ရန်ကုန်၊ စက်တင်ဘာ ၁၂
ထိုင်းနိုင်ငံ ချွန်ဘူရီခရိုင် စက်ရုံတွင် အလုပ်ထုတ်ခံရသည့် မြန်မာအလုပ်သမား ၃၇ ဦး၏ လုပ်အားခ ဘတ် ၂ သိန်း ၂ သောင်းကျော် ပြန်လည် ရရှိနိုင်ရန် ကူညီဆောင်ရွက်ပေးခဲ့ကြောင်း M.H.A.C မဟာမိတ်အဖွဲ့မှ အေအေစီ ကိုရဲမင်းက ရန်ကုန်ခေတ်သစ်သတင်းဌာနသို့ ပြောကြားသည်။
စက်တင်ဘာလ ၁၀ ရက်နေ့တွင် အလုပ်သမားများကို မတရားအလုပ်ထုတ်ခဲ့သည့် စက်ရုံဘက်မှ ပြန်လည် ညှိနှိုင်းခဲ့ပြီး အလုပ်သမားများ ရရှိမည့် လုပ်အားခများကို ပြန်လည် ပေးချေခဲ့ခြင်းဖြစ်ကြောင်း၊ မတရား အလုပ်ထုတ်ခံရသည့် အလုပ်သမား ၃၇ ဦးသည် M.H.A.C အဖွဲ့ကို ဆက်သွယ်၍ အကူအညီတောင်းခံလာသည့်အတွက် NUG အလုပ်သမားဝန်ကြီးဌာနနှင့် M.H.A.C မဟာမိတ်အဖွဲ့ ပူးပေါင်းကာ သက်ဆိုင်ရာ နယ်မြေခံရုံးတွင် ကူညီဆောင်ရွက်ပေးခဲ့ခြင်းဖြစ်ကြောင်း သိရသည်။
အဆိုပါ စက်ရုံသည် မြန်မာ အလုပ်သမား ၃၇ ဦးကို အထောက်အထားပြည့်စုံလျက် မပြည့်စုံဟုဆိုကာ ကြိုတင် အသိမပေးဘဲ အလုပ်ထုတ်ခဲ့ခြင်းဖြစ်ကြောင်း သိရှိရသည်။
“ဒီလိုမျိုးဖြစ်စဉ်တွေ ဖြစ်နေတာက ထိုင်းနိုင်ငံရဲ့ စီးပွားရေးအခြေအနေမှာ အလုပ်ရုံ အချို့တွေ စီးပွားရေးကျတာနဲ့ ဆိုင်တယ်။ နောက်တစ်ခုက အလုပ်ရုံတွေက စာရေးတွေက အပြင်က ပွဲစားတွေနဲ့ ပေါင်းပြီး အလုပ်စမတ်ခယူပြီး လူသွင်းတယ်။ လိုတဲ့အချိန်ခေါ်ခိုင်းတယ်။ လူမလိုရင် လျှော့တယ်။ တချို့ ရုံတွေကျ အကြောင်းမဲ့ အပစ်ရှာပြီး အလုပ်ထုတ်လိုက်တယ်။ အကြောင်းမဲ့ ထုတ်လိုက်တဲ့ လူတွေနေရာမှာ စမတ်ခတွေ ယူပြီး လူသွင်းတယ်။ အဲဒီလိုမျိုး တော်တော်များများလည်း တွေ့လာရတယ်” ဟု အေအေစီ ကိုရဲမင်းက ပြောဆိုသည်။
M.H.A.C မဟာမိတ်အဖွဲ့ကိုလည်း ထိုကဲ့သို့ ဖြစ်စဉ်မျိုးများ ဩဂုတ်လအတွင်း အမှုပေါင်း ၅၀ လောက်အထိ တိုင်ကြားလာမှုရှိကြောင်း၊ M.H.A.C မဟာမိတ် အဖွဲ့အနေဖြင့် ထိုင်းနိုင်ငံအလယ်ပိုင်းခရိုင်များတွင် တတ်နိုင်သမျှ ကူညီဆောင်ရွက်ပေးနေကြောင်း၊ အလုပ်သမားများအနေနှင့် ထိုကဲ့သို့ ဖြစ်စဉ်မျိုး ကြုံတွေ့လာပါက အလုပ်သမားများအနေနှင့် စည်းလုံးညီညွတ်စွာနဲ့ ပူးပေါင်းဆောင်ရွက်ရန် လိုအပ်ကြောင်း အေအေစီ ကိုရဲမင်းက ဆက်လက် ပြောဆိုသည်။
“အဲဒီလို ဖြစ်လာရင် နံပါတ် ၁ အလုပ်သမားတွေအနေနဲ့ စည်းလုံးညီညွတ်မှု ရှိရမယ်။ နံပါတ် ၂ အဲဒီလို ဖြစ်လာရင် အလုပ်ရုံရဲ့ သက်ဆိုင်ရာ မန်နေဂျာတွေ၊ အလုပ်ရုံသူဌေးတွေ၊ ကုမ္ပဏီပိုင်ရှင်တွေ သိအောင် ကြိုးစားရမယ် ပထမအဆင့် အဲဒီမှာ ဆန္ဒပြတာတွေ မလုပ်နဲ့၊ ပြီးတော့ ဒုတိယအဆင့်အနေနဲ့ စုဝေးပြီး တောင်းဆိုရမယ် အလုပ်ရုံကို အဲဒါမှ ညှိနှိုင်းလို့မှ မရဘူးဆိုရင် ကိုရဲမင်းတို့လို အဖွဲ့အစည်းတွေ၊ အလုပ်သမားအဖွဲ့အစည်းတွေကို ချိတ်ဆက်ပြီးတော့ အကူအညီတောင်းခံတာအပြင် သက်ဆိုင်ရာ နယ်မြေ ထိုင်းအလုပ်သမားကာကွယ်စောင့်ရှောက်ရေးဌာန၊ မြို့နယ်တိုင်း ခရိုင်တိုင်းမှာ ရှိတယ်။ အဲဒီဌာနမှာ သွားပြီးတော့ အလုပ်ရုံဘက်က အလုပ်သမား အခွင့်အရေး ချိုးဖောက်တာတွေကို တိုင်ကြားရမှာ ဖြစ်တယ်။ အဲဒီတော့ အလုပ်သမားတွေ ဒီအဆင့်ဆင့်တွေ မရဘူးဆိုရင် အလုပ်ရုံကို ပြန်တိုင်ကြားရတဲ့ အခြေအနေမျိုးအထိ ရောက်သွားမှာပေါ့နော်။ အလုပ်သမားတွေ စည်းလုံးညီညွတ်ဖို့နဲ့ ကိုယ့်အလုပ်သမားအခွင့်အရေး ပြောင်ပြောင်တင်းတင်း ချိုးဖောက်နေရင်တော့ ကိုယ့်ရပိုင်ခွင့် အခွင့်အရေးအရ တောင်းဆိုလို့ရတယ်လို့ ဖြည့်စွက်ပြောချင်ပါတယ်” ဟု အေအေစီ ကိုရဲမင်းက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
