မကွေးတိုင်း၊ ဆိပ်ဖြူမြို့နယ်ရှိ အမှတ် (၂၂) ကာကွယ်ရေးပစ္စည်းစက်ရုံ (ကပစ ၂၂) မှ အကြမ်းဖက်စစ်ကောင်စီတပ်၏ ရိက္ခာပို့စစ်ကြောင်းများ ထပ်မံထွက်ခွာလာသောကြောင့် ပုသိမ်-မုံရွာလမ်းနှင့် ဆိပ်ဖြူ-ပေါက်လမ်းပိုင်းများကို တော်လှန်ရေးတပ်ဖွဲ့များက စစ်ရေးအရ ယာယီပိတ်ထားလိုက်ကြောင်း သိရသည်။

ယနေ့ ဧပြီလ ၂၂ ရက်နေ့ ညနေပိုင်းတွင် ကပစ ၂၂ မှ အင်အား ၃၀၀ ခန့်နှင့် မော်တော်ယာဉ် အစီးရေ ၅၀ ကျော်ပါဝင်သော စစ်ကောင်စီစစ်ကြောင်းသည် ပုသိမ်-မုံရွာ လမ်းပိုင်းအတိုင်း စတင်ထွက်ခွာလာခြင်းဖြစ်သည်။ ၎င်းစစ်ကြောင်းသည် ပေါက်မြို့ပေါ်၊ ကုက္ကိုစုပျူစောထီးရွာနှင့် ရေပြာရွာရဲစခန်းတို့သို့ ရိက္ခာပို့ဆောင်ရန် ရည်ရွယ်ထားကြောင်း ဆိပ်ဖြူပြောက်ကျား တစ်ကိုယ်တော် ကျားဇိုး LDF ပြည်သူ့ကာကွယ်ရေးတပ်မှ ကိုကျားဇိုးက ရန်ကုန်ခေတ်သစ်သတင်းဌာနထံသို့ ပြောဆိုသည်။

စစ်ကောင်စီစစ်ကြောင်း ထွက်ခွာလာမှုကြောင့် စစ်ရေးတင်းမာနေပြီး တော်လှန်ရေးတပ်ဖွဲ့များက

ပုသိမ်-မုံရွာ လမ်းပိုင်း: ဆိပ်ဖြူ ကပစ ၂၂ မှ ဘုရားတောင်ကျေးရွာအထိ၊ဆိပ်ဖြူ-ပေါက် လမ်းပိုင်း: ဆိပ်ဖြူ ကပစ ၂၂ မှ ပေါက်မြို့အထိ ယာယီပိတ်ထားကြောင်း သိရှိရသည်။

လမ်းဘေးဝဲယာ တစ်မိုင်ပတ်လည်အတွင်းသည် စစ်ရေးပစ်မှတ်များ ဖြစ်လာနိုင်သဖြင့် ပြည်သူများအနေဖြင့် အသွားအလာ မပြုလုပ်ကြရန်နှင့် မဖြစ်မနေသွားလာရပါက နယ်မြေခံအဖွဲ့အစည်းများထံ ခွင့်ပြုချက်ရယူပြီးမှသာ သွားလာကြရန် နှိုးဆော်ထားပါသည်။

အဆိုပါစစ်ကြောင်းသည် ဧပြီလ ၁၉ ရက်နေ့ကလည်း ပေါက်မြို့နယ်အတွင်းသို့ စစ်ကြောင်းထိုးခဲ့ပြီး ဧပြီလ ၂၀ ရက်နေ့တွင် ကပစ ၂၂ သို့ ပြန်လည်ဝင်ရောက်သွားခဲ့သည်။ ထိုသို့ဝင်ရောက်စဉ်အတွင်း လူသားဒိုင်းအဖြစ် ဖမ်းဆီးထားသည့် ပြည်သူ ၇ ဦးကို ပြန်လွှတ်ပေးခဲ့သော်လည်း ၎င်းတို့၏လက်ကိုင်ဖုန်းများကို သိမ်းဆည်းကာ ဖုန်းအတွင်းရှိ ငွေကျပ်သိန်း ၁၀၀ ကျော်ကို လုယက်ခိုးယူသွားခဲ့ကြောင်း သိရှိရပါသည်။

“ပုသိမ်-မုံရွာလမ်းပိုင်းနဲ့ ဆိတ်ဖြူ-ပေါက်လမ်းပိုင်းတွေကို အသွားအလာမပြုလုပ်ဖို့ ယာယီပိတ်ထားတယ်။ မဖြစ်မနေသွားမည်ဆိုရင် နယ်မြေခံအဖွဲ့အစီးကို အကြောင်းကြားပြီးမှ သွားလာဖို့ကြပါ။ စစ်ရေးပစ်မှတ်တွေကတော့ လမ်းဘေးဘယ်ညာ တစ်မိုင်အကွာအတွင်းဖြစ်တာမို့လို့ အဲ့အပိုင်းတွေကို ပြည်သူတွေအနေနဲ့ အသွားအလာမလုပ်ဖို့နဲ့ ခွင့်ပြုချက်ယူပြီးမှ သွားလာကြဖို့ အသိပေးချင်ပါတယ်။ ဒါအပြင် ပြည်သူတွေအနေနဲ့ စစ်ခွေးစစ်ကြောင်းထွက်လာနေပြီ ဖြစ်တာကြောင့် ကြိုတင်တိမ်းရှောင်တာမျိုးနဲ့ လမ်းပိုင်းပေါ်ကို မသွားလာဖို့ကို ပြောချင်ပါတယ်” ဟု ဆိပ်ဖြူပြောက်ကျား တစ်ကိုယ်တော် ကျားဇိုး LDF ပြည်သူ့ကာကွယ်ရေးတပ်မှ ကိုကျားဇိုးက ပြောဆိုသည်။

လက်ရှိတွင် စစ်ကောင်စီစစ်ကြောင်းကြောင့် ဒေသခံပြည်သူများ ကြိုတင်တိမ်းရှောင်နေကြရပြီး တော်လှန်ရေးတပ်ဖွဲ့များနှင့် စစ်ရေးတင်းမာမှုများ ဆက်လက်ရှိနေပါသည်။

ဓာတ်ပုံ- အကြမ်းဖက်စစ်တပ်၏ စစ်ယာဉ်တန်း။ (ပုံအဟောင်းကို အသုံးပြုထားပါသည်။)

The post ဆိပ်ဖြူ ကပစ ၂၂ မှ စစ်တပ်စစ်ကြောင်း ထပ်မံထွက်လာ၍ ပုသိမ်-မုံရွာနှင့် ဆိပ်ဖြူ-ပေါက်လမ်းပိုင်းများကို ယာယီပိတ်ထား appeared first on Khit Thit Media.

ရန်ကုန်၊ ဧပြီ ၂၂

ကရင်ပြည်နယ်၊ ဘားအံမြို့နယ်တွင် စစ်တပ်က လေကြောင်းတိုက်ခိုက်မှုကြောင့် ပြည်သူ ၁ ဦး သေဆုံးပြီး ၆၀၀၀ ကျော် အရေးပေါ် ထွက်ပြေးတိမ်းရှောင်နေရကြောင်း KNU ဗဟိုက သတင်းထုတ် ပြန် သည်။

ဘားအံမြို့နယ်အတွင်းရှိ ကျေးရွာများကို အာဏာသိမ်းစစ်ကောင်စီတပ်က မြန်မာနှစ်သစ်ကူး သင်္ကြန်ကာလအတွင်း တိုက်ပွဲဖြစ်ပွားခြင်းမရှိဘဲ လေကြောင်းနှင့် လက်နက်ကြီးများဖြင့် ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ရာ အရပ်သားပြည်သူတစ်ဦး သေဆုံးပြီး တစ်ဦး ဒဏ်ရာရရှိခဲ့သည့်အပြင် ဒေသခံ ၆,၀၀၀ ကျော် ဘေးလွတ်ရာသို့ ထွက်ပြေးတိမ်းရှောင်နေရခြင်းဖြစ်သည်။

ဧပြီလ ၁၃ ရက်နေ့ ညနေပိုင်းတွင် စစ်ကောင်စီတပ်က Y-12 လေယာဉ်ဖြင့် ဘားအံမြို့နယ်၊ ဟတ္တလိုက်ကျေးရွာအုပ်စုအတွင်းသို့ ၁၂၂ မမ ဗုံးသီးများ ကြဲချတိုက်ခိုက်ခဲ့ရာ တလိုင်းကရင်ကျေးရွာမှ အပြစ်မဲ့ပြည်သူတစ်ဦး ဗုံးစထိမှန် သေဆုံးသွားခဲ့သည်။ ထို့ပြင် အခြားပြည်သူတစ်ဦးလည်း လက်နက်ကြီးကျည်စထိမှန်ကာ ဒဏ်ရာရရှိခဲ့ပြီး နွားတစ်ကောင် သေဆုံးကာ နေအိမ်နှင့် ဆိုင်ကယ်များ ပျက်စီးခဲ့ရသည်။

ဧပြီလ ၁၆ ရက်နေ့တွင်လည်း ဂျက်ဖိုက်တာတိုက်လေယာဉ်ဖြင့် ဘားအံမြို့နယ်၊ ဘန့်ဘွေးကုန်းကျေးရွာအုပ်စုအတွင်းသို့ Cluster ဗုံးသီးများ ကြဲချခဲ့သည့်အပြင်၊ အမှတ် (၂၀၂) တပ်ရင်းကလည်း လက်နက်ကြီးများဖြင့် ထပ်မံပစ်ခတ်ခဲ့သဖြင့် ပြည်သူ့နေအိမ်များနှင့် ရော်ဘာစိုက်ခင်းများ ထိခိုက်ပျက်စီးခဲ့ရသည်။

လူနေကျေးရွာများကို ပစ်မှတ်ထားသည့် ယင်းတိုက်ခိုက်မှုများကြောင့် ဘားအံမြို့နယ်၊ ဟတ္တလိုက်ကျေးရွာအုပ်စုအတွင်းရှိ ကျေးရွာ ၁၀ ရွာမှ အိမ်ခြေ ၈၈၀ ခန့်၊ စုစုပေါင်း လူဦးရေ ၆,၂၈၆ ဦးသည် အသက်ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရသည်။

လက်ရှိတွင် နေရပ်စွန့်ခွာ ထွက်ပြေးနေရသူများအတွက် စားနပ်ရိက္ခာ၊ ဆေးဝါးနှင့် အမိုးအကာများ အရေးပေါ် အကူအညီလိုအပ်နေကြောင်း သိရှိရသည်။ရန်ကုန်၊ ဧပြီ ၂၂

ကရင်ပြည်နယ်၊ ဘားအံမြို့နယ်တွင် စစ်တပ်က လေကြောင်းတိုက်ခိုက်မှုကြောင့် ပြည်သူ ၁ ဦး သေဆုံးပြီး ၆၀၀၀ ကျော် အရေးပေါ် ထွက်ပြေးတိမ်းရှောင်နေရကြောင်း KNU ဗဟိုက သတင်းထုတ် ပြန် သည်။

ဘားအံမြို့နယ်အတွင်းရှိ ကျေးရွာများကို အာဏာသိမ်းစစ်ကောင်စီတပ်က မြန်မာနှစ်သစ်ကူး သင်္ကြန်ကာလအတွင်း တိုက်ပွဲဖြစ်ပွားခြင်းမရှိဘဲ လေကြောင်းနှင့် လက်နက်ကြီးများဖြင့် ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ရာ အရပ်သားပြည်သူတစ်ဦး သေဆုံးပြီး တစ်ဦး ဒဏ်ရာရရှိခဲ့သည့်အပြင် ဒေသခံ ၆,၀၀၀ ကျော် ဘေးလွတ်ရာသို့ ထွက်ပြေးတိမ်းရှောင်နေရခြင်းဖြစ်သည်။

ဧပြီလ ၁၃ ရက်နေ့ ညနေပိုင်းတွင် စစ်ကောင်စီတပ်က Y-12 လေယာဉ်ဖြင့် ဘားအံမြို့နယ်၊ ဟတ္တလိုက်ကျေးရွာအုပ်စုအတွင်းသို့ ၁၂၂ မမ ဗုံးသီးများ ကြဲချတိုက်ခိုက်ခဲ့ရာ တလိုင်းကရင်ကျေးရွာမှ အပြစ်မဲ့ပြည်သူတစ်ဦး ဗုံးစထိမှန် သေဆုံးသွားခဲ့သည်။ ထို့ပြင် အခြားပြည်သူတစ်ဦးလည်း လက်နက်ကြီးကျည်စထိမှန်ကာ ဒဏ်ရာရရှိခဲ့ပြီး နွားတစ်ကောင် သေဆုံးကာ နေအိမ်နှင့် ဆိုင်ကယ်များ ပျက်စီးခဲ့ရသည်။

ဧပြီလ ၁၆ ရက်နေ့တွင်လည်း ဂျက်ဖိုက်တာတိုက်လေယာဉ်ဖြင့် ဘားအံမြို့နယ်၊ ဘန့်ဘွေးကုန်းကျေးရွာအုပ်စုအတွင်းသို့ Cluster ဗုံးသီးများ ကြဲချခဲ့သည့်အပြင်၊ အမှတ် (၂၀၂) တပ်ရင်းကလည်း လက်နက်ကြီးများဖြင့် ထပ်မံပစ်ခတ်ခဲ့သဖြင့် ပြည်သူ့နေအိမ်များနှင့် ရော်ဘာစိုက်ခင်းများ ထိခိုက်ပျက်စီးခဲ့ရသည်။

လူနေကျေးရွာများကို ပစ်မှတ်ထားသည့် ယင်းတိုက်ခိုက်မှုများကြောင့် ဘားအံမြို့နယ်၊ ဟတ္တလိုက်ကျေးရွာအုပ်စုအတွင်းရှိ ကျေးရွာ ၁၀ ရွာမှ အိမ်ခြေ ၈၈၀ ခန့်၊ စုစုပေါင်း လူဦးရေ ၆,၂၈၆ ဦးသည် အသက်ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရသည်။

လက်ရှိတွင် နေရပ်စွန့်ခွာ ထွက်ပြေးနေရသူများအတွက် စားနပ်ရိက္ခာ၊ ဆေးဝါးနှင့် အမိုးအကာများ အရေးပေါ် အကူအညီလိုအပ်နေကြောင်း သိရှိရသည်။

The post ဘားအံမြို့နယ်တွင် စစ်တပ်က လေကြောင်းတိုက်ခိုက်မှုကြောင့် ပြည်သူ ၁ ဦး သေဆုံးပြီး ၆၀၀၀ ကျော် အရေးပေါ် ထွက်ပြေးတိမ်းရှောင်နေရ appeared first on Khit Thit Media.

စစ်ကိုင်းတိုင်း၊ ပုလဲမြို့နယ်၊ ကိုင်းတွင်းကျေးရွာကို အကြမ်းဖက် စစ်တပ်က စစ်ကြောင်းထိုး ဝင်ရောက်စီးနင်းပြီး နေအိမ်များကို မီးရှို့ဖျက်ဆီးခဲ့ကြောင်း ဒေသသတင်းရင်းမြစ်က ရန်ကုန်ခေတ်သစ်သတင်းဌာနထံသို့ပြောဆိုသည်။

ယမန်နေ့ ဧပြီလ ၂၁ ရက်နေ့ မွန်းလွဲ ၁ နာရီ ၁၅ မိနစ်ခန့်တွင် ပုလဲမြို့နယ်၊ အင်မထီးပျူစောထီးရွာမှ ထွက်လာသော အကြမ်းဖက် စစ်တပ်က ကိုင်းတွင်းကျေးရွာအတွင်းကို စစ်ကြောင်းထိုး ဝင်ရောက်လာပြီး ပြည်သူပိုင် ပစ္စည်များကို လုယှက်ခိုးယူကာ နေအိမ်များကို စတင်မီးရှို့ဖျက်ဆီးခဲ့ကြောင်း၊ ထိုအကြမ်းဖက် စစ်တပ်၏ မီးရှို့ဖျက်ဆီးမှုကြောင့် ကျေးရွာအတွင်းရှိ နေအိမ်အများအပြား မီးလောင်ပြာကျခဲ့ကြောင်း သိရှိရသည်။

အဆိုပါ အကြမ်းဖက် စစ်တပ်သည် ယင်းနေ့ မွန်းလွဲ ၂ နာရီ ၂၅ မိနစ်ခန့်တွင် ကိုင်းတွင်းကျေးရွာရှိ နေအိမ်များကို မီးရှို့ဖျက်ဆီးပြီးနောက် အင်မထီးပျူစောထီးရွာအတွင်းကို ပြန်လည်ဝင်ရောက်သွားကြောင်း သိရသည်။

“အင်မထီးရွာကနေ ထွက်လာတဲ့ စစ်ခွေးတွေက နေ့လည် ၁ နာရီ ၁၅ မိနစ်ခန့်လောက်က ကိုင်းတွင်းရွာကို စတင်မီးရှို့တာပါ။ နေအိမ်ပျက်စီးဆုံးရှုံးမှုကတော့ များတယ်။ နေက ပူတော့ မီးအပူနဲ့ ညှိမ်းသက်ဖို့ဆိုတာကလည်း မလွယ်ကူဘူး။ အိမ်ခြေပျတ်စီးဆုံးရှုံးမှု အသေးစိတ်ကိုတော့ စီစစ်‌နေဆဲပါ။ ပစ္စည်းတွေကတော့ မီးမရှို့ခင် ခိုးယူသွားတာမျိုးရှိတယ်လို့သိရပြီး ပြည်သူတွေ ဖမ်းဆီးတာမျိုတော့မရှိဘူးလို့ သိရပါတယ်” ဟု ဒေသသတင်းရင်းမြစ်က ရန်ကုန်ခေတ်သစ်သို့ ပြောဆိုသည်။

အလားတူ တနင်္သာရီတိုင်း၊ ရေဖြူမြို့နယ်၊ ထားဝယ်ရေနက်ဆိပ်ကမ်းစီမံကိန်းအနီးရှိ နဘုလယ်တိုက်နယ်အတွင်းကို အကြမ်းဖက် စစ်တပ်က ဆက်လက် စစ်ကြောင်းထိုးနေ၍ ကျေးရွာ ၃ ခုမှ ပြည်သူများဘေးလွတ်ရာ ထွက်ပြေးတိမ်းရှောင်နေရကြောင်း ဒေသသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ယမန်နေ့ ဧပြီလ ၂၀ ရက်နေ့မှ စတင်ကာ ရေဖြူမြို့နယ်၊ ထားဝယ်ရေနက်ဆိပ်ကမ်းစီမံကိန်းအတွင်း တပ်စွဲထားသော အကြမ်းဖက် စစ်သားများသည် အင်အား ၁၀၀ ကျော်ဖြင့် နဘုလယ်တိုက်နယ်အတွင်းရှိ ကျေးရွာများကို စစ်ကြောင်းထိုး ဝင်ရောက်လာကြောင်း၊ ဧပြီလ ၂၁ ရက်နေ့တွင် ၎င်းတို့ လူသားဒိုင်းအဖြစ် ဖမ်းဆီးထားသော ပြည်သူ ၂၀ ကျော်မှာ ပြန်လည်လွတ်မြောက်လာပြီ ဖြစ်သော်လည်း စစ်တပ် စစ်ကြောင်း ပြန်လည်ဆုတ်ခွာခြင်းမရှိသေးဘဲ နဘုလယ်တိုက်နယ်အတွင်းရှိ ကျေးရွာများကို ဆက်လက်စစ်ကြောင်းထိုး ဝင်ရောက်နေကြောင်း သိရသည်။

လက်ရှိချိန်တွင် အကြမ်းဖက် စစ်တပ် စစ်ကြောင်းကြောင့် နဘုလယ်တိုက်နယ်အတွင်းရှိ လဲရှောင်ရွာ၊ ပရဒတ်ရွာနှင့် ထိန်ကြီးရွာ စသည့် ကျေးရွာ ၃ ရွာမှ ပြည်သူများ ဘေးလွတ်ရာ ထွက်ပြေးတိမ်းရှောင်နေရကြောင်း သိရှိရသည်။

“မနေ့က စစ်ခွေး စစ်ကြောင်းက မင်္ဂလာဆောင်နဲ့ လမ်းတစ်လျှောက်ကနေ ဖမ်းဆီးသွားတဲ့ ပြည်သူ ၂၀ ကျော် ပြန်လွတ်လာတယ်လို့ ကြားတယ်။လက်ရှိမှာ စစ်ခွေး စစ်ကြောင်းကတော့ အင်းအား ၁၀၀ ကျော်နဲ့ စစ်ကြောင်းပြန်ဆုတ်တာမျိုး မရှိဘဲ နဘုလယ်တိုက်နယ်ထဲမှာပဲ ဆက်ပြီး စစ်ကြောင်းထိုးနေသေးတယ်။ လက်ရှိမှာ နဘုလယ်တိုက်နယ်ထဲက လဲရှောင်ရွာ၊ ပရဒတ်ရွာ၊ ထိန်ကြီးရွာ စတဲ့ ၃ ရွာက ပြည်သူ ရာနဲ့ချီ ထွက်ပြေးတိမ်းရှောင်နေရတယ်။ တစ်ရွာကို ပြည်သူ သုံးပုံနှစ်ပုံကတော့ ရှောင်နေရတယ်။ ရွာတွေထဲက နေအိမ်တွေကို မီးရှို့တာတော့ မရှိသေးဘူး။ နေအိမ်တွေက ပစ္စည်းတွေ ခိုးယူတာတွေတော့ရှိနိုင်တယ်။ ပြည်သူတွေ ထပ်ပြီးဖမ်းဆီးမျိုးတော့ မကြားသေးပေမယ့် စစ်ကြောင်းထိုးရာတစ်လျှောက်မှာတော့ တွေ့ရင်တွေ့သလို ပြည်သူတွေကို ဖမ်းချင်ဖမ်းနိုင်သေးတယ်” ဟုဒေသသတင်းရင်းမြစ်က ပြောဆိုသည်။

အဆိုပါ အကြမ်းဖက် စစ်တပ် စစ်ကြောင်းသည် နေအိမ်များကို မီးရှို့ဖျက်ဆီးခြင်း မရှိသော်လည်း ပြည်သူပိုင်ပစ္စည်းများနှင့် ကြက်၊ ဝက်များကို ခိုးယူ သတ်ဖြတ် စားသောက်နေပြီး စစ်ကြောင်းထိုးရာ လမ်းတစ်လျှောက် ပြည်သူများကို ထပ်မံဖမ်းဆီးနိုင်ခြေရှိသောကြောင့် ပြည်သူများ စစ်ရေးအသိရှိကြရန် ဒေသတော်လှန်ရေးအင်အားစုများက တိုက်တွန်းနှိုးဆော်ထားသည်။

ထို့ပြင် မန္တလေးတိုင်း၊ မတ္တရာမြို့နယ်တွင်လည်း အကြမ်းဖက် စစ်တပ်က စစ်ကုန်းရွာကို ဝင်ရောက်စီးနင်းပြီး ပြည်သူ ၂ ဦးကို ရိုက်နှက် ဖမ်းဆီးသွားကြောင်း ဒေသပြည်သများက ရန်ကုန်ခေတ်သစ် သတင်းဌာနထံသို့ပြောဆိုသည်။

ဧပြီလ ၁၉ ရက်နေ့တွင် အကြမ်းဖက် စစ်တပ်က မတ္တရာမြို့နယ်၊ စစ်ကုန်းရွာကို ဝင်ရောက်စီးနင်းပြီး ပြည်သူ ၂ ဦးကို ရိုက်နှက်ဖမ်းဆီးသွားခြင်းဖြစ်ကြောင်း၊ ဖမ်းဆီးခံရသော ပြည်သူ ၂ ဦးကို မည်သည့် နေရာသို့ ခေါ်ဆောင်သွားသည်ကို မသိရသေးကြောင်း ဒေသပြည်သူများက ပြောဆိုသည်။

မတ္တရာမြို့နယ်အတွင်းတွင်လည်း အကြမ်းဖက် စစ်တပ်က ကျေးရွာနေ လူငယ်များကို နေအိမ်ထဲထိပါ ဝင်ရောက် ရိုက်နှက်၍ စစ်မှုထမ်းရန် ပေါ်တာဆွဲ ဖမ်းဆီးမှုများ ပိုမိုလုပ်ဆောင်လာခြင်းများရှိကြောင်း သိရသည်။

ဓာတ်ပုံ – စစ်ကိုင်းတိုင်း အတွင်းရှိ ကျေးရွာတစ်ရွာကို စစ်တပ်က ညအချိန် မီးရှို့နေစဉ် (ပုံအဟောင်းဖြစ်သည်)

The post ပုလဲ၊ ရေဖြူနှင့် မတ္တရာမြို့နယ် တို့တွင် စစ်တပ်က ပြည်သူများကို ရိုက်နှက် ဖမ်းဆီးပြီး ကျေးရွာများကို မီးရှို့ဖျက်ဆီးကာ စစ်ကြောင်းထိုးနေ၍ ထောင်နှင့်ချီသော ပြည်သူများ ဘေးလွတ်ရာထွက်ပြေးနေရ appeared first on Khit Thit Media.

တနင်္သာရီတိုင်း၊ လောင်းလုံးမြို့နယ်ရှိ ညှင်းမော်ရွာကို အကြမ်းဖက် စစ်တပ် စစ်ကြောင်းထိုးလာ၍ ပြည်သူများ ရွာလုံးကျွတ် ထွက်ပြေးနေရကြောင်း ဒေသစစ်ရေးသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၂၂ ရက်နေ့ နံနက် အစောပိုင်း ၃ နာရီကျော်ခန့်တွင် လောင်းလုံးမြို့ပေါ်မှ အင်အား ၁၀၀ ကျော်ခန့် ပါဝင်သော အကြမ်းဖက် စစ်တပ် စစ်ကြောင်းသည် ညှင်းမော်ရွာကို စစ်ကြောင်းထိုး ဝင်ရောက်လာခြင်းဖြစ်ကြောင်း၊ လက်ရှိချိန်ထိ အကြမ်းဖက် စစ်သားများသည် ကျေးရွာထဲမှ ပြည်သူပိုင် နေအိမ်များပေါ် တပ်စွဲထားသောကြောင့် ပြည်သူများ ဘေးလွတ်ရာကို ရွာလုံးကျွတ် ထွက်ပြေးတိမ်းရှောင်နေရကြောင်း သိရသည်။

အကြမ်းဖက် စစ်တပ်သည် ဧပြီလ ၂၁ ရက်နေ့ကလည်း လောင်းလုံးမြို့ပေါ်မှ လက်နက်ကြီးများဖြင့် ကျေးရွာများကို ရမ်းသမ်း ပစ်ခတ်ခဲ့ပြီးနောက် ယနေ့ နံနက်အစောပိုင်းတွင် ထားဝယ်-လောင်းလုံး လမ်းအတိုင်း ညှင်းမော်ရွာကို ဝင်ရောက် စီးနင်းကာ တပ်စွဲထားခြင်းဖြစ်ကြောင်း သိရှိရသည်။

“ပြည်သူတွေ ဖမ်းဆီးခံရတဲ့ သတင်းတော့ မကြားမိသေးဘူး။ စစ်ခွေးစစ်ကြောင်းက နံနက်အစောကြီးရွာထဲကိုဝင်စီးတာ ပြည်သူတွေလည်း ရွာလုံးကျွတ်ကို ပြေးရတာပဲ အခုလက်ရှိထိတော့ စစ်ခွေးတွေက ညှင်းမော်ရွာထဲက ပြည်သူပိုင်နေအိမ်တွေထဲမှာ တပ်စွဲထားတုန်းပဲ ဘယ်ကို ဆက်ပြီး စစ်ကြောင်းထိုးလာမလဲတော့ မသိသေးဘူး။ စောင့်ကြည့်နေတယ်။ မြေပြင် တိုက်ပွဲဖြစ်ပွားတာမရှိသေးပါဘူး” ဟု ဒေသစစ်ရေးသတင်းရင်းမြစ်က ပြောဆိုသည်။

ထို့ပြင် တနင်္သာရီတိုင်း၊ ထားဝယ်မြို့နယ်၊ မောင်မယ်ရှောင်ရွာအနီး အကြမ်းဖက် စစ်တပ်က တောမီးရှို့မှုကြောင့် နေအိမ်များ မီးကူးစက် လောင်ကျွမ်းခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၂၂ ရက်နေ့တွင် မောင်မယ်ရှောင်ဂိတ်မှ အကြမ်းဖက် စစ်သားများသည် ထားဝယ်နည်းပညာတက္ကသိုလ်နှင့် မောင်မယ်ရှောင်အနီး၌ တောမီးရှို့ရာမှ ပြည်သူပိုင်နေအိမ်များကို မီးကူးစက်လောင်ကျွမ်းခဲ့ခြင်းဖြစ်ကြောင်း၊ အကြမ်းဖက် စစ်တပ် မီးရှို့မှုကြောင့် နေအိမ် ၁၀ လုံးကျော် မီးလောင်ပျက်စီးခဲ့ကြောင်း သိရှိရသည်။

“မောင်မယ်ရှောင်ဂိတ်က စစ်ခွေးတွေက တောမီးရှို့တာ သူတို့လာတိုက်ခံရမှာကိုကြောက်လို့ မီးရှို့ရှင်းလင်းရာကနေ နေအိမ်တွေမှာ မီးထဲပါသွားတာ ကျနော်သိရသလောက်ကတော့ နေအိမ် ၁၀ လုံးကျော် မီးထဲပါသွားတယ်လို့တော့ သိရတယ်” ဟု ဒေသပြည်သူတစ်ဦးက ပြောဆိုသည်။

The post လောင်းလုံးရှိ ညှင်းမော်ရွာကို စစ်တပ် စစ်ကြောင်းထိုးလာ၍ ပြည်သူများ ရွာလုံးကျွတ် ထွက်ပြေးနေရ၊ ထားဝယ်တွင်လည်း စစ်တပ်က တောမီးရှို့မှုကြောင့် နေအိမ်များ မီးကူးစက်လောင်ကျွမ်း appeared first on Khit Thit Media.

အကြမ်းဖက်စစ်တပ်၏ လေတပ် ကာကွယ်ရေးဦးစီးချုပ် အသစ်အဖြစ် ဗိုလ်ချုပ်ကြီး ထွန်းဝင်းကို ခန့်အပ်ခြင်း၊ စစ်ဆင်ရေး ကိစ္စများ အပါအဝင် စစ်တပ်၏ စီမံခန့်ခွဲရေးကိစ္စများကို မင်းအောင်လှိုင်က ဆက်လက်ချုပ်ကိုင်ထားပြီး ရဲဝင်းဦးက မင်းအောင်လှိုင်ထံ တင်ပြခွင့်ပြုချက်ယူနေရကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။

ယခင်လေတပ်ဦးစီးချုပ် ဗိုလ်ချုပ်ကြီးထွန်းအောင်မှာ ကာကွယ်ရေးဝန်ကြီး ဖြစ်လာခဲ့ပြီးနောက် လစ်လပ်သွားသော လေတပ်ဦးစီးချုပ်နေရာအတွက် ဗိုလ်ချုပ်ကြီး ထွန်းဝင်းကို မင်းအောင်လှိုင်ကပင် ရွေးချယ်ပေးခြင်းဖြစ်ကြောင်း၊ ဗိုလ်ချုပ်ကြီးထွန်းဝင်းသည် စစ်တက္ကသိုလ် အပတ်စဉ် ၃၄ ကျောင်းဆင်း ဖြစ်ပြီး လေတပ်ဦးစီးချုပ်အဖြစ် မခန့်အပ်မီ မင်းအောင်လှိုင်က ခေါ်ယူတွေ့ဆုံခဲ့ကြောင်း သိရှိရသည်။

“လေတပ်ချုပ်ခန့်တာက ဗိုလ်ချုပ်မှူးကြီး(မင်းအောင်လှိုင်)ကပဲ ခန့်တာ။ ဒုဗိုလ်ချုပ်ကြီးထွန်းဝင်းကို လက်ရှိတပ်ချုပ်အသစ်က လက်မှတ်ထိုးပြီး အတည်ပြုပေးရတာ။ ဗိုလ်ချုပ်မှူးကြီးပဲ ခန့်တာ။ နောက် တစ်ခုကတော့ တပ်မတော်ကိစ္စတွေ လက်ရှိ တပ်ချုပ်အသစ်က ဗိုလ်ချုပ်မှူးကြီးဆီကို အပတ် စဉ် သွားပြီးတင်ပြရတယ်။ စစ်ဆင်ရေး၊ တပ်မတော် ရေးရာ ကိစ္စတွေ အကုန် တင်ပြတယ်။ တပ်ချုပ်နဲ့ ဒုတပ်ချုပ် နှစ်ဦးစလုံး အိမ်တော်(သမ္မတအိမ်တော်)မှာ သွားပြီး အစီရင်ခံရတာ”ဟု နေပြည်တော်စစ်ဘက်သတင်းရင်းမြစ်က ပြောဆိုသည်။

အကြမ်းဖက် မင်းအောင်လှိုင်က မတ်လ ၃၀ ရက်နေ့တွင် စစ်တပ် ဦးစီးချုပ်အသစ်အဖြစ် ၎င်း၏ လူယုံ ရဲဝင်းဦးကို လွှဲပြောင်းပေးအပ်ခဲ့သော်လည်း လက်ရှိအချိန်အထိ တပ်မတော်ရေးရာကိစ္စများကို မင်းအောင်လှိုင်က စီမံခန့်ခွဲ ချုပ်ကိုင်ထားဆဲဖြစ်ကြောင်း၊ အထူးသဖြင့် နယ်မြေသိမ်းဆည်းရေး ထိုးစစ်ဆင် ရေးကိစ္စများကို မင်းအောင်လှိုင်ကသာ ဆက်လက် ဆုံးဖြတ် လုပ်ကိုင်နေဆဲဖြစ်ကြောင်း သိရှိရသည်။

“သိရသလောက်တော့ ထိုးစစ်ဆင်တဲ့ကိစ္စတွေမှာ ဗိုလ်ချုပ်မှူးကြီးက အကုန်ပါနေတုန်းပဲ။ တပ်ချုပ်သစ်ကလည်း စစ်ဆင်ရေးကိစ္စတွေ ဘာတွေလုပ်နေတယ်။ ဘယ်လို တိုးတက်မှုရှိတယ်ဆိုတာ အကုန်တင်ပြနေရတယ်” ဟု နေပြည်တော်စစ်ဘက်သတင်းရင်းမြစ်က ဆိုသည်။

အခြားတစ်ဖက်တွင်လည်း အမျိုးသားကာကွယ်ရေးနှင့်လုံခြုံရေးကောင်စီ(ကာ/လုံ) အစည်းအဝေးတွင်လည်း မင်းအောင်လှိုင်က ရဲဝင်းဦးကို တပ်ပိုင်းဆိုင်ရာနှင့် ထိုးစစ်ကိစ္စများကို အသေးစိတ် ညွှန် ကြားချက်များပေးကြောင်း သိရှိရသည်။

The post လေတပ် ကာကွယ်ရေးဦးစီးချုပ် အသစ် ခန့်အပ်ခြင်း၊ ထိုးစစ်ဆင်ခြင်းများ အပါအဝင် စစ်တပ်၏ စီမံခန့်ခွဲရေးကိစ္စများကို မင်းအောင်လှိုင်က ဆက်လက်ချုပ်ကိုင်ထားပြီး ရဲဝင်းဦးက တင်ပြနေရဟုဆို appeared first on Khit Thit Media.

မွန်ပြည်နယ်၊ ရေးမြို့နယ် ကျောင်းရွာအခြေစိုက် ခမရ ၅၈၃ တပ်ရင်း ၏ကို ဝင်ရောက်တိုက်ခိုက်ရာ အကြမ်းဖက် စစ်တပ်ဘက်မှ ထိခိုက်သေဆုံးမှုရှိကြောင်း ရေးဘီလူးတပ်ရင်းမှ တာဝန်ရှိသူက ရန်ကုန်ခေတ်သစ်သတင်းဌာနထံသို့ပြောဆိုသည်။

ယနေ့ ဧပြီလ ၂၂ ရက်နေ့ နံနက် ၈ နာရီခန့်တွင် ရေးမြို့နယ် ကျောင်းရွာအခြေစိုက် ၅၈၃ တပ်ရင်းကို ဝင်ရောက်ပစ်ခတ် တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ထိခိုက်သေဆုံးမှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်းသိရသည်။

“ကျွန်တော်တို့ ဒီနေ့ နံနက် ၈ နာရီလောက်မှာ ဝင်ရောက် ပစ်တိုက်ခိုက်ခဲ့တာပါ။ စစ်ခွေးသေစာရင်းကတော့ ကျွန်တော်တို့ ဆက်လက် စုံစမ်းနေဆဲပါ။ စစ်ခွေးဘက်က ထိခိုက်သေဆုံးမှုရှိနိုင်တယ်။ စစ်ခွေးတွေဘက်ကတော့ လက်နက်ကြီးပစ်ခက်မှုတော့ရှိနေတယ်။ ရေးမြို့နယ်ကျောင်းရွာအခြေစိုက် ၅၈၃ တပ်ရင်းမှာ စစ်ခွေး အင်အားက ၁၀၀ ကျော်လောက်ရှိမယ်” ဟု ရေးဘီလူး တပ်ရင်းမှ တာဝန်ရှိသူက ပြောဆိုသည်။

အဆိုပါ တိုက်ခိုက်မှုကို ရေးဘီလူးတပ်ရင်းမှ ရဲဘော်များ လုပ်ဆောင်ခဲ့ဖြစ်ပြီး တိုက်ခိုက်မှု ပြုလုပ်ပြီးနောက် တော်လှန်ရေး တပ်ဖွဲ့များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။

အခြားတစ်ဖက်တွင်လည်း တနင်္သာရီတိုင်း၊ တနင်္သာရီမြို့နယ်အတွင်း စစ်ကောင်စီတပ်များ အင်အားအလုံးအရင်းဖြင့် တပ်ဖြန့်ထားမှုကြောင့် စစ်ရေးအခြေအနေ ပြင်းထန်စွာ တင်းမာနေပြီး တိုက်ပွဲများ အချိန်မရွေး ဖြစ်ပွားနိုင်ကြောင်း People’s Defense Force- မြိတ်ခရိုင်တပ်ရင်း၂ -P2 3402 က ယနေ့ သတိပေးချက်ထုတ်ပြန်သည်။

လက်ရှိတွင် တနင်္သာရီမြို့နယ်၊ တနင်္သာရီမြို့ရှိ ဘောဓိကမ်း – ညောင်ပင်ကွင်း ကျေးရွာလမ်းပိုင်းတစ်လျှောက်ဖြစ်သော ဘန်လော၊ ၅ မိုင်၊ ၆ မိုင် နှင့် ထုံတော်ကျေးရွာများတွင် စစ်ကောင်စီတပ်များက အင်အားသုံး၍ တပ်ဖြန့်နေရာယူထားကြောင်း သိရသည်။

ထိုသို့ စစ်ရေးပြင်ဆင်မှုများကြောင့် အဆိုပါ ဒေသတစ်လျှောက်တွင် တိုက်ပွဲများ အချိန်မရွေး ဖြစ်ပေါ်လာနိုင်သည့်အပြင် စစ်ကောင်စီဘက်မှ ဒရုန်းများ၊ လေယာဉ်များ အသုံးပြု၍ တိုက်ခိုက်လာနိုင်သည့် အန္တရာယ်များလည်း ရှိနေသည်။

စစ်ရေးတင်းမာမှုများကြောင့် ဒေသခံပြည်သူများ၏ အသက်အန္တရာယ် ဘေးကင်းလုံခြုံရေးအတွက် အထူးသတိပေး နှိုးဆော်ထားပြီး ဘောဓိကမ်း-ညောင်ပင်ကွင်း လမ်းပိုင်းကို လုံးဝ (လုံးဝ) အသုံးမပြုကြရန်၊ တိုက်ပွဲများ အချိန်မရွေး ပြင်းထန်စွာ ဖြစ်ပွားလာနိုင်သဖြင့် လမ်းပိုင်းတစ်လျှောက်ရှိ ပြည်သူများအနေဖြင့် မိမိတို့၏ ဘေးကင်းလုံခြုံရေးအတွက် ဘေးလွတ်ရာသို့ အမြန်ဆုံး ပြောင်းရွှေ့နေထိုင်ကြရန် သတိပေးထားသည်။

The post ရေးမြို့နယ် ခမရ ၅၈၃ တပ်ရင်းကို တိုက်ခိုက်မှု စစ်တပ်ဘက်မှ ထိခိုက်သေဆုံးမှုရှိဟုဆို၊ တနင်္သာရီမြို့နယ်အတွင်း စစ်ရေးတင်းမာနေ၍ လမ်းတချို့ အသုံးမပြုရန်နှင့် ဘေးလွတ်ရာ ပြောင်းရန် သတိပေး appeared first on Khit Thit Media.

စစ်ကိုင်းတိုင်း၊ ရွှေဘိုမြို့နယ် အနောက်ခြမ်း ဇင်ကြီးကုန်းပေါ်သို့ အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့ရာ အမျိုးသမီး ၁ ဦးသေဆုံးကာ နေအိမ်များမီးလောင် ပျက်စီးခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ပြောဆိုသည်။

ယမန်နေ့ ဧပြီလ ၂၁ ရက် ညပိုင်း စစ်တပ်က ရွှေဘိုမြို့နယ် အနောက်ခြမ်း ဇင်ကြီးကုန်းပေါ်သို့ အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့ကြောင်း၊ထို အကြမ်းဖက်စစ်တပ် လေကြောင်းတိုက်ခိုက်မှုကြောင့် ဇင်ကြီးကုန်းပေါ်နေ အသက် ၅၀နှစ်အရွယ် နေရာမှာတင် အမျိုးသမီး ၁ ဦး ပွဲချင်းပြီး သေဆုံးကာ၊ ပြည်သူ ၃ ဦး ထိခိုက်ဒဏ်ရာရရှိပြီး နေအိမ် ၁လုံး ပျက်စီးသွားခဲ့ကြောင်းသိရှိရသည်။

” စစ်ခွေးတွေ တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့တာပါ။ ဇင်ကြီးကုန်းပေါ်နေ အသက် ၅၀နှစ်အရွယ် အမျိုးသမီး ၁ဦးက ပွဲချင်းပြီးသေဆုံးတယ်။ ပြည်သူ ၃ ဦးထိခိုက်ဒဏ်ရာရတယ်။ နေအိမ် ၁ လုံးပျက်စီးသွားတယ်။ စစ်ခွေးတွေ ဗုံး ၄ လုံးနဲ့ ကျဲသွားတာပါ။နွားတွေ ဆိတ်တွေကော အများကြီးသေသွားတယ်။ နေအိမ် ၁လုံး မီး လောင် ပျက်စီးသွားတယ်။ ပြည်သူများအနေဖြင့် စစ်ကြောင်းနှင့် လေကြောင်း အန္တရာယ်တို့ သတိပြုနေထိုင်ကြဖို့ ပြောချင်ပါတယ်”ဟု ပြည်သူတစ်ဦးကပြောဆိုသည်။

အလားတူ ဧပြီလ ၁၆ ရက်နေ့ကလည်း ရွှေဘိုမြို့နယ် တောင်ခြမ်းရှိ ကျေးရွာများကို အကြမ်းဖက် စစ်တပ်က လေယာဉ် ၃ စီးဖြင့် ဗုံးကျဲ တိုက်ခိုက်သွားခဲ့ကြောင်း သိရှိရသည်။

ဓာတ်ပုံ- ကွီးဂဏန်း။

The post ရွှေဘိုမြို့နယ်၊ ဇင်ကြီးကုန်းပေါ်သို့ စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်မှု အမျိုးသမီး ၁ ဦးသေဆုံးပြီး နေအိမ်များ မီးလောင် ပျက်စီးသည့်အပြင် နွားနှင့်ဆိတ် အများအပြား သေဆုံး appeared first on Khit Thit Media.

နိုင်ငံတော်သမ္မတဦးဝင်းမြင့် လွတ်မြောက်လာခြင်းကို ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကော်မတီ-SCEF က ဝမ်းမြောက်ဝမ်းသာဖြစ်ရပြီး နိုင်ငံတကာသံရုံးများက ကြိုဆိုလိုက်ကြသည်။

ယင်းအပြင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားအားလုံး လွတ်မြောက်ရေး ဆက်လက် ကြိုးပမ်းမည်ဖြစ်ကြောင်း SCEF က ယနေ့ တရားဝင် ကြေညာထုတ်ပြန်သည်။

ဖက်ဒရယ်ဒီမိုကရေစီပြည်ထောင်စု ပေါ်ထွန်းရေး ဦးဆောင်ကောင်စီ (SCEF) က သမ္မတဦးဝင်းမြင့် မိသားစုထံ ပြန်လည်ရောက်ရှိခြင်းအတွက် မြန်မာပြည်သူအားလုံးနှင့်ထပ်တူ ဝမ်းမြောက်ကြောင်း ၊ ထို့အပြင် သမ္မတကြီးအနေဖြင့် ကျန်းမာကြံ့ခိုင်စွာဖြင့် နိုင်ငံ့အကျိုးကို ဆက်လက်သယ်ပိုးနိုင်ပါစေကြောင်း ဆုမွန်ကောင်းတောင်းခဲ့ပြီး၊ မတရားဖမ်းဆီးခံထားရဆဲဖြစ်သော နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားအားလုံး ခြွင်းချက်မရှိ အမြန်ဆုံးလွတ် မြောက် ရေးအတွက် ဆက်လက်ကြိုးပမ်းသွားမည်ဟု ကြေညာသည်။

အလားတူ ၂၀၂၁ ခုနှစ် စစ်အာဏာသိမ်းချိန်မှစ၍ မတရားဖမ်းဆီးထိန်းသိမ်းခံခဲ့ရသည့် နိုင်ငံတော်သမ္မတ ဦးဝင်းမြင့်သည် (၅) နှစ်ကျော်အကြာ ၂၀၂၆ ခုနှစ် ဧပြီလ ၁၇ ရက်နေ့တွင် မိသားစုထံ ပြန်လည်ရောက်ရှိလာခဲ့ပြီး အဆိုပါ လွတ်မြောက်မှုအပေါ် အမေရိကန်၊ ယူကေ၊ ဥရောပသမဂ္ဂနှင့် သြစတြေးလျသံရုံးတို့က ကြိုဆိုကြောင်း ထုတ်ပြန်ခဲ့ကြသည်။

အမေရိကန်ပြည်ထောင်စုက မြန်မာနှစ်သစ်ကူးတွင် ဦးဝင်းမြင့်နှင့် မရှင်ဒေဝီတို့အပါ အဝင် နိုင်ငံရေးအကျဉ်းသားများ လွတ်မြောက်လာမှုကို ကြိုဆိုပြီး၊ ကျန်ရှိနေသေးသူများ လွတ် မြောက်ရေးနှင့် မြန်မာ့ငြိမ်းချမ်းရေးဖြစ်စဉ်ကို ဆက်လက်ပံ့ပိုးမည်ဖြစ်ကြောင်း ရန်ကုန်အခြေစိုက် အမေရိကန်သံရုံးက သတင်းထုတ်ပြန်သည်။

ရန်ကုန်မြို့ရှိ ယူကေ (ဗြိတိသျှသံရုံး)၏ သံရုံးအကြီးအကဲ Andrew Jackson က ဦးဝင်းမြင့် လွတ် မြောက်မှုကို အသိအမှတ်ပြုသော်လည်း ကျန်ရှိနေသည့် အကျဉ်းသားများအတွက် စိုးရိမ်ကြောင်း ပြောကြားသည်။ ဒေါ်အောင်ဆန်းစုကြည်အပါအဝင် ဖမ်းဆီးခံထားရသူအားလုံးကို လွှတ်ပေးရန်နှင့် အကြမ်းဖက်မှုများ ရပ်တန့်ရေးကိုလည်း ထပ်မံတိုက်တွန်းထားသည်။

ဥရောပသမဂ္ဂ (EU)၏ ပြောရေးဆိုခွင့်ရှိသူ Anitta Hipper က ဦးဝင်းမြင့် လွတ်မြောက်မှုနှင့် သေဒဏ်ချမှတ်ခံထားရသူများအား ပြစ်ဒဏ်လျော့ပေါ့ပေးခြင်းကို ကြိုဆိုကြောင်း၊ သို့သော် ဒေါ်အောင်ဆန်းစုကြည်အပါအဝင် အားလုံးကို ခြွင်းချက်မရှိ လွှတ်ပေးရန် ဆက်လက်တောင်းဆိုကြောင်း တွစ်တာမှတစ်ဆင့် သတင်းထုတ်ပြန်သည်။

သြစတြေးလျအစိုးရကလည်း သြစတြေးလျနိုင်ငံအနေဖြင့် ဦးဝင်းမြင့် လွတ်မြောက်မှုကို အသိ အမှတ်ပြုပြီး၊ ဒေါ်အောင်ဆန်းစုကြည်နှင့် အခြားအကျဉ်းသားများအားလုံးကို ချွင်းချက်မရှိ လွှတ်ပေးရန်၊ အရပ်သားများအပေါ် အကြမ်းဖက်မှုရပ်တန့်ရန်နှင့် အာဆီယံ၏ အခန်းကဏ္ဍကို ထောက်ခံကြောင်း ထုတ်ပြန်သည်။

နိုင်ငံတကာအသိုင်းအဝိုင်းအနေဖြင့် မြန်မာနိုင်ငံ၏ အကျပ်အတည်းကို ဖြေရှင်းနိုင်ရန်အတွက် အားလုံးပါဝင်သော ဆွေးနွေးမှုများ ဖော်ဆောင်ရန်နှင့် လူသားချင်းစာနာထောက်ထားမှုဆိုင်ရာ အကူအညီများ အဟန့်အတားမရှိ ရရှိနိုင်ရေးအတွက် မြန်မာစစ်တပ်ကို ဆက်လက်တိုက်တွန်းလျက်ုရှိသည်။

The post နိုင်ငံတော်သမ္မတဦးဝင်းမြင့် လွတ်မြောက်လာခြင်းကို SCEF က ဝမ်းမြောက်ပြီး နိုင်ငံတကာသံရုံးများက ကြိုဆို၊ ဒေါ်အောင်ဆန်းစုကြည်နှင့် နိုင်ငံရေးအကျဉ်းသားအားလုံး လွတ်မြောက်ရေး ဆက်လက် ကြိုးပမ်းမည် appeared first on Khit Thit Media.

ကချင်ပြည်နယ်၊ ဖားကန့်မြို့နယ်၊ လုံးခင်းရွာ Mai ဆေးရုံမှ ဆရာဝန်များ အပါအဝင် ပြည်သူ ၂၀ ကျော်ကို အကြမ်းဖက် စစ်တပ်က ဝင်ရောက် ဖမ်းဆီးသွားပြီး အဆက်အသွယ် ပြတ်တောက်နေကြောင်း ဒေသသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ဧပြီလ ၂၁ ရက်နေ့ ည ၁၀ နာရီကျော်ခန့်တွင် အကြမ်းဖက် စစ်တပ်က လုံးခင်းကျေးရွာအုပ်စု အတွင်းကို အင်အားအလုံးအရင်းဖြင့် ဝင်ရောက် စီးနင်းခဲ့ကြောင်း၊ ထိုသို့ စီးနင်းပြီးနောက် Mai ဆေးရုံမှ ဆရာဝန်များ အပါအဝင် ပြည်သူ ၂၀ ကျော်ကို ဖမ်းဆီးခေါ်ဆောင်သွားကြောင်း သိရသည်။

အကြမ်းဖက် စစ်တပ်က ဖမ်းဆီးသွားသော ပြည်သူများကို မည်သည့် နေရာ၌ ဖမ်းဆီးထားသည်ကို လက်ရှိချိန်ထိ မသိရသေးဘဲ မိသားစုဝင်များနှင့်လည်း အဆက်အသွယ် ပြတ်တောက် နေကြောင်း သိရှိရသည်။

“မနေ့ကည ၁၀ နာရီကျော်လောက်က ဖမ်းသွားတာလို့ သိရတယ်။ စစ်ခွေးတွေနဲ့ ပြည်သူ့စစ်တွေက ရွာထဲကို အင်အားအလုံးအရင်းနဲ့ ဝင်ရောက်စီးနင်းပြီးဖမ်းတာလို့ သိရတယ်။ ဘယ်နေကို ဖမ်းသွားလဲဆိုတာကတော့ အတိအကျ မသိရသေးဘူး။ အခုထိလည်း အဆက်အသွယ် မရသေးဘူး။ ဖမ်းဆီးခံရတာက ဆရာဝန်တွေ အပါအဝင် လူဦးရေ ၂၀ ကျော်လောက်ရှိတယ်” ဟု ဒေသသတင်းအရင်းမြစ်က ပြောဆိုသည်။

အလားတူ ယမန်နေ့ ဧပြီလ ၂၁ ရက်နေ့ မွန်းလွဲပိုင်းကလည်း ဖားကန့်မြို့နယ်၊ လုံးခင်းကျေးရွာအုပ်စု၊ အောင်ရာရွာအနီးတွင် ပြည်သူများထံမှ ဆက်ကြေးကောက်ပြီး အနုကြမ်းစီးနေသော အကြမ်းဖက် စစ်သားများကို KIA ပူးပေါင်းတပ်က ဒရုန်းဖြင့် ဗုံးကျဲ တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ၅ ဦးသေဆုံးကာ ထိခိုက်ဒဏ်ရာရရှိသူများလည်းရှိကြောင်း သိရသည်။

ထို့ပြင် ဖားကန့်ဒေသအတွင်း အကြမ်းဖက် စစ်တပ်၏ စစ်ရေးလှုပ်ရှားနေမှုများကြောင့် ဖားကန့်-နန့်ယား-ကားမိုင်း လမ်းပိုင်းကြီးကို ဧပြီလ ၂၂ ရက် နေ့မှ စတင်ပြီး အများပြည်သူခရီးသွားလာခြင်း၊ ယာဉ်ကြီး၊ ယာဉ်ငယ်များ ဖြတ်သန်းသွားလာခြင်းကို ရက်အကန့် အသတ်မရှိ (ယာယီ) ပိတ်ပင်လိုက်ကြောင်း KIA အမှတ် ၆ တပ်ရင်းက ယနေ့ ဧပြီလ ၂၁ ရက်နေ့တွင် ထုတ်ပြန်ထားသည်။

ဧပြီလ ၁၄ ရက်နေ့ မွန်းလွဲပိုင်းကလည်း အကြမ်းဖက် စစ်တပ်က နှိပ်စက်သတ်ဖြတ်ထားသော ပြည်သူ ၄ ဦး၏ ရုပ်အလောင်းကို( မရှီကထောင်နှင့် စည်ပင် လမ်းဆုံရှိ ရွှေမြန်မာဆီဆိုင်အနီးတွင် အိမ်စီးကားဖြင့် လာရောက် စွန့်ပစ်ခဲ့ကြောင်း၊ အကြမ်းဖက် စစ်တပ်သည် ဖားကန့်မြို့တွင် ၎င်တို့ သံသယရှိသူများကို လိုက်လံဖမ်းဆီးပြီး တပ်မကုန်း၌ ရိုက်နှက် နှိပ်စက်ကာ စစ်ဆေးရေး လုပ်ဆောင်ပြီး သေဆုံးသူများ၏ ရုပ်အလောင်းများကို လိုက်လံစွန့်ပစ်ခြင်းများ လုပ်ဆောင်နေခြင်းကြောင့် ပြည်သူများ စိုးရိမ်နေကြကြောင်း သိရသည်။

(စစ်​ကောင်စီတပ်က ၂၀၂၃ ဧပြီ ၂၆ ရက်က ဖားကန့်မြို့နယ်၊မဇွပ်ယန်နှင့် ဆန်ခါ ကျေးရွာ ၂ရွာ ပြည်သူများကိုစစ်​ကောင်စီတပ်က လူသားဒိုင်းအဖြစ်အသုံးပြုရန်ဖမ်းဆီးထားစဥ်။ ဓါတ်ပုံ- အောင်ဇော်မိုး)

The post ဖားကန့်မြို့နယ်၊ လုံးခင်းရွာ Mai ဆေးရုံမှ ဆရာဝန်များ အပါအဝင် ပြည်သူ ၂၀ ကျော်ကို စစ်တပ်က ဝင်ရောက် ဖမ်းဆီးသွားပြီး အဆက်အသွယ် ပြတ်တောက်နေ appeared first on Khit Thit Media.

တနင်္သာရီတိုင်း၊ ဘုတ်ပြင်းမြို့နယ်တွင် စစ်မှုထမ်းရန် ငြင်းဆန်သည့် အသက် ၃၁ နှစ်အရွယ် လူငယ်တစ်ဦးအား ပျူစောထီးအဖွဲ့ဝင်တစ်ဦးက ရိုက်နှက်သတ်ဖြတ်ခဲ့သည့် ဖြစ်စဉ်တစ်ခု ဖြစ်ပွားခဲ့သည်။

အဆိုပါ လူသတ်မှုကို ဖုံးကွယ်ရန်အတွက် မြို့နယ်စီမံကောင်စီအဖွဲ့ဝင် ဗိုလ်မှူးနှင့် ကြံ့ခိုင်ရေးပါတီ အမတ်တို့က သေဆုံးသူ၏ မိသားစုအား အမှုပိတ်ပေးရန် ဖိအားပေး ခြိမ်းခြောက်နေကြောင်း သိရသည်။

ဧပြီလ ၁၅ ရက်နေ့ (သင်္ကြန်အတက်နေ့) မွန်းလွဲပိုင်းတွင် ဘုတ်ပြင်းမြို့၊ ရွှေဘုံသာရပ်ကွက်၌ နေထိုင်သည့် အသက် ၃၁ နှစ်အရွယ် မောင်မျိုး နှင့် အသက် ၄၁ နှစ်အရွယ် ကိုညီညီ တို့အပါအဝင် သူငယ်ချင်းတစ်စုသည် အရက်သောက်စားကြရင်း အခြားအမျိုးသားတစ်ဦးနှင့် စကားများ ရန်ဖြစ်ခဲ့ကြသည်။ ထိုရန်ပွဲအတွင်း အမျိုးသားတစ်ဦး ဦးခေါင်းကွဲသွားခဲ့သဖြင့် မောင်မျိုးနှင့် ကိုညီညီတို့ကို ရဲစခန်းက လာရောက်ဖမ်းဆီးသွားခဲ့သည်။

၂ ရက်အကြာတွင် ဦးခေါင်းကွဲသွားသည့် အမျိုးသားဘက်က ဒဏ်ရာမပြင်းထန်သဖြင့် အမှုမဖွင့်လိုတော့ကြောင်း ပြောဆိုခဲ့သော်လည်း ရဲစခန်းက ၎င်းတို့အား ပြန်မလွှတ်ဘဲ ခမရ ၄၃၂ တပ်ရင်း အတွင်းသို့ တိုက်ရိုက် ပို့ဆောင်ခဲ့သည်။

မောင်မျိုးကို ဧပြီလ ၁၇ ရက်နေ့တွင် တပ်ထဲသို့ ပို့ဆောင်ခဲ့ခြင်းဖြစ်ပြီး၊ တပ်တွင်း၌ ရှိနေစဉ် “စစ်မှုမထမ်းလိုကြောင်း” ပြောဆိုခဲ့သည့်အတွက် ခမရ ၄၃၂ တပ်ရင်းလက်အောက်ခံ ပျူစောထီးအဖွဲ့ဝင် ဝင်းနိုင် နှင့် အဖွဲ့က မောင်မျိုးကို ဝိုင်းဝန်းရိုက်နှက်ခဲ့ကြသည်။

ဧပြီလ ၁၈ ရက်နေ့ နံနက်ပိုင်းတွင် မိသားစုဝင်များက လိုက်လံစုံစမ်းရာ ရွှေဘုံသာရပ်ကွက် အုပ်ချုပ်ရေးမှူး ခင်မောင်လွင်နှင့် ရာအိမ်မှူး မျိုးအောင်တို့က ငွေကျပ် သိန်း ၃၀ တောင်းယူကာ ညှိနှိုင်းပေးခဲ့သဖြင့် မောင်မျိုး ပြန်လည်လွတ်မြောက်လာခဲ့သည်။

သို့သော် ပြန်လွတ်လာချိန်တွင် မောင်မျိုး၏ မျက်နှာ၊ လက်နှင့် တစ်ကိုယ်လုံး၌ ဖူးယောင်ညိုမည်း ဒဏ်ရာများ ပြင်းထန်စွာ ရရှိနေသဖြင့် ဘုတ်ပြင်းဆေးရုံသို့ အရေးပေါ် ပို့ဆောင်ခဲ့ရသည်။ ဒဏ်ရာများမှာ အတွင်းကြေ ဒဏ်ရာများဖြစ်ပြီး အလွန်ပြင်းထန်သဖြင့် ထိုနေ့ညပိုင်းတွင်ပင် ဆေးရုံ၌ သေဆုံးသွားခဲ့ရသည်။

လက်ရှိတွင် လူသတ်မှု ကျူးလွန်သူ ပျူစောထီး ဝင်းနိုင်ကို ရဲစခန်းက ဖမ်းဆီးထားသော်လည်း ၎င်းတစ်ဦးတည်းကသာ ဝန်ခံထားသည့် ပုံစံမျိုး လုပ်ဆောင်နေသည်။

အခြားတစ်ဖက်တွင်လည်း ဘုတ်ပြင်းမြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူးရဲလင်းဦး၊ ကြံ့ဖွတ်ပါတီမှ ပြည်သူ့လွှတ်တော်ကိုယ်စားလှယ် အောင်လင်းလှိုင်တို့က သေဆုံးသူ မောင်မျိုး၏ မိဘများကို အမှုမဖွင့်ရန်နှင့် အမှုပိတ်ပေးရန် ပြင်းပြင်းထန်ထန် ဖိအားပေးနေကြောင်း သေဆုံးသူ မောင်မျိုး၏ မိတ်ဆွေများက ပြောဆိုသည်။

ငွေကျပ် သိန်း ၃၀ ယူဆောင်သွားသည့် အုပ်ချုပ်ရေးမှူး ဦးခင်မောင်လွင်နှင့် ရာအိမ်မှူး မျိုးအောင်တို့ကလည်း ၎င်းတို့ယူထားသည့် ငွေများကို ပြန်ပေးမည်ဟုဆိုကာ အမှုပိတ်ရန် ညှိနှိုင်းနေကြကြောင်း သိရှိရသည်။

ဓာတ်ပုံ- စစ်မှုထမ်းရန် ငြင်းဆန်နေသော မောင်မျိုးကို ပျူစောထီးက ရိုက်သတ်မှုအတွက် အမှုပိတ်ရန် သေဆုံးသူ မိသားစုကို ဖိအားပေးနေသော ဗိုလ်မှူး ရဲလင်းဦး။

The post ဘုတ်ပြင်းတွင် စစ်မှုမထမ်းလိုသည့် လူငယ်ကို ပျူစောထီးက ရိုက်သတ်လိုက်ပြီး အမှုပိတ်ရန် စစ်တပ်မှ ဗိုလ်မှူး ရဲလင်းဦးနှင့် ကြံ့ဖွတ်အမတ်အောင်လင်းလှိုင်တို့ ဖိအားပေး appeared first on Khit Thit Media.