အစိတ်စိတ်အမွှာမွှာ ပြိုကွဲမည့်လမ်းကြောင်းမှ မြန်မာနိုင်ငံ နောက်ပြန်လှည့်အောင် အာဆီယံ ကူညီရမည်

အစိတ်စိတ်အမွှာမွှာ ပြိုကွဲမည့်လမ်းကြောင်းမှ မြန်မာနိုင်ငံ နောက်ပြန်လှည့်အောင် အာဆီယံ ကူညီရမည်

By Ta Doh Moo & Salai Thla Hei

ဆောင်းပါးရှင်များ ဖြစ်သော တာဒိုမူး(Ta Doh Moo) သည် ကရင်အမျိုးသား အစည်းအရုံး (KNU) ၏ အထွေထွေ အတွင်းရေးမှူးဖြစ်ပြီး ဆလိုင်းသလဟေး(Salai Thla Hei ) သည် ချင်းအမျိုးသားတပ်ဦး (CNF) ၏ အထွေထွေ အတွင်းရေးမှူး ဖြစ်သည်။ ကရင်နီအမျိုးသား တိုးတက်ရေးပါတီ (KNPP) အထွေထွေ အတွင်းရေးမှူးဖြစ်သူ ခူပလူးရယ် (Khu Plu Reh) ကလည်း ဤဆောင်းပါးကို ပူးတွဲရေးသားခဲ့သည်။

———————–

မြန်မာစစ်ကောင်စီ၏ မိမိပြည်သူများအပေါ် အကြမ်းဖက်မှုများ ဆက်လက်ကျူးလွန်နေမှုနှင့် ယခုနှစ်နှောင်းပိုင်းတွင် ရွေးကောက်ပွဲကျင်းပရန် စီစဉ်နေမှုများသည် ၂၀၂၃ ခုနှစ်၌ အာဆီယံ အလှည့်ကျဥက္ကဋ္ဌအဖြစ် အင်ဒိုနီးရှားနိုင်ငံက တာဝန်ယူပြီးနောက်ပိုင်း ပထမဆုံးအကြိမ်အဖြစ် သောကြာနေ့တွင် တွေ့ဆုံဆွေးနွေးကြမည့် အရှေ့တောင် အာရှနိုင်ငံများအသင်း၏ နိုင်ငံခြားရေးဝန်ကြီးများ အစည်းအဝေးတွင် အဓိကဆွေးနွေးရန် ကိစ္စများ ဖြစ်လာမည်မှာ ယုံမှားသံသယ ဖြစ်စရာမရှိပေ။

ဆောင်းပါးရှင်များသည် မြန်မာနိုင်ငံတစ်ဝှမ်း လက်နက်ကိုင် တော်လှန်ရေးကြီးအတွက် ခိုနားစရာနေရာ၊ လေ့ကျင့်မှုနှင့် စစ်ဆင်ရေး အကူအညီများ ပေးအပ်နေသည့် တိုင်းရင်းသား လက်နက်ကိုင်အဖွဲ့များမှ ခေါင်းဆောင်များ ဖြစ်သည်နှင့်အညီ မိမိတို့၏ ရှေ့တန်းစစ်မျက်နှာပြင်မှ အမြင်များသည် ကာလတာရှည်နေသော မြန်မာ့ပဋိပက္ခများအတွက် အာဆီယံ၏ချဉ်းကပ်မှု ပိုမိုထိရောက်အကျိုးရှိစေရေး အဓိကအရေးပါသော အခြေခံအုတ်မြစ်များအဖြစ် အထောက်အကူပြုနေသည်ဟု ယုံကြည်မိပါသည်။

ဂျကာတာအစည်းအဝေးကို မြန်မာစစ်အာဏာသိမ်းမှု နှစ်နှစ်ပြည့် မြောက်သည့်နေ့မှ ၂ ရက်အကြာတွင် ကျင်းပပြုလုပ်မည်ဖြစ်ရာ ၎င်းထက်ပို၍ တိုက်ဆိုင်သည့် အခွင့်အခါကောင်းဟူ၍ မရှိနိုင်တော့ပေ။

ဒီဇင်ဘာလကုန်ပိုင်းတွင် ကုလသမဂ္ဂလုံခြုံရေးကောင်စီက မြန်မာနိုင်ငံနှင့် စပ်လျဉ်း၍ ပထမဆုံး ဆုံးဖြတ်ချက်ကို ချမှတ်ခဲ့ပြီး ၂၀၂၁ခုနှစ်၊ ဖေဖော်ဝါရီလ ၁ရက် အာဏာသိမ်းမှု ဖြစ်ပွားပြီးကတည်းက နိုင်ငံတစ်ဝှမ်း ဖြစ်ပွားနေသော အကြမ်းဖက်မှုများကို အဆုံးသတ်ရန် အလေးအနက် တောင်းဆိုခဲ့သည်။ မြန်မာနိုင်ငံ၌ အကြမ်းဖက်မှုများ အဆုံးသတ်စေရေး အာဆီယံ၏ အခန်းကဏ္ဍမှာ အရေးအကြီးဆုံး ဖြစ်နေကြောင်း တရုတ်၊ ရုရှားနှင့် အိန္ဒိယနိုင်ငံများက မဲမပေးဘဲနေခဲ့သည့် အဆိုပါကုလသမဂ္ဂ ဆုံးဖြတ်ချက်က အသိအမှတ်ပြုလျက်ရှိသည်။

၂၀၀၇ ခုနှစ်၊ ဇန်နဝါရီလနှင့် ၂၀၂၂ ခုနှစ်၊ ဧပြီလအတွင်း အလားတူ ဆုံးဖြတ်ချက်များကို ရုရှားနှင့် တရုတ်တို့က ဗီတိုအာဏာသုံး၍ ပယ်ချခဲ့ဖူးသည်။ ယခုနောက်ဆုံး ဆုံးဖြတ်ချက်မဲခွဲရာ၌ ၎င်းတို့၏ မဲမပေးဘဲ ပျက်ကွက်ခဲ့ခြင်းက မြန်မာ့အကြမ်းဖက်မှုများကို အဆုံးသတ်ပြီး အသွင်ကူးပြောင်းရေး အစီအစဉ်တစ်ရပ် ရေးဆွဲရာတွင် မော်စကိုနှင့် ဘေကျင်းတို့၏ အပြုသဘောဆောင်သော နောက်ထပ် ပါဝင်ပတ်သက်မှုမျိုး ဖြစ်ပေါ်လာစေရေး ကြိုးပမ်းနိုင်ရန် အာဆီယံအတွက် တစ်ကြိမ်တစ်ခါမျှ မရရှိဖူးသော အခွင့်ထူးတစ်ရပ် ဖန်တီးပေါ်ပေါက်လာခြင်းလည်း ဖြစ်သည်။ သို့ရာတွင် အလွန် အရေးကြီးသော ကိစ္စရပ်အများအပြားကို ပိုမိုနားလည်သဘောပေါက်ရန် လိုအပ်လျက်ရှိသည်။

အရေးပါသည့် အချက်တစ်ချက်မှာ အမျိုးသားကာကွယ်ရေး လုပ်ပိုင်ခွင့်အက်ဥပဒေ (NDAA) ၏ တစ်စိတ်တစ်ပိုင်း အဖြစ် “တင်းကြပ်သောစစ်ရေး တာဝန်သိမှုမှတစ်ဆင့် မြန်မာနိုင်ငံပေါင်းစည်းရေး အက်ဥပဒေ” (မြန်မာအက်ဥပဒေ) ကို အမေရိကန် ကွန်ဂရက်လွှတ်တော်က ပွဲဦးထွက်အတည်ပြု ပြဋ္ဌာန်းအပြီး ရက်အနည်းငယ်အကြာ၌ ကုလသမဂ္ဂ လုံခြုံရေးကောင်စီ၏ ယခုဆုံးဖြတ်ချက်ကို ချမှတ်ခဲ့ခြင်း ဖြစ်သည်။

အမေရိကန်ပြည်ထောင်စု၏ မြန်မာအက်ဥပဒေအရ တော်လှန်ရေးအတွက် အရေးကြီးသော လူသားချင်းစာနာမှု အကူအညီနှင့် လူသေဆုံးနိုင်မှုနှင့် မပတ်သက်သော အထောက်အပံ့များကို ခွဲဝေပေးအပ်သွားမည်ဖြစ်သည်။ စာရေးသူတို့၏ တိုင်းရင်းသားတော်လှန်ရေးအဖွဲ့များသည် မြန်မာ့တော်လှန်ရေး၏ အဓိကအမာခံ ကျောရိုးများပင် ဖြစ်ကြသည်။

မြန်မာစစ်ခေါင်းဆောင် မင်းအောင်လှိုင်က ၎င်း၏ ဇန်နဝါရီ ၄ ရက် လွတ်လပ်ရေးနေ့ ကြေညာချက်တွင် အကျဉ်းသား ၇,၀၀၀အား လွတ်ငြိမ်းချမ်းသာခွင့်ပေးခြင်းနှင့်အတူ ယခုနှစ်နှောင်းပိုင်း၌ ရွေးကောက်ပွဲများကျင်းပမည့် အစီအစဉ်ကို ထုတ်ဖော်ပြောဆိုခဲ့သည်။

ရွေးကောက်ပွဲအစီအစဉ်သည် မိုက်လုံးကြီးခြင်းမျှသာ ဖြစ်သည်။ နိုင်ငံရေးပဋိပက္ခ၏ အရင်းခံ အကြောင်းရင်းများကို ကိုင်တွယ်ဖြေရှင်းနိုင်စွမ်း မရှိသော အာဏာရှင်များက ကြိုးကိုင်ချယ်လှယ် ကျင်းပသည့် ရွေးကောက်ပွဲများသည် လက်ရှိဖြစ်ပွားနေဆဲ စစ်ပွဲများကို မီးလောင်ရာလေပင့် ပိုမိုဆိုးဝါး စေမည်သာမက စစ်ပွဲအသစ်များ ဖြစ်ပေါ်လာရေးကိုလည်း မျိုးစေ့ချပေးလိမ့်မည် ဖြစ်သည်။

မြန်မာနိုင်ငံသည် အလွန်အရေးကြီးသော အနေအထားသို့ ရောက်ရှိနေသည်။ စစ်တပ်ကိုယ်စားပြု နိုင်ငံရေးပါတီများသည် ၁၉၉၀၊ ၂၀၁၅ နှင့် ၂၀၂၀ ရွေးကောက်ပွဲများတွင် အပြတ်အသတ်အရေးနိမ့် ခဲ့ကြသည်။ ၁၉၉၀ နှင့် ၂၀၂၀ ပြည့်နှစ် ရွေးကောက်ပွဲ အရေးနိမ့်မှုများအပြီး ရလဒ်များ ဖျက်သိမ်းခြင်းနှင့်အတူ ရက်ရက်စက်စက် ဖိနှိပ်မှုများ ဆက်လက် ဖြစ်ပေါ်ခဲ့သည်။ ၂၀၂၀ ပြည့်နှစ် ရွေးကောက်ပွဲ အပြီးတွင် လုပ်ကြံဖန်တီးထားသော အမျိုးသားလုံခြုံရေး စိုးရိမ်မှုများကို အကြောင်းပြ၍ အာဏာသိမ်းမှု ဖြစ်ပွားလာခဲ့သည်။

ယခုနှစ် ရွေးကောက်ပွဲကို ဒီမိုကရေစီနည်းလမ်းတကျ ကျင်းပနိုင်လိမ့်မည်ဟု မည်သူမျှ မယုံကြည် ကြသလို စစ်ကောင်စီအဖွဲ့အတွင်းမှာပင် ယုံကြည်လက်ခံမည့်သူ မရှိပေ။ စစ်တပ်ထောက်ခံသော ပါတီအနိုင်ရရှိပါက ဒီမိုကရေစီတော်လှန်ရေး အင်အားစုများက ရွေးကောက်ပွဲရလဒ်ကို ပယ်ချမည် ဖြစ်ကာ တိုင်းပြည်တွင် နောက်ထပ်အကွဲအပြဲများ(သို့မဟုတ်) ပို၍ အတိအကျပြောရလျှင် ၂၀ရာစု အစောပိုင်းက နိုင်ငံငယ်လေးများအဖြစ် အစိတ်စိတ်အမွှာမွှာပြိုကွဲခဲ့သည့် ဘော်လကန်ကျွန်းဆွယ် ဒေသကိုအစွဲပြု၍ ခေါ်ဝေါ်သုံးစွဲလျက်ရှိသော ဘော်လကန်နိုက်ဇေးရှင်း (တိုင်းပြည် အစိတ်စိတ်အမွှာမွှာ ပြိုကွဲမှုများ) ဆက်လက် ဖြစ်ပေါ်လာပေလိမ့်မည်။

စစ်တပ်က အရေးနိမ့်ပါကလည်း မြန်မာစစ်ဗိုလ်ချုပ်ကြီးများက ရွေးကောက်ပွဲရလဒ်ကို ဖျက်သိမ်းလျှင် ဖျက်သိမ်း၊ သို့တည်းမဟုတ် နောက်တစ်ကြိမ် အာဏာထပ်သိမ်းလျှင်သိမ်း၊ သို့တည်းမဟုတ် အာဏာဆက်လက် တည်မြဲရေးအတွက် အကြောင်းပြချက်အမျိုးမျိုး ပေးကြပေလိမ့်မည်။ မည်သည့်ရလဒ်ထွက်ပေါ်လာသည် ဖြစ်စေ၊ တိုင်းပြည်၌ မတည်ငြိမ်မှုများကိုသာ ပိုမိုဆိုးဝါးလာစေမည် ဖြစ်သည်။

ယခုရွေးကောက်ပွဲသည် စစ်တပ်အထက်တန်းလွှာများက ၎င်းတို့အကျိုးအတွက် ၎င်းတို့ရေးဆွဲခဲ့သော လူကြိုက်နည်းသည့် ၂၀၀၈ ခုနှစ်ဖွဲ့စည်းပုံအခြေခံဥပဒေကို ပြန်လည် အသက်သွင်းလာပေလိမ့်မည်။ အဆိုပါ ဖွဲ့စည်းပုံအရ အရေးကြီးသော ပြုပြင်ပြောင်းလဲမှုများအတွက် စစ်တပ်ကို ဗီတိုအာဏာသုံးစွဲခွင့် အမြဲတမ်းပေးအပ်ထားပြီး ဒီမိုကရေစီ နည်းလမ်းကျသော လုပ်ငန်းစဉ်များကို မထီလေးစား ပစ်ပယ်ထားသောဖွဲ့စည်းပုံ ဖြစ်သည်။

ရွေးကောက်ပွဲသည် အဖြေတစ်ခုမဟုတ်ဘဲ တိုင်းပြည်ပြိုလဲဖို့သာ အကြောင်းဖန်လာလိမ့်မည် ဖြစ်ကြောင်း အာဆီယံနှင့် နိုင်ငံတကာ အသိုင်းအဝိုင်းက စစ်ကောင်စီခေါင်းဆောင် မင်းအောင်လှိုင်ကို အလေးအနက်ပြောဆိုရန် လိုအပ်နေသည်။ ထို့အပြင် မင်းအောင်လှိုင်သည် လက်ရှိသတ်ဖြတ်နေမှုများကို ရပ်ဆိုင်း၍ ဒီမိုကရေစီတော်လှန်ရေး အင်အားစုများနှင့် တွေ့ဆုံဆွေးနွေးရန်လည်း လိုအပ်သည်။

မြန်မာနိုင်ငံသည် တိုင်းပြည်ပြိုကွဲရေးဆီသို့ အနှေးပြကွက်ဖြင့် တဖြည်းဖြည်း လျှောက်လှမ်းလျက်ရှိသည်။ စစ်တပ်သည် လက်နက်ကိုင် တော်လှန်ရေးအဖွဲ့များထံသို့ နယ်မြေများ လက်လွှတ်ဆုံးရှုံးနေရပြီး ပုံမှန်အားဖြင့် ၎င်းတို့ တပ်သားသစ်စုဆောင်းရာ နယ်မြေများဖြစ်သော ဗုဒ္ဓဘာသာ ဗမာအများစု နေထိုင်ရာ နိုင်ငံအလယ်ပိုင်း နှလုံးသည်းပွတ်ဒေသများအထိ ယခုအခါ စစ်မီးများပျံ့နှံ ရောက်ရှိလာခဲ့ပြီ ဖြစ်သည်။

စစ်ကောင်စီ၏ ထိန်းချုပ်မှုသည် ယခင်မြို့တော်ဟောင်းဖြစ်သော ရန်ကုန်နှင့် ဒုတိယအကြီးဆုံးဖြစ်သော မန္တလေးကဲ့သို့ မြို့ကြီးများ၌ပင်လျှင် မြို့ပြနယ်နိမိတ်ကို များစွာကျော်လွန် သက်ရောက်နိုင်ခြင်း မရှိတော့ပေ။

ဗမာမဟုတ်သော တိုင်းရင်းသားနယ်မြေအများစုမှာ စစ်ကောင်စီ၏ အုပ်ချုပ်ရေးပြင်ပသို့ ရောက်ရှိ လွတ်မြောက်နေကြပြီဖြစ်သည်။ အာဏာဖီဆန်ရေးလှုပ်ရှားမှုနှင့် တော်လှန်ရေးအင်အားစုများ၏ ဖိအားများကြောင့် နိုင်ငံ၏အရေးပါသော အုပ်ချုပ်ရေးမှူးအင်အားမှာလည်း လျော့နည်းကုန်ခမ်းလာလျက် ရှိသည်။

ပြည်တွင်းပဋိပက္ခများအပြင် ကမ္ဘာ့ကပ်ရောဂါဆိုးကြီး၏ အတိဒုက္ခများနှင့် ပေါင်းစပ်လိုက်သည့်အခါ မြန်မာ့စီးပွားရေးမှာ လုံးဝနီးပါး ပြိုလဲကျဆင်းလာခဲ့သည်။ စိုက်ပျိုးရေးနှင့် အထည်အလိပ်လုပ်ငန်း အပါအဝင် အဓိကအရေးပါသောကဏ္ဍများမှာ ဖြစ်ပွားနေဆဲ အကြမ်းဖက်မှုများ၏ အကျိုးဆက်ကြောင့် ဒယိမ်းဒယိုင် လှုပ်လီလှုပ်လဲ့ အခြေအနေသို့ ရောက်ရှိနေသည်။

တစ်ဖက်တွင်မူ အထက်ပါ အနုတ်လက္ခဏာများနှင့် လုံးကွဲပြားခြားနားသည့် အနေအထားအဖြစ် ဆောင်းပါးရှင်တို့ တော်လှန်ရေးအင်အားစုများ၏ ထိန်းချုပ်နယ်မြေဧရိယာသည် တဖြည်းဖြည်း ကျယ်ပြန့်လာလျက်ရှိသည်။ မြန်မာနိုင်ငံရှိ တိုင်းရင်းသားတော်လှန်ရေးအုပ်စု အများအပြားသည် မိမိတို့ ထိန်းချုပ်ရာဒေသ၌ အစိုးရတစ်ပိုင်း အဖွဲ့များအဖြစ် ဆယ်စုနှစ်များနှင့်ချီသော အုပ်ချုပ်မှု အတွေ့အကြုံများ ရရှိနေကြပြီဖြစ်သည်။

သစ်တောနှင့် ပတ်ဝန်းကျင်ထိန်းသိမ်းရေးဌာနများ၊ ကျန်းမာရေးနှင့် ကောလိပ်အကြို ပညာရေးစနစ်များ၊ အခွန်အခစနစ်များ၊ အရပ်ဖက်အုပ်ချုပ်ရေးနှင့် ဒေသန္တရဒီမိုကရေစီအဖွဲ့များကို စာရေးသူတို့ တည်ထောင်ဖွဲ့စည်းခဲ့ပြီး လုပ်ငန်းများ လည်ပတ်ဆောင်ရွက်လျက် ရှိသည်။ လိုအပ်ချက်ရှိလာသဖြင့် လူသားချင်းစာနာမှု အကူအညီဖြန့်ဖြူးပေးအပ်ရေး စနစ်များကိုလည်း ကျွန်တော်တို့ တည်ထောင်ခဲ့ကြသည်။ ထို့အပြင် ပြည်တွင်းနေရပ်စွန့်ခွာ ထွက်ပြေးသူ ၂ သန်းအတွက် ကာကွယ်စောင့်ရှောက်မှုများကို လက်ရှိအချိန်၌ ကျွန်တော်တို့ ပေးအပ်လျက် ရှိသည်။

အရေးကြီးသည့်အချက်တစ်ချက်မှာ ဝန်ကြီးများအပါအဝင် အတိုက်အခံ အမျိုးသားညီညွတ်ရေး အစိုးရ (NUG) အတွက် ကယ်ဆယ်ရေး လုပ်ငန်းများကို ကျွန်တော်တို့ဆောင်ရွက်ပေးခဲ့ကာ ၎င်းတို့အတွက် ဘေးကင်းလုံခြုံသော နေရာများ ပေးအပ်ထားခြင်းဖြစ်သည်။

မြောက်ဘက်တွင် ကချင်လွတ်မြောက်ရေးအဖွဲ့အစည်း (KIA)၊ အရှေ့နှင့် အရှေ့တောင်ဘက်တွင် ကရင်အမျိုးသားအစည်းအရုံး(KNU)၊ အရှေ့ဘက်တွင် ကရင်နီအမျိုးသား တိုးတက်ရေးပါတီ(KNPP) နှင့် အနောက်ဘက်တွင် ချင်းအမျိုးသားတပ်ဦး (CNF) တို့သည် စစ်တပ်ကို ခုခံတိုက်ခိုက်နေသော ထောင်နှင့်ချီသည့် သာမန်အရပ်သားများကို လေ့ကျင့်သင်တန်းပေးခဲ့ကြသည်။

ဗမာလူငယ် တော်လှန်ရေးသမား ၁ သိန်း ကျော်သည် စာရေးသူတို့၏ နယ်မြေများတွင် မှီတင်းနေထိုင်လျက်ရှိကြပြီး ထောက်ပံ့ပို့ဆောင်ရေး၊ စစ်ဆင်ရေးနှင့် နိုင်ငံရေးအပိုင်းများတွင် ကျွန်တော်တို့က ၎င်းတို့ကို ပံ့ပိုးကူညီလျက်ရှိသည်။

ဆောင်းပါးရှင်တို့၏ တိုင်းရင်းသား တော်လှန်ရေးအဖွဲ့များသည် လွတ်လပ်ရေး သို့မဟုတ် ခွဲထွက်ရေးအတွက် တိုက်ပွဲဝင်နေကြခြင်းမဟုတ်ဘဲ လူများစု ဗမာလူမျိုးများနှင့် အာဏာခွဲဝေ အုပ်ချုပ်မည့် ဖက်ဒရယ်စနစ်အတွက် တိုက်ပွဲဝင်နေခြင်းဖြစ်ကြောင်း စစ်တပ်ခေါင်းဆောင်ပိုင်းက သိရှိထားသည်။

သို့သော် လူများစု ဗမာများနှင့် ရန်တိုက်ပေးရန် ကျွန်တော်တို့ကို ပြည်ထောင်စု ပြိုကွဲအောင် ဖြိုခွဲလိုသည့် လူမျိုးစွဲ ခွဲထွက်ရေးသမားများအဖြစ် စစ်တပ်က တမင်တကာလုပ်ကြံ ပုံဖော်လျက်ရှိသည်။ သို့တိုင်အောင်လည်း ၎င်းတို့၏သတင်းတုစစ်ဆင်ရေးမှာ ယခုအခါ အလုပ် မဖြစ်တော့ပေ။

အာဏာမသိမ်းမီက စာရေးသူတို့၏ အဖွဲ့အစည်းများသည် ဖက်ဒရယ် ဒီမိုကရေစီ နိုင်ငံတစ်ခု တည်ဆောက်ရန် သမ္မတဦးသိန်းစိန်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ ဦးဆောင်သော ယခင်အစိုးရများနှင့် စာချုပ်များချုပ်ဆိုခဲ့ကြသည်။ အဆိုပါစာချုပ်များကို ထိုစဉ်က ကာကွယ်ရေးဦးစီးချုပ်ဖြစ်သူ မင်းအောင်လှိုင်က အတည်ပြုလက်မှတ်ရေးထိုးထားခဲ့ပြီး ဖြစ်သည်။

၂၀၂၁ ခုနှစ်၊ ဧပြီလက ဂျကာတာ၌သဘောတူခဲ့ကြသော မြန်မာနိုင်ငံဆိုင်ရာ အာဆီယံတူညီဆန္ဒငါးရပ် ကို မင်းအောင်လှိုင်က လိုက်နာရန် ပျက်ကွက်ခဲ့သည့်နည်းတူ ကျွန်တော်တို့၏ အဆိုပါ ပြည်တွင်းသဘောတူစာချုပ်များကိုလည်း ၎င်းက ချိုးဖောက်ခဲ့ပြန်သည်။

တိုင်းရင်းသား လက်နက်ကိုင်တော်လှန်ရေးအဖွဲ့များ၏ ခေါင်းဆောင်များ ဖြစ်ကြသော စာရေးသူတို့သည် သက်ဆိုင်ရာ အသိုင်းအဝိုင်း၏ ကိုယ်စားလှယ်များ အဖြစ်သာမက နိုင်ငံအဆင့် လှုပ်ရှားဆောင်ရွက်သူများ အဖြစ် မိမိတို့ကိုမိမိ ရှုမြင်ခံယူကြသည်။

အာဆီယံအား ကျွန်တော်တို့ အစွမ်းကုန်ကူညီသွားမည် ဖြစ်သလို အာဆီယံ၏ တူညီဆန္ဒငါးရပ် ငြိမ်းချမ်းရေးအစီအစဉ်ကို အကောင်အထည်ဖော်ရာ၌ ကမ္ဘာ့ကုလသမဂ္ဂနှင့် အာဆီယံ၏ မိတ်ဆွေနိုင်ငံများက အကူအညီ ပေးကြရန်လည်း ကျွန်တော်တို့ တိုက်တွန်းတောင်းဆိုအပ်ပါသည်။

အာဆီယံဥက္ကဋ္ဌရာထူးထက် ကျော်လွန်၍ အင်ဒိုနီးရှားနိုင်ငံ၏ ခိုင်မာ၍ စနစ်ကျသော ခေါင်းဆောင်မှုအောက်တွင် မြန်မာ့အကြမ်းဖက်မှု ဒီရေကို တားဆီး၍ ဒုက္ခပင်လယ်ဝေနေသော မြန်မာနိုင်ငံအတွက် ငြိမ်းချမ်းရေး လုပ်ငန်းစဉ်တစ်ခု စတင်တာထွက်နိုင်ရေး အာဆီယံသည် မိမိ၏ စုပေါင်းအင်အားကို အသုံးချ၍ ကူညီဆောင်ရွက်ပေးနိုင်လိမ့်မည်ဟု မျှော်လင့်ချက်များ ကြီးမားလျက် ရှိပါသည်။

(Nikkei Asia မဂ္ဂဇင်းပါ Ta Doh Moo and Salai Thla Hei တို့၏ “ASEAN must help reverse Balkanization of Myanmar” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်ပါသည်)။