ရန်ကုန်၊ ဧပြီ ၁၄
လည်ပတ်သူမရှိဘဲ ခြောက်ကပ်နေသည့် နေပြည်တော်လမ်းလျှောက်သင်္ကြန်တွင် လူစည်ကားစေရေးအတွက် သွားရောက်လည်ပတ်ရန် ငလျင်ဒဏ်သင့် Non-CDM ဝန်ထမ်းနှင့်မိသားစုကို ဌာနဆိုင်ရာများက ဖိအားပေးနေကြောင်း နေပြည်တော်မှ ဝန်ထမ်းမိသားစုဝင် တချို့က ပြောဆိုသည်။
ယမန်နေ့် ဧပြီလ ၁၃ ရက်နေ့ မွန်းလွဲပိုင်းတွင် နေပြည်တော်လမ်းလျှောက်သင်္ကြန်ကို စတင်ဖွင့်လှစ်ခဲ့ပြီး အကြမ်း ဖက် စစ်ခေါင်းဆောင် မင်းအောင်လှိုင်နှင့် စစ်ဗိုလ်ချုပ်များ လာရောက်လည်ပတ်ခဲ့ကြောင်း၊ ယင်းနောက် Non-CDM ဝန်ထမ်းများနှင့်မိသားစုဝင်များကိုလည်း နေပြည်တော်လမ်းလျှောက်သင်္ကြန်သို့ သွားရောက်လည်ပတ်ရန် ဌာနဆိုင်ရာ အကြီးအကဲများက ဖိအားပေးနေကြောင်း သိရှိရသည်။
“ဘယ်မှမသွားရင်တောင် နေပြည်တော်လမ်းလျှောက်သင်္ကြန်ကို သွားဖို့ ပြောတယ်။ ကလေးတွေ လူငယ်တွေရော မိသားစုလိုက် အသွားအပြန် ကားစီစဉ်ပေးမယ်။ သင်္ကြန်တစ်ရက်တော့ သွားရမယ်လို့ ပြောတယ်။ ဌာနအလိုက် မိသားစုဝင်အားလုံး တစ်ရက်စီတော့ အလှည့်ကျပို့ပေးမယ်ပြောတယ်။ ငလျင်ကြောင့် တဲနဲ့တောင် နေနေရတာကို လမ်းလျှောက်သင်္ကြန်ထပ်သွားခိုင်းတာက အတော်အဆင်မပြေပါဘူး” ဟု ယာယီတဲဖြင့် နေထိုင်နေရသည့် နေပြည်တော်မှ Non-CDM ဝန်ထမ်းတစ်ဦးက ဆိုသည်။
ယမန်နေ့ သင်္ကြန်အကြိုနေ့ နှင့် ယနေ့ သင်္ကြန်အကျနေ့တွင်လည်း နေပြည်တော်လမ်းလျှောက်သင်္ကြန်တွင်ပြင်ပမှ လာရောက်သူမရှိဘဲ ဝန်ထမ်းများနှင့် အတင်းအကျပ် လာရောက်ခိုင်းခံရသည့် ဝန်ထမ်းမိသားစုများ၊နေပြည်တော် ပတ်ဝန်းကျင် ကျေးရွာများမှ ပြည်သူတချို့ လာရောက်ကြကြောင်း၊ စည်ကားမှုမရှိဘဲ ခြောက်ကပ်နေကြောင်း သိရှိရသည်။
ထို့ပြင် စစ်ကောင်စီက နေပြည်တော်စစ်ရုံးနှင့် ဝန်ကြီးဌာနများအလိုက် ဌာနတွင်း သင်္ကြန်ပွဲများကိုလည်း ပြုလုပ်ခိုင်းနေပြီး စတုဒီသာအဖြစ် မုန့်လုံးရေပေါ်၊ ရွှေရင်အေး၊ မုန့်လက်ဆောင်း၊ သင်္ကြန်ထမင်းတို့ကို တစ်ရက်စီအလိုက် အလှည့်ကျ လာရောက် လုပ်အားပေး ချက်ပြုတ်ခိုင်းနေကြောင်းလည်း သိရှိရသည်။
“အရင်ဆိုရင်တော့ ပျော်ပါတယ်။ ဒီနှစ်က နေစရာလည်းပျောက်၊ ကိုယ့်မိတ်ဆွေတချို့လည်း ဆုံးရှုံးခဲ့ရတော့ ဘာမှ အဓိပ္ပာယ်ရှိမနေဘူး” ဟု ဇေယျာသီရိမြို့နယ်၊ တပ်မတော် ကြည်း၊ရေ၊လေ မိသားစု သင်္ကြန်ပွဲသို့ အတင်း အကျပ် တက်ရောက်ရန် ဖိအားပေးခံခဲ့ရသူ စစ်အင်ဂျင်နီယာတပ်မှ အင်ဂျင်နီယာတပ်ကြပ်ကြီးတစ်ဦးက ဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
