ရန်ကုန်၊ ဇူလိုင် ၉
စစ်ကိုင်းတိုင်း၊ ချောင်းဦးမြို့ပေါ်တွင် ဆိုင်ကယ်ဖြင့် ကင်းလှည့်နေသော အကြမ်းဖက်စစ်သား ၂ ဦးကို ပစ်ခတ်တိုက်ခိုက်ခဲ့ရာ စစ်သား ၁ ဦးသေဆုံးပြီး သေနတ် ၁ လက်သိမ်းဆည်းရရှိခဲ့ကြောင်း Chaung U People Defense Force – CHU PDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ ဇူလိုင်လ ၈ ရက်နေ့ ညနေ ၆ နာရီ ၃၀ မိနစ်အချိန်ခန့် ချောင်းဦးမြို့၊ ဘောလုံးကွင်းအနီး ပတ်ဝန်းကျင်တွင် ဆိုင်ကယ်တစ်စီးဖြင့် ကင်းလှည့်ထွက်လာသော အကြမ်းဖက်စစ်သား ၂ ဦးကို အသင့် စောင့်ကြိုပစ်ခတ်တိုက်ခိုက်ခဲ့ရာ စစ်သား ၁ ဦး သေဆုံးပြီး တစ်ဦး ဒဏ်ရာရရှိကာ G3 အမျိုး အစားသေနတ် ၁ လက်နှင့် ကျည်ဘောက် ၃ ဘောက် သိမ်းဆည်းရရှိခဲ့ကြောင်း သိရသည်။
“ဆိုင်ကယ်နဲ့နှစ်ယောက်ကင်းလှည့်ထွက်လာတာ၊ တစ်ယောက်သေတယ်။ တစ်ယောက်ဒဏ်ရာရတယ်။ ဒဏ်ရာရသူက ခြေ ထောက်ထိသွားတာ။ မြို့ပေါ်အထိ တက်စောင့်ပြီး ပစ်ခတ်ခဲ့တာ၊ ဘောလုံးကွင်းအနီးပတ်ဝန်းကျင်မှာပဲ။ ဘောလုံးကွင်းနဲ့ ချောင်းဦးမြို့အထွက်တံတားနားမှာ ၃ ထပ်တိုက်တစ်လုံးရှိတယ်၊ အဲဒီတိုက်မှာ တပ်စွဲထားတာ။ အဲဒီဝန်းကျင်နားမှာပဲ ပစ်ခတ်ခဲ့တာ၊ အဲနားမှာက အင်အားကလည်းများတော့ ဓာတ်ပုံတွေဘာတွေ ရိုက်မယူနိုင်ခဲ့ဘူး၊ ပစ်ပြီးတစ်ခါတည်းပြန်ဆုတ်ပြေးလာခဲ့ရတာ” Chaung U People Defense Force – CHU PDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်း ဌာနထံသို့ ပြောကြားသည်။
အဆိုပါ ပစ်ခတ်တိုက်ခိုက်မှုကို Chaung U People Defense Force – CHU PDF တပ်ဖွဲ့ ၊တပ်ခွဲ ၃ ရဲဘော်များက တိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များအထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
ချောင်းဦးမြို့ပေါ်တွင်အကြမ်းဖက်စစ်သား ရာကျော်ရှိပြီး မြို့ပေါ်တွင်အထိုင်စခန်းများထပ်မံတိုးချဲ့ ထားကြောင်း၊ ချောင်းဦးမြို့ပေါ်ရှိအထိုင်စခန်းများမှ အင်အားများ ချောင်းဦးမြို့တွင်ဖြန့်ကျက်ထား ကာ မုံရွာ-မန္တလေးလမ်းပိုင်းကို ဖြတ်သန်းသွားလာသည့် အကြမ်းဖက်စစ်ယာဉ်တန်းများကိုလည်း လုံခြုံရေးယူပေးလျက်ရှိကြောင်း သိရသည်။
ဓာတ်ပုံ – ၂၀၂၁ ခုနှစ် ချောင်းဦးမြို့ပေါ်တွင် ကင်းလှည့်နေသော အကြမ်းဖက်စစ်ကောင်စီတပ်ဖွဲ့ဝင်များ။ (ပုံအဟောင်းဖြစ်ပါသည်။)
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
