မြဝတီမြို့ကို စစ်ကူလာသည့် အောင်ဇေယျ စစ်ကြောင်းကို လုံခြုံရေးယူပေးသော စစ်ကောင်စီ တပ်သားများကို ၁၃ ရက်ကြာ တိုက်ခိုက်မှု စစ်တပ်ဘက်မှ ၁၁ ဦးသေဆုံး

မြဝတီမြို့ကို စစ်ကူလာသည့် အောင်ဇေယျ စစ်ကြောင်းကို လုံခြုံရေးယူပေးသော စစ်ကောင်စီ တပ်သားများကို ၁၃ ရက်ကြာ တိုက်ခိုက်မှု စစ်တပ်ဘက်မှ ၁၁ ဦးသေဆုံး

ရန်ကုန်၊ မေ ၆

ကရင်ပြည်နယ်၊ မြဝတီမြို့ကို စစ်ကူလာသည့် အောင်ဇေယျ စစ်ကြောင်းကို လုံခြုံရေးယူပေးသော အကြမ်းဖက် စစ်ကောင်စီ တပ်သားများကို ၁၃ ရက်ကြာ တိုက်ခိုက်ရာ စစ်တပ်ဘက်မှ ၁၁ ဦးသေဆုံးခဲ့ကြောင်း KNDO တပ်ရင်း ၆ Drone တပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ဧပြီလ ၂၄ ရက်နေ့မှ မေလ ၆ ရက်နေ့ အထိ ကျုံးဒိုး-ကိုးတိုင် လမ်းမကြီး တစ်လျှောက် မြဝတီမြို့ကို စစ်ကူလာသည့် အောင်ဇေယျ စစ်ကြောင်းကို လုံခြုံရေး ယူပေးသော အကြမ်းဖက် စစ်သားများ၊ BGF အဖွဲ့နှင့် ၂၄ ပစ္စည်း DKBA ပူးပေါင်း အဖွဲ့ကို KNDO တပ်ရင်း ၆ Drone တပ်ဖွဲ့က ၁၃ ရက်ကြာ နေ့စဉ် တိုက်ခိုက်ခဲ့ကြောင်း သိရသည်။

အဆိုပါ တိုက်ခိုက်မှုအတွင်း အကြမ်းဖက် စစ်တပ်ဘက်မှ BGF စစ်ကြောင်းမှူး ၂ ဦး၊ ခမရ -၅၄၆ မှ ဗိုလ်ကြီး ၁ ဦး၊ တပ်ကြပ် ၁ ဦးနှင့် တပ်သား ၇ ဦးသေဆုံးပြီး ၇၀ ကျော် ထိခိုက်ဒဏ်ရာရရှိခဲ့ကြောင်း သိရှိရသည်။

“ဧပြီလ ၂၄ ရက်နေ့ကနေ မေလ ၆ ရက်နေ့ထိ ၂ ပတ်​ကျော်အတွင်း ကျုံးဒိုး-ကိုးတိုင် လမ်းမကြီး တစ်လျှောက် အောင်ဇေယျ စစ်ခွေးစစ်ကြောင်း မြ၀တီမြို့ကို တက်နိုင်ဖို့ နယ်မြေလုံခြုံရေး တိုးချဲ့ နေရာယူထားတဲ့ စစ်ခွေး၊ BGF နဲ့ ၂၄ ပစ္စည်း DKBA ပူးပေါင်းအဖွဲ့ကို ကျွန်တော်တို့ KNDO တပ်ရင်း ၆ Drone တပ်ဖွဲ့က နေ့ညမနား သွားရောက်တိုက်ခိုက်ခဲ့ပါတယ်။ အဲတိုက်ခိုက်မှု အတွင်းမှာ စစ်ခွေးတွေ ဘက်က BGF စစ်ကြောင်းမှူး ၂ ဦး၊ ခမရ -၅၄၆က ဗိုလ်ကြီး ၁ ကောင်၊ တပ်ကြပ် ၁ ကောင်နဲ့ တပ်သား ၇ ကောင် သေဆုံးပြီး ၇၀ နဲ့ အထက် ထိခိုက်ဒဏ်ရာရတယ်လို့ သိရတယ်” ဟု KNDO တပ်ရင်း ၆ Drone တပ်ဖွဲ့မှ တာဝန်ရှိသူ တစ်ဦးက ပြောဆိုသည်။