ရန်ကုန်၊ ဇန်နဝါရီ ၂၀
ပဲခူးတိုင်း၊ နတ်တလင်းမြို့နယ်၊ ဆီဆုံကုန်းရွာကို အကြမ်းဖက် စစ်တပ်က ဝင်ရောက် စီးနင်းစဉ် ရွာထဲတွင် ပိတ်မိပြီး ကျန်ခဲ့သည့် ပြည်သူ ၁၀ ဦးကျော်ကို လက်ပြန်ကြိုးတုပ်၍ လမ်းမပေါ် ခေါ်ထုတ်ပြီး အစုလိုက်အပြုံလိုက် ပစ်ခတ်သတ်ဖြတ်ခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၁၅ ရက်နေ့တွင် နတ်တလင်းမြို့နယ်၊ ဆီဆုံကုန်းရွာကို အကြမ်းဖက် စစ်တပ်က ဝင်ရောက်စီးနင်းစဉ် ပြည်သူများ ရွာလုံးကျွတ် ထွက်ပြေးတိမ်းရှောင်ခဲ့သော်လည်း ရွာထဲ၌ ပိတ်မိနေသည့် ပြည်သူ ၁၀ ဦးကိုကျော်ကို အကြမ်းဖက် စစ်ကောင်စီ တပ်သားများက ဖမ်းဆီးခဲ့ကြောင်း သိရသည်။
ဇန်နဝါရီလ ၁၆ ရက်နေ့ အကြမ်းဖက် စစ်ကောင်စီ တပ်သားများ ဖမ်းဆီးထားသည့် ကိုချက်ဖောင်း၊ ကိုမင်းထိုက်၊ ကိုကျော်ကျော်၊ ကိုသန်းဇော်ဦး အပါအဝင် ပြည်သူ ၁၀ ဦးကျော်ကို လက်ပြန်ကြိုးတုပ်၍ ရွာလမ်းမပေါ် ခေါ်ထုတ်ကာ အစုလိုက်အပြုံလိုက် ပစ်သတ်ခဲ့ခြင်းဖြစ်ကြောင်း သိရှိရသည်။
လက်ရှိချိန်ထိ အကြမ်းဖက် စစ်ကောင်စီ တပ်သားများသည် ကျေးရွာအတွင်း၌ တပ်စွဲထားသော သေဆုံးသွားသော ပြည်သူများ၏ ရုပ်အလောင်းများကို ပြည်သူများက ကောက်ယူသဂြိုလ်နိုင်ခြင်းမရှိသေးဘဲ စစ်ကောင်စီ တပ်သားများက ပြည်သူပိုင် ပစ္စည်းများကို စိတ်ကြိုက် ခိုးယူနေကြောင်း သိရသည်။
ထို့ပြင် အကြမ်းဖက် စစ်ကောင်စီ တပ်သားများက ၎င်းတို့ စိတ်ကြိုက် ပစ္စည်းများကို ခိုးယူပြီးနောက် ရွာကို မီးရှို့ဖျက်ဆီးရန် ခြိမ်းခြောက်ပြောဆိုမှုများရှိပြီး ရွာနားကပ်လာသည့် ပြည်သူများကိုလည်း လိုက်လံ ပစ်ခတ်မှုများရှိကြောင်း၊ ဆီဆုံကုန်းရွာသည် နေအိမ် ၆၀၀ ခန့်ရှိသော ကျေးရွာကြီး တစ်ရွာဖြစ်ပြီး ထောင်နှင့်ချီသော ပြည်သူများသည် ဘေးလွတ်ရာ တိမ်းရှောင်နေရကြောင်း သိရှိရသည်။
” ဇန်နဝါရီ ၁၅ ရက်နေ့မှာ စစ်ခွေးတွေက ရွာကို ဝင်ရောက်စီးနင်းပြီး ရွာထဲမှာ ကျန်ခဲ့တဲ့ ပြည်သူ ၁၀ ဦးကျော်ကို ဖမ်းဆီးထားတာ ၁၆ ရက်နေ့မှာ စစ်ခွေးတွေက သူတို့ ဖမ်းဆီးထားတဲ့ ပြည်သူ ၁၀ ဦးကျော်လုံးကို ကြိုးတုတ်ပြီး လမ်းမခေါ်ထုတ် ပစ်သတ်လိုက်တာ အခုအတည်ပြုနိုင်တာက ကိုချက်ဖောင်း၊ ကိုမင်းထိုက်၊ ကိုကျော်ကျော်နဲ့ ကိုသန်းဇော်ဦး အပါအဝင် အမည်မသိ ပြည်သူ ၁၀ ဦးကျော်ကို သတ်ဖြတ်ခံရတယ်လို့ သိရတယ်။ ကျန်တဲ့ သူတွေရဲ့ အမည်တော့ အတည်မပြုနိုင်သေးဘူး အလောင်းလည်း မကောင်နိုင်သေးဘူး။ ရွာထဲမှာ စစ်ခွေးတွေက အခုထိရှိနေသေးတော့ ကျန်တဲ့ သူတွေရဲ့ အမည်တွေကို အတည်မပြုနိုင်သေးတာ အခု သတင်းကြားရတဲ့ သတင်းက နောက်ထပ် ၂ ရက်နေရင် စစ်ခွေးတွေက ရွာထဲက သူတို့ စိတ်ကြိုက် ပစ္စည်းတွေ အကုန်သယ်ထုတ်ပြီး ရွာကို မီးရှို့မယ်လို့လည်း သိရတယ်” ဟု ဒေသပြည်သူ တစ်ဦးက ပြောဆိုသည်။
၂၀၂၄ ဒီဇင်ဘာလ ၂ ရက်နေ့ကလည်း ဆီဆုံကုန်းရွာကို အကြမ်းဖက် စစ်တပ်က လက်နက်ကြီးဖြင့် ပစ်ခတ်ခဲ့ခြင်းကြောင့် အမျိုးသမီး ၁ ဦး သေဆုံးခဲ့ပြီး ပြည်သူ ၈ ဦး ထိခိုက်ဒဏ်ရာရရှိကာ ရွာလုံးကျွတ် တိမ်းရှောင်ခဲ့ရပြီး ပြည်သူများ ကျေးရွာအတွင်း ပြန်လည် ဝင်ရောက်နေထိုင်နေသည်မှာ ရက်ပိုင်းမျှသာ ရှိသေးချိန်တွင် အကြမ်းဖက် စစ်တပ် စစ်ကြောင်းက ရွာသို့ ဝင်ရောက် စီးနင်းခဲ့ခြင်းဖြစ်ကြောင်း သိရသည်။
ဓာတ်ပုံ – ၂၀၂၃ ခုနှစ် ဇူလိုင်လ ၂၁ ရက်နေ့တွင် ယင်းမာပင်မြို့နယ်၊ စုန်ချောင်းကျေးရွာမှ ပြည်သူ့ကာကွယ်ရေး တပ်ဖွဲ့ဝင် ၃ ဦးနှင့် ပြည်သူ ၁၁ ဦးကို အကြမ်းဖက် စစ်တပ်က အစုလိုက် အပြုံလိုက် သတ်ဖြတ်ခဲ့စဉ်။ (ပုံအဟောင်းဖြစ်သည်)
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
