စစ်ကိုင်းတိုင်း၊ ယင်းမာပင်မြို့နယ်အတွင်းရှိ လည်ငေါက်ကျေးရွာကို အကြမ်းဖက် စစ်တပ်က စစ်ကြောင်းထိုးဝင်ရောက်ကာ ပြည်သူပိုင်နေအိမ်များကို မီးရှို့ဖျက်ဆီးခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇွန်လ ၇ ရက်နေ့ နံနက်ပိုင်းတွင် ယင်းမာပင်မြို့ပေါ်မှ ထွက်ခွာလာသည့် အကြမ်းဖက် စစ်တပ် စစ်ကြောင်းသည် လည်ငေါက်ကျေးရွာအတွင်းကို စစ်ကြောင်းထိုး ဝင်ရောက်စီးနင်းခဲ့ပြီး နေအိမ်များမှ တန်ဖိုးကြီးပစ္စည်းများကို ခိုးယူ၍ မီးရှို့ဖျက်ဆီးခဲ့ကြောင်း၊ စစ်တပ်၏ မီးရှို့ဖျက်ဆီးမှုကြောင့် ပျက်စီးသွားသော နေအိမ် အရေအတွက်ကို အတည်ပြုနိုင်ခြင်းမရှိသေးကြောင်း သိရှိရသည်။

“ဒီနေ့မနက်ပိုင်းက ယင်းမာပင်မြို့ပေါ်ကနေ ထွက်လာပြီး လည်ငေါက်ရွာကို ဝင်မီးရှို့တာ။ ရွာထဲက နေအိမ်တော်တော်များများ မီးလောင်သွားတယ် ကြားတယ်။ စစ်ခွေးတွေက ပြည်သူပိုင်နေအိမ်တွေကို ဝင်မွှေပြီး ပစ္စည်းတွေ ခိုးယူပြီးမှ မီးရှို့တာ။ အခုတော့ စစ်ခွေးစစ်ကြောင်းက ယင်းမာပင်မြို့ဘက်ကို ပြန်ဝင်သွားတယ် ဘယ်ချိန်ထပ်ထွက်လာမလဲ မသိဘူး” ဟု ဒေသပြည်သူတစ်ဦးက ပြောဆိုသည်။

လက်ရှိချိန်တွင် အကြမ်းဖက် စစ်တပ် စစ်ကြောင်းသည် ယင်းမာပင်မြို့ပေါ်သို့ ပြန်လည်ဆုတ်ခွာသွားသော်လည်း ကျေးရွာအတွင်း နောက်ကျန် ကင်းပုန်းများ ရှိ၊ မရှိကို အတည်မပြုနိုင်သေး၍ ပြည်သူများအနေဖြင့် စစ်ရေးသတိရှိကြရန်နှင့် ကျေးရွာအတွင်း စစ်ကြောင်းမရှိတော့မှသာ ပြန်လည်ဝင်ရောက်ကြရန် ဒေသတွင်း တော်လှန်ရေးအင်းအားစုများ သတိပေးနှိုးဆော်ထားသည်။

အလားတူ စစ်ကိုင်းတိုင်း၊ ပုလဲမြို့နယ်အတွင်းရှိ မင်းတိုင်ပင်ကျေးရွာတွင် ၁ နှစ်နီးပါး ကြာ တပ်စွဲထားသော စစ်တပ်က ယခုရက်ပိုင်းအတွင်း ပြည်သူပိုင်နေအိမ်များမှ သံတံခါးနှင့် ကျွန်တံခါးများမကျန် ဖြုတ်ယူ ရောင်းစားနေကြောင်း မင်းတိုင်ပင်ရွာမှ စစ်ဘေးတိမ်းရှောင်နေရသော ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ပြီးခဲ့သည့် မေလပိုင်းမှ စတင်ကာ မင်းတိုင်ပင်ကျေးရွာအတွင်း အထိုင်ချတပ်စွဲထားသော စစ်တပ်သည် ပြည်သူပိုင်နေအိမ်များမှ သံတံခါးများ၊ ကျွန်တံခါးများနှင့် တန်ဖိုးကြီးပစ္စည်းများကို ဖြုတ်ခိုးကာ ပြန်လည်ရောင်းစားနေသည်မှာ ယခုရက်ပိုင်းအတွင်း ပိုမိုဆိုးဝါးလာပြီး လမ်းဘေးတွင် ဆောက်လက်စနေအိမ်များမှ ကျွန်းတိုင်များ သွပ်မိုးများကိုပါ ရောင်းစားနေကြကြောင်း သိရသည်။

ထို့ပြင် ဇီးဖြူကုန်း ပျူစောထီးရွာမှ ပျူစောထီးများသည်လည်း နံနက်ခင်းအချိန်တိုင်း လှည်းများဖြင့် မင်းတိုင်ပင်ရွာအတွင်းသို့ ဝင်ရောက်ကာ လူသူမရှိသည့် ပြည်သူပိုင်နေအိမ်များမှ ပစ္စည်းများကို စိတ်တိုင်းကျ ဖြုတ်ယူသယ်ဆောင်နေကြပြီး ပြန်လည်ရောင်းစားနေကြောင်း သိရှိရသည်။

“ဟိုရက်က မင်းတိုင်ပင်ရွာမှာရှိတဲ့နေအိမ်တွေကနေ ပစ္စည်းတွေဖြုတ်ယူလုယက်ယူဆောင်နေကြတာကို သတင်းတင်ပြီးနောက် ယခုရက်ပိုင်း ပိုပြီးတော့ ဆိုးရွားလာတယ်။ ယခုဆိုရင် နေအိမ်က ကျွန်တံခါးတွေ တန်ဖိုးကြီးတဲ့ အရာမှန်သမျှ ဖြုတ်ယူနေကြတာကို ဘယ်သူကမှ တားဆီးပေးနိုင်တာမတွေ့ရဘူး။ ရပ်ရွာလူထုဟာ ကြာလာရင် ဆုံးဖြတ်ချက် အမှားတွေဝင်လာတော့မယ်ထင်ပါတယ်။ မနက်ဆိုရင် ဇီးဖြုကုန်းပျုရွာက ပျုတွေက လှည်းတွေနဲ့ မင်းတိုင်ပင်ရွာကိုလာပြီး လူသူမရှိတဲ့နေအိမ်တွေကနေ စိတ်တိုင်းကျ ဖြုတ်ယူပြီး ယူဆောင်သွားကြတယ်။ တချို့လမ်းဘေးက ဆောက်လက်စ အိမ်တွေဆီက သွပ်မိုး၊ အိမ်တိုင်နဲ့ ဆောက်လက်စ အိမ်တွေဆို အလုံးလိုက်ဖြုတ်သွားကြတယ်” ဟူ မင်းတိုင်ပင်ရွာမှ စစ်ဘေးတိမ်းရှောင်နေသော ပြည်သူတစ်ဦးက ပြောဆိုသည်။

ပုလဲမြို့နယ်၊ မင်းတိုင်ပင်ကျေးရွာတွင် ပြီးခဲ့သည့် ၂၀၂၅ ခုနှစ်၊ ဇွန်လပိုင်းတွင် ကန့်ဒေါင့်ရဲစခန်းကို တော်လှန်ရေးပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက် အဆိုပါစခန်းမှ ထွက်ပြေးလာသည့် စစ်သားနှင့် ရဲများသည် မင်းတိုင်ပင်ကျေးရွာအတွင်းသို့ ဝင်ရောက်ကာ အထိုင်ချတပ်စွဲထားသည့်မှာ တစ်နှစ်နီးပါးခန့် ရှိလာနေပြီး ရွာသူရွာသားများမှာ နေရပ်စွန့်ခွာကာ ယနေ့အချိန်အထိထွက်ပြေးတိမ်းရှောင်နေကြရကာ နေအိမ်များတွင်လည်း စစ်တပ်နှင့် ပျူစောထီးများက အိမ်အလုံးလိုက်ဖြုတ်ယူ ခိုးရောင်းစားခံနေရခြင်း ဖြစ်ကြောင်း သိရှိရသည်။

ဓာတ်ပုံ – ပုလဲမြို့နယ် အတွင်းရှိ ကျေးရွာတစ်ခုကို စစ်တပ်က ညအချိန် မီးလောင်ဗုံးကျဲချ တိုက်ခိုက်ခြင်းကြောင့် နေအိမ်များ မီးလောင်နေစဉ် (ပုံအဟောင်းဖြစ်သည်)

The post ယင်းမာပင်တွင် စစ်တပ်က လည်ငေါက်ရွာကို စစ်ကြောင်းထိုးဝင်ရောက်ပြီး နေအိမ်များကို မီးရှို့ဖျက်ဆီး၊ ပုလဲမြို့နယ်ရှိ မင်းတိုင်ပင်ရွာတွင်လည်း စစ်တပ်က နေအိမ်ရှိ သံတံခါးနှင့် ကျွန်တံခါးများမကျန် ဖြုတ်ယူ ရောင်းစားနေ appeared first on Khit Thit Media.

တနင်္သာရီတိုင်း၊ လောင်းလုံးမြို့နယ်တွင် စစ်ကြောင်းထိုးနေသည့် အကြမ်းဖက် စစ်တပ်က ကျေးရွာ ၂ ခုအတွင်း ဝင်ရောက်တပ်စွဲထား၍ စစ်ရေးဆက်လက်တင်းမာနေကြောင်း ဒေသစစ်ရေးသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ဇွန်လ ၄ ရက်နေ့ ညနေပိုင်းတွင် ထားဝယ်မြို့နှင့် သရက်ချောင်းမြို့ဘက်မှ အင်အား ၁၀၀ ကျော်ပါ အကြမ်းဖက် စစ်တပ် စစ်ကြောင်းသည် ကမြောကင်းတံတားမှနေ၍ လောင်းလုံးမြို့ဘက်ကို ခြေလျင် စစ်ကြောင်းထိုးဝင်ရောက်လာစဉ် တော်လှန်ရေးတပ်ဖွဲ့များက လမ်းတောက်လျောက် မိုင်းဆွဲ တိုက်ခိုက်ခဲ့ကြောင်း၊ ထိုသို့ မိုင်းဆွဲ တိုက်ခိုက်မှုအတွင်း စစ်ကြောင်း အထိနာပြီး ပြန်လည် ဆုတ်ခွာသွားခဲ့ကြောင်း သိရသည်။

ထိုစစ်ကြောင်းသည် လက်ရှိချိန်တွင် စခန်းကြီးရွာကို ထပ်မံ ရောက်ရှိလာပြီး ရွာထဲ၌ တပ်စွဲထားကာ မည်သည့်နေရာကို ဆက်လက်ထွက်ခွာမည်ကို မသိရှိရသေးကြောင်း၊ လက်ရှိချိန်တွင် ကျေးရွာနေပြည်သူများသည်လည်း ဘေးလွတ်ရာကို ထွက်ပြေးတိမ်းရှောင်နေရကြောင်း သိရှိရသည်။

“ဟိုနေ့က ကမြောကင်းတံတား ဘက်က ဆင်းလာတဲ့ကောင်တွေက မိုင်းဆွဲခံရပြီး ပြန်ဆုတ်သွားလို့ အခုစခန်းကြီးရွာကိုရောက်နေတယ်။ ဆုတ်သွားတဲ့ကောင်တွေက လမ်းကြောင်းပြောင်းပြီး စခန်းကြီးရွာဘက်ကို စစ်ကြောင်းပြန်ထိုးနေတယ်။ သရက်ချောင်းနဲ့ ထား၀ယ်မြို့ထဲက ကောင်တွေ အင်အားက ၁၀၀ ကျော်လောက်ရှိတယ်။ အဲကောင်တွေ ဘယ်ကို ဆက်ထိုးမလဲဆိုတာတော့ စောင့်ကြည့်နေတုန်းပဲ” ဟု ဒေသစစ်ရေးသတင်းရင်းမြစ်ကပြောဆိုသည်။

အလားတူ ဇွန်လ ၃ ရက်နေ့ကလည်း လောင်းလုံးမြို့ပေါ်မှ ထွက်ခွာလာသော စစ်ကြောင်းသည် စစ်ပြဲကျေးရွာအတွင်းကို စစ်ကြောင်းထိုးဝင်ရောက်တပ်စွဲခဲ့သောကြောင့် တော်လှန်ရေးတပ်ဖွဲ့များနှင့် ထိတွေ့ တိုက်ပွဲဖြစ်ပွားခဲ့ကြောင်း၊ တိုက်ပွဲအတွင်း စစ်တပ်ဘက်မှ အထိနာပြီး ပြည်သူပိုင် နေအိမ်များကို မီးရှို့ဖျက်ဆီးခဲ့ကြောင်း သိရသည်။

ထိုစစ်ကြောင်းသည် လက်ရှိချိန်တွင် ညင်းမော်ရွာဘက်ကို ရောက်ရှိနေပြီး ရွာထဲ၌ တပ်စွဲထားသောကြောင့် ပြည်သူများ ရွာလုံးကျွတ် ထွက်ပြေးတိမ်းရှောင်နေရပြီး တော်လှန်ရေးတပ်ဖွဲ့များနှင့် စစ်ရေး ဆက်လက်တင်းမာနေဆဲဖြစ်ကြောင်း သိရှိရသည်။

“ညင်းမော်ရွာထဲ ရောက်နေတဲ့ ကောင်တွေက လောင်းလုံးမြို့ပေါ်က လာတဲ့ကောင်တွေ အိမ်တွေမှာ ၀င်နေနေတယ်။ အခုထိတော့မရွေ့သေးဘူး။ လောင်းလုံးမြို့ပေါ်ပဲ ပြန်ဆုတ်မလား ဘယ်ကို ဆက်သွားမလားဆိုတာတော့ ကျနော်တို့ မသိရသေးဘူး။ စစ်ရေးက ဆက်လက် တင်းမာနေတုန်းပဲ” ဟု ဒေသစစ်ရေးသတင်းရင်းမြစ်က ဆက်လက် ပြောဆိုသည်။

ထို့ပြင် လောင်းလုံးမြို့နယ်တွင် တော်လှန်ရေးတပ်ဖွဲ့များနှင့် အကြမ်းဖက် စစ်တပ်တို့ နှစ်ဖက်စစ်ရေးတင်းမာနေလျက်ရှိပြီး အရပ်သား ပြည်သူများကို စစ်တပ်က လူသားဒိုင်းသဖွယ် အသုံးပြုနေပြီး ကျောင်း ကြို/ပို့ ယာဉ်များကိုလည်း အကာကွယ်ယူပြီး သွားလာလှုပ်ရှားမှုများပြုလုပ်နေကြောင်း ထားဝယ်ခရိုင်၊ အမှတ်-၈၀၀၃-တပ်ရင်းက ယမန်နေ့က ထုတ်ပြန်ထားသည်။

ထို့ကြောင့် တော်လှန်ရေးတပ်ဖွဲ့များသည်လည်း လောင်းလုံးမြို့နယ်အတွင်း စစ်ဆင်ရေး အရှိန်ဟုန်မြှင့် ဖော်ဆောင်သွားနိုင်ရေးအတွက် ကြိုးပမ်းလျက်ရှိပြီး မြို့ပေါ်ကျောင်းအပ်နှံထားသော မိဘများအနေဖြင့် ကလေးငယ်များ လုံခြုံရေးကိုရှေးရှု့၍ မြို့ပေါ်၌ ပြောင်းရွေ့နေထိုင်ပေးကြပါရန် လောင်းလုံးမြို့ နယ် (၈၀ဝ၃) တပ်ရင်း ၊(ပအဖ) (ပကဖ) (ပလဖ)၊ သံမဏိလိပ်ပြာတပ်ဖွဲ့၊အထူးပြောက်ကျားတပ်ဖွဲ့(SGF) နှင့် လောင်းလုံးပညာရေး(ဘုတ်အဖွဲ့) တို့မှပူးတွဲ မေတ္တာရပ်ခံထားသည်။

ထိုသို့ တားမြစ်ရခြင်းသည် ကျောင်းသူကျောင်းသားများကို လွတ်လပ်စွာပညာသင်ယူခွင့် တားမြစ် ဟန့်တားခြင်းမဟုတ်ဘဲ နယ်မြေသည် စစ်ရေးနယ်မြေဖြစ်သောကြောင့် ကျောင်းကားများ နှင့်အတူ စစ်ကားများပါ လိုက်ပါလာနိုင်၍ နှစ်ဖက်ထိတွေ့တိုက်ပွဲများ အချိန်မရွေးဖြစ်ပွားလာနိုင်သောကြောင့် မလိုလားအပ်ဘဲ ကျောင်းသူကျောင်းသားများကို ထိခိုက်လာနိုင်ခြင်းကြောင့် မေတ္တာရပ်ခံခြင်းဖြစ်ကြောင်း ထားဝယ်ခရိုင်၊ အမှတ်-၈၀၀၃-တပ်ရင်းက ပြောဆိုထားသည်။

“နယ်ဖက်က ကျောင်းသားမိဘတွေကို အသိပေးခြင်းဖြစ်ပါတယ်။ ကျောင်းသားတွေကို ထားဝယ်မြို့ပေါ်မှာ ကျောင်းအပ်ထားသည့်အတွက် ကျောင်းသားတွေကို ထားဝယ်မြို့ပေါ်မှာပဲ ထားစေချင်ပါတယ်။ ကျောင်းအကြို/ပို့ ကားက နေ့တိုင်း ထားဝယ်မြို့နဲ့ လောင်းလုံးမြို့နယ်ကို ကျောင်းအကြို /ပို့ လုပ်နေတယ်။ စစ်သားတွေက အခွင့်အရေးယူပြီး လူသားဒိုင်းသဖွယ် ပြုလုပ်ခြင်းကြောင့် သတိပေးခြင်းဖြစ်ပါတယ်။ ဘယ်ကျောင်းပဲ ဖြစ်ဖြစ် ကျောင်းသားတွေကို တားဆီးပိတ်ပင်လိုတဲ့ စိတ်လုံးဝမရှိပါဘူး။ အာဏာရှင်မြစ်ပြတ်ချေမှုန်းရေးကို အဓိကပြုလုပ်သွားပါ့မယ်။ ကျောင်းသားတွေ ဘေးကင်းရန်အတွက် သတိပေးခြင်းဖြစ်တယ်။ စစ်ကောင်စီတပ်သားတွေက လူသားဒိုင်းသဖွယ်ပြုလုပ်နေတဲ့အတွက် သတိပေးခြင်းဖြစ်တယ်လို့ ထုတ်ပြန်ချက်နဲ့ပက်သက်ပြီးတော့ ဝေဖန်သူတိုင်းကို ပြောကြားလိုပါတယ်။ နှစ်ဦးနှစ်ဖက်ညီညွတ်စွာ စဥ်းစားဆုံးဖြတ်ကျဖို့ပြောကြားလိုတယ်” ဟု ထားဝယ်ခရိုင် အမှတ်(၈၀၀၃)တပ်ရင်း သတင်းနှင့်ပြန်ကြားရေး မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။

The post လောင်းလုံးတွင် စစ်ကြောင်းထိုးနေသည့် စစ်တပ်က ကျေးရွာ ၂ ခုအတွင်း ဝင်ရောက်တပ်စွဲထား၍ စစ်ရေးဆက်လက်တင်းမာနေ၊ စစ်တပ်က ကျောင်းကားများကို အကာအကွယ်ယူ၍ စစ်ရေးလှုပ်ရှားနေဟု ၈၀ဝ၃ တပ်ရင်းက ထုတ်ပြန်ထား appeared first on Khit Thit Media.

ချင်းပြည်နယ်၊ မင်းတပ်မြို့ပေါ်ကို အကြမ်းဖက် စစ်တပ်က လေယာဉ်ဖြင့် ၂ ကြိမ် ဗုံးကျဲ တိုက်ခိုက်ခြင်းကြောင့် နေအိမ်များ ပျက်စီးခဲ့ကြောင်း ဒေသသတင်းရင်းမြစ်ထံမှ သိရသည်။

ယနေ့ ဇွန်လ ၇ ရက်နေ့ နံနက်အစောပိုင်း ၁ နာရီခန့်တွင် နေပြည်တော် အေလာလေတပ်မှ တက်လာသော ဂျက်ဖိုက်တာ ၂ စီးသည် မင်းတပ်မြို့ပေါ်ကို ပေါင် ၅၀၀ ဗုံး ၂ လုံးကျဲချ တိုက်ခိုက်ခဲ့ကြောင်း၊ အလားတူ ယနေ့ နံနက် ၁၀ နာရီ ၄၇ မိနစ်နှင့် ၅၄ မိနစ်ခန့်တွင် တံတားဦးလေတပ်မှ တက်လာသော ဂျက်ဖိုက်တာ ၂ စီးက မင်းတပ်မြို့ကို ဗုံး ၄ လုံး ထပ်မံကျဲချ တိုက်ခိုက်ခဲ့ကြောင်း သိရသည်။

အကြမ်းဖက် စစ်တပ်၏ ဗုံးကျဲ တိုက်ခိုက်မှု အတွင်း နေအိမ် ၁၀ လုံးကျော်ခန့် ထိခိုက် ပျက်ဆီးခဲ့ပြီး ပြည်သူများ ထိခိုက်မှု အခြေအနေကို အတည်ပြုနိုင်ခြင်းမရှိသေးကြောင်း သိရှိရသည်။

အလားတူ စစ်ကိုင်းတိုင်း၊ ရေဦးမြို့နယ် ပန်းကုံးရွာ စာသင်ကျောင်းအနီးကိုလည်း အကြမ်းဖက် စစ်တပ်က အသေခံဒရုန်းဖြင့် ဗုံးကျဲ တိုက်ခိုက်ခဲ့ကြောင်းရေဦးမြို့နယ်အနောက်ခြမ်းဇုံ သတင်းဆက်သွယ်ရေးတာဝန်ခံ ထူးခန့်ဇော်(အမေ့သား) က ရန်ကုန်ခေတ်သစ် သတင်းဌာနထံသို့ ပြောဆိုသည်။

ယမန်နေ့ ဇွန်လ ၆ ရက်နေ့ ညနေပိုင်းတွင် ရေဦးမြို့နယ် မြောက်ဘက်ခြမ်း ပန်းကုံးကျေးရွာ စာသင်ကျောင်းအနီးကို ရွှေဘိုလေ့ကျင့်ရေး ၈ မှ တက်လာသော အသေခံဒရုန်း ၁ စီးက လေကြောင်းတိုက်ခိုက်မှု ပြုလုပ်ခဲ့ကြောင်း၊ ထိုလေကြောင်းတိုက်ခိုက်မှု အတွင်း ပြည်သူများ ထိခိုက်မှုမရှိဘဲ လယ်ကွင်းပြင်များတွင် ကျရောက်ပေါက်ကွဲခဲ့ကြောင်း သိရသည်။

“ရွှေဘိုလေ့ကျင့်ရေး ၈ ကနေ လွှတ်တင်တဲ့ Kamikaze Suicide Drone အမျိုးအစားက လေကြောင်း တိုက်ခိုက်မှု ပြုလုပ်သွားတာပါ။ အရပ်သားပြည်သူ ထိခိုက်မှုမရှိခဲ့ပါဘူး။ နေအိမ်တွေထိခိုက်မှုမရှိခဲ့ဘူး။ လယ်ကွက်ထဲကျရောက်ပေါက်ကွဲခဲ့တယ်” ဟု ရေဦးမြို့နယ်အနောက်ခြမ်းဇုံ သတင်းဆက်သွယ်ရေးတာဝန်ခံ ထူးခန့်ဇော်(အမေ့သား) က ပြောဆိုသည်။

photo credit – Hkl Mindat

The post မင်းတပ်မြို့ပေါ်နှင့် ရေဦးရှိ ပန်းကုံးရွာ စာသင်ကျောင်းအနီးကို စစ်တပ်က လေယာဉ်၊ အသေခံဒရုန်းဖြင့် တိုက်ခိုက်မှု နေအိမ်များ ပျက်စီး appeared first on Khit Thit Media.

ရန်ကုန်မြို့နေရာအနှံ့အပြားရှိ ကွန်ဒိုမီနီယမ်များနှင့် အိမ်ရာဝင်းများတွင် တရုတ်အွန်လိုင်းငွေလိမ် လည်မှု (ကျားဖြန့်) လုပ်ငန်းများ ဖြန့်ကျက်လုပ်ကိုင်နေသော သတင်းကို ရန်ကုန်ခေတ်သစ်သတင်းဌာနက ဖော်ပြပြီးနောက် စစ်တပ်၊ရဲ၊ ပျူစောထီးနှင့်ထွေ/အုပ်တို့က မြန်မာပြည်နွယ်ဖွား တရုတ်လုပ်ငန်းရှင်များ၏ စီးပွားရေးလုပ်ငန်းများ၊ နေအိမ်များကို လိုက်လံစီးနင်းဖမ်းဆီး၍ ငွေညှစ်ခြင်းများ စတင်လုပ်ဆောင်နေကြောင်း ငွေညှစ်ခံနေရသည့် စီးပွားရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

အကြမ်းဖက်စစ်တပ်က အမှန်တကယ် ကျားဖြန့် လုပ်ကိုင်နေသော မြန်မာနိုင်ငံသားမှတ်ပုံတင် ကိုင်ဆောင်ထားသော တရုတ်များ၏ ကျားဖြန့် လုပ်ငန်းများကို ဝင်ရောက်ရှာဖွေ စီးနင်းခြင်းမပြုဘဲ မြန်မာပြည်နွယ်ဖွား မြန်မာ နိုင်ငံသား တရုတ်များ၏ တရားဝင် စီးပွားရေးလုပ်ငန်းအချို့ကိုလည်း ကျားဖြန့်ခေါင်းစဉ်တပ်ကာ ဝင်ရောက်စီးနင်းပြီး အပြစ်မဲ့ လူငယ်ဝန်ထမ်းရာပေါင်းများစွာကို ဖမ်းဆီးစစ်ဆေးမှုများ ပြုလုပ်လာခြင်းနှင့် ငွေညှစ်မှုများ လုပ်ဆောင်လာခြင်းဖြစ်ကြောင်း သိရှိရသည်။

ဇွန်လ ၅ ရက်နေ့ ည ၇ နာရီနှင့် ၈ နာရီဝန်းကျင်အချိန်တွင် တောင်ဥက္ကလာပမြို့နယ်၊ သံသုမာလမ်းပေါ်ရှိ စီမံကိန်းမှတ်တိုင်အနီးမှ အထပ်မြင့်တိုက်တစ်လုံးကို ရန်ကုန်တိုင်းစစ်ဌာနချုပ် တိုင်းမှူးကိုယ်တိုင် ဦးစီးကာ ကျားဖြန့်ခေါင်းစဉ်ဖြင့် ဝင်ရောက်စီးနင်းဖမ်းဆီးခဲ့ကြောင်း၊ သို့သော် အဆိုပါလုပ်ငန်းမှာ အွန်လိုင်းကျားဖြန့် ငွေလိမ်လုပ်ငန်း မဟုတ်ဘဲ တရုတ်ပြည်ဘက်မှ ပစ္စည်းများကို မြန်မာနိုင်ငံတွင် အော်ဒါ ကောက်ယူကာ မှာယူ ဝယ်ပေးသည့် Online Shopping လုပ်ငန်းဖြစ်ကြောင်း၊ ယင်းလုပ်ငန်းတွင် မြန်မာလူငယ်ရာချီကို အလုပ်ခန့်ထားခြင်း ဖြစ်ကြောင်း၊ သို့ရာတွင် လုပ်ငန်းမှာ တရားဝင် လိုင်စင်မရှိကြောင်း သိရှိရသည်။

ယင်းလုပ်ငန်းတွင် မြန်မာလူငယ်ရာချီမှာ နေ့ဆိုင်း၊ ညဆိုင်းခွဲကာ Online Shopping လုပ်ကိုင်နေကြခြင်းဖြစ်ပြီး လူငယ်အများစုမှာ ကျောင်းသားကျောင်းသူများနှင့် အသက် ၂၀ နှစ်အောက် လူငယ်များဖြစ်ကြောင်း သိရှိရသည်။

“အဓိက ပြောချင်တာက အဲ့ဒီလုပ်ငန်းမှာ လုပ်တဲ့ ကလေးတွေကို ကျားဖြန့် လုပ်တယ်ဆိုပြီး ပေါ်တာဆွဲသွားမှာ စိုးရိမ်နေရတယ်။ အဲဒီတိုက်ကို စစ်တပ်က ဝင်စီးပြီးတော့ လူငယ် ရာချီကို ထောင်ကား ၃ စီးနဲ့ စစ်ကြောရေးကို တစ်ခါတည်းပို့လိုက်တာ။ မိဘတွေ ပြောချိန် ရှင်းပြချိန် မရလိုက်ကြဘူး။” ဟု ဖမ်းဆီးခံလိုက်ရသော လူငယ်တစ်ဦး၏ မိဘဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်

လက်ရှိတွင် ဖမ်းဆီးခံလိုက်ရသည့် လူငယ်များ၏ မိဘများက ၎င်းတို့၏ သားသမီးများမှာ ကျားဖြန့်လုပ်ငန်းလုပ်ကိုင်နေခြင်း မဟုတ်ကြောင်း ရှင်းပြခွင့်ပင်မရဘဲ စစ်ကြောရေးသို့ ချက်ချင်းအပို့ခံလိုက်ရသဖြင့် အထူးစိုးရိမ်ပူပန်လျက်ရှိကြောင်း သိရှိရသည်။

အလားတူ ရန်ကုန်မြို့ရှိ အိမ်ရာဝင်းများနှင့် ကွန်ဒိုများအတွင်း ကျားဖြန့်လုပ်ငန်းများ ရှာဖွေရေး စစ်ဆေးမှုများကို ဇွန်လ ၅ ရက်နေ့မှ စတင်ကာ စီမံချက်ဖြင့် လုပ်ဆောင်နေပြီး ကျားဖြန့် စစ်ဆင်ရေးအတွက် နယ်မြေခံစစ်တပ်နှင့် မြို့နယ်ရဲ၊ ရပ်/ကျေးအုပ်ချုပ်ရေးအဖွဲ့များ၊ ပျူစောထီးများကို ရန်ကုန်တိုင်းစစ်ဌာနချုပ်တိုင်းမှူးက ကျားဖြန့်များ ရှာဖွေဖမ်းဆီးရေး အထူးညွှန်ကြားချက် အမိန့်ထုတ်ပြန်ထားကြောင်း သိရှိရသည်။

သို့ရာတွင် လက်တွေ့တွင် အမှန်တကယ် ကျားဖြန့် ငွေလိမ် လုပ်ငန်းများကို ရှာဖွေ ဖမ်းဆီးခြင်းမပြုဘဲ မြေပြင်တွင် စစ်တပ်၊ ရဲနှင့် အုပ်ချုပ်ရေးအဖွဲ့များက ကျားဖြန့်လုပ်ငန်းများ၊ တရုတ် KTV များနှင့် ကလပ်များကို လိုက် လံစုံစမ်းကာ ဆက်ကြေးကောက်ယူနေကြကြောင်း သိရှိရသည်။

ရန်ကုန်မြို့တွင် အခြေစိုက်သည့် တရုတ်ကျားဖြန့်လုပ်ငန်းများက မြန်မာနိုင်ငံတွင်းသာမက ပြည်ပအထိပါ ငွေ ကြေးလိမ်လည်နေကြပြီး ဘဏ်စာရင်းနှင့် ကိုယ်ရေးအချက်အလက်များရယူကာ ငွေညှစ်ခြင်း၊ ငွေသွင်းကစားရသည့် စလော့ဂိမ်းများ ဖြန့်ချိခြင်း၊ မြန်မာဆယ်ကျော်သက်မိန်းကလေးများကို အလုပ်ခန့်၍ အင်တာနက်ပေါ်မှတစ်ဆင့် လိင်ပိုင်းဆိုင်ရာဖျော်ဖြေမှု ဝန်ဆောင်မှုပေးခြင်း စသည့် နည်းလမ်းမျိုးစုံဖြင့် အွန်လိုင်းငွေလိမ်လည်နေကြခြင်းဖြစ်သည်။

ကျားဖြန့် လုပ်ငန်းများတွင် လုပ်ကိုင်ခဲ့ဖူးသည့် မြန်မာလူငယ်တစ်ဦး၏ ပြောပြချက်အရ ကျားဖြန့်မှရရှိသော ငွေမည်းများကို တရုတ်ပိုင်စားသောက်ဆိုင်များ၊ ဆံပင်ညှပ်ဆိုင်များ၊ ကားအရောင်းပြခန်း (Showroom) များ၊ ဟိုတယ်များ၊ တရုတ်နှင့် ကိုရီးယားဘာသာစကားသင်တန်းကျောင်းများနှင့် ကျန်းမာရေးစောင့်ရှောက်မှုစင်တာများမှတစ်ဆင့် မြန်မာဘဏ်များသို့ လွှဲပြောင်းကာ တရုတ်ဘဏ်စာရင်းများအတွင်းသို့ ငွေဖြူအဖြစ် ပြန်လည်ရောက်ရှိအောင် လုပ်ဆောင်နေကြခြင်းဖြစ်ကြောင်း သိရသည်။

“သူတို့ ငွေရှာတဲ့နေရာ၊ လုပ်ငန်းနေရာပေါ့ အဲဒါက သက်သက်၊ ငွေဖြူဖွတ်တဲ့ နေရာက သက်သက်။ ဥပမာ တရုတ်ကျားဖြန့် တစ်ခုကို မိတယ်ထား၊ မပြီးဘူး။ သူတို့ငွေတွေကို ဖွတ်ပေးနေတာက သူတို့ဟန်ပြဖွင့်ထားတဲ့ စားသောက်ဆိုင်တွေ၊ ဆံပင်ညှပ်ဆိုင်တွေ၊ ကားရှိုးရွန်းတွေ၊ ဟိုတယ်လုပ်ငန်းတွေ၊ ကိုရီးယားနဲ့ တရုတ်စာ သင်တန်းကျောင်းတွေ၊ ကျန်းမာရေး စောင့်ရှောက်ရေး စင်တာတွေ။ အကုန်တရုတ်တွေပိုင်တာပဲ။ အဲဒီလုပ်ငန်းတွေက ကျားဖြန့်ကရတဲ့ ရတဲ့ငွေတွေကို လွှဲယူတယ်။ အဲဒီကနေ မြန်မာဘဏ်တွေဆီ ရောက်တယ်။ အဲဒီကနေ တရုတ်ဘဏ်စာရင်းတွေကို ငွေဖြူပြန်သွားတယ်။ စစ်ရင် အဲလုပ်ငန်းတွေပါ အကုန်စစ်ရမှာ အမြတ်ဘယ် လောက်ရနေလဲ၊ အခွန်တွေ ဘယ်လိုဆောင်ထားလဲ၊ စာရင်းစစ်ဝင်လိုက်ရင် အကုန်ပေါ်တယ်။ စီးပွားရေးမကောင်း တဲ့ နေရာမှာ ဒီလူတွေ ဘာလာလုပ်လဲ၊ ဒီကျားဖြန့်တွေပဲရှိတယ်။”ဟု အဆိုပါ သတင်းရင်းမြစ်က ရှင်းပြသည်။

လက်ရှိတွင် လှိုင်သာယာ၊ တာမွေ၊ လမ်းမတော်၊ ရန်ကင်းနှင့် မင်္ဂလာဒုံမြို့နယ်များရှိ အိမ်ရာအုပ်ချုပ်ရေးမှူးများနှင့် ရပ်ကျေး၊ မြို့နယ်အုပ်ချုပ်ရေးဌာနများကို စစ်ဆေးမှုများ ပြုလုပ်နေသော်လည်း တရုတ်ပိုင်ဟိုတယ်များကိုမူ ဝင်ရောက်စစ်ဆေးခြင်း မရှိသေးကြောင်း သိရှိရသည်။

“အခုက ရန်ကုန်မှာ ကျားဖြန့်တွေကို ဖမ်းဖို့ စီမံချက်က တကယ်ကျားဖြန့် လုပ်နေတာကို ဖမ်းတာမဟုတ်ဘူး။ မြန်မာနိုင်ငံသား တရုတ်လုပ်ငန်းတွေကို ကျားဖြန့် သံသယဆိုပြီး လိုက်ပြီး ငွေညှစ်နေတာ အဲဒါက အဆိုးဆုံးပဲ။ တကယ်တမ်း ကျားဖြန့်တွေက ဟိုတယ်ကြီးတွေ ဟီးနေအောင် ဖွင့်ပြီး နယ်မြေခံ စစ်တပ်၊ ရဲနဲ့ ထွေ/အုပ်ကို လိုင်းကြေး လစဉ် သိန်းထောင်ချီ ပေးထားတာ။ အခု ခံနေရတာက တရုတ်တွေပိုင်တဲ့ တရားဝင်လုပ်ငန်းတွေခံနေရတာ” ဟု ငွေညှစ်ခံရသည့် တရုတ်စီးပွားရေး သတင်းရင်းမြစ်က ရှင်းပြသည်။

ကရင်ပြည်နယ်၊ မြ၀တီမြို့နယ်အတွင်း ကျားဖြန့် ဂိုဏ်းများကို စစ်တပ်က နှိမ်နင်းပြီးနောက် ကျားဖြန့်လုပ်ကိုင်သော တရုတ်များမှာ ရန်ကုန်မြို့ပေါ်သို့ ရောက်ရှိလာကြကြောင်း၊ အထူးသဖြင့် လှိုင်သာယာမြို့နယ်တွင် မြ၀တီဘက်မှ တက်လာသော တရုတ်နိုင်ငံသားများစွာ ပြန်လည် အခြေစိုက်လာကြောင်း၊ ကျားဖြန့် တရုတ်များက ရန်ကုန်မြို့အတွင်း နေရာများ ဖြန့်ခွဲကာ အွန်လိုင်းငွေလိမ်လုပ်ငန်းများကို တရားဝင်လုပ်ငန်းများ ဗန်းပြ ခြေရာဖျောက် လုပ်ကိုင်လာကြကြောင်း သိရှိရသည်။

ဓာတ်ပုံ- ရန်ကုန်မြို့တွင် ၂၀၂၃ ခုနှစ် နိုဝင်ဘာလ ညပိုင်း ကင်းလှည့်နေသည့် စစ်ကောင်စီတပ်ဖွဲ့ဝင်များ။ (ပုံအဟောင်းဖြစ်ပါသည်။)

The post ရန်ကုန်တွင် ကျားဖြန့်စစ်ဆင်ရေးဟုဆိုကာ မြန်မာပြည်ဖွား တရုတ်လုပ်ငန်းရှင်များ၏ စီးပွားရေးလုပ်ငန်းများနှင့် နေအိမ်၊ ကွန်ဒိုများကို စစ်တပ်၊ ရဲ၊ ပျူစောထီးနှင့် ထွေ/အုပ်တို့က လိုက်လံစီးနင်းဖမ်းဆီး စစ်ဆေး ငွေညှစ်နေ appeared first on Khit Thit Media.

ထိုင်းနိုင်ငံ၊ ချွန်ဘူရီခရိုင် (Chonburi) ရှိ ဆောက်လုပ်ရေးလုပ်ငန်းခွင်တစ်ခုတွင် လုံခြုံရေးဝန်ထမ်းကို ဝိုင်းဝန်းရိုက်နှက် ကြိုးတုပ်ပြီး ဘတ် ၆ သိန်းခန့် (၆၀၀,၀၀၀ ဘတ်) တန်ဖိုးရှိ လျှပ်စစ်ကေဘယ်ကြိုးများကို ခိုးယူခဲ့သည့် မြန်မာဓားပြဂိုဏ်းဝင် ၄ ဦးကို ထိုင်းရဲတပ်ဖွဲ့က ဖမ်းဆီးလိုက်ကြောင်း သိရသည်။

ဇွန်လ ၄ ရက်နေ့ နံနက် ၁ နာရီ ၂၃ မိနစ်မှ ၂ နာရီ ၂၀ မိနစ်ဝန်းကျင်အချိန်အတွင်း ချွန်ဘူရီခရိုင်၊ ဘန်ဘွန်မြို့နယ် (Ban Bueng) ရှိ ဆောက်လုပ်ရေးလုပ်ငန်းခွင်တစ်ခုတွင် ဖြစ်ပွားခဲ့ခြင်းဖြစ်သည်။ စီစီတီဗီ (CCTV) ကင်မရာမှတ်တမ်းများအရ လူ ၁၀ ဦးထက်မနည်းပါဝင်သည့် လူဆိုးဂိုဏ်းသည် လုံခြုံရေးဝန်ထမ်းကို ဝိုင်းဝန်းတိုက်ခိုက်ကာ လက်ခြေများကို ကြိုးဖြင့်တုပ်နှောင်ခဲ့ပြီး၊ အသစ်စက်စက် လျှပ်စစ်ကေဘယ်ကြိုး အမြောက်အမြားကို အသင့်စောင့်ဆိုင်းနေသည့် ပစ်ကပ်ဗန်ကား နှစ်စီးပေါ်သို့ တင်ဆောင်ကာ မောင်းနှင်ထွက်ပြေးခဲ့ကြသည်။

ဘန်ဘွန်မြို့နယ်နှင့် ချွန်ဘူရီခရိုင် ရဲတပ်ဖွဲ့မှ စုံစမ်းစစ်ဆေးရေးအရာရှိများသည် တရားခံများ ထွက်ပြေးသည့် လမ်းကြောင်းတစ်လျှောက်ရှိ CCTV မှတ်တမ်းများကို လိုက်လံစစ်ဆေးခဲ့ကြသည်။ ထို့နောက် ဇွန်လ ၆ ရက်နေ့ ညနေ ၅ နာရီခွဲခန့်တွင် ပြစ်မှုကျူးလွန်ရာ၌ အသုံးပြုခဲ့သည့် ကားတစ်စီးသည် ဘန်ဆူရာဆက်-ဖန်ဆာဒက်နောက် (Ban Surasak–Phan Sadet Nok) လမ်းဘေးရှိ အလုပ်ဟောင်းဆိုင်တစ်ဆိုင်အတွင်းသို့ မောင်းနှင်ဝင်ရောက်သွားသည်ကို တွေ့ရှိခဲ့ရပြီး၊ ကားနံပါတ်မှတစ်ဆင့် ခြေရာခံရာ ရေယောင်းခရိုင် (Rayong)၊ ပလုဒေါင်မြို့နယ် (Pluak Daeng) အတွင်းရှိ လိပ်စာတစ်ခုသို့ ဦးတည်နေကြောင်း ဖော်ပြနေခဲ့သည်။

ရဲတပ်ဖွဲ့ဝင်များက အဆိုပါ ရေယောင်းခရိုင်အတွင်းရှိ လမ်းကြားတစ်ခုသို့ ဝင်ရောက်စဉ် CCTV မှတ်တမ်းပါ ကားနံပါတ်နှင့် တူညီသည့် အနက်ရောင် အိုင်ဆိုဇူး (Isuzu) မော်တော်ယာဉ်တစ်စီး မောင်းနှင်လာသည်ကို တားဆီးစစ်ဆေးခဲ့ရာ ယာဉ်မောင်းဖြစ်သူ အသက် ၃၄ နှစ်အရွယ် ရဲထွေး (Ye Htwe) နှင့်အတူ ၎င်း၏ ရည်းစားဖြစ်သူ၊ ရည်းစားဖြစ်သူ၏ ညီမနှင့် ကလေးငယ်တစ်ဦးတို့ကို စစ်ဆေးတွေ့ရှိရသဖြင့် ဖမ်းဆီးခဲ့သည်။

ယာဉ်မောင်း ရဲထွေးကို စစ်ဆေးမေးမြန်းချက်အရ ရဲတပ်ဖွဲ့သည် ၎င်းနှင့်အတူ ပြစ်မှုကျူးလွန်ရာတွင် ပါဝင်သည့် နောက်ထပ် သံသယရှိသူ မြန်မာနိုင်ငံသား ၃ ဦးဖြစ်သော စိုင်းထက်အောင် (Sai Htet Aong)၊ အသက် ၂၇ နှစ်ဝေရန် (Wai Yan)၊ အသက် ၁၈ နှစ် ရဲကိုလင်း (Ye Ko Lin)၊ အသက် ၃၄ နှစ် တို့ကို ထပ်မံဖမ်းဆီးရမိခဲ့သည်။

ဖမ်းဆီးရမိသူ မြန်မာအလုပ်သမား ၄ ဦးစလုံးက ၎င်းတို့သည် ဓားပြတိုက်မှုတွင် ပါဝင်ခဲ့ကြောင်း ဝန်ခံထွက်ဆိုထားကြသည်။

သို့သော် “မောင်” (Maung) ဟု လူသိများသည့် ဂိုဏ်းခေါင်းဆောင်အပါအဝင် ကျန်ရှိနေသည့် ဂိုဏ်းဝင်အချို့မှာမူ လက်ရှိအချိန်အထိ လွတ်မြောက်နေဆဲဖြစ်သည်။

ဘန်ဘွန်ရဲစခန်းမှ ရဲမှူးကြီး ခရစ်မာဆွတ် (Pol. Col. Krit Masuk) ၏ ပြောကြားချက်အရ ဖမ်းဆီးခံရသူများအားလုံးသည် မြန်မာရွှေ့ပြောင်းအလုပ်သမားများ ဖြစ်ကြပြီး၊ လုံခြုံရေးဝန်ထမ်းအား ဓားများဖြင့် ခြိမ်းခြောက်၍ ကြိုးတုပ်ကာ ခိုးယူခဲ့ကြခြင်းဖြစ်ကြောင်း သိရသည်။

ထို့ပြင် အဆိုပါ မြန်မာလူဆိုးဂိုဏ်းသည် အနီးနားရှိ အခြားရဲစခန်းနယ်မြေအချို့တွင်လည်း ယခုကဲ့သို့သော ခိုးမှု၊ ဓားပြတိုက်မှုများကို အကြိမ်ကြိမ် ကျူးလွန်ခဲ့ဖူးသည့် ရာဇဝတ်ဂိုဏ်းတစ်ခုဖြစ်ကြောင်း ယူဆရသဖြင့် ၎င်းတို့အား ဥပဒေအရ ထိရောက်စွာ အရေးယူနိုင်ရန်နှင့် လွတ်မြောက်နေသူများကို ဖမ်းဆီးနိုင်ရန် ရဲတပ်ဖွဲ့က ဆက် လက်စုံစမ်းစစ်ဆေးလျက်ရှိသည်။

The post ထိုင်းနိုင်ငံ၊ ချွန်ဘူရီတွင် လုံခြုံရေးဝန်ထမ်းအား ကြိုးတုပ်ကာ ဘတ် ၆ သိန်းတန် လျှပ်စစ်ကေဘယ်ကြိုးများ ခိုးယူခဲ့သည့် မြန်မာဓားပြဂိုဏ်းဝင် ၄ ဦးကို ဖမ်းဆီးရမိ၊ ဂိုဏ်းခေါင်းဆောင် လွတ်နေဆဲ appeared first on Khit Thit Media.

ထိုင်းနိုင်ငံ၊ အယုဒ္ဓယခရိုင်အတွင်း တရားမဝင် ခိုးဝင်လာသော မြန်မာအလုပ်သမား ၇ ဦးနှင့် ၎င်းတို့အား သယ် ဆောင်လာသည့် ထိုင်းနိုင်ငံသား ယာဉ်မောင်း ၁ ဦးတို့ကို ထိုင်းအာဏာပိုင်များက ဖမ်းဆီးခဲ့ကြောင်း အယုဒ္ဓယခရိုင် လူဝင်မှုကြီးကြပ်ရေးဌာနက သတင်းထုတ်ပြန်ထားသည်။

ဇွန်လ ၆ ရက်နေ့ မွန်းလွဲ ၁ နာရီခွဲခန့်တွင် အယုဒ္ဓယခရိုင် လူဝင်မှုကြီးကြပ်ရေးရဲတပ်ဖွဲ့ (လဝက)၊ အဝေးပြေးရဲတပ်ဖွဲ့၊ မှုခင်းနှိမ်နင်းရေးရဲတပ်ဖွဲ့နှင့် မဟာရတ်မြို့မရဲစခန်းတို့ ပူးပေါင်းကာ အယုဒ္ဓယခရိုင်အတွင်း တရားမဝင် လူမှောင်ခိုကူးသည့် လမ်းကြောင်းများနှင့် သံသယရှိယာဉ်များကို ပိတ်ဆို့ရှာဖွေစစ်ဆေးမှုများ ပြုလုပ်ခဲ့ကြသည်။

ထိုသို့ စစ်ဆေးစဉ် မဟာရတ်မြို့နယ်၊ ဘန်မိုင်ကျေးရွာအုပ်စုရှိ အာရှအဝေးပြေးလမ်းမကြီး မိုင်တိုင်အမှတ် ၄၄-၄၅ အနီးတွင် သံသယရှိ မော်တော်ယာဉ် ၁ စီးကို တားဆီးစစ်ဆေးခဲ့ရာ ယာဉ်ပေါ်တွင် တရားဝင်အထောက်အထားတစ်စုံတစ်ရာမရှိသည့် မြန်မာအလုပ်သမား ၇ ဦးကို စစ်ဆေးတွေ့ရှိရသဖြင့် ဖမ်းဆီးခဲ့ခြင်းဖြစ်သည်။

ထိုင်းအာဏာပိုင်များသည် အလုပ်သမားများကို သယ်ဆောင်လာသည့် အသက် ၃၁ နှစ်အရွယ် ထိုင်းနိုင်ငံသား ယာဉ်မောင်းကိုလည်း မော်တော်ယာဉ်နှင့်အတူ ဖမ်းဆီးခဲ့သည်။ စုံစမ်းစစ်ဆေးချက်များအရ အဆိုပါ မြန်မာအလုပ်သမားများသည် နယ်စပ်ကို တရားမဝင် ဖြတ်ကျော်ဝင်ရောက်လာကြသူများဖြစ်ပြီး၊ ၎င်းတို့သည် အွန်လိုင်းငွေလိမ်ဂိုဏ်း (Scammer Network) များနှင့် ဆက်စပ်မှု ရှိ၊ မရှိကိုပါ အာဏာပိုင်များက ဆက်လက်စစ်ဆေးလျက်ရှိသည်။

လက်ရှိတွင် ဖမ်းဆီးခံရသူ မြန်မာအလုပ်သမား ၇ ဦးကို “ခွင့်ပြုချက်မရှိဘဲ ထိုင်းနိုင်ငံအတွင်းသို့ တရားမဝင် ဝင်ရောက်နေထိုင်မှု” ဖြင့်လည်းကောင်း၊ ထိုင်းနိုင်ငံသား ယာဉ်မောင်းကို “တရားမဝင် ခိုးဝင်လာသော နိုင်ငံခြားသားများအား နည်းလမ်းမျိုးစုံဖြင့် ကူညီဖုံးကွယ်ပေးမှု”၊ “ခွင့်ပြုချက်မရှိဘဲ သယ်ယူပို့ဆောင်ရေးလုပ်ငန်း လုပ်ကိုင်မှု” စသည့် စွဲချက်များဖြင့်လည်းကောင်း အမှုဖွင့်ထားပြီး ဥပဒေအရ အရေးယူနိုင်ရန် မဟာရတ်မြို့မရဲစခန်းသို့ လွှဲပြောင်းပို့ဆောင်ထားသည်။

အလားတူ ထိုင်းနိုင်ငံ၊ မဲဆောက်မြို့နယ်ရှိ ဘန်းဟွေဟင်ဖုန် ပူးတွဲလုံခြုံရေးစစ်ဆေးရေးဂိတ်တွင် အခြားသူများ၏ နိုင်ငံကူးလက်မှတ် (ပတ်စ်ပို့) များကို ပြသကာ ထိုင်းနိုင်ငံအတွင်းသို့ ဝင်ရောက်ရန် ကြိုးပမ်းသည့် မြန်မာနိုင်ငံသား လူငယ် ၂ ဦးကို တာ့ခ်ခရိုင် လူဝင်မှုကြီးကြပ်ရေးဌာနက ဖမ်းဆီးရမိခဲ့သည်။

တာ့ခ်ခရိုင် လူဝင်မှုကြီးကြပ်ရေးရဲတပ်ဖွဲ့နှင့် လုံခြုံရေးတပ်ဖွဲ့ဝင်များသည် နိုင်ငံအတွင်းသို့ ဝင်ထွက်သွားလာသူများကို စစ်ဆေးမှုများ တင်းကြပ်စွာ ဆောင်ရွက်နေစဉ် အသက် ၁၉ နှစ်အရွယ် မြန်မာလူငယ် ၂ ဦးကို စစ်ဆေးရေးဂိတ်၌ တားဆီးစစ်ဆေးခဲ့ခြင်းဖြစ်သည်။ ထိုသို့ စစ်ဆေးရာတွင် ၎င်းတို့၌ ကိုယ်ပိုင်နိုင်ငံကူးလက်မှတ် အစစ်အမှန်မရှိဘဲ အခြားသူများ၏ ပတ်စ်ပို့စာအုပ်များကို အသုံးပြုကာ ဝင်ရောက်လာခြင်းဖြစ်ကြောင်း စစ်ဆေးတွေ့ရှိရသဖြင့် ဖမ်းဆီးခဲ့ခြင်း ဖြစ်သည်။

၎င်း ဖမ်းဆီးခံရသူ မြန်မာလူငယ် ၂ ဦးကို ထိုင်းအာဏာပိုင်များက “အခြားသူများ ထိခိုက်နစ်နာစေမည့် နည်းလမ်းဖြင့် အခြားသူများ၏ နိုင်ငံကူးလက်မှတ်ကို မတရားအသုံးပြုမှု”၊ “တရားဝင်ခွင့်ပြုချက်မရှိဘဲ ထိုင်းနိုင်ငံအတွင်းသို့ ဝင်ရောက်နေထိုင်မှု” စသည့် ပုဒ်မများဖြင့် ဥပဒေအရ ထိရောက်စွာ အရေးယူနိုင်ရန် မဲဆောက်မြို့မရဲစခန်းရှိ စုံစမ်းစစ်ဆေးရေးအရာရှိများထံ လွှဲပြောင်းပို့ဆောင်ထားကြောင်း သိရှိရသည်။

The post ထိုင်းနိုင်ငံ၊ အယုဒ္ဓယခရိုင်တွင် တရားမဝင် ခိုးဝင်လာသော မြန်မာအလုပ်သမား ၇ ဦးကို ထိုင်းအာဏာ ပိုင်များက ဖမ်းဆီး၊ မဲဆောက်တွင်လည်း အခြားသူပတ်စ်ပို့ဖြင့် ဝင်လာသော မြန်မာလူငယ် ၂ ဦး ဖမ်းခံရ appeared first on Khit Thit Media.

အကြမ်းဖက်စစ်ခေါင်းဆောင် မင်းအောင်လှိုင်အား ဂုဏ်ပြုဖွဲ့နွဲ့သီဆိုထားသည့် သီချင်းကို လူမှုကွန် ရက်ပေါ်တွင် လှောင်ပြောင်ဝေဖန်ခဲ့သည့် တောင်ကြီးမြို့မှ ဧကရီကျော် (ခ) နန်းဧကရီကျော်ကို စစ်ကောင်စီက နိုင်ငံတော်အကြည်ညိုပျက်စေမှု ပုဒ်မ-၅၀၅ (က) ဖြင့် ဖမ်းဆီးအမှုဖွင့်လိုက်ကြောင်း တောင်ကြီးမြို့ခံများနှင့် စစ်ကောင်စီ၏ ဝါဒဖြန့်သတင်းများအရ သိရသည်။

အကြမ်းဖက်မင်းအောင်လှိုင်ကို အလွန်အကျူးအမွမ်းတင်ထားသည့် “လရောင်အောက်က ကုမုဒြာ” (ခေါ်) ငွေလမင်းကြီးသီချင်းကို တေးရေး သျှန်ထွန်း (မြန်မာစာ) က ရေးသားပြီး တေးသံရှင် မေသက်ထားဆွေက သီဆိုထားခြင်းဖြစ်သည်။

အဆိုပါသီချင်းနှင့် ပတ်သက်၍ စစ်အုပ်စုကို အမြဲတစေ လှောင်ပြောင်လေ့ရှိသော “ကေသီ ဘေဘီ တော်လောက်ပြီ” Facebook စာမျက်နှာ (Page) က “ဆိုရတာ ပါးစပ်ဝမှာ အရှက်ရှိ မရှိတော့မသိဘူး၊ ကြားရတာ နားဝမှာတော့ ရှက်စဖွယ် စကားလုံးတွေပဲ၊ ဒါကြောင့် ကျွန်တွေမှာ အာဏာပါဝါမရှိဘူး၊ သူတို့ကို ခိုင်းတဲ့အတိုင်း လုပ်ပေးရတာ၊ Chee ဆိုလည်း စားကြမှာ၊ Ball ဆိုလဲ မကြရမှာ၊ ဒါဟာ ကျွန်တွေရဲ့ သဘောသဘာဝပဲ”ဟု ရေးသားဖော်ပြခဲ့သည်။

ယင်းသို့ ရေးသားထားသည့် ပို့စ် (Post) အောက်တွင် တောင်ကြီးမြို့တွင် နေထိုင်သူ “Nang Akari” အမည်ရှိ Facebook အကောင့်ပိုင်ရှင် ဧကရီကျော် (ခ) နန်းဧကရီကျော်က “ထဘီတရွတ်တိုက် ဝတ်လည်း ရွံ့တယ်နော်” ဟု ဝင်ရောက်မှတ်ချက် (Comment) ရေးသားခဲ့မှုအပေါ် မှတ်ချက်ရေးသူ ဧကရီကျော်(ခ) နန်းဧကရီကို ဖမ်းဆီးရန် စစ်လော်ဘီများက တယ်လီဂရမ်ချန်နယ်များမှတစ်ဆင့် လှုံ့ဆော်ခဲ့ကြသည်။

ထိုသို့ မှတ်ချက်ရေးသားမှုကြောင့် ဧကရီကျော် (ခ) နန်းဧကရီကျော်ကို တောင်ကြီးမြို့ နယ်မြေခံရဲစခန်းမှ နေ၍ အကြမ်းဖက်စစ်အုပ်စုကို အကြည်ညိုပျက်စေရန် လှုံ့ဆော်မှုဖြင့် ဇွန်လ ၆ ရက် စနညေ့်ညပိုင်းက ဖမ်းဆီးကာ ပုဒ်မ-၅၀၅ (က) ဖြင့် အမှုဖွင့်အရေးယူ ဆောင်ရွက်ထားကြောင်း သိရသည်။

အလားတူ ပဲခူးမြို့တွင်လည်း လူမှုကွန်ရက်ပေါ်တွင် တော်လှန်ရေးသတင်းများ မျှဝေမှုဖြင့် ဖမ်းဆီးမှုများ ရှိခဲ့သည်။

ပဲခူးမြို့၊ လိပ်ပြာကန်ရပ်ကွက်တွင် နေထိုင်သည့် အသက် ၆၈ နှစ်အရွယ် “Daw Kyin Soe” Facebook အကောင့်ပိုင်ရှင် ဒေါ်ကျင်စိုးသည် လူမှုကွန်ရက်စာမျက်နှာပေါ်တွင် ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် အမျိုးသားညီညွတ်ရေးအစိုးရ (NUG) တို့နှင့် ပတ်သက်သည့် ပို့စ်များကို မျှဝေ (Share) ခဲ့သည်။

ထိုသို့ မျှဝေမှုကြောင့် ၎င်းအား ပဲခူးမြို့မရဲစခန်း၌ ဖမ်းဆီးထိန်းသိမ်းကာ အမှုဖွင့်လှစ် အရေးယူဆောင်ရွက်ထားကြောင်း ဇွန်လ ၇ ရက်နေ့ထုတ် စစ်ကောင်စီ၏ ဝါဒဖြန့် “မြန်မာ့အလင်း” သတင်းစာတွင် ဖော်ပြထားသည်။

ဓာတ်ပုံ- မင်းအောင်လှိုင် ဂုဏ်ပြု ငွေလမင်းကြီး သီချင်းကို လှောင်ပြောင်မှုဖြင့် အဖမ်းခံရသူ ဧကရီကျော် (ခ) နန်းဧကရီကျော်

The post မင်းအောင်လှိုင်ကို ဂုဏ်ပြု “ငွေလမင်းကြီး” သီချင်းကို လှောင်ပြောင်မှုဖြင့် တောင်ကြီးမှ မနန်းဧကရီကျော်ကို စစ်တပ်က ဖမ်းဆီး၊ လူမှုကွန်ရက်တွင် တော်လှန်ရေးသတင်းမျှဝေသည့် အသက် ၆၈ နှစ် အဘွားတစ်ဦးလည်း အဖမ်းခံရ appeared first on Khit Thit Media.

စစ်ကိုင်းတိုင်း၊ ကလေးမြို့တွင် စစ်ကောင်စီတပ်က နေ့စဉ် လူငယ် ၃၀ နီးပါးကို စစ်မှုထမ်းခိုင်းရန် ပေါ်တာဆွဲ ဖမ်းဆီးပြီး စစ်သင် တန်းကျောင်းများသို့ ဆက်တိုက်ပို့ဆောင်နေကြောင်းကလေးမြို့ လူထုတိုက်ပွဲကော်မတီမှ တာဝန်ရှိသူတစ်ဦးက ပြောကြားသည်။

ကလေးမြို့တွင် ဇွန်လဆန်းပိုင်းမှ စတင်ကာ လမ်းဆုံများနှင့် လူစည်ကားရာ နေရာများ၌ စစ်ကောင်စီတပ်နှင့် ပျူစောထီးအဖွဲ့များ ပူးပေါင်း၍ လူငယ်များကို ပေါ်တာဆွဲ ဖမ်းဆီးမှုများ ဆက်တိုက်ပြုလုပ်လာသဖြင့် နေ့စဉ် လူငယ် ၃၀ နီးပါး ဖမ်းဆီးခံနေရသည်။

ယခင်က ဖမ်းဆီးခံရသူများကို ငွေကြေးဖြင့် လိုက်လံရွေးထုတ်၍ ရသော်လည်း လက်ရှိတွင် ရွေးထုတ်ခွင့်မပေးတော့ဘဲ အသက်မပြည့်သေးသည့် ကလေးငယ်များကိုပါ မှတ်ပုံတင်အတင်းအကျပ်လုပ်ပေးကာ စခန်းကြီးကျေးရွာအနီးရှိ စစ်တပ်၏ လေ့ကျင့်ရေး – ၁၀ တပ်သို့ တိုက်ရိုက်ပို့ဆောင်နေကြောင်း သိရသည်။

ကလေးမြို့လူထုတိုက်ပွဲဦးဆောင်ကော်မတီမှ တာဝန်ရှိသူက “ပြီးခဲ့တဲ့ ၃ ရက်နေ့တုန်းက တစ်နေ့တည်းကို အယောက် ၃၀ လောက်ဆွဲတယ်။ အခုက တော်တော်လေးကို ဆိုးဝါးနေတယ်၊ အရင်ထက်ကို ပိုဆိုးလာတယ်။ မိုးလေဝသရုံးကုန်းဆင်းနားမှာလည်း ပန်းရံဆင်းပြီးပြန်တဲ့ အလုပ်သမား ၄ ယောက်ကို ဖမ်းသွားတယ်။ ကလေးမြို့ပေါ်မှာ ကြုံရင်ကြုံသလိုကို ဖမ်းနေတာ။ ဆိုင်ကယ်နဲ့ တစ်ယောက်တည်းလာရင်လည်း ဆိုင်ကယ်ကိုဖမ်းသလိုနဲ့တားပြီးတော့ လူကော ဆိုင်ကယ်ကော ဖမ်းတာပဲ။ လမ်းလျှောက်လာရင်လည်း ကားပေါ် အတင်းဆွဲတင်ပြီးဖမ်းတယ်။ အခြေအနေက တော်တော်လေးကို ဆိုးနေပါတယ်”ဟု ပြောဆိုသည်။

ထို့ကြောင့် ပြည်သူများအနေဖြင့် ဖမ်းဆီးမှုအများဆုံးလုပ်ဆောင်လေ့ရှိသည့် ဗိုလ်ချုပ်လမ်းမကြီး၊ စံပြလမ်း ထောင့်၊ လမ်းဆုံများနှင့် ဟိုတယ်/ကားကြီးဝင်း အနီးတဝိုက်သို့ သွားလာခြင်းမပြုရန်နှင့် ပိတ်ဆို့မှုအများဆုံးဖြစ်သည့် ညနေ ၃ နာရီမှ ၇ နာရီအတွင်း (ရုံးတက်ရုံးဆင်းချိန်နှင့် ဈေးအချိန်များ) ပြင်ပသို့ ထွက်ခွာခြင်းမပြုကြရန် လူထုတိုက်ပွဲကော်မတီက သတိပေးနှိုးဆော်ထားသည်။

အလားတူ မကွေးတိုင်း၊ စလင်းမြို့နယ်၊ စေသူ့ရှင်ကုန်းကျေးရွာ အုပ်ချုပ်ရေးမှူး ထွန်းနိုင် ဦးဆောင်ကာ ဇွန်လ ၁ ရက်နေ့မှစ၍ အနီးနားရှိ ကျေးရွာ ၉ ခုမှ အသက် ၁၈ နှစ်မှ ၃၅ နှစ်အတွင်းရှိသော လူငယ်များရှိသည့် နေအိမ်များကို စစ်မှုထမ်းကြေးအဖြစ် တစ်အိမ်လျှင် ငွေကျပ် ၂၀,၀၀၀ စီ လိုက်လံကောက်ခံနေကြောင်း သိရသည်။

ငွေကြေးမပေးဆောင်သည့် နေအိမ်မှ လူငယ်များကို စစ်တပ်ထဲသို့ ပို့ဆောင်မည်ဟု အုပ်ချုပ်ရေးမှူးနှင့် ၎င်း၏ အပေါင်းအပါများက လိုက်လံခြိမ်းခြောက်နေခြင်း ဖြစ်သည်။

စစ်မှုထမ်းကြေး ကောက်ခံခြင်းခံနေရသည့် ကျေးရွာ ၉ ခုမှာ မကျီးကုန်းကျေးရွာ၊ မကျီးပင်ပုကျေးရွာ၊ အင်းပုတ်ကျေးရွာ၊ ကူတိုတောင်ရွာ၊ ကူတိုမြောက်ရွာ၊ စေသူ့ရှင်ကုန်းကျေးရွာ ၊ပေါက်ကုန်းကျေးရွာ၊ ခြင်္သေဦးကျေးရွာ၊ ကျဉ်ကုန်းကျေးရွာနှင့် ကျွဲကျောင်းကျေးရွာတို့ ဖြစ်ကြသည်။

ဒေသခံပြည်သူတစ်ဦးက “ထွန်းနိုင်က လက်နက်ရ ပျူစောထီး တစ်ယောက်ပါ။ ၂၅၃ ၊ ၂၅၄၊ ၂၅၅ တပ်ရင်း စလင်းအခြေစိုက် ၁၀၁ လက်အောက်ခံတပ်များထဲမှာ အနေများတယ်။ တပ်တွင်းထဲမှ စီစဉ်ညွှန်ကြားတာများတယ်။ စလင်းမြို့နယ် စေသူ့ရှင်ကုန်းကျေးရွာ အုပ်ချုပ်ရေးမှူး ထွန်းနိုင်ဦးဆောင်ပြီးတော့ စစ်မှုထမ်းကြေး ကောက်ခံနေတာ။ စစ်မှုထမ်းကြေး မပေးဆောင်တဲ့ နေအိမ်က လူငယ်တွေကို စစ်တပ်ထဲ သွားရမယ်၊ အရေးယူမယ်၊ စစ်မှု ထမ်းရမယ်လို့ ခြိမ်းခြောက်ပြောဆိုသွားတယ်လို့ သိရတယ်။”ဟု ပြောဆိုသည်။

လက်ရှိတွင် စစ်မှုထမ်းကြေး ပေးဆောင်နေရသည့် ကျေးရွာ ၉ ခုစလုံး၌ စုစုပေါင်းအိမ်ခြေ ၂,၇၀၀ ဝန်းကျင်နှင့် လူဦးရေတစ်သောင်းကျော်ဝန်းကျင်ရှိကြောင်း သိရှိရသည်။

ဓာတ်ပုံ- အကြမ်းဖက်စစ်တပ်က ညအချိန် ဆိုင်ကယ်များကို စစ်ဆေးပြီး ပေါ်တာဆွဲ ဖမ်းဆီးမှုများ လုပ်ဆောင်နေစဉ်။

The post ကလေးမြို့တွင် စစ်တပ်က နေ့စဉ် လူငယ် ၃၀ နီးပါးကို ပေါ်တာဆွဲနေပြီး စလင်းမြို့နယ်တွင်လည်း စစ်မှုထမ်းကြေး မပေးသူများကို ခြိမ်းခြောက်ငွေတောင်းနေ appeared first on Khit Thit Media.

၁၁၄ ကြိမ်မြောက် အပြည်ပြည်ဆိုင်ရာ အလုပ်သမားညီလာခံ (ILC) တွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများ အမြန်ဆုံးလွတ်မြောက်ရေးအတွက် ဝိုင်းဝန်းတောင်းဆိုပေးကြပါရန် အလုပ်သမားသမဂ္ဂများအဖွဲ့ချုပ်-မြန်မာ (CTUM) ၏ လက်ထောက်အထွေထွေအတွင်းရေးမှူး မဖြိုးစန္ဒာစိုးက တိုက်တွန်းပြောကြားလိုက်သည်။

ယမန်နေ့ ဇွန်လ ၆ ရက်နေ့ ဆွစ်ဇာလန်နိုင်ငံ၊ ဂျနီဗာမြို့ရှိ အပြည်ပြည်ဆိုင်ရာ အလုပ်သမားအဖွဲ့အစည်း (ILO) ရုံးချုပ်တွင် ကျင်းပပြုလုပ်ခဲ့သည့် ၁၁၄ ကြိမ်မြောက် အပြည်ပြည်ဆိုင်ရာ အလုပ်သမားညီလာခံ (ILC) တွင် ၎င်းက ယခုကဲ့သို့ တိုက်တွန်းတောင်းဆိုခဲ့ခြင်း ဖြစ်သည်။

စစ်ကောင်စီဘက်က နိုင်ငံအတွင်း တရားဥပဒေစိုးမိုးရေး လည်ပတ်နေပြီး ဖမ်းဆီးထိန်းသိမ်းခံထားရသူများကို တရားမျှတစွာ ဆက်ဆံနေသည်ဟု ပြောဆိုနေသော်လည်း၊ စစ်အာဏာသိမ်းပြီး ၅ နှစ်ကျော်ကြာလာသည့်တိုင်အောင် ဒေါ်အောင်ဆန်းစုကြည်၏ ကျန်းမာရေးအခြေအနေနှင့် သက်ရှိထင်ရှားရှိမှုအတွက် လွတ်လပ်သည့် အထောက်အထားတစ်စုံတစ်ရာ မရရှိသေးကြောင်း ၎င်းက ထောက်ပြသည်။

ထို့ကြောင့် နိုင်ငံတကာအသိုက်အဝန်းအနေဖြင့် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး လွတ်မြောက်လာရေးအတွက် ဆက်လက်တိုက်ပွဲဝင်ပေးရန်နှင့် ဒေါ်အောင်ဆန်းစုကြည် သက်ရှိထင်ရှားရှိကြောင်း အထောက်အထား (Proof of Life) ပြသရန် စစ်ကောင်စီထံ ဆက်လက်တောင်းဆိုပေးကြရန် ညီလာခံတွင် တင်ပြသည်။

အလုပ်သမားသမဂ္ဂများအဖွဲ့ချုပ်-မြန်မာ လက်ထောက်အထွေထွေအတွင်းရေးမှူး မဖြိုးစန္ဒာစိုးက “အာဏာသိမ်းပြီး ငါးနှစ်ကျော်ကြာသည်အထိတောင်မှ နိုင်ငံတကာ အသိုက်အဝန်းက ဒေါ်အောင်ဆန်းစုကြည်ရဲ့ ကျန်းမာရေးနဲ့ အသက်ရှင်သန်မှုအတွက် လွတ်လပ်တဲ့ အထောက်အထားတွေ မရရှိကြသေးပါဘူး။ ဒါက နိုင်ငံရေးမေးခွန်းသက်သက် မဟုတ်ပါဘူး။ ပွင့်လင်းမြင်သာမှု၊ တာဝန်ခံမှုနှင့် အခြေခံလူ့ဂုဏ်သိက္ခာအတွက် မေးခွန်းထုတ်စရာဖြစ်ပါတယ်။”ဟု ပြောဆိုသည်။

စစ်ကောင်စီအနေဖြင့် ယုံကြည်မှုရှိပါက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ လက်ရှိအခြေ အနေနှင့် ဖမ်းဆီးခံထားရသူအားလုံး၏ အခြေအနေများကို လွတ်လပ်စွာ အတည်ပြုခွင့် ပေးရမည်ဖြစ်ကြောင်း၊ ယခုကဲ့သို့ အတည်ပြုခွင့်မပေးဘဲ ကန့်သတ်ထားခြင်းက မြန်မာနိုင်ငံ၏ လွတ်လပ်ခွင့်အခြေအနေသည် အလွန်စိုးရိမ်စရာကောင်းနေသည်ကို ဖော်ပြနေခြင်းဖြစ်ကြောင်း ထည့်သွင်းထောက်ပြထားသည်။

The post အပြည်ပြည်ဆိုင်ရာ အလုပ်သမား ညီလာခံတွင် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများ လွတ်မြောက်ရေးအတွက် ၀ိုင်းဝန်းတောင်းဆိုကြရန် နိုင်ငံတကာသို့ တိုက်တွန်း appeared first on Khit Thit Media.

မကွေးတိုင်း၊ ဆောမြို့နယ်နှင့် စစ်ကိုင်းတိုင်း၊ ချောင်းဦးမြို့နယ်တို့ရှိ ကျေးရွာများကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းမှတစ်ဆင့် ဗုံးကျဲတိုက်ခိုက်ခဲ့သဖြင့် ဒေသခံပြည်သူ ၂ ဦး သေဆုံးပြီး အများအပြား ဒဏ်ရာရရှိခဲ့ကြောင်း ဒေသခံပြည်သူများနှင့် နယ်မြေခံသတင်းမှန်ပြန်ကြားရေးအဖွဲ့များထံမှ သိရသည်။

ယမန်နေ့ ဇွန်လ ၆ ရက်နေ့ မကွေးတိုင်း၊ ဆောမြို့နယ်၊ ကျခဲကျေးရွာကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းမှတစ်ဆင့် ဗုံးများ ကျဲချတိုက်ခိုက်ခဲ့ပြီး ယင်းတိုက်ခိုက်မှုကြောင့် ကျခဲကျေးရွာမှ ဒေသခံပြည်သူ ၁ ဦး သေဆုံးခဲ့ပြီး၊ အခြားပြည်သူ ၃ ဦး ထိခိုက်ဒဏ်ရာရရှိခဲ့သည်။

ဒေသခံပြည်သူတစ်ဦးက ” တိုက်ပွဲဖြစ်တာမရှိဘဲ လေကြောင်းတိုက်ခိုက်ခဲ့တာ ဖြစ်ပါတယ်။ ပြည်သူ ၁ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့ပါတယ်။ ဒဏ်ရာရရှိတဲ့ ပြည်သူ ၃ ဦးကတော့ စိုးရိမ်ရတဲ့အခြေအနေရှိတယ်။ စစ်တပ်က အဲဒီဘက်ကို ဖုန်းလိုင်းတွေ ဖြတ်တောက်ထားတဲ့အတွက်ကြောင့် နောက်ဆက်တွဲ အခြေအနေကိုတော့ မသိရသေးပါဘူး” ဟု ရန်ကုန်ခေတ်သစ်သတင်းဌာနသို့ ပြောကြားသည်။

အလားတူ စစ်ကိုင်းတိုင်း၊ ချောင်းဦးမြို့နယ်အတွင်း၌လည်း စစ်တပ်က လေကြောင်းတိုက်ခိုက်မှုများကို ဆက်တိုက်ပြုလုပ်လျက်ရှိပြီး ဇွန်လ ၅ ရက်နေ့ မွန်းလွဲ ၂ နာရီ ၃၅ မိနစ်ခန့်အချိန် အနောက်မြောက်ပိုင်းတိုင်းစစ်ဌာနချုပ် (မနခ) မှ ပျံသန်းတက်လာသော Gyrocopter ၃ စီးဖြင့် ချောင်းဦးမြို့နယ်၊ ရှမ်းထူးကျေးရွာ ဘုန်းကြီးကျောင်းကို တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့သည်။

အဆိုပါ လေကြောင်းတိုက်ခိုက်မှုအတွင်း ရှမ်းထူးကျေးရွာ၌ နေထိုင်သည့် ပြည်သူ ၁ ဦး သေဆုံးခဲ့ပြီး၊ အခြားပြည်သူ ၂ ဦး ထိခိုက်ဒဏ်ရာရရှိကာ ဘုန်းကြီးကျောင်းအဆောက်အအုံလည်း ထိခိုက်ပျက်စီးသွားခဲ့သည်။

မြောင်မြို့ သတင်းမှန်ပြန်ကြားရေးအဖွဲ့မှ တာဝန်ရှိသူတစ်ဦးက ” ဘုန်းကြီးကျောင်းမှာ ဆရာ၊ ဆရာမတွေ အစည်းအဝေးထိုင်နေကြတာကို စစ်တပ်က လာရောက်ဗုံးကျဲသွားတာပါ။ ဗုံးကျဲလို့ သေဆုံးသွားတဲ့ ပြည်သူ ၁ ဦးကတော့ ရှမ်းထူးကျေးရွာမှာ နေထိုင်သူဖြစ်ပြီး အသက်အရွယ်ကိုတော့ မသိရသေးပါဘူး။ ဒဏ်ရာရရှိသူ ၂ ဦးထဲက တစ်ဦးက စိုးရိမ်ရပြီး၊ အခြားတစ်ဦးကတော့ မစိုးရိမ်ရဘူးလို့ သိရပါတယ်။ ဘုန်းကြီးကျောင်းလည်း ထိခိုက်ပျက်စီးသွားပါတယ်” ဟု ပြောကြားသည်။

ထို့ပြင် ဇွန်လ ၄ ရက်နေ့ကလည်း စစ်တပ်က ချောင်းဦးမြို့နယ်အတွင်းရှိ မင်းခေါင်ကျေးရွာနှင့် ရှမ်းထူးကျေးရွာတို့ကို တိုက်ပွဲဖြစ်ပွားခြင်းမရှိဘဲ လေကြောင်းမှတစ်ဆင့် ဗုံးကျဲတိုက်ခိုက်မှုများ ပြုလုပ်ခဲ့သည်။

အဆိုပါ တိုက်ခိုက်မှုတွင် အနောက်မြောက်ပိုင်းတိုင်းစစ်ဌာနချုပ် (မနခ) မှ တက်လာသည့် Gyrocopter များနှင့် Paramotor များကို အသုံးပြု၍ ကျေးရွာများအတွင်းသို့ ဗုံးသီးများ ကျဲချခဲ့ခြင်းဖြစ်သည်။

ဓာတ်ပုံ- အညာဒေသတွင် စစ်တပ်၏ လေကြောင်းတိုက်ခိုက်မှုကြောင့် မီးလောင်ကျွမ်းနေစဉ်။ (ပုံအဟောင်းကို အသုံးပြုထားပါသည်။)

The post ဆောနှင့် ချောင်းဦးမြို့နယ် ကျေးရွာများကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေ ကြောင်းတိုက်ခိုက်မှု ပြည်သူ ၂ ဦး သေဆုံး appeared first on Khit Thit Media.