■ တပ်မ ၄၄ တပ်မှူး ဗိုလ်မှူးချုပ် အေးမင်းနောင် အလွန်အပြင်းအထန်ဒဏ်ရာရပြီး အခြားအဆင့် ၅ ဦးလည်း ဒဏ်ရာရ ထား
ရန်ကုန်၊ ဇန်နဝါရီ ၂၉
ကရင်ပြည်နယ်၊ မြ၀တီမြို့နယ်၊ သင်္ဃန်းညီနောင် ခမရ ၃၅၅ တပ်သို့ တပ်ချိန်းရန်လာသည့် စစ်ရဟတ်ယာဉ် ၂ စီးကို KNLA ဦးဆောင်သော တော်လှန်ရေးတပ်များက ၀ိုင်းဝန်းပစ်ခတ်ရာ ရဟတ်ယာဉ် တစ်စီး ထိမှန်ပျက်စီးပြီး တပ်မ ၄၄ တပ်မှူး ဗိုလ်မှူးချုပ် အေးမင်းအောင် အလွန်အပြင်းအထန်ဒဏ်ရာရရှိထားကြောင်း KNLA သတင်းရင်းမြစ်က ပြောဆိုသည်။
ယနေ့ ဇန်နဝါရီလ ၂၉ ရက်နေ့ မွန်းလွဲ ၂ နာရီ ကျော်အချိန် သင်္ဃန်းညီနောင် ခမရ ၃၅၅ တပ်ရင်းထဲသို့ တပ်ချိန်းရန် လာသည့် စစ်ရဟတ်ယာဉ် ၂ စီးကို KNLA တပ်များနှင့် တော်လှန်ရေးတပ်များက ၀ိုင်းဝန်း ပစ်ခတ်ခြင်းဖြစ်ကြောင်း၊ ရဟတ်ယာဉ် တစ်စီးမှာ ကျည်ထိမှန် ပျက်စီးသွားပြီ ခမရ ၃၅၅ တပ်ရင်းထဲတွင် ရပ်တန့်ထားကြောင်း၊ အခြားစစ်ရဟတ်ယာဉ်မှာမူ ပြန်လည် ထွက်ခွာသွားကြောင်း သိရှိရသည်။
အဆိုပါပစ်ခတ်မှုကြောင့် စစ်ရဟတ်ယာဉ်ပေါ်တွင် လိုက်ပါသော တပ်မ ၄၄ တပ်မမှူး ဗိုလ်မှူးချုပ်အေးမင်းနောင်မှာ ဒဏ်ရာ အပြင်းအထန်ဒဏ်ရာရရှိထားပြီး အခြားအဆင့် ၅ ဦးမှာလည်း ဒဏ်ရာ ပြင်းထန်ကြောင်း သိရှိရသည်။
“ရဟတ်ယာဉ် ၂ စီးလာတာကို ပွိုင့်ဖိုက်တွေရော ဒရုန်းတွေရော ဒုံးတွေရောနဲ့ ၀ိုင်းပစ်ကြတာ။ တစ်စီးက ကျည်ထိမှန်ပြီး အခုထက်ထိ တပ်ဝင်းထဲမှာ မပျံနိုင်တော့ဘူး ရပ်ထားတယ်။ တပ်မမှူးကတော့ ဒဏ်ရာ အတော်ပြင်းထန်တယ်။ သေနိုင်လောက်တယ်။ အခြား အဆင့် ၅ ဦးလည်းဒဏ်ရာရထားတယ်။ “ဟု KNLA သတင်းရင်းမြစ်က ပြောဆိုသည်။
ဓာတ်ပုံ- အကြမ်းဖက်စစ်တပ်၏ ထောက်ပို့ရဟတ်ယာဉ်တစ်စီး။ (ပုံအဟောင်း ဖြစ်ပါသည်။)
#နွေဦးတော်လှန်ရေး #yktnews #khitthitmedia #myanmarmedia #burmesemedia #foryou #foryoupage #NUG #springrevolution #KNLA
![](https://yktnews.com/wp-content/uploads/2024/01/424546978_742849774609298_2515646732020008436_n.jpg)