ရန်ကုန်၊ ဩဂုတ် ၁၉
စစ်ကိုင်းတိုင်း၊ ကန့်ဘလူမြို့နယ်မြောက်ခြမ်းကို စစ်ကြောင်းထိုးနေသော အကြမ်းဖက်စစ်ကောင်စီက ဩဂုတ်လ ၁၆ ရက်နေ့တွင် အင်ငုတ္တိုရွာကို လက်နက်ကြီးငယ်များဖြင့် ပစ်ခတ် ဝင်ရောက်တပ်စွဲကာ မီးရှိူ့ခဲ့ပြီး နေအိမ် ၂၀ ဝန်းကျင် မီးလောင်ပြာကျသွားကြောင်း၊ ဩဂုတ်လ ၁၇ ရက်နေ့တွင်လည်း ပင့်သာ(တည်ပင်)ရွာကို လက်နက်ကြီး၊ လက်နက်ငယ်များဖြင့် ပစ်ခတ်ကာ ဝင်ရောက်တပ်စွဲခဲ့ပြီး မီးရှို့ခဲ့သောကြောင့် နေအိမ် ၃၀ ဝန်းကျင် ပြာကျခဲ့ကာ နွား သုံးကောင် လက်နက်ကြီးထိမှန် သေဆုံးခဲ့ကြောင်း ဒေသခံများထံမှ သိရှိရသည်။
“ပင့်သာရွာကို ၁၇ ရက် နေ့လယ်ကနေ ည ၉ နာရီခွဲ အထိ မီးရှို့တယ်” ဟု ဒေသခံတစ်ဦးက ရန်ကုန်ခတ်သစ်သို့ ပြောကြားသည်။
အင်ငုတ္တိုရွာကို အကြမ်းဖက်စစ်တပ်က ဒုတိယအကြိမ်မြောက် ဝင်ရောက်မီးရှို့ခြင်းဖြစ်ပြီး ၂၀၂၂ ခုနှစ် ဧပြီလ ၂၉ ရက်နေ့တွင်လည်း အကြမ်းဖက်စစ်ကောင်စီနှင့် ပျူစောထီးပူးပေါင်းအဖွဲ့မှ ဝင်ရောက်မီးရှို့ဖျက်စီးခဲ့သည့်အတွက် အိမ်မွေတိရစ္ဆာန်များ သေဆုံးကာ နေအိမ် ၁၂၅ လုံးနှင့် စပါးကျီများ ပြာကျခဲ့ရကြောင်း ဒေသခံများက ပြောကြားသည်။
အကြမ်းဖက်စစ်ကောင်စီများ ဝင်ရောက်စဉ်ကျေးရွာထဲတွင် ပိတ်မိနေသော အင်ငုတ္တိုရွာမှ ပြည်သူ ၂ ဦး နှင့် ပင့်သာရွာမှ ပြည်သူ ၄ ဦးအား စစ်အုပ်စုမှဖမ်းဆီးခဲ့ကာ ပင့်သာရွာမှ ဖမ်းဆီးခံပြည်သူ ၄ ဦးအား ၁၇ ရက်နေ့က တနေကုန် နေပူလှမ်းထားကာ ရိုက်နှက်ခဲ့ပြီး အသက် ၆၀ အရွယ် ဦးပွကြီးကိုမူ အကြမ်းဖက်စစ်ကောင်စီက အကြောင်းမဲ့သတ်ခဲ့ပြီး ကျန်သူများကို ပြန်လွှတ်ပေးခဲ့ကြောင်း ဒေသခံများထံမှ သိရှိရသည်။
အဆိုပါ အကြမ်းဖက် စစ်ကောင်စီတပ်သည် ဩဂုတ် ၁၈ ရက်နေ့ နံနက်ပိုင်းတွင် ပင့်သာ–ကျွန်းလှ ကားလမ်းပိုင်းရှိ ချောင်းကြားရွာသို့ ထပ်မံဝင်ရောက်တပ်စွဲနေကာ ကျွန်းလှနှင့်ပေကုန်း(တ)ရွာတို့မှ ပျူစောထီးအင်အား ၅၀ ဝန်းကျင်ပါ ချောင်းကြားရွာသို့ ထပ်မံအင်အားဖြည့်တင်းထားကြောင်း သိရသည်။
