့်ခလုတ်မဖြစ်စေရန် ဆိုသော အချက်လည်း ပါဝင်ကြောင်း သိရှိရသည်။
“အခု တင်းမာမှုဖြစ်တာက DKBA နဲ့ ငြိနေတာ။မြ၀တီကိုလာရင် လက်နက်ကို ခွင့်ပြုချက်နဲ့လာရမယ်ဆိုတာ DKBA ဘက်က သိပ်မကျေလည်ဘူး။ နောက်တစ်ခါ ဂိတ်တွေကို ငွေမကောက်ခိုင်းတာ။ အဲဒါလည်း အမှတ် ၂ တံတားဖွင့်လို့ ကုန်သွယ်ရေးစရင် ပြဿနာဖြစ်လာနိုင်တယ်။ ကျန်တဲ့ လက်နက်ကိုင်တွေကတော့ စစ်တပ်အလိုအတိုင်းပဲ။ နောက်ပြီးတော့ စစ်တပ်က DKBA ရဲ့ နေရာတွေကို ဒရုန်းနဲ့ဗုံးကျဲတာ၊ လက်နက်ကြီးပစ်တာ။ စစ် ကြောင်းထိုးတာတွေရှိတယ်။ တိုက်ပွဲဖြစ်လောက်တဲ့အထိတော့ ဖြစ်မလာလောက်ဘူးလို့ထင်တယ်။ DKBA ကလည်း သူ့အကျိုးစီးပွားအတွက်ပဲ ရပ်တည်နေတာ။ စစ်တပ်ကို ခံချမှာတော့ မဟုတ်ဘူး။ မကျေလည်တာကတော့ မကျေလည်နေကြဘူး” ဟု ကရင်စစ်ရေး သတင်းရင်းမြစ်က ပြောဆိုသည်။
လတ်တလော ထိုင်း-မြန်မာနယ်စပ်၊ မြ၀တီမြို့နယ်၊ ဝေါ်လေဗျူဟာကုန်းတွင် တိုက်ပွဲများ ပြင်းထန်နေပြီး စစ်တပ်က ဝေါ်လေဗျူဟာကုန်းထံသို့ စစ်ကူပေးပို့နိုင်ရေး အပြင်းအထန် ကြိုးပမ်းနေကြောင်း၊ ဝေါ်လေ ဗျူဟာကုန်း မကျစေရေးအတွက် လေကြောင်းဖြင့် ဗုံးကျဲမှုများလည်း စစ်တပ်က တောက်လျှောက် လုပ်ဆောင်နေကြောင်း ကရင်စစ်ရေး သတင်းရင်းမြစ်ထံမှ သိရှိရသည်။
ဓာတ်ပုံ- စစ်တပ်နှင့် မိတ်ဖက်ဖြစ်နေသော ကရင်လက်နက်ကိုင်အဖွဲ့တချို့၏ အစည်းအဝေးတစ်ခု။ (ပုံအဟောင်းကို အသုံးပြုထားပါသည်။)
