အမေရိကန်တစ်ဒေါ်လာ ၄၅၀၀ ကျပ်ဝန်းကျင်နှင့် အခေါက်ရွှေတစ်ကျပ်သား ၅၅ သိန်း ၉ သောင်း စံချိန်တင်စျေးများဖြင့် စျေးကွက် စဖွင့်

ရန်ကုန်၊ မေ ၂၉

ပြည်တွင်းစျေးကွက်တွင် မတည်မငြိမ်ဖြစ်နေသော ရွှေစျေးနှင့်အမေရိကန်ဒေါ်လာစျေးနှုန်းများမှာ ယနေ့ နံနက်ပိုင်းတွင်လည်း စံချိန်တင် စျေးနှုန်းများဖြင့် စျေးကွက်စတင်ဖွင့်လှစ်လိုက်ကြောင်း ရွှေကုန်သည်နှင့်ဒေါ်လာဝယ်ရောင်း ဒိုင်ကြီးများက ပြောဆိုကြသည်။

ယနေ့ နံနက်ပိုင်း ၁၁ နာရီကျော်အချိန်တွင် အမေရိကန်တစ်ဒေါ်လာလျှင် ၄၄၉၈ ကျပ် ဖြင့်လည်းကောင်း၊ အခေါက်ရွှေတစ်ကျပ်သားလျှင် ငွေကျပ် ၅၅ သိန်း ၉ သောင်းဖြင့် လည်းကောင်း စျေးကွက်စတင်လှုပ်ရှားနေကြောင်း သိရှိရသည်။

“အရွက်စျေး( အမေရိကန်ဒေါ်လာ)က စဖွင့်ကတည်းက အမြင့်နဲ့ပဲ ဖွင့်တယ်။ စျေးကွက် ဖွင့်တာနဲ့ တစ်ဒေါ်လာ ၄၄၅၀ စတယ်။ ၁၀ မိနစ်လောက်ပဲကြာတယ်။ တစ်ဒေါ်လာကို ၄၄၉၈ ကျပ်လောက်ရောက်သွားတယ်။ ၄၅၀၀ ပဲ ပြောပါတော့။ အခုတော့ အဲဒီစျေးဖြစ်နေတယ်။ အလှုပ်အရမ်းတော့ အတော်ကြမ်းတယ်”ဟု ရန်ကုန်မှ ငွေလဲဒိုင်က ပြောဆိုသည်။

ရွှေစျေးကွက်မှာမူ စျေးကွက်စဖွင့်ချိန်တွင် မီးလင်းရွှေ (၁၆ ပဲရည် အခေါက်ရွှေ) တစ်ကျပ်သားလျှင် ၅၅ သိန်း ၇ သောင်းဖြင့် စတင်ဖွင့်လှစ်ခဲ့ပြီး စျေးကွက်ဖွင့်ပြီးသည်နှင့် ၅၅ သိန်း ၉ သောင်းကျပ်သို့ ရောက်ရှိသွားကြောင်း သိရှိရသည်။

“ကမ္ဘာ့ရွှေစျေးက ငြိမ်တယ်။ ဒေါ်လာစျေးလိုက်တက်တော့ ရွှေစျေးပါ လိုက်တက်တာ။ ဒီနေ့တော့ ရွှေစျေး ၅၆ သိန်းကျော်ပြီးတော့ ဒေါ်လာက တစ်ဒေါ်လာ ၅၀၀၀ နားကပ်သွားနိုင်တယ်။ ရွှေလည်း အရောင်းနည်းတယ်။ အဝယ်များတယ်” ဟု ရွှေကုန်သည်တစ်ဦးက ပြောဆိုသည်။

ပြည်တွင်းစျေးကွက်တွင် ရွှေနှင့်ဒေါ်လာစျေးနှုန်းများ အချိန်နှင့်အမျှ အလှုပ်အရမ်းကြမ်းကြမ်းဖြင့် ပြောင်းလဲနေကြောင်း ရွှေကုန်သည်နှင့် ဒေါ်လာလက် ကြီးဒိုင်များက ပြောဆိုကြသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar