စစ်ကိုင်းတိုင်း၊ မြင်းမူမြို့နယ်၊ မုံရွာ-မန္တလေး လမ်းပိုင်းတွင် ကင်းပုန်းဝပ်ရန် ပြင်ဆင်နေသော အကြမ်းဖက် စစ်တပ် စစ်ကြောင်းကို ပစ်ခတ် တိုက်ခိုက်ခဲ့ရာ စစ်သား ၇ ဦးသေဆုံးခဲ့ကြောင်း ဗမာလွတ်မြောက်ရေးဒီမိုကရက်တစ်တပ်ဦး (BLDF) မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

မေလ ၂၇ ရက်နေ့ နံနက် ၈ နာရီ ၃၀ မိနစ်ခန့်တွင် မြင်းမူမြို့နယ်၊ မုံရွာ-မန္တလေး လမ်းပိုင်း၌ ကင်းပုန်းဝပ်ရန် ပြင်ဆင်နေသော တပ်မ ၃၃ လက်အောက်ခံ တပ်ရင်းမှ စစ်သားများနှင့် ပျူစောထီးများ ပူးပေါင်းထားသော အင်အား ၂၀ ခန့်ပါ စစ်ကြောင်းကို တော်လှန်ရေး တပ်ဖွဲ့များက စောင့်ကြို တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၇ ဦးသေဆုံးကာ ၅ ဦး ထိခိုက်ဒဏ်ရာရရှိခဲ့ပြီး တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရှိရသည်။

“စစ်ခွေးသေစာရင်းက ထပ်တိုးသေဆုံးတာမျိုး မရှိပါဘူး။ စစ်ခွေးဘက်က လက်နက်ခဲယမ်းတွေ သိမ်းဆည်းရမိတာမျိုးလည်း မရှိပါဘူး။ ကျွန်တော်တို့ ရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့ပါတယ်” ဟု ဗမာလွတ်မြောက်ရေး ဒီမိုကရက်တစ်တပ်ဦး (BLDF) မှ တာဝန်ရှိသူကပြောဆိုသည်။

အဆိုပါ တိုက်ခိုက်မှုကို ဗမာလွတ်မြောက်ရေးဒီမိုကရက်တစ်တပ်ဦး (BLDF)၊ မဟာမိတ်တပ်များဖြစ်သည့် မုံရွာခရိုင်ပကဖ (ရေနဂါးစစ်ကြောင်း)နှင့် Black Eagle အဖွဲ့တို့က ပူးပေါင်း လုပ်ဆောင်ခဲ့ကာ တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။

The post မုံရွာ-မန္တလေး လမ်းပိုင်းတွင် ကင်းပုန်းဝပ်ရန် ပြင်ဆင်နေသော စစ်တပ် စစ်ကြောင်းကို တိုက်ခိုက်မှု စစ်သား ၇ ဦးသေဆုံး appeared first on Khit Thit Media.

မန္တလေးတိုင်း၊ ငါန်းဇွန်မြို့နယ်အတွင်းရှိ ကျေးရွာများကို အကြမ်းဖက် စစ်တပ်က ဒရုန်း၊ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ ပြည်သူ ၈ ဦး ထိခိုက်ဒဏ်ရာရရှိခဲ့ပြီး နေအိမ် ၆ လုံး ထိခိုက်ပျက်စီးခဲ့ကြောင်း ဒေသပြည်သူများ ရန်ကုန်ခေတ်သစ်သတင်းဌာနသို့ ပြောဆိုသည်။

မေလ ၂၇ ရက်နေ့တွင် ငါန်းဇွန်မြို့နယ်၊ သပြေသာကျေးရွာအတွင်းကို စစ်ကြောင်းထိုးဝင်ရောက်လာသော အကြမ်းဖက် စစ်တပ်သည် အနီးနားရှိ ကုလကျေးရွာဘက်ကို ဒရုန်းများဖြင့် ဗုံး ၁၅ လုံး ကျဲချတိုက်ခိုက်ခဲ့ကြောင်း၊ ထို ဗုံးကျဲတိုက်ခိုက်မှုအတွင်း ကုလကျေးရွာအတွင်းရှိ အမျိုးသမီးများ အပါအဝင် ပြည်သူ ၈ ဦး ထိခိုက်ဒဏ်ရာရရှိခဲ့ပြီး ကျေးရွာအတွင်းရှိ ပြည်သူ့နေအိမ် ၆ လုံးခန့် ထိခိုက်ပျက်စီးခဲ့ကြောင်း သိရှိရသည်။

ထို့ပြင် ယနေ့ မေလ ၂၉ ရက်နေ့တွင်လည်း အကြမ်းဖက် စစ်တပ် စစ်ကြောင်းသည် ကုလကျေးရွာများအနီးဝန်းကျင်ကို လက်နက်ကြီးများဖြင့် ထပ်မံ ရမ်းသန်းပစ်ခတ်ခဲ့ကြောင်း သိရသည်။

“မေလ ၂၇ ရက်နေ့က ငါန်းလွန်အုပ်စု၊ သပြေသာရွာကို ရောက်နေတဲ့ စစ်ခွေးစစ်ကြောင်းက ကုလရွာကို ဒရုန်းနဲ့ ဗုံးချတာမှာ ပြည်သူတွေ အနည်းဆုံး ၈ ဦးလောက် ထိခိုက်ဒဏ်ရာရပြီး ရွာထဲက နေအိမ် ၆ လုံးလောက် ထိခိုက်ပျက်စီးသွားတယ်။ ဒဏ်ရာရတာကတော့ အမျိုးသားရော အမျိုးသမီးတွေရော ပါတယ်၊ ကလေးသူငယ်တွေတော့ မပါဘူး။ အသက်အရွယ်တွေကတော့ အတိအကျမသိရသေးဘူး။ ဒီနေ့လည်း ငါန်းလွန်အုပ်စုဘက်က သပြေသာရွာဘက်ကို ရောက်နေတဲ့ခွေးတွေက ကုလရွာဘက်ကို လက်နက်ကြီးနဲ့ ပစ်ခတ်သံတွေတော့ ကြားနေရတယ်” ဟု ဒေသပြည်သူတစ်ဦးက ပြောဆိုသည်။

လက်ရှိချိန်တွင် အကြမ်းဖက် စစ်တပ်သည် အင်အား ၂၀၀ ခန့်ဖြင့် ငါန်းဇွန်မြို့နယ်အတွင်း စစ်ကြောင်းများ တပ်ဖြန့်ထားပြီး လက်နက်ကြီးများဖြင့် ရမ်းသန်းပစ်ခတ်နေ၍ စစ်ကြောင်းထိုးရာ လမ်းကြောင်းတစ်လျှောက်ရှိ ကျေးရွာများမှ ပြည်သူများ ဘေးလွတ်ရာ တိမ်းရှောင်နေကြရကြောင်း သိရသည်။

“လက်ရှိမှာလည်း စစ်ခွေးစစ်ကြောင်းက အဲဒီနားမှာပဲ ရှိနေသေးတယ်။ ခွေးအင်အားကတော့ လာတုန်းကတော့ ၂၀၀ လောက်ရှိတယ် အတိအကျတော့ မသိရဘူး။ စစ်ကြောင်းဖြန့်ပြီး သွားကြတာ သူတို့က ရုံးတွေရှိတဲ့ဘက် သူတို့အတွက် အားသာတဲ့ဘက်ကို သွားကြတာ ကားတွေ သွားလာတာမျိုးတွေလည်း ရှိတယ်” ဟု ဒေသခံပြည်သူက ဆက်လက်ပြောဆိုသည်။

အလားတူ ရခိုင်ပြည်နယ်၊ ကျောက်ဖြူမြို့နယ်ရှိ ကျေးရွာများကို အကြမ်းဖက် စစ်တပ် စစ်သင်္ဘောက လက်ကြီးများဖြင့် ပစ်ခတ်တိုက်ခိုက်ခဲ့ရာ ပြည်သူ ၁ ဦး သေဆုံးခဲ့ကာ နေအိမ်များ ထိခိုက်ပျက်စီးခဲ့ကြောင်း ဒေသပြည်သူများထံမှ သိရသည်။

ယနေ့ မေလ ၂၉ ရက်နေ့ နံနက်ပိုင်းတွင် အကြမ်းဖက် စစ်တပ်၏ တောင်မော်ဦးရေတပ်စခန်းအောက်ဘက် သံဇစ်မြစ်ကမ်းတွင်ရှိသော စစ်သင်္ဘောက ကျောက်ဖြူမြို့နယ် ကံပြင်ရွာအတွင်းကို လက်နက်ကြီးကျည် ၅ လုံးထက်မနည်း ပစ်ခတ်တိုက်ခိုက်ခဲ့ကြောင်း၊ ထိုလက်နက်ကြီးကျည်များသည် ‌ပေါက်ပြင်ကျေးရွာအတွင်းရှိ ဦးရဲထွန်းနိုင်၏ နေအိမ်ပေါ်သို့ ကျရောက် ပေါက်ကွဲခဲ့ပြီး ၎င်းနေအိမ်တွင် စစ်ဘေးတိမ်းရှောင်နေထိုင်နေသော ကိုမိုးထက်ပိုင်သည် ဘယ်ဘက်နားထင်တွင် လက်နက်ကြီးကျည်စထိမှန်ကာ သေဆုံးခဲ့ခြင်းဖြစ်ပြီး ဦးရဲထွန်းနိုင်၏ နေအိမ်အပါအဝင် ပေါက်ပြင်ကျေးရွာရှိ နေအိမ်တချို့လည်း ထိခိုက်ပျက်စီးမှုများရှိခဲ့ကြောင်း သိရသည်။

အကြမ်းဖက် စစ်တပ်သည် ကျောက်ဖြူမြို့နယ်ရှိ ပြည်သူများ နေထိုင်ရာ မြို့၊ ရွာများကို ဒရုန်း၊ လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်‌တိုက်ခိုက်မှုများကြောင့် ပြည်သူများ ထိခိုက်သေဆုံးမှုများရှိပြီး နေအိမ်များလည်း မီးလောင်ပျက်စီး ဆုံးရှုံးမှုများရှိကြောင်း သိရသည်။

ဓာတ်ပုံ – ပုလဲမြို့နယ် အတွင်းရှိ ကျေးရွာတစ်ရွာကိုစစ်တပ်က လေယာဉ်ဖြင့် ညအချိန် မီးလောင်ဗုံးကျဲချ တိုက်ခိုက်ခြင်းကြောင့် နေအိမ်များ မီးလောင်နေစဉ် (ပုံအဟောင်းဖြစ်သည်)

The post ငါန်းဇွန်နှင့် ကျောက်ဖြူမြို့နယ်ရှိ ကျေးရွာများကို စစ်တပ်က ဒရုန်း၊ လက်နက်ကြီးများဖြင့် တိုက်ခိုက်မှု ပြည်သူ ၁ ဦး သေဆုံးပြီး အမျိုးသမီးများ အပါအဝင် ၈ ဦး ထိခိုက်ဒဏ်ရာရကာ နေအိမ်များ ပျက်စီး appeared first on Khit Thit Media.

ပဲခူးတိုင်း၊ အုတ်ဖိုမြို့နယ်ရှိ ကျေးရွာများကို အကြမ်းဖက် စစ်တပ်က ၃ ရက်ဆက် လေယာဉ်ဖြင့် ဗုံးကျဲနေပြီး လက်နက်ကြီးများဖြင့်လည်း နေ့စဉ် ပစ်ခတ် တိုက်ခိုက်ခြင်းကြောင့် စာသင်ကျောင်းနှင့် နေအိမ် အများအပြားပျက်စီးခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ မေ ၂၉ ရက်နေ့ မွန်းလွဲပိုင်းတွင် အုတ်ဖိုမြို့နယ်၊ ဝင်းသရက်ရွာကို အကြမ်းဖက် စစ်တပ်က လေယာဉ်ဖြင့် ထပ်မံ ဗုံးကျဲ တိုက်ခိုက်ခဲ့ပြီး ရွာလုံးကျွတ် ထွက်ပြေးတိမ်းရှောင်နေခြင်းကြောင့် ထိခိုက်ဒဏ်ရာရရှိသူမရှိကြောင်း၊ သို့သော် ကျေးရွာအတွင်းရှိ နေအိမ်များ ပျက်စီးမှုရှိကြောင်း သိရသည်။

မေလ ၂၇ ရက်နေ့ကလည်း အုတ်ဖိုမြို့နယ်၊ ချောင်းဂွရွာသို့ လေယာဉ်ဖြင့် ဗုံး ၄ လုံး လာရောက်ကျဲချ တိုက်ခိုက်ခဲ့သောကြောင့် သရက်နှစ်ဖျားလိန်ရွာမှ ချောင်းဂွကြီးရွာသို့ မြင်း ၃ ကောင် သွားရောက်ပို့ဆောင်သည့် အသက် ၅၀ ကျော်အရွယ် ဦးဘိုလေး (ခေါ်) ဦးပေါ်လုသည် ဗုံးစထိမှန်ကာ နေရာတွင်ပင် ပွဲချင်းပြီး သေဆုံးသွားခဲ့ပြီး ၎င်းနှင့်အတူ ပါလာသည့် မြင်း ၃ ကောင်လည်း သေဆုံးသွားခဲ့သည်။ ထို့ပြင် ကျေးရွာအတွင်းရှိ စာသင်ကျောင်းနှင့် လူနေအိမ်များလည်း ပျက်စီးသွားခဲ့ကြောင်း သိရသည်။

ထို့ပြင် မေလ ၂၈ ရက်နေ့ နံနက် ၉ နာရီ ၁၀ မိနစ်ခန့်တွင်လည်း စစ်ကောင်စီတပ်က အုတ်ဖိုမြို့နယ်၊ ထန်း ပင်ကုန်းရွာကို လေယာဉ်ဖြင့် ဗုံး ၂ လုံး ထပ်မံကျဲ တိုက်ခိုက်ခဲ့၍ လူနေအိမ် ၁ လုံး ပျက်စီးခဲ့ပြီး ပြည်သူ ၁ ဦး မစိုးရိမ်ရ ဒဏ်ရာရရှိခဲ့ကြောင်း၊ မေလ ၂၃ ရက်နေ့ကလည်း အုတ်ဖိုမြို့နယ် သရက်နှစ်ဖျားလိန်ရွာရှိ စာသင်ကျောင်းကို စစ်တပ်က လေယာဉ်ဖြင့် ၆ ကြိမ်တိုင်တိုင် ဗုံးကြဲတိုက်ခိုက်မှုကြောင့် အပြင်းအထန် ပျက်စီးဆုံးရှုံးခဲ့ဖူးကြောင်း သိရသည်။

“စစ်ခွေးတွေကလည်း အုတ်ဖိုမြို့နယ်ထဲကို လေယာဉ်၊ လက်နက်ကြီးတွေနဲ့ နံနက်ပိုင်းတည်းကစပြီး ပစ်ခတ် တိုက်ခိုက်နေတာ မွန်းလွဲပိုင်းကလည်း ဝင်းသရက်ရွာကို ဗုံးကျဲ သွားတယ်။ ရွာလုံးကျွတ် တိမ်းရှောင်နေရကြတော့ ထိခိုက်တဲ့သူမရှိဘူး။ နေအိမ်တွေ ပျက်စီးတာပဲရှိတယ်” ဟု ဒေသပြည်သူတစ်ဦးက ပြောဆိုသည်။

စစ်တပ်က မြေပြင်ကလည်း စစ်ကြောင်းထိုးနေ၍ ဒေါင်းကြီးရွာ၊ ဒေါင်းလေးရွာ၊ ကျေးပင်ဆိတ်ရွာ၊ မအူတန်းရွာ၊ ဝင်းသရက်ရွာ၊ သရက်နှစ်ပင်လိမ်ရွာ၊ ကိုင်းရှိုကြီးရွာ၊ သာလိကာရွာ၊ ချောင်းခွကြီးရွာ၊ ကျွဲတဲကုန်းရွာ၊ ကြိုးကြာကွင်းရွာ၊ စမ်းကြီးကုန်းရွာ၊ စံပြရွာ၊ ထွက်တိုးရွာ၊ ရေငံရွာ၊ စမ်းသုခရွာ၊ ကိုင်းတောစုရွာ၊ ကြို့ကိုးပင်ရွာ၊ ချင်းစုရွာ၊ ကျွဲဖြူမရွာ၊ ရွာရှောင်ရွာ၊ ကိုင်းကြီးရွာ၊ ကိုင်းလေးရွာ၊ တင်းကုတ်ရွာ၊ ဥတိုရွာ၊ ရေဒါရွာနှင့် ကျေးပြတ်ရွာတို့အပါအဝင် ရွာပေါင်း ၃၀ နီးပါးမှ သောင်းနှင့်ချီသောပြည်သူများ ဘေးလွတ်ရာ ထွက်ပြေးတိမ်းရှောင်နေရပြီး စားနပ်ရိက္ခာများ အရေးပေါ် လိုအပ်နေကြောင်း သိရသည်။

လက်ရှိချိန်တွင် အကြမ်းဖက် စစ်တပ် စစ်ကြောင်းသည် ရန်ကုန်-ပြည် လမ်း အနောက်ခြမ်းရှိ ရေခင်း ၊ မိုးညို နှင့် ထိန်သေး မှ ပျူစောထီးများဖြင့် ထပ်မံ အင်အားစုဖွဲ့ပြီး ထန်းပင်ကုန်းရွာအထိ စစ်ကြောင်းထိုးရန် ပြင်ဆင်နေကြောင်း သိရသည်။

The post အုတ်ဖိုမြို့နယ်ရှိ ကျေးရွာများကို စစ်တပ်က ၃ ရက်ဆက် လေယာဉ်ဖြင့် ဗုံးကျဲနေပြီး လက်နက်ကြီးများဖြင့်လည်း နေ့စဉ် ပစ်ခတ် တိုက်ခိုက်မှု စာသင်ကျောင်းနှင့် နေအိမ် အများအပြားပျက်စီး၊ သောင်းနှင့်ချီသော ပြည်သူများ စားနပ်ရိက္ခာ အရေးပေါ်လိုအပ်နေ appeared first on Khit Thit Media.

မကွေးတိုင်း၊ ဆင်ပေါင်ဝဲမြို့နယ်တွင် အကြမ်းဖက် စစ်တပ်က ကုတင်ကြီးရွာမှ ဦးအောင်ဇော်လင်းကို ဖမ်းဆီးသတ်ဖြတ်ပြီး သားဖြစ်သူ ကိုဖြိုးဝေအောင်ကို ဖမ်းဆီးခေါ်ဆောင်သွားကာ တော်လှန်ရေးတပ်များနှင့်လည်း ထိတွေ့ တိုက်ပွဲများ ဖြစ်ပွားနေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

မေလ ၂၈ ရက်နေ့တွင် ဆင်ပေါင်ဝဲမြို့နယ်၊ ကုတင်ကြီးရွာ၊ ထင်အင်းရွာနှင့် ယင်အိုင်ရွာတို့ကို အကြမ်းဖက် စစ်တပ်က စစ်ကြောင်းထိုးဝင်ရောက်ခဲ့ကြောင်း၊ ထိုသို့ စစ်ကြောင်းထိုးဝင်ရောက်လာစဉ် ထွက်ပြေးတိမ်းရှောင်သည့် ကုတင်ကြီးရွာမှ ဦးအောင်ဇော်လင်းနှင့် သားဖြစ်သူ ကိုဖြိုးဝေအောင်တို့သည် စစ်တပ် စစ်ကြောင်းနှင့် ထိပ်တိုက်တွေ့ပြီး ဖမ်းဆီးခံခဲ့ရခြင်းဖြစ်ကြောင်း သိရသည်။

ထိုသို့ ဖမ်းဆီးခံရပြီးနောက် စစ်ကြောင်းသည် ထိန်အင်းရွာဘက်ကို ထပ်မံ စစ်ကြောင်းထိုးဝင်ရောက်လာပြီးနောက် ဖခင်ဖြစ်သူ ဦးအောင်ဇော်လင်းကို စစ်သားများက သတ်ဖြတ်ကာ သားဖြစ်သူ ကိုဖြိုးဝေအောင်ကို ဖမ်းဆီးခေါ်ဆောင်သွားကြောင်း သိရှိရသည်။

ယင်းစစ်တပ် စစ်ကြောင်း တော်လှန်ရေးတပ်ဖွဲ့များလည်း ယနေ့ မွန်းလွဲပိုင်းမှ စတင်၍ တိုက်ပွဲများဖြစ်ပြီးနေပြီး ထောင်နှင့်ချီ‌သော ပြည်သူများသည်လည်း တောတောင်များ အတွင်း ဆက်လက် စစ်ဘေးတိမ်းရှောင်နေရကြောင်း သိရသည်။

“မနေ့က နံနက် ၇ နာရီလောက်က စစ်ခွေး စစ်ကြောင်းက ကုတင်ကြီးကျေးရွာ၊ ထင်အင်းကျေးရွာနဲ့ ယင်အိုင်ကျေးရွာတွေကို စစ်ကြောင်းထိုးလာတာပါ။ စစ်ခွေးစစ်ကြောင်းထိုးလို့ ထွက်ပြေးတဲ့ သူတွေကထဲက ကုတင်ကြီးကျေးရွာသား ဦးအောင်ဇော်လင်းနဲ့ သားဖြစ်သူ ကိုဖြိုးဝေအောင်တို့က စစ်ခွေးတွေ ထိပ်တိုက်တွေ့ပြီး ဖမ်းဆီးခံရတာ ထိန်အင်းရွာဘက်ကို စစ်ကြောင်း ဆက်ထိုးသွားပါတယ်။ ဒီနေ့ကြားသိရတာက ဖခင်ဖြစ်သူ ဦးအောင်ဇော်လင်းက စစ်​ခွေးတွေ သတ်လိုက်ပြီးလို့ သိရပါတယ်။ ဒီနေ့ မွန်းလွဲပိုင်းမှာလည်း ပစ်ခတ်သံတွေ ကြားနေရပါတယ်။ တိုက်ပွဲဖြစ်နေပါတယ်။ မနေ့ကတည်းက ယနေ့ အထိရွာသားတွေ တောထဲရှောင်နေကြရပါတယ်” ဟု ဒေသပြည်သူတစ်ဦးက ပြောဆိုသည်။

ဓာတ်ပုံ- အကြမ်းဖက်စစ်တပ်က စစ်အာဏာသိမ်းဆန့်ကျင်ရေး ဆန္ဒပြလူငယ်များကို အကြမ်းဖက် ဖမ်းဆီးခဲ့စဉ်။(ပုံအဟောင်းကို အသုံးပြုထားပါသည်။)

The post ဆင်ပေါင်ဝဲတွင် စစ်တပ်က ကုတင်ကြီးရွာမှ ဦးအောင်ဇော်လင်းကို ဖမ်းဆီးသတ်ဖြတ်ပြီး သားဖြစ်သူ ကိုဖြိုးဝေအောင်ကို ဖမ်းဆီးခေါ်ဆောင်သွား၊ တော်လှန်ရေးတပ်များနှင့်လည်း ထိတွေ့ တိုက်ပွဲများ ဖြစ်ပွားနေ appeared first on Khit Thit Media.

အကြမ်းဖက် မင်းအောင်လှိုင်၏ အိန္ဒိယခရီးစဉ်ကို ဖျက်သိမ်းရန် အရပ်ဘက်အဖွဲ့ ၁၂၂ ခုက အိန္ဒိယဝန်ကြီးချုပ်ထံသို့ ယမန်နေ့ မေလ ၂၈ ရက်နေ့တွင် အိတ်ဖွင့်ပေးစာပေးပို့ တောင်းဆိုလိုက်သည်။

မြန်မာ အကြမ်းဖက် စစ်ခေါင်းဆောင် မင်းအောင်လှိုင်၏ မေလ ၃၀ ရက်နေ့မှ ဇွန်လ ၃ ရက်နေ့ အထိ အိန္ဒိယနိုင်ငံသို့ လာရောက်မည့် ခရီးစဉ်ကို ချက်ချင်းဖျက်သိမ်းပေးရန်၊ မြန်မာပြည်သူများနှင့်အတူ ရပ်တည်လျက် သံတမန်ရေးရာဆက်ဆံမှုများကို ပြန်လည်သုံးသပ်ပေးရန် မြန်မာ့အရေးလှုပ်ရှားနေသည့် အရပ်ဘက်အဖွဲ့အစည်း၊ လူသားချင်းစာနာထောက်ထားမှုဆိုင်ရာ ကွန်ရက်နှင့် တိုင်းရင်းသားလူမျိုးစုအခြေပြုအဖွဲ့အစည်း စုစု ပေါင်း ၁၂၂ ဖွဲ့က အိန္ဒိယဝန်ကြီးချုပ် ရှရီ နာရင်ဒရာ မိုဒီ (Shri Narendra Modi) ထံသို့ မေလ ၂၈ ရက်နေ့စွဲဖြင့် အိတ်ဖွင့်ပေးစာပေးပို့ကာ ပြင်းပြင်းထန်ထန် ကန့်ကွက်တောင်းဆိုလိုက်ကြခြင်းဖြစ်သည်။

မြန်မာနိုင်ငံတွင်း စစ်အာဏာသိမ်းရန် ကြိုးပမ်းမှုနောက်ပိုင်း ဖြစ်ပေါ်လာသည့် မတည်ငြိမ်မှုများကြောင့် အိမ်နီးချင်း အိန္ဒိယနိုင်ငံအနေဖြင့် နယ်စပ်ဖြတ်ကျော် ဆိုးကျိုးများကို လက်တွေ့ခံစားနေရကြောင်း အိတ်ဖွင့်ပေးစာတွင် ထည့်သွင်းဖော်ပြထားသည်။

မင်းအောင်လှိုင် ဦးဆောင်သည့် စစ်အုပ်စုအောက်တွင် တရားဥပဒေစိုးမိုးမှုများ ပျက်ပြားလာခြင်းကြောင့်တရားမဝင် မူးယစ်ဆေးဝါးများ အစုအပြုံလိုက် ဝင်ရောက်လာခြင်း၊ ထိန်းချုပ်ထားနိုင်ခြင်းမရှိသည့် နယ်စပ်ဖြတ်ကျော် မှောင်ခိုကူးမှုများ ဖြစ်ပွားနေခြင်း၊ သောင်းနှင့်ချီသည့် မြန်မာစစ်ဘေးဒုက္ခသည်များ အိန္ဒိယနိုင်ငံဘက်သို့ ထွက် ပြေးခိုလှုံနေရခြင်း၊ အိန္ဒိယနိုင်ငံသားအများအပြား မြန်မာနိုင်ငံအတွင်းရှိ အွန်လိုင်းငွေလိမ်ဂိုဏ်း (Cyber-scam) များတွင် ပိတ်မိဖမ်းဆီးခံနေရခြင်း စသည့် နောက်ဆက်တွဲဆိုးကျိုးများကို အိန္ဒိယနိုင်ငံအနေဖြင့် ခံစားနေရကြောင်း ထောက်ပြထားသည်။

ထို့ပြင် လက်ရှိစစ်အုပ်စုက ဒီမိုကရေစီနည်းကျ အုပ်ချုပ်မှုကို ဖျက်ဆီးပြီး ကမ္ဘာ့တည်ငြိမ်မှုကို ပျက်ပြားစေမည့် အင်အားစုများနှင့် မဟာမိတ်ဖွဲ့နေခြင်းကြောင့် ဒေသတွင်းလုံခြုံရေးကို ပြင်းထန်စွာ ခြိမ်းခြောက်နေကြောင်း၊ ယင်းအချက်ကို မေလ ၂၆ ရက်နေ့က ထွက်ပေါ်ခဲ့သည့် ကွတ် (QUAD) နိုင်ငံများ၏ ပူးတွဲကြေညာချက်တွင်လည်း မြန်မာ့အရေးသည် နယ်စပ်ဖြတ်ကျော် ရာဇဝတ်မှုနှင့် အွန်လိုင်းငွေလိမ်ဂိုဏ်းလုပ်ငန်းများအပေါ် ရိုက်ခတ်မှုရှိနေကြောင်း ထည့်သွင်းအသိအမှတ်ပြုထားပြီးဖြစ်ကြောင်း ဖော်ပြထားသည်။

မြန်မာပြည်သူများ အတိဒုက္ခကြုံတွေ့နေရသည့် အချိန်အခါတွင် မင်းအောင်လှိုင်ကို အိန္ဒိယနိုင်ငံက ဧည့်သည်တော်အဖြစ် လက်ခံတွေ့ဆုံရန် ပြင်ဆင်နေခြင်းအပေါ် အလွန်အမင်း စိတ်ပျက်တုန်လှုပ်မိကြောင်း အရပ်ဘက်အဖွဲ့များက ဆိုသည်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ဒီမိုကရေစီနည်းကျ ရွေးကောက်ခံခေါင်းဆောင်များနှင့် တက်ကြွလှုပ်ရှားသူ ၂၂,၀၀၀ ကျော်ကို မတရားဖမ်းဆီးထားပြီး လူ့အခွင့်အရေးချိုးဖောက်မှုများ စနစ် တကျကျူးလွန်နေသည့် စစ်ခေါင်းဆောင်ကို တရားဝင်လက်ခံတွေ့ဆုံခြင်းသည် တရားမဝင်စစ်အုပ်စုအား သံတမန်ရေးအရ တရားဝင်မှုပေးရာ ရောက်သွားလိမ့်မည်ဟု သတိပေးထားသည်။

မြန်မာနိုင်ငံ၏ ပဋိပက္ခနှင့် အကျပ်အတည်းများကို ရေရှည်တည်တံ့စွာ ဖြေရှင်းနိုင်မည့် နည်းလမ်းမှာ စစ်အုပ်စုအနေဖြင့် အကြမ်းဖက်မှုအားလုံးကို ချက်ချင်းရပ်တန့်ရန်၊ ပြည်သူများ၏ ဒီမိုကရေစီဆန္ဒကို လေးစားလိုက်နာရန်၊ ပြည်သူများအပေါ် ကျူးလွန်ခဲ့သည့် ရာဇဝတ်မှုများအတွက် တာဝန်ခံမှုရှိစေရန် ဖိအားပေးခြင်းဖြင့်သာ ရရှိနိုင်မည်ဖြစ်ကြောင်း ထည့်သွင်းဆွေးနွေးထားသည်။

မြန်မာနိုင်ငံ၏ မတည်ငြိမ်မှုများသည် အိန္ဒိယနိုင်ငံ၏ နယ်စပ်လုံခြုံရေး၊ ဘင်္ဂလားပင်လယ်အော် တည်ငြိမ်ရေး၊ အရှေ့မျှော်မူဝါဒ (Act East Policy)၊ ကုလားတန်ဘက်စုံစီမံကိန်း (Kaladan Project) နှင့် အင်ဒို-ပစိဖိတ်ဆိုင်ရာ မဟာဗျူဟာမြောက် အကျိုးစီးပွားများကိုပါ တိုက်ရိုက်ခြိမ်းခြောက်နေခြင်းကြောင့် စစ်ခေါင်းဆောင်၏ ခရီးစဉ်ကို ဖျက်သိမ်းပေးရန် အိန္ဒိယအစိုးရကို အလေးအနက် တောင်းဆိုထားသည်။

ထို့ပြင် ဖက်ဒရယ်ဒီမိုကရေစီ၊ ငြိမ်းချမ်းရေးနှင့် တည်ငြိမ်မှုရရှိအောင် ကြိုးပမ်းနေသည့် မြန်မာပြည်သူများဘက်မှ အိန္ဒိယနိုင်ငံအနေဖြင့် ခိုင်ခိုင်မာမာ ရပ်တည်ပေးပါရန် တိုက်တွန်းထားသည်။

အဆိုပါ ကန့်ကွက်လွှာကို “People Movement Platform Myanmar” က ဦးဆောင်ကာ A New Burma၊ အသံ (Athan)၊ Chin Defence Force (Mindat) အပါ အဝင် ပြည်တွင်းပြည်ပ အရပ်ဘက်အဖွဲ့အစည်းပေါင်း ၁၂၂ ခုက လက်မှတ်ရေးထိုးတောင်းဆိုထားကြခြင်းဖြစ်သည်

The post အကြမ်းဖက် မင်းအောင်လှိုင်၏ အိန္ဒိယခရီးစဉ်ကို ဖျက်သိမ်းရန် အရပ်ဘက်အဖွဲ့ ၁၂၂ ခုက အိန္ဒိယဝန်ကြီးချုပ်ထံသို့ စာပေးပို့ တောင်းဆို appeared first on Khit Thit Media.

မကွေးတိုင်း၊ ကျောက်ထုမြို့နယ်မြေအတွင်းရှိ ကျေးရွာများကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံး ၃၆ လုံးဖြင့် ဗုံးကျဲတိုက်ခိုက်မှုများ ပြုလုပ်ခဲ့ကြောင်း ယောအလင်းတန်းအဖွဲ့မှ တာဝန်ရှိသူတစ်ဦး၏ ပြောပြချက်အရ သိရသည်။

ယမန်နေ့ မေလ ၂၈ ရက်နေ့ ည ၁၁ နာရီဝန်းကျင်အချိန် နေပြည်တော် အေလာလေတပ်မှ တက်လာသော ဂျက်ဖိုက်တာ ၁ စီး၊ မန္တလေး တံတားဦးလေတပ်မှ တက်လာသော ဂျက်ဖိုက်တာ ၂ စီးနှင့် Y-12 လေယာဉ် ၁ စီးတို့ဖြင့် ကျောက်ထုမြို့နယ်အတွင်းရှိ ကျေးရွာများကို အကြောင်းမဲ့ ဗုံးကျဲတိုက်ခိုက်ခဲ့ခြင်းဖြစ်သည်။

အဆိုပါ လေကြောင်းတိုက်ခိုက်မှုကြောင့် ဒေသခံပြည်သူများ ထိခိုက်ဒဏ်ရာရရှိမှုနှင့် နေအိမ်များ ပျက်စီးဆုံးရှုံးမှု အခြေအနေကိုမူ လတ်တလောတွင် အတည်မပြုနိုင်သေးဘဲ ဆက်လက်စုံစမ်းနေဆဲဖြစ်သည်။

ယောအလင်းတန်းအဖွဲ့မှ တာဝန်ရှိသူက “စစ်ခွေးတွေက တိုက်ပွဲဖြစ်ပွားခြင်းမရှိဘဲ လေကြောင်းတိုက်ခဲ့တာပါ။ ပြည်သူတွေ ထိခိုက်ဒဏ်ရာရတာမျိုးနှင့် နေအိမ် ပျက်စီးတာမျိုးကို ကျွန်တော် ဆက်လက်စုံစမ်းနေဆဲပါ။ ဖိုက်တာ ၁ စီးကို ဗုံး ၂ လုံးကျဲတာပါ။ ဖိုက်တာ ၃စီးဆိုတော့ ဗုံး ၆လုံးပါ။ Y12 က ၆ကြိမ် ပတ်ပြီးတော့ ကျဲသွားတာပါ။ တစ်ကြိမ်ကို ဗုံး ၅လုံးကျဲသွားတာပါ။ အားလုံးပေါင်း အလုံးရေ ဗုံးအလုံးရေ ၃၀ ပါ။ Y12က ကျဲတာက ၃၀ ပါ။ ဖိုက်တာ ၃စီးက ဗုံး ၆ လုံးပါ။ စုစုပေါင်းဗုံး ၃၆လုံးကျဲသွားတာ။ ဆော-ကျောက်ထု-ပေါက် လမ်းပိုင်းကရွာတွေကို ပစ်မှတ်ထားနေတာ စစ်တပ်က “ဟု ရှင်းပြသည်။

ယခုကဲ့သို့ လေကြောင်းမှတစ်ဆင့် အဆမတန် ဗုံးကျဲတိုက်ခိုက်မှုများကြောင့် ဆော – ကျောက်ထု – ပေါက် လမ်းပိုင်းတွင်ရှိသည့် ကျေးရွာများအားလုံးနီးပါးမှ ဒေသခံပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။

ကျောက်ထုမြို့နယ်အတွင်း စစ်ကောင်စီတပ်၏ အကြောင်းမဲ့ လေကြောင်းတိုက်ခိုက်လျက်ရှိပြီး မေလ ၄ ရက်နေ့ကလည်း တံတားဦးလေတပ်မှ တက်လာသော Y-12 လေယာဉ် ၁ စီးက တိုက်ပွဲဖြစ်ပွားခြင်းမရှိဘဲ ၈ ကြိမ်တိုင်တိုင် ဗုံး ၃၄ လုံး လာရောက်ကျဲချ တိုက်ခိုက်ခဲ့သည်။

The post ကျောက်ထုမြို့နယ်အတွင်းရှိ ကျေးရွာများကို စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းမှ ဆက်တိုက်ဗုံးကျဲ appeared first on Khit Thit Media.

မကွေးတိုင်း၊ မင်းဘူးမြို့နယ်အတွင်း စစ်ကောင်စီ၏ ထောက်ပို့စစ်ကားတစ်စီးကို ပြည်သူ့ကာကွယ်ရေးအဖွဲ့ (ပကဖ) နှင့် ပူးပေါင်းတပ်ဖွဲ့များက မိုင်းဆွဲတိုက် ခိုက်ခဲ့ရာ စစ်ကောင်စီတပ်ဖွဲ့ဝင် ၆ ဦး သေဆုံးပြီး ၃ ဦးကို အရှင်ဖမ်းဆီးရမိကာ လက်နက်ခဲယမ်းများနှင့်အတူ ၁၂၂ မမ MLRS ရော့ကတ်များကိုပါ သိမ်းဆည်းရရှိခဲ့ကြောင်း အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနက သတင်းထုတ်ပြန်သည်။

မေလ ၂၈ ရက်နေ့ မင်းဘူးမြို့နယ်၊ မင်းဘူး-အမ်း လမ်းပိုင်းပေါ်၌ မောင်းနှင်လာသော စစ်ကောင်စီ၏ ထောက်ပို့ကားတစ်စီးကို မင်းဘူးမြို့နယ် ပကဖ၊ CDF-Asho၊ NSA လူ့ဘောင်သစ်တပ်မတော်တို့က မိုင်းဆွဲတိုက်ခိုက်ခဲ့ခြင်းဖြစ်သည်။ မိုင်းဆွဲတိုက်ခိုက်မှုပြုလုပ်ပြီးနောက် နှစ်ဖက်အကြား မိနစ် ၂၀ ကြာ ထိတွေ့ပစ်ခတ်မှု ဆက်လက်ဖြစ်ပွားခဲ့သည်။

အဆိုပါ တိုက်ခိုက်မှုနှင့် ထိတွေ့ပစ်ခတ်မှုအတွင်း စစ်ကောင်စီတပ်ထံမှ လက် နက် ခဲယမ်းများနှင့် စစ်အသုံးအဆောင်ပစ္စည်းများကို သိမ်းဆည်းရမိခဲ့ရာတွင် အူဇီ (Uzi) သေနတ် ၃ လက်၊ MA-1 သေနတ် ၂ လက်၊ MA-2 သေနတ် ၁ လက်၊ ၅.၅၆ မမ ကျည် လက်ဆွဲဘောက် ၁ လုံး၊ ၁၂၂ မမ MLRS ရော့ကတ် ပို့ယမ်းသေတ္တာ ၆ လုံး၊၁၂၂ မမ MLRS ရော့ကတ် ၂၈ လုံး သိမ်းဆည်းရရှိခဲ့ကြောင်း သိရှိရသည်။

ယခုတိုက်ခိုက်မှုသည် စစ်တပ်က စိုးမိုးထားသည့် နယ်မြေအတွင်းရှိ စစ်ကောင်စီတပ်စခန်းများနှင့် အနီးကပ်ဆုံးနေရာတွင် သွားရောက်လုပ်ဆောင်ခဲ့ခြင်းဖြစ်ပြီး ပြည်သူ့ကာကွယ်ရေးအဖွဲ့ (ပကဖ) နှင့် မဟာမိတ်ပူးပေါင်းတပ်ဖွဲ့များ၏ မြေပြင်တိုက်ခိုက်ရေးစွမ်းရည်ကို ထင်ရှားစွာပြသနိုင်ခဲ့ခြင်းဖြစ်ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏ ထုတ်ပြန်ချက်အရ သိရှိရသည်။

The post မင်းဘူးမြို့နယ်၊ မင်းဘူး-အမ်းလမ်းတွင် စစ်တပ်ထောက်ပို့ကားကို မိုင်းဆွဲတိုက်ခိုက်မှု စစ်သား ၆ ဦးသေဆုံးပြီး ၃ ဦးအရှင်ဖမ်းမိ၊ လက်နက်ခဲယမ်းများနှင့် ၁၂၂ မမ MLRS ရော့ကတ်များပါ သိမ်းဆည်းရရှိ appeared first on Khit Thit Media.

စစ်ကိုင်းတိုင်း၊ အင်းတော်မြို့နယ်၊ မော်လူးမြို့သို့ စစ်ကူပေးရန်တက်လာသည့် စစ်ကြောင်းများကို ကြားဖြတ်တိုက်ခိုက်ခဲ့ရာ စစ်သား ၁၅ ဦးထက်မနည်းသေဆုံးပြီး ကား ၃ စီး မီးလောင်ပျက်စီးကာ လက်နက်ခဲယမ်းများလည်း သိမ်းဆည်းရရှိခဲ့ကြောင်း တော်လှန်ရေးစစ်ရေးသတင်းရင်းမြစ်က ရန်ကုန် ခေတ်သစ်သတင်းဌာနထံသို့ ပြောကြားသည်။

မေလ ၂၇ ရက်နေ့မှစ၍ အင်းတော်မြို့ဘက်မှ မော်လူးမြို့ဘက်သို့ စစ်ကူပေးရန် တက်လာသော စစ်ကြောင်းများကို မော်လူးမြို့အထွက် စီပိန်းရွာအနီးတွင် လည်းကောင်း၊ နဘားလမ်းဆုံအနီးတွင် လည်းကောင်း KIA နှင့်တော်လှန်ရေးပူးပေါင်းတပ်ဖွဲ့များကကြားဖြတ်တိုက်ခိုက်လျက်ရှိရာ တိုက်ပွဲ များပြင်းထန်နေပြီး စစ်ကောင်စီတပ်ဘက်ကလည်း ဂျက်ဖိုက်တာ ၃ စင်းဖြင့် ဗုံးကျဲတိုက်ခိုက်နေ ကြောင်း သိရသည်။

ထိုသို့ တိုက်ပွဲများအတွင်း မော်လူးမြို့အထွက် စီပိန်းရွာအနီးတိုက်ပွဲတွင် စစ်သား ၁၅ ဦးထက်မနည်း သေဆုံးပြီး စစ်ကား ၃ စီးမီးလောင်ပျက်စီးကာ လက်နက်ခဲယမ်းများလည်း သိမ်းဆည်းရရှိထား ကြောင်း သိရသည်။

“ဒီနေ့ရောဆိုရင် ၃ ရက်ရှိပြီ တိုက်ပွဲပြင်းထန်နေတာ၊ အင်းတော်ဘက်ကနေ မော်လူးမြို့ထဲကို စစ်ကူ ပေးဖို့ တက်လာတဲ့ စခတွေကို ဆော်နေတာ၊ စီပိန်းဘက်မှာတစ်ပွဲဖြစ်တယ်။ နဘားလမ်းဆုံဘက်မှာ လည်း တစ်ပွဲဖြစ်တယ်။ စီပိန်းဘက်မှာက အရင်နေ့တွေက လက်နက်တွေလည်းရတယ်။ ကား ၃ စီး လည်းမီးလောင်တယ်။ အသေ ၁၅ ယောက်ရထားတယ်လို့ သိရတယ်။ဒီနေ့တော့ အသေ၊ အရှင် မရ သေးဘူးလို့ သိရတယ်။” ဟု တော်လှန်ရေးစစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံ သို့ ပြောကြားသည်။

မော်လူးမြို့အတွင်းသို့ ရောက်ရှိနေသော စစ်ကောင်စီတပ်သားများကိုလည်း KIA နှင့်တော်လှန်ရေး ပူးပေါင်းတပ်ဖွဲ့များ တိုက်ခိုက်ချေမှုန်းလျက်ရှိရာ ငတ်ပြတ်နေသော စစ်သားများက ပြည်သူများ၏ ကုန်စုံဆိုင်များ၊ နေအိမ်များကို ဖောက်ထွင်းခိုးယူလျက်ရှိကြောင်း သိရသည်။

“မော်လူးမြို့က အကုန်မသိမ်းမိသေးဘူး။ မြို့ထဲတော့ ပြန်ဝင်နိုင်ပါပြီ၊ စစ်တပ်ဘက်က အရပ်သား ကားတွေနဲ့ စစ်ကူအင်အား တောက်လျှောက်ပို့နေတာပါ၊ စစ်ကားက နည်းနည်းပဲပါတယ်။ အရပ်သား ကားတွေများတာ။ လေကြောင်းကနေ တိုက်ခိုက်လို့ အရပ်သား ၂ ဦးသေဆုံးထားတာရှိတယ်။ ကျ နော်တို့ တော်လှန်ရေးဘက်က ရဲဘော် တွေဘေးကင်းပါတယ်” ဟုတော်လှန်ရေးစစ်ရေးသတင်းရင်း မြစ်က ပြောဆိုသည်။

အကြမ်းဖက်စစ်တပ်နှင့် တော်လှန်ရေးတပ်များအကြား ကသာ၊ အင်းတော်ကြီး၊ မော်လူး၊ ဗန်းမော်၊ အင်းတော် အပါအဝင် စစ်ကိုင်းနှင့်ကချင်ပြည်နယ်အစပ်များတွင် တောက်လျှောက် တိုက်ပွဲများဖြစ်ပွားလျက်ရှိကြောင်း တော်လှန်ရေး သတင်းရင်းမြစ်ထံမှ သိရှိရသည်။

ဓာတ်ပုံ- ယခု မေလ ဒုတိယအပတ်အတွင်း ထီးချိုင့်-ကသာလမ်းတွင စစ်တပ်စစ်ကြောင်းကို ကြားဖြတ်တိုက်ခိုက်စဉ် စစ်ကား ၁ စီး မီးလောင်နေစဉ်။ (ပုံအဟောင်းကို အသုံးပြုထားပါသည်။)

The post မော်လူးမြို့သို့ စစ်ကူလာသည့် စစ်တပ်စစ်ကြောင်းများကို ကြားဖြတ်တိုက်ခိုက်မှု စစ်တပ်ဘက်မှ သေဆုံးမှုများ​ပြားပြီး စစ်ကားတချို့ကို ဖျက်ဆီးနိုင်ခဲ့ appeared first on Khit Thit Media.

ပဲခူးတိုင်း၊ နတ်တလင်းမြို့နယ်အတွင်းရှိ စစ်ကောင်စီတပ်ဖွဲ့ဝင်များနှင့် ပြည်သူ့ စစ်ခေါင်းဆောင် အောင် တင်ဝင်းတို့အဖွဲ့သည် ဒေသခံပြည်သူများကို အကြောင်း အမျိုးမျိုးပြ ဖမ်းဆီးပြီး ငွေကြေးအမြောက်အမြား အတင်းအဓမ္မ တောင်းခံငွေညှစ်မှုများ ဆက်တိုက်ပြုလုပ်နေကြောင်း ဒေသပြည်သူများထံမှ သတင်းရရှိသည်။

မေလ ၂၇ ရက်နေ့ နတ်တလင်းမြို့နယ် ပျူစောထီး(ခ) ပြည်သူ့စစ်ခေါင်းဆောင် အောင်တင်ဝင်းနှင့်အဖွဲ့သည် ဆိုင်ကယ် ၁၀ စီးဖြင့် တောင်ညို့မြို့သစ်အတွင်းသို့ လှည့်ကင်းလှည့်သည်ဟုဆိုကာ ရောက်ရှိလာပြီးနောက်၊ လယ်ယာလုပ် ငန်းခွင်မှ ပြန်လာသည့် အောင်သာယာ ၄ လမ်းတွင် နေထိုင်သူ ကိုဝင်းမြင့် နှင့် အောင် သာယာ ၁၁ လမ်းတွင် နေထိုင်သူ ကိုကံအေး ၂ ဦးကို ဖမ်းဆီးခဲ့ကြကြောင်း၊ ၎င်းနောက် နတ်တလင်းမြို့နယ်၊ သိမ်ကုန်းကျေးရွာရှိ စစ်တပ်အခြေ စိုက်စခန်းသို့ ဖမ်းဆီးခေါ်ဆောင်သွားခဲ့ကြောင်း သိရှိရသင်္ည။

ယင်းသို့ ပြည်သူ ၂ ဦးကို သိမ်ကုန်းစခန်းသို့ ဖမ်းဆီးခေါ်ဆောင်သွားပြီးနောက် စစ်ကောင်စီတပ်မှ ဗိုလ်မှူး အောင်မျိုးသန့်နှင့် ပြည်သူ့စစ်ခေါင်းဆောင် အောင်တင်ဝင်းတို့ ချိတ်ဆက်ကာ ငွေညှစ်မှုများကို ပြုလုပ်ခဲ့ကြောင်း၊ ဖမ်းဆီးခံထားရသော ကိုကံအေးထံမှ ငွေကျပ် သိန်း ၇၀ ကျပ် တိတိ တောင်းကာ ညတွင်းချင်းပင် ပြန်လည်လွှတ်ပေးခဲ့ကြောင်း သိရှိရသည်။

ယင်းနောက် ဖမ်းဆီးထားသော စစ်တပ်ဘက်တော်သား ကိုဝင်းမြင့်ကိုလည်း ငွေကျပ် သိန်း ၄၀ ပေးဆောင်မှသာ ပြန်လွှတ်ပေးမည်ဟု စစ်တပ်က တောင်းခံခဲ့ကြောင်း၊ ယင်းသို့ တောင်းခံနေစဉ် ဒေသကွပ်ကဲမှုစစ်ဌာနချုပ် – ဒကစ (ပြည်) သို့ သတင်းပေါက်ကြားသွားခဲ့သဖြင့် စစ်တပ်ဘက်တော်သား ကိုဝင်းမြင့်ကို ပြန်လွှတ်ပေးခဲ့ရကြောင်း၊ သို့ရာတွင် လက်ရှိအချိန်အထိ ဖုန်းဆက်ကာ ငွေကြေးများ စစ်တပ်က် ဆက်တိုက်ထပ်မံ တောင်းခံလျက်ရှိကြောင်း သိရှိရသည်။

ထို့ပြင် မေလ ၂၈ ရက်နေ့တွင်လည်း နတ်တလင်းမြို့နယ်၊ သခွပ်ကုန်းကျေးရွာတွင် နေထိုင်သည့် ကိုမြင့်နိုင် ဆိုသူကို PDF အဖွဲ့နှင့် အဆက်အသွယ်ရှိသည်ဟု စွပ်စွဲကာ စစ်တပ်က ဖမ်းဆီးခဲ့ပြီး၊ ခံဝန်လက်မှတ်ရေးထိုးခိုင်းကာ ငွေကျပ် ၃၅ သိန်းတိတိကို ထပ်မံတောင်းခံ ပြန်လွှတ်ပေးခဲ့ကြောင်း သိရှိရသည်။

လက်ရှိတွင် နတ်တလင်းမြို့နယ် လုံခြုံရေးအအတွက် တပ်မ ၆၆ ဒုတပ်မမှူး ဗိုလ်မှူးကြီး နေထူးလှိုင်က တာဝန်ယူထားပြီး စစ်တပ်လက်အောက်ခံ ဗိုလ်မှူး အောင်မျိုးသန့်နှင့် ပြည် သူ့စစ်ခေါင်းဆောင် အောင်တင်ဝင်းတို့၏ ပြည်သူများအပေါ် မတရားဖမ်းဆီး ငွေညှစ်နေသည့် လုပ်ရပ်များကို တစ်စုံတစ်ရာ အရေးယူခြင်းမရှိဘဲ တမင် မသိကျိုးကျွံပြုကာ လွှတ်ထားပေးကြောင်း သိရှိရသည်။

အလားတူ ကချင်ပြည်နယ်၊ မိုးညှင်းမြို့ နောင်စွန်းရပ်ကွက်တွင် နေထိုင်သော အသက် ၁၄ နှစ်အရွယ် မောင်ထက်ဇေယျာမင်း ပျောက်ဆုံးနေပြီး အဆက် အသွယ်ပြတ်တောက်နေကြောင်း မိသားစုဝင်များက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယမန်နေ့ မေလ ၂၈ ရက်နေ့ နံနက် ၉ နာရီခန့်တွင် မိုးညှင်းမြို့ နောင်စွန်းရပ် ကွက်၌ နေထိုင်သော အ သက် ၁၄ နှစ်အရွယ် မောင်ထက်ဇေယျာမင်းသည် နေအိမ်အပြင် ထွက်ခွာလာစဉ် သူငယ်ချင်းဖြစ်သူက ဆိုင်ကယ်ဖြင့် လာရောက်ခေါ်ဆောင်သွားပြီးနောက် လက်ရှိချိန်ထိ အဆက်သွယ်မရဘဲ ပျောက် ဆုံးနေခြင်း ဖြစ်ကြောင်း သိရှိရသည်။

ထိုသို့ နာရီပေါင်းများစွာ ပျောက်ဆုံးနေပြီး အိမ်သို့ ပြန်ရောက်လာခြင်းမရှိကြောင့် မိသားစုဝင်များက အသက်အန္တရာယ်နှင့် ပေါ်တာဆွဲဖမ်းဆီးခံရမည်ကို အထူးစိုးရိမ်ပူပန်နေကြပြီး မိုးညှင်းမြို့နေ ပြည်သူများအနေဖြင့် အပြာရောင် အကျီ ဝတ်ဆင်ထားသော အသက် ၁၄ နှစ်အရွယ် မောင်ထက်ဇေယျာမင်းကိုတွေ့ရှိပါက မိသားစုထံသို့ အမြန်ဆုံး ဆက်သွယ်အကြောင်းကြားပေးရန် မေတ္တာ ရပ်ခံထားကြောင်း သိရသည်။

“မောင်ထက်ဇေယျာမင်း ပျောက်ဆုံးနေတာ ဟုတ်ပါတယ်။ ဘာသတင်းမှ မရသေးပါဘူး” ဟု မိသား စုဝင် တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုခဲ့သည်။

မိုးညှင်းမြို့နယ်တွင်လည်း စစ်တပ်နှင့်ပြည်သူ့စစ်များက လူငယ်များကို ပေါ်တာဆွဲ ဖမ်းဆီးမှုများ မကြာခဏဆိုသလို ဖြစ်ပွားလျက်ရှိကြောင်း ၊ လူငယ်များ မကြာခဏဆိုသလို ပျောက်ဆုံးမှုများလည်း ဖြစ်ပေါ်နေကြောင်း ဒေသပြည်သူများက ပြောဆိုကြသည်။

ဓာတ်ပုံ- မိုးညှင်းတွင် ပျောက်ဆုံးနေသော အသက် ၁၄ နှစ်အရွယ် မောင်ထက်ဇေယျာမင်း။

The post နတ်တလင်းတွင် ပျူစောထီးခေါင်းဆောင် အောင်တင်ဝင်းနှင့် စစ်အရာရှိများ ပူးပေါင်းကာ ပြည်သူများကို ဖမ်း ဆီးငွေညှစ်နေ၊ မိုးညှင်းတွင်လည်း အသက် ၁၄ နှစ်အရွယ် မောင်ထက်ဇေယျာမင်း ပျောက်ဆုံးနေ appeared first on Khit Thit Media.

တနင်္သာရီတိုင်း၊ လောင်းလုံးမြို့နယ်တွင်လည်း အကြမ်းဖက် စစ်တပ်က ကဒက်ကြီးရွာကို မီးရှို့ပြီး ကျေးရွာများကို ဆက်တိုက် စစ်ကြောင်းထိုးနေကာ ထားဝယ်နှင့် သရက်ချောင်းတွင်လည်း စစ်ကြောင်းများ ဝင်ရောက်လာ၍ ရွာလုံးကျွတ် တိမ်းရှောင်နေရကြောင်း ဒေသစစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

မေလ ၂၂ ရက်နေ့ နံနက် အစောပိုင်း ၃ နာရီခန့်မှ စတင်ပြီး လောင်းလုံးမြို့ပေါ်မှ ထွက်လာသော အကြမ်းဖက် စစ်တပ် စစ်ကြောင်းသည် မြို့အနီးရှိ ညင်းမော်ရွာ၊ ရင်းဘုတ်ရွာနှင့် စစ်ပြဲရွာများကို စတင် စစ်ကြောင်းထိုး ဝင်ရောက်လာပြီးနောက် မေလ ၂၇ ရက်နေ့တွင် ထို စစ်ကြောင်းသည် ကဒက်ကြီးရွာ အနီးရောက်ရှိလာခဲ့ကြောင်း၊ ထို့နောက် မေလ ၂၈ ရက်နေ့တွင် ကဒက်ကြီးကျေးရွာမှ နေအိမ် ၆ လုံးကိုမီးရှို့ဖျက်ဆီးခဲ့ကြောင်း သိရသည်။

ထို အကြမ်းဖက် စစ်တပ် စစ်ကြောင်းသည် ၎င်းတို့ စစ်ကြောင်းထိုးရာ လမ်းတောက်လျောက်ရှိ ပြည်သူ ၂၀ ဦးကိုလည်း လူသားဒိုင်းအဖြစ် ဖမ်းဆီးသွားပြီး လက်ရှိချိန်တွင် အကြမ်းဖက် စစ်တပ် စစ်ကြောင်းကြောင့် စစ်ပြဲကျေးရွာ၊ ညင်းမော်ကျးရွာ၊ ဂေါ့အင်းကျေးရွာ၊ ရေဖြူကျေးရွာ ၊ ဝံတွင်းကျးရွာ၊ သင်္ကန်းတော၊ ပိန္နဲတောကျေးရွာ၊ ကျောက်ဖြူကျေးရွာ၊ ကဒက်ကြီးရွာ၊ ဟင်းချိုတောရွာနှင့် သပြေရှောင်ရွာ တို့မှ သောင်းနှင့်ချီသော ပြည်သူများ ရွာလုံးကျွတ် ဘေးလွတ်ရာ ထွက်ပြေး တိမ်းရှောင်နေရကြောင်း သိရှိရသည်။

အလားတူ ထားဝယ်အထူးစီးပွားရေးဇုန်တွင် တပ်စွဲထားသော အင်အား ၁၂၀ ခန့်ပါ အကြမ်းဖက် စစ်တပ် စစ်ကြောင်းကလည်း နဘူလယ်တိုက်နယ်ဘက်ရှိ လဲရှောင်ကျေးရွာအတွင်းကို စစ်ကြောင်းထိုး ဝင်ရောက်စီးနင်းခဲ့ကြောင်း၊ ထို စစ်ကြောင်းဝင်ရောက်စီးနင်းမှုကြောင့် လဲရှောင်ကျေးရွာ၊ ထိန်ကြီးကျေးရွာနှင့် ပရဒတ်ကျေးရွာမှ ပြည်သူ ၁၀၀၀ ခန့်သည်လည်း ဘေးလွတ်ရာကို ထွက်ပြေးတိမ်းရှောင်နေရပြီး အနီးနားရှိ မယင်းကြီးကျေးရွာမှ ပြည်သူများလည်း စစ်ကြောင်းဝင်ရောက်လာမည်ကို စိုးရိမ်ထိတ်လန့်နေကြရကြောင်း သိရသည်။

ထို့ပြင် ထားဝယ်မြို့ပေါ်မှ ထွက်လာသော အင်အား ၁၂၀ ကျော်ပါ စစ်ကြောင်းကလည်း သရက်ချောင်းမြို့နယ်ဘက်ရှိ ကျေးရွာများကို စစ်ကြောင်းထိုးနေပြီး လက်ရှိချိန်တွင် ရှမ်းမတွင်းကျေးရွာဘက်သို့ ရောက်ရှိနေကြောင်း၊ အဆိုပါ အကြမ်းဖက် စစ်တပ် စစ်ကြောင်းသည် ဒရုန်းများဖြင့် ဗုံးကျဲတိုက်ခိုက်မှုများ ပြုလုပ်နေ၍ ရှမ်းမတွင်းကျေးရွာအပါအဝင် အနီးအနားကျေးရွာများမှ ရာနှင့်ချီသောပြည်သူများလည်း စစ်ဘေးတိမ်းရှောင်နေကြရကြောင်း သိရသည်။

“ထားဝယ်အထူးစီးပွားဇုန်မှာ တပ်စွဲထားတဲ့ စစ်ခွေးတွေက အင်အား ၁၂၀ ခန့်နဲ့ နဘူလယ်တိုက်နယ်ဘက်က လဲရှောင်ကျေးရွာဘက်ကို စစ်ကြောင်းထိုးလာတယ်။ အဲ့နားမှာရှိတဲ့ ရွာကြီး ၃ ရွာက ပြည်သူ ၁၀၀၀ ကျော်လောက်တော့ ထွက်ပြေးနေရပြီ မယင်းကြီးရယ်ကတော့ ဝေးတော့ မရှောင်ရသေးဘူး။ စစ်ခွေးတွေက ရွာထဲဝင်လာပြီဆို သောင်းကြမ်းတဲ့ကောင်တွေပဲဆိုတော့ သူတို့ကိုကြောက်နေရတော့ ပြည်သူတွေက ပြေးရမှာပဲ။ လောင်းလုံးမြို့နယ်ထဲ အင်အား ၁၂၀ နဲ့ပဲ ထိုးနေတဲ့ စစ်ကြောင်းက ကဒက်ကြီးရွာက နေအိမ် ၆ လုံးကို မီးရှို့သွားတယ်။ လက်နက်ကြီး လက်နက်ငယ်တွေ ပစ်ခတ်သံတွေတော့ကြားနေရတယ်။ ကဒက်ကြီးရွာကနေ အောက်ဘက်က ရွာတွေကို ထပ်ထိုးနေတယ်။ ထားဝယ်မြို့ပေါ်ကနေ သရက်ချောင်းမြို့နယ်ဘက်ကို အင်အား ၁၂၀ ကျော်နဲ့ ဒီနေ့လက်ရှိ စစ်ကြောင်းထိုးနေတာတွေရှိတယ်။ စစ်ကြောင်းက ရှမ်းမတွင်းရွာဘက်ကို ရောက်နေပြီ အဲ့စစ်ကြောင်းက ဒရုန်းနဲ့ ဗုံးကျဲတာတွေတော့ရှိတယ်” ဟု ဒေသပြည်သူတစ်ဦးက ပြောဆိုသည်။

ဓာတ်ပုံ – စစ်ကိုင်းတိုင်း အတွင်းရှိ ကျေးရွာတစ်ရွာကို စစ်တပ်က မီးရှို့ဖျက်ဆီးနေစဉ် (ပုံအဟောင်းဖြစ်သည်)

The post လောင်းလုံးတွင် စစ်တပ်က ကဒက်ကြီးရွာကို မီးရှို့ပြီး ကျေးရွာများကို ဆက်တိုက် စစ်ကြောင်းထိုးနေ၊ ထားဝယ်နှင့် သရက်ချောင်းတွင်လည်း စစ်ကြောင်းများ ဝင်ရောက်လာ၍ ရွာလုံးကျွတ် တိမ်းရှောင်နေရ appeared first on Khit Thit Media.